يا هلالاب ولا يهمكم لو لعبتوا في (التمهيدي) - المريخ (تمهيدي) تربيع..الأرضة جربت الحجر نحن ما نجرب التمهيدي """""""""""""""""""""""""""""""" هسع عليكم الله يا جماعة (البدل) السافر بيها الهلال إلى الإمارات – دي بدل تمهيدي """""""""""""""""""""""""""""""""""""""" زي الزول (المغترب) وقت ينزل البلد – يلموا فيه (عزومات) لمن يبقى زي البرميل...يتنفخ زي شوال التبن """""""""""""""""""""""""""""""""""""" عزومة لي عصام الحضري تلعبوا مع (عزام) في سيكافا ..عزومة لي بكري المدينة تلعبوا مع (عزام) في التمهيدي """""""""""""""""""""""""""""""""""""" • أصلو ما في حاجة ساكت. • زمان نحن بنقول ليكم الكلام دا. • أنتوا تشيلوا وتغالطوا فينا. • إذا كان الضحك بدون سبب (قلة أدب) – الغلاط بدون سبب بكون شنو؟. • ديل (الضحك) اعتبروه (قلة أدب). • ما عاوزين الناس يضحكوا. • على كدا يعني الضحك يدخل في دائرة اختصاص شرطة (النظام العام). • وممكن عادي جداً تلقى ليك زول مقبوض في قضية آداب...تقول ليه مالك يا زول؟. • يقول ليك كنت بضحك بدون سبب...(موش قلتوا الضحك بدون سبب قلة أدب). • أنتوا بتتكلموا ساكت. • المشكلة ما في سبب بيضحك. • أسباب الضحك انعدمت. • بح. • مافي – يعملوا ليكم شنو؟. • عشان كدا الناس بتضحك بدون سبب. • لا في مسارح. • ولا في إذاعة. • ولا تلفزيون. • ولا نكات جديدة. • ولا عروض. • يجيبوا ليكم الأسباب من وين؟. • عندي ليكم فكرة. • أصلو الصينين ديل دخلوا في أي حاجة. • أي حاجة تهبشها تلقاها صينية. • رأيكم شنو تستوردوا ليكم نكات صينية؟. • البلد دي ما فيها نكات. • استوردوا ليكم نكات من الصين. • بعد كدا يعني ممكن تلقى ليك واحد بجمع ايديه وبيجيبهم قدام وشو..ويتحني ليك كدا ويقوم تاني..تقول ليه يا زول مالك؟. • يقول ليك بضحك لي في نكتة صينية. • الضحك الصيني كدا. • برضو أحسن من الضحك بدون سبب. • قالوا ليك واحد من أهلنا الصعبين – النوع الما بتفاهمو ديك. • ملاح القرع عندهم زي (شية الجمر). • أصلو ما عندهم فوقو كلمة. • ينسفوا ليك ملاح القرع في لمحة – جب جلب...الموضوع انتهى. • الزول الصعب دا قالوا ليك عندو سبع بنات. • البنات السبعة ماشاء الله وقت يقومن الصباح تقول في طابور مدرسة ثانوية للبنات. • أبوهن يعاين ليهن كدا ويقول ليهن عليكن الله هسع لو مشيتن وقفتن في صف طابونة ..الرغيف الفي الطابونة ما بقطع ..(أنا أجيب ليكم من وين؟). • سبعة بنات (سيد اللبن) لو دق الباب ساكت – السبعة يجرن على الباب. • صاحبكم مع البنات السبعة ديل ...زوجتو حامل. • زول صعب ما بتفاهم. • الفول عندو زي الكوارع بكفكف ليه ايدو للكوع. • صاحبكم زوجتو قالت ليه أنا حامل يا أبو الرجال. • أبو الرجال عاين ليك كدا لي بناتو السبعة وقال لي مرتو – اسمعي لو جبتي (البنت) التامنة تمشي بيت أبوك طوالي. • السماية تعمليها عند أهلك. • ولا تنتظريني هنا. • ولا بجامل في حاجة زي دي. • قال ليها بالصوت العالي أوعك تجيبي لي (بنت). • المرا من الخوف وقت بقت على الولادة جابت ليها (تريس). • تعمل شنو؟. • الراجل ما نصيح وما عندو رأس – عليكم الله البنات مالهن لو ما ساكت. • أنتوا ساكت بتشيلوا حال الناس. • وتصنقعوا في المراوح. • الحكاية الصعبة الما بتتبلع لينا غير (الحركات) البنعمل ليكم فيها دي – الهلال ح يلعب في التمهيدي. • يبقى فرقكم شنو من المريخ؟. • يعني (التمهيداب) دي نقول لي منو؟. • ما مشكلة كمان نحن بنتحير. • ولا يهمكم يا هلالاب ...المريخ (تمهيدي) تربيع. • يعني شنو لو لعبتوا مرة (تمهيدي). • الأرضة جربت الحجر. • جربوا (التمهيدي) دا مرة كدا – عشان تشوفوا ناس المريخ ديل بتعذبوا قدر شنو؟. • بالله (التمهيدي) دا بتستحملوه كيف؟. • نحن مرة واحدة كنا عاوزين نموت. • جاتنا نفسيات. • جابوا لينا العشا (فطير بي لبن) ..قعدنا نبلع في الفطير زي حبوب الملاريا. • أنتوا ذاتو البخليكم تتعشوا شنو؟..وأنتوا ح تلعبوا (تمهيدي). • نحن لو ما أخوانا المريخاب ديل. • ولو ما عاوزين نعمل نفسيات لي سلك ...كان فرشنا عديل كدا. • لكن كمان بكون ما صاح مننا. • نفرش على التمهيدي – المريخاب شعورهم ببقى شنو وهم عمرهم كلو بيلعبوا في (التمهيدي). • الحكاية دي فيها لعبة. • في ايد غريبة دخلت في الموضوع دا. • ما معقول الهلال بلعب في المجموعات يجي يلعب (تمهيدي). • نقاطنا حقت المجموعات الشالها منو؟. • راحت وين؟. • عاوزين نعرف بس. • نحن قبل 72 ساعة قابضين من الاتحاد الافريقي (200) ألف دولار. • تجوا بعد الدولارات دي تلعبونا في (التمهيدي). • أنتوا ما عندكم تقدير. • ما عندكم إحساس. • والله أنا ما شفت (البص) بتاع الهلال قلت الله يستر من التمهيدي. • هسع عليكم الله يا جماعة (البدل) السافر بيها الهلال إلى الإمارات – دي بدل تمهيدي. • كمان الزول الما بشوف من الغربال يبقى أعمى. • لكن يا جماعة المنطق بقول كدا؟. • المنطق بقول شنو؟. • مالك عاوز تدخل لينا (المنطق) في التمهيدي. • التمهيدي دا اصلو ما فيه (منطق). • يا جماعة هسع عليكم الله لمن تكون في البيت وعندك أخوك الصغيّر بقرأ في (التمهيدي) موش أبوك بقول ليك امشي وديه (الروضة). • وامشي جيبوا من (التمهيدي). • وامشي قطعوا الزلط. • هسع نحن المريخاب ديل ح نمشي معاهم (التمهيدي)..نوصلهم ونجي راجعين. • بنخليهم في (التمهيدي) حقهم قبلهم. • بنقطعهم الزلط. • لكن تاني لو في (قندران) زي كمبالا سيتي هرسهم ما عندنا معاهم قضية. • لو في قطر قطعهم زي (عزام) بي طريقتهم. • عجبنا ليكم. • عزام الشال ولدكم (باسكال). • عزام القابلتوه في سيكافا. • سنتكم كلها عزام. • عزام في سيكافا. • وعزام في التمهيدي. • دي شنو (العزومات) الكتيرة دي؟. • زي الزول (المغترب) وقت ينزل البلد – يلموا فيه (عزومات) لمن يبقى زي البرميل...يتنفخ زي شوال التبن. • لكن تستاهلو. • عشان حركاتكم دي ح تلعبوا مع (عزام). • عصام الحضري مرة عملوا ليه (عزومة) عيد ميلاد. • عادل أبوجريشة مشى وسط البلد جاب ليه (تورتة) وعملوا عزومة لعصام الحضري. • السنة دي عادل أبوجريشة عمل نفس الشيء. • عارفنو عمل شنو؟. • عملوا (عزومة) لي بكري المدينة بالقلع عبدالحفيظ. • عزومة تاني. • شفتوا عشان عزوماتكم دي ح تلعبوا مع (عزام). • أنتوا قايلين الحاجات دي ماشه ساكت. • الحاجات دي مرتبة. • الجاحات دي مسطرة. • الحاجات دي في تناسق بينها. • في ترتيب. • في نظام. • فاكرنها ماشه ساكت. • الموضوع دا نحن قاصدنو. • عزومة لي عصام الحضري تلعبوا مع (عزام) في سيكافا. • عزومة لي بكري المدينة تلعبوا مع (عزام) في التمهيدي. • بس إن شاء الله (الكروت) تكون وصلتكم. • أي عزومة بي ناسها. • يعني عزومة العرس ما زي عزومة السماية. • وعزومة السماية ما زي عزومة النجاح. • وعزومة النجاح ما زي عزومة الزول المسافر بره البلد. • في الحلة بتلقى ليك زول بتاع بتشالق ...زول (عزام) كدا ..قدر ما يلقى ليه زول يقول ليه تعال اتغدى معاي. • زول (عزام) خالص. • أها الزول دا شبك المرة دي في (المريخ). • بقى في أي بطولة يلاقيهم. • ديل البطولة البنظموها براهم ..بلقوا فيها (عزام) دا. • المشكلة ما في التمهيدي – المشكلة في (عزام) دا. • السنة دي خليكم عارفين – لو طلعتوا من التمهيدي ما في سيكافا. • عارفين ليه؟. • عشان (عزام) بكون بيلعب في البطولة الافريقية للأندية يعني ما فاضي ليكم. • سيكافا السنة دي إلّا تعملوها بي مريخ الفاشر والأهلي الخرطوم. • ما في ليها اكتر من كدا. • ..... • ملحوظة : عملوا تورتة للحضري وحفلة لبكري المدينة وقعوا مع (عزام) ..دي (قرعة) وإلّا دعوة؟. هوامش • عشان تبقوا عارفين – نحن فريقنا المعسكر في الإمارات ما بنلعب بيه في التمهيدي. • التمهيدي بنلعبوا بالرديف. • وندخل ناس بشه وكاريكا بعد دور ال (64). • معقولة نلعب في دور ال (64). • ليه – نحن ما عندنا (بص). • نحن ما عندنا (بدل). • الاتحاد الافريقي دا أكيد ما عندو رأس. • لو عندو رأس ما بعمل كدا. • ناس المريخ لو طلعوا من (عزام) ح يلاقيهم (الترجي). • يعني أحسن تطلعوا من (التمهيدي). • وتركزوا في الدورة التنشيطية. • البطولات الكبيرة دي لا بتقدروا عليها ولا حاجة. • بعدين غارزيتو ذاتو ما عندو قدرة لتلتلة دي. • معقولة عاوزنو يبدأ معاكم من دور ال (64). • ليه ؟..واقع ليه من قطر. • ......... • عاجل : قالوا ناس عزام (ضبحوا) وقت عرفوا أنهم ح يلعبوا مع (المريخ).
