زول مستعجل شديد ..عليكم الله دى محترف وإلّا (جزار) البصل من اول جرس دا """"""""""""""""""""""""""""""""" يا علي جعفر – احسن اتخارج وشوف ليك (إعارة) – ناس الهلال الموسم الجديد دا لا بتصاقعوا ولا حاجة """""""""""""""""""""""""""""" طبعا أي دكتور جديد تمشي ليه عشان ما يقوم يدخل في الغلط – بقوم يكتب ليك (مضاد حيوي) """""""""""""""""""""""""""" قولوا الحقيقة – السودان دا ناقص (جوطة) عشان تجنسوا لينا أيمن سعيد """"""""""""""""""""""""""""" • محترف المريخ النيجيري (سالمون) عمل ليه حركة (بله جابر) ما بعملها. • سالمون وصل البلد قبل ما يرسلوا ليه (التذاكر). • زول مستعجل. • عليكم الله دي محترف وإلّا (جزار) البصل من اول جرس دا. • طبعا الجزار قبل ما تدق ليه بتلقاه قدام الباب. • قبل ما تجيب ليه الخروف – بتلقاه علقو في الباب. • وقبل ما يسخلو بتلقى الشية طلعت. • شغل نضيف. • عملية سالمون دي بله جابر ما بعملها. • بله جابر هسع ذنبو شنو؟. • لو ما انت عاوز ليك سبب ساكت. • مواصلات ما في. • ما بنقدر نقول حاجة في المواصلات. • ما بنقدر نقول كلمة. • نقوم نعمل شنو في الحالة دي؟. • نقوم نهاجم بله جابر..(مع حبتين بندول ومضاد حيوي). • طبعا اي دكتور جديد تمشي ليه عشان ما يقوم يدخل في الغلط – بقوم يكتب ليك (مضاد حيوي). • هسع المضاد الحيوي دا عاوز ليه (دكتور). • الواحد فيهم بقرأ (6) سنوات في كلية الطب. • وبملحق (14) مرة. • ويعيد اربع سنوات..لمن يبقى في كلية الطب اقدم من غفير المشرحة. • ووقت يتخرج يقوم يكتب ليك (مضاد حيوي). • عليكم الله هسع المضاد الحيوي دا عاوز التعب دا كلو. • والله عندنا (ممرض) مفتح في الحلة اقل حاجة برقدك اسبوع. • لو جاملك بكتب ليك (قزازة دم). • ممرض صعب – وما بتفاهم في الحاجات بتاعة الدم دي. • نقوم (انبثاقا) من الموضوع دا (من غير اي لجنة) نقوم نهاجم بله جابر. • ليه مواصلات مافي؟. • كلو من بله جابر. • انتوا فاكرين عدم المواصلات من شنو؟. • من بله جابر. • انتوا ساكت بتهاجموا في الحكومة – الحكومة ما عندها اي ذنب. • الحكومة تعمل ليكم شنو؟. • تبقى ليكم (امجاد). • الحكومة تتقطع ليكم. • تبقى ليكم (ركشات). • السبب بله. • اصلو الموضوع دا ما عاوز ليه (غلاط). • بله جابر لو بلعب كورتو – المواصلات ما بتبقى زحمة كدا – ولا الكمساري ما بقول للركاب ( ما راجعين). • ما راجعين – يعني ح تمشي وين؟. • بله جابر حكاية ما (راجعين) دي برضو عندو فيها دور – بكمل اللاين وما برجع. • من هنا جات حكاية (ما راجعين) عند الكماسره. • انتوا قايلنها طالعة من فراغ. • وقت نقول ليكم الموضوع عندو علاقة ب (بله جابر) بتقعدوا تغالطوا فينا. • وانا ما بكره في الدنيا دي حاجة اكتر من الغلاط والعدس. • العدس هسع الدخلو هنا – لو ما عاوز ليك سبب ساكت. • اللحمة سعرها يرتفع. • نقوم نزعل ونتنفخ ليك. • ونغضب في الدنيا دي جنس غضب. • الكيلو يبقى ب (80) جنيه تقول معاه وقية دهب. • الدخل بينا وبين اللحمة منو؟. • في زول لعب في الحتة دي. • الاسعار طارت. • لكن نحن عشان ناس ظراف. • عشان نحن شعب مثالي وبسمع الكلام – ما بنقول اي حاجة. • ما بنقدر نقول حاجة...(نقول شنو عاد؟). • لا بنقول حاجة في اللحمة. • ولا في الدهب. • نقوم نعمل شنو؟. • نقوم نهاجم (بله جابر). • كلو من بله جابر. • الحكومة ما عندها اي ذنب. • الحكومة تعمل ليكم شنو؟. • كمان عاوزين الحكومة تبقى ليكم (لحمة). • الفول دا مالو؟...عيبوه لي. • موية الفول دي ما سمحة – وطاعمة وخفيفة – (اللحمة تعملوا بيها شنو؟). • هاجموا بله جابر بس. • بله جابر لو بلعب كورتو – كيلو اللحمة ما بصل (80) جنيه – بلد ما فيها كورة. • لو فيها كورة – كيلو اللحمة بتاع الضان ما ببقى ب (80) جنيه – تقول معاه (كتلوج). • تقول معاه غرفة نوم. • الحاجات طارت. • انتوا وقت بتبعوه ب (80) جنيه ما توزعوا معاه حبوب ضغط. • اللحمة فكت. • ما في احترام ..(مجرد كدا بدون تفاصيل). • عشان ما تقعدوا تفسروا لي على كيفكم. • ولا في احترام للمعارضة. • هي المعارضة يحترموا ليها شنو؟. • المعارضة ما عندها اكتر من (وانطلاقا من هذا المبدأ). • ما شايفين لينا اي (مبدأ). • شابكننا هذا المبدأ وذاك المبدأ – ومن اجل المبدأ. • ولا مبدأ واحد. • كلامكم دا ما حصل قابلنا في حتة. • ولا صادفنا بالغلط. • هاجموا بله جابر – السبب بله جابر. • يعني بله جابر لو بلعب كورتو – المعارضة ما بتدهور كدا (اي كورة معكوسة بتدخل فيهم). • انتوا المعارضة دي ما تجنسوا ليها (توانسة). • جنسوا ليها (مغاربة). • مصريين. • اي حاجة...كورتهم دي بطلعهم لينا من (التمهيدي). • الكهربة تقطع...(في اثناء كلامي دا). • لو ما قطعت قولوا قطعت ..(عشان اكمل ليكم العمود من الواقع). • عشان ما تقولوا بتكلم ساكت. • الكهربة تقطع تقوم من نومك – تهاجم بله جابر. • من غير اي مبررات. • من غير اي مقدمات..تهاجم بله جابر. • كلو من بله. • بله جابر لو بلعب كورتو – الكهربة ما بتقطع. • انتوا فاكرنها قاطعة ساكت كدا من رأسها. • ما تعاينوا لي – الحكومة ما عندها اي ذنب في قطوعات الكهربة دي. • الحكومة جابت ليكم (شمع) – تعمل ليكم شنو تاني؟. • السبب بله جابر. • لكن اعتقد في مسألة ( قطوعات الكهربة) دي بالذات – موسى الزومة عندو دور مع بله جابر في قطوعات الكهربة. • بله جابر براهو ما بقطع ليه (كهربة). • يكون مشاركو موسى الزومة. • عشان كدا ما تعصروا على بله جابر شديد في موضوع الكهربة دي. • مع بله جابر – هاجموا موسى الزومة. • هاجموا بله وموسى. • عاد نقول شنو في الكهربة؟. • ناس الكهربة ما فيهم اي كلام. • الخلل من بله جابر وموسى. • شفتوا من يقولوا ليك في (عطل فني). • اعرف طوالي – ان بله جابر عندو علاقة بالعطل الفني دا. • ما في عطل فني بطلع من فراغ. • نحن لو ما قرينا بارينا الطلبة. • نحن عارفين اي شيء. • خلوها الكهربة. • لو عاوزين تهاجموا بله جابر بالجد. • انتظروا الخريف. • شوفوا الولاية بتعمل شنو؟. • ولا حاجة. • لا بحفروا ليهم خور. • ولا بردموا ليهم شارع. • ولا بفتحوا ليهم مصرف. • في الحالة دي تفتكروا مفروض تعملوا شنو؟. • مفروض تهاجموا بله جابر. • السبب بله جابر. • وضفر. • ضفر بكون عندو دور في الموضوع دا. • بلة جابر براهو ما بعمل كدا. • تلخبطوا الزول في عيونو. • تخلوا الواحد يدخل الشارع غلط. • يقوم يطلع. • برضو يطلع غلط. • هسع انتوا قايلين تأخر طيارات محترفين الهلال ديل من شنو؟. • انتوا تكونوا فاكرين ما في حجوزات. • او تكونوا فاكرين الطيارات فاتتهم. • او الوكلاء ما نجضوا شغلهم. • او ناس الهلال بتكلموا ساكت شغلهم ني. • ابدا – كل الحاجات دي ما حصلت. • السبب بله جابر. • اصلو تأخر الطيارات دي ما طالع من فراغ. • اصلو ما ساي. • كلو من بله جابر. • ما تهاجموا الكاردينال. • الكاردينال ما عندو اي ذنب. • هاجموا بله جابر. • وعشان بله جابر ما يشيل الليلة براهو – هاجموا معاه علي جعفر. • علي جعفر يتلفت براهو كدا تقول بقرأ في الجامعة الامريكية. • يا علي جعفر – احسن اتخارج وشوف ليك (اعارة) – ناس الهلال الموسم الجديد دا لا بتصاقعوا ولا حاجة. • ابقى خفيف واتخارج. • ان شاءالله تمشي هلال الابيض. • بي كورتك دي ما نشوفك تاني في البلد دي. • ........... • ملحوظة : علي جعفر – فاكر الكورة (نضمي). هوامش • ناس المريخ يجنسوا ايمن سعيد. • ويجسنوا سالمون. • ويتكلموا في تجنيس جمعة جينارو. • في حقارة اكتر من كدا. • بعدين عليكم الله..قولوا الحقيقة – السودان دا ناقص (جوطة) عشان تجنسوا لينا ايمن سعيد. • نحن ناقصين. • براكم بتفتشوا في المشاكل. • جبتوا لينا زول بتاع جوطة ساكت. • وجنستوه لينا. • المصري دا لو قعد سنة تاني في البلد دي بمشي (الدهب). • زولكم دا ح يقعد يشاركنا في اي حاجة. • وما بعيد يعمل ليه (ركشة) في جبرة. • كروز قالوا شهر يونيو. • العاوز يستناه ليكم منو يا الكاردينال. • الكاردينال ذاتو ضامن يقعد لي شهر يونيو. • ......... • عاجل : الخريف بي طريقتكم دي ح يغرق الخرطوم.
