* لا احد يستطيع ان يجزم بسر تسمية (المريخ) فالرواية المتوارثة جيلا بعد جيل والتي ركزها الاعلام المريخي في الاذهان تتحدث عن شابة صغيرة من شابات المسالمة هي شقيقة مؤسس نادي المسالمة (السيد عبد السيد المسيح فرح) اقترحت الاسم في زمن لم يكن اسم كوكب المريخ اصلا يتداول في الحياة السودانية ولا حتى في الاعلام السوداني على قلة الصحف التي كانت تصدر في ذلك الوقت ولدي قناعة بان اسم المريخ قد تحور من اسم آخر! ولكن هذا الامر يحتاج الى بحث كثير فقط أود ان أقول اليوم ان الاسم الى حد كبير اصبح يشبه المريخ بشكل عام حيث عجز العلماء حتى الآن عن كشف تفاصيل كوكب المريخ بينما عجز الخبراء عن تقديم أسباب منطقية لما يحدث في المريخ ! * فاجأ مجلس المريخ الجميع امس واتمنى ان لا يكون عددا كبيرا من اعضاء المجلس قد شملتهم مفاجأة الاختيارات الغريبة لشخصيات لا يمكن ان تجتمع مع بعضها الا اذا كانت هناك حرب عالمية ثالثة سيكون مسرحها الكوكب الاحمر ! * جاء غارزيتو نصير (اكانغا) ضد بكري المدينة في الموسم الذي اصبح فيه المدينة نجم تسجيلات المريخ ! * غارزيتو الذي شطب علاء الدين يوسف وقال انه لاعب مشاكل بعد ان ابعده عن التشكيلة الاساسية يدرب المريخ الذي يلعب فيه علاء اساسيا ! * أي تناقضات يضعها الوالي في فريقه في الموسم الجديد ! * المريخ يسجل المعز محجوب قبل ايام من اعلان التعاقد مع غارزيتو ؟؟ هل يمكن ان يكون شخص واحد هو الذي يفعل كل هذه المتناقضات ؟ هل يستطيع خبير رياضي ان يفسر تصرفات الوالي الذي سجل هيثم مصطفي وعلاء الدين يوسف واستعان بغارزيتو ! هل من الممكن ان تتعاقد مع مدرب يعتمد علي الشباب ويشرك محمد عبد الرحمن ويقول ان كرة القدم لا تعتمد على النجومية في موسم يعج فيه المريخ باللاعبين الكبار في السن والاسم بحكم تاريخهم ! * لماذا يريد الوالي ان يحرج الاعلام الرسمي الذي كتب ما كتب في غارزيتو؟ كيف سيدافع الاعلام الرسمي عن طريقة 343 التي سيلعب بها غارزيتو ام ان عقد غارزيتو قد حدد الطريقة من البداية ! بالمناسبة الزول ده (فقري) كربو معاهو العقد كويس .. اوعه من حكاية عقدين دي .. والله الخواجة ده مشهور ب(الفت ! اي كلام بقولوا .. ياخي ده قال ناس الوداد المغربي بشتروا الكور بمعرفتو .. عندو حوار عامل مشكلة لي هسة في المغرب ! اوعه تتكلموا قداموا يا صديق علي صالح باي اسرار تخص المريخ والكرة السودانية ؟؟ * ولو قال ليكم عايز اجيب ولدي قول ليهو كل شئ ولا ولدك ! وما يجيب ليكم مدرب لياقة واحسن حاجة خليتو محسن وبرهان معاهو ! لكن الجهاز الفني ده حيتكلم بي ياتو لغة ! والله يا محسن الا تتعلم فرنسي ؟؟ خالد بخيت قال لي نحن كنا شغالين بالاشارة ! ضحكت وقلت لي (هو في ناس في الدنيا بشتغلوا بالاشارة احسن من ناس المريخ !!!!!!!! * غارزيتو مرة واحدة ؟ والله بالغت يا والي .. ياخي لو مصر تحاكي الهلال كان ممكن تجيب النابي .. اهو على الاقل صاحب صديق علي صالح وسامر العمرابي ! * نحن قلنا الناس ما حتفرز كشف المريخ من الاهلي الخرطوم.. لكن واضح انو ناس قناة بي ان سبورت ما حيقدروا يفرزوا الهلال من المريخ ؟؟ بي ان سبورت شنو كمان يا خالد ؟؟ منو البصل لحدي ما بي ان سبورت تنقل مبارياتو .. تمهيدي .. متعودة دائما ! بي ان سبورت دي الا تعمل تقرير عن اقالة غارزيتو !! * غارزيتو وابوجريشة وعبد الصمد .. لا حوله .. حرب شديدة .. بالمناسبة غارزيتو عندو رأي بانو المدرب مفروض يكون شاب صغير .. ومدير الكرة ما يتدخل في الكورة .. ورئيس القطاع الرياضي يكون موظف بمرتب ! بختك يا عبد الصمد ! * الله .. نسيت اقول ليكم .. تراوري برضو عندو مشكلة مع غارزيتو .. قال غارزيتو جابو وشال قروشو .. والله جنس ضرب حيكون في الكوكب الاحمر .. ديل تاني الا يفرزوهم بالبصمة !!!!!! * الهلال جاب غارزيتو وسط اعتراضات البعض ومساندة اصحاب القرار ولكن بعد تجربة غارزيتو مع الهلال من الصعب جدا ان يتقبل احد عودته مرة اخري للسودان الا اذا كان الوالي يريد ان يعيش تجربته مع الهلال بتفاصيلها الدقيقة !! اوعه تكون عايز تتعاقد مع قاقارين ودكتور حسن علي عيسي .. والله انا خائف تجيب العسقلاني ! * واحد ثقيل قال .. المريخ اسهل نادي تعرف مدربو الجاي منو .. من هسة مدرب المريخ القادم يا النابي يا كامبوس !! * وبكره نكتب ليكم عن لاعب المريخ الجديد الشبيه بغارزيتو . نجم بلعباس هشام العقبي الذي خدع ناديه ليوقع في المريخ ! اوعه الفيفا !!!