* كلمة بسيطة وعادية جداً لكن استخدامها هذه الأيام يأتي بانزعاج في أوساط الرياضيين وخاصة الهلاليين * ما يتلاقو اتنين إلا الشليق فيهم بسأل التاني الناس ديل جديدهم شنو سجلو زول ؟ * ونحن الصحفيين الذين يعتبرنا الجمهور أعضاء في مجلس الإدارة في معرفة القرارات والخطوات والتسجيلات والشطب وبعتبرونا ناس شمارات وعارفين أي حاجة * تضج الهواتف طيلة اليوم وأول ماتفتح الخط يقول ليك محدثك من الجانب الآخر قائلاً: ( الجديد شنو )؟ * والجديد لا تعرفه حتى اللجنة الفنية الموجودة بالعاصمة الإمارتية دبي * والجديد ناس المجلس ماعافنو نحن نجيب الجديد من وين ؟ * والجديد أنو شركات الاتصالات الأيام دي بتكون رطبت اتصالات تقيلة بين ناس الكورة * أها الجديد شنو الناس ديل ماسجلو حاجة ؟ * وموضوع ناس عمر والمعز ومهند فيهو جديد ؟ * عمر صحي ماشي المريخ ؟ * قالو مهند رفض و الله عمل موقف كبير * لكن مفروض مايشطبوهم التلاته .. * كل هذه أسئلة تسأل دون أن نجيب عليها * ولا يستطيع أحد الإجابة عليها * في حاجات كدا ثابتة كل تسجيلات * يقولو ليك الهلال يفجر قنبلة التسجيلات * ( ...... ) يستعد لتفجير قنبلة التسجيلات خلال ساعات * والنقط المحل القوس دي معناها الكاردينال , البرير , الأرباب , الحاج عطا المنان الوالي مع تغيير كلمة الهلال بالمريخ * وتبقى التسجيلات عندي شخصياً موسم خسارات الجلابة وتوزيع الأحلام السنوية على الجمهور * وأتمنى أن يكون الموسم المقبل مختلف بس ما أظن .. * والجديد شنو برضو بتكون ملاحقة ناس المجلس * الأيام دي الصحفيين وناس مجلس الهلال أي زول شايل شاحنو في جيبو تتكلم وتشحن * و الله بقينا نخجل لما نقول لي الزول مافي جديد وكل ما يجينا تلفون بقينا نذكر قصة الزول الخطفو التمساح * ردودنا واحدة وناس عماد الطيب برضو ردودن واحده بقول ليك اصبرو بس * وقيامة التسجيلات السنة دي مصطلح خاص بعماد الطيب * قال قيامة التسجيلات حاتقوم يوم السبت والناس هسا منتظرة السبت لكن ياتو سبت مامعروف * واصبرو علينا عشان نصبر عليكم * يا ناس بالواضح كدا الجديد عند الكاردينال و.... * والكاردينال في لندن والباقي تمو خيال
