محمد الطيب بالعربى الكسيح كترو من المترجمين بس !! * العادي هو ان تأكل (اللحم) وتجدع (العضم) .. * والما عادي هو ان تجدع (اللحم) وتأكل (العضم) .. * في ناس كده .. بيجدعوا اللحم وبيخلو العضم .. * عندهم غرام مع الحاجة دي .. * زمان ناس الحكومة في عيد الاضحى بيقولوا لينا : (اكلو اللحم وجلد الخروف ادوهو لناس الدفاع الشعبي) .. * يعنى ح نديهم اللحم ؟؟ * ما اكيد ح نديهم الجلد ونشيل اللحم .. * دي كمان دايرة ليها درس عصر ؟؟ * جمال الوالي هو واحد من الذين يحبون العضم .. * الوالي ده انا متأكد لو ضبح خروف بيشيل الجلد وبيقول للضباح شيل اللحمة .. * والحاجة دي ظاهره بشكل واضح في تسجيلات المريخ .. * الآن (تحت تحت) قالوا المريخ فاوض نصر الدين النابي .. * والنابي لما جاء الهلال كان (لحم) وهسه بقى عضم .. * والمريخ ماشاء الله تبارك الله ما قاعد يقصر في (عضام الهلال) .. * تاريخيا الجماعة ديل عندهم غرام مع اي (عضم يجدعو الهلال) .. * الغريبة بعد مرات الهلال بيجدع عضامو بعيد جدا لكن المريخ برضو بيمشي يجيبها .. * زي (شليل) .. نجدع العضم بعيد يقومو ناس المريخ بضوء القمر يفتشو ليك ويجيبو .. * متخصصين في العضام حقتنا .. * أنا بقول لكل زول هلالابي إنو يحافظ على عضمو .. * لو انت هلالابي ومشيت ليك (سماية) وضربت الضلع اوع تجدع العضم .. * ما تجدعو نهائي .. * ان شاء الله تشيلو معاك في جيبك .. * الدنيا ما معروفة .. * لو جدعت العضم قدامك متر كده بتلقى الجماعة شالو .. * المهم .. * واضح انو الكاردينال نفسه تأثر بهذه النظرية فأصبح من عشاق العضم .. * الهلال كان مليان (لحم) بس التسجيلات بدت كده الكاردينال خلى لينا الهلال (عضم ساكت) .. * خلى الهلال عريان .. * استغنى عن تلاتة وخطفو منه واحد .. * وبقى يتلفت .. * السنة دي يا الكاردينال حارسنا الله .. * حارس الجبل الاسود ده بطيخة مقفولة .. * ممكن ينجح وممكن ما ينجح .. * ممكن الجو ينفع معاهو وممكن الجو ما ينفع معاهو .. * وبعيدين الحارس ده داير مترجم .. * لأنو مدرب الحراس سوداني على ما يبدو .. * والهلال السنة الجاية دي بيكون محتاج ليهو لاربعة مترجمين .. * الحارس داير مترجم والبرازيلي داير مترجم والمدرب البلجيكى داير مترجم .. * والجمهور ذاتو عشان يعرف الهلال داير مترجم .. * عليك الله في زول بيجيب ليهو حارس من بلجيكا ؟؟ * ده شنو التخبط ده ؟؟ * حارس كان بيلعب في قبرص ولما يجي يدخل المقبرة دي داير ليهو سنتين عشان يعرف الهلال شايت على وين .. * في حاجة اهم من ده كلو .. * التسجيلات قربت تنتهي .. * والهلال سجل بوتاكو وفيصل موسى فقط .. * والكاردينال الذي هو (مضيف طيران) اكتر من كونه رئيس الهلال ما فاضي لينا .. * شغال من طيارة لطيارة .. * والتسجيلات ح تنتهي بالطريقة دي والهلال لن يسجل .. * لا ح يجيب حارس ولا ح يجيب مهاجم .. * هسه افرض إنو حارس الجبل الاسود ده طلع مصاب .. * افرض انو عملتو ليهو الكشف وطلع مصاب يا عماد الطيب .. * تاني ح ننتظر اسبوعين عشان ترشحو حارس جديد وبعد داك نبقى في التأشيرة والحجز والطيران .. * الني للنار .. * والكاردينال ده ما تسكتو ليهو .. * كفاية سكات .. * بنديك مهلة لحدى يوم الاتنين يا جبت محترفنك ديل يا كمان اخطانا .. * ننتظرك كده لما متين يعني ؟؟ * لاعبين وطنيين ما قادر تسجلهم ومحترفين ما قادر تجيبهم .. * الجابرك شنو على الكرسي ده .. * الكاردينال ده كلموهو وقولو ليهو موضوع التسجيلات ما فيهو كضب ولا فيهو رشاقة .. * دى فترة مرتبطة بزمن معين .. * ما بتستحمل الرشاقة البيعمل فيها الكاردينال ده .. * ده ما وكت رشاقة يا شاعر العواطف .. * انا شايف الهلال لو وفق اوضاع جمعة احسن .. * جمعة ده ما تفكو .. * حارس الجبل الاسود بيجى وما بيقدر يلعب في السودان .. * والموضوع ده ما لعب .. * احسن تشوفو حل لجمعة .. * والوقت سيف .. * والمحترفين الجايين ديل كلهم ما فى زول شفناهو جاري في الملعب .. * يعنى عادى ممكن يجى محترف نلقاهو مصاب .. * والمحترف البيكون مصاب من اول التسجيلات ما زي المحترف البتكتشف اصابتو في اليوم الاخير من التسجيلات .. * الاسبوع ده لو انتهى الهلال بيكون امام الامر الواقع .. * لو جاب محترف مصاب ح يسجلو لانو الزمن ضيق .. * وانا بقول لسه الكاردينال في البر .. * عندك اسبوع وبعد الاسبوع قصتك بايظة جدا .. * ما تركز لينا على الدفاع وحراسة المرمى وتهمل الهجوم .. * كاريكا الموسم الفات كان (مواطن ساكت) .. * ما قدم اي حاجة .. * كاريكا كان شايلو بكري .. * وبكري مشى ولذلك لازم نتعاقد مع مهاجم افضل من بكري .. * ونرجو ان يدخل كاريكا الموسم الجديد بشكل مختلف .. * كاريكا لو خلى تقليد كريستيانو ما عندو عوجة .. * و..و.. * وليك مدة ما بنت …(دخلوك غرفة التسجيلات ولا شنو) ؟؟