* لن يتماثل الهلال للشفاء من الهزائم إلا بعد ان تتعافى ضمائر الحكام في افريقيا .. * طالما ضمائر الحكام رخصية فإن الهلال سيظل بعيدا كل البعد عن البطولات .. * الغريبة زمان الحكام ممكن يظلموا الهلال في دور ال(32) وال(16) لان هذه الادوار لا تكون متلفزة .. * قناة الجزيرة تبدأ نقل المباريات من دور التمانية وانت ماشى .. * يعنى الجزيرة بتبدأ النقل بعد خروج المريخ من البطولة .. * تنقل الجزيرة مباريات الفرق الكبيرة في الادوار المتقدمة .. * بعد خروج (اطفال افريقيا) يبدأ نقل المباريات .. * الآن الحكام وصلت بهم قوة العين ان يظلموا الهلال في مباريات دور الثمانية المنقولة على قناة الجزيرة وتشاهدها كل افريقيا .. * في العادة الحكم الافريقي يشترط عدم نقل المباراة (عشان يتم الشغل) .. * ولكن الحكام حاليا بقوا ما شغالين بالتلفزة .. * متلفزة ولا ما متلفزة بقت ما بتشكل حاجة للحكام ديل .. * ومباراة الأزرق القادمة امام مازيمبي سيكون بطلها الاول والاخير هو الحكم .. * الحكم سيظلم الهلال امام مازيمبى حتى ولو تابع عيسى حياتو المباراة من على المقصورة .. * وهذا ما يتطلب الانتباه له منذ الان .. * وقبل هذا كله نقول : الله في .. * على صعيد آخر ستغادر غدا بعثة مريخ السودان إلى لواندا من اجل تمثيل السودان في بطولة سيكافا الدولية .. * المريخ يحمل لواء الكرة السودانية في هذا المحفل الكبير .. * كل افريقيا ستكون موجودة في لواندا لمتابعة سيكافا .. * وللمعلومية هذه هى سيكافا رقم اتنين في هذا العام .. * سيكافا بقت مرتين في السنة .. * مرة بيعملوها للمريخ في الخرطوم ومرة بيعملوها للمريخ خارج السودان .. * وسيكافا الاول والتانية المريخ يدعمها من تحت التربيزة .. * وفي النهاية لا يحقق الكأس .. * سيكافا شنو عليك الله ؟؟ * إنتو إشتقتوا للطيران شكلكم ؟؟ * ناس المريخ زمن ما ركبوا طيران عشان كده قرروا المشاركة في سيكافا من اجل (الطيارة) .. * عشان يركبوا طيارة قرروا المشاركة في البطولة .. * وغدا بأذن الله سيخرجبص المريخ الذى اشتراه جمال الوالى .. * البص غدا سيخرج من النادى لنقل اللاعبين إلى مطار الخرطوم الدولى .. * وآخر خروج للبص من النادى كان قبل السقوط امام كمبالا سيتى .. * بمناسبة كمبالا سيتي .. * قبل اربعة ايام قامت قناة قوون باعادة مباراة المريخ وكمبالا .. * المباراة التى طار فيها الحمام .. * أنا بحضر في الاعادة إتوقعت المريخ يتأهل .. * قلت يمكن في الاعادة يتأهلوا .. * لكن للاسف في الاعادة برضو طاروا !! * أول مرة في حياتي اشوف لي فريق بيطير في البث المباشر وبيطير في الاعادة .. * المفروض تطيروا في واحد من الاتنين يا المباشر ويا في الاعادة .. * هسه ح تطيروا .. * والله انا شايف لو كان سافرتو الكنغو وشجعتو مازيمبى امام الهلال احسن ليكم من سيكافا دى .. * الهلال بيستحى من سيكافا .. * بنخجل منها .. * بطولة بتاعت ناس رايح ليهم الدرب .. * قالوا في لاعبين في المريخ ما دايرين يسافروا للمشاركة في سيكافا .. * رافضين .. * أو تقدر تقول خجلانين .. * لكن المجلس يصر على المشاركة .. * جمال الوالى ده حياتو كلها قضاها سيكافات .. * يخرج من سيكافا يشارك في سيكافا .. * والله بدل عزو المفروض يكون اسمو جمال سيكا .. * جمال سيكا لقب يتماشى مع جمال الوالى .. * اكتر رئيس في تاريخ المريخ يشارك في سيكافا .. * 12 سنة مشاركات متواصلة في سيكافا .. * والمحصلة طيران شديد .. * بالمناسبة .. * تراورى ح يسافر معاكم ولا لسه حردان .. * مرتب تراورى يعادل مرتبات تمانية لاعبين في تشكيلة المريخ .. * تمانية لاعبين تراورى مرتبو اكتر منهم .. * عافى منك والله يا ولدنا .. * ولدنا ب(الخاء) .. * و..و.. * وبشكيك لرب الكون الفى العيون ابدع ..