ما تبقوا زي (النسيب) وقت يسجل زيارة لاهل العريس...اي (شافع) يقابلو يحقق معاه اي زول وقت يشغل التلفزيون – يقول ليك هو الفيلم دا ما فيه غير (اللقطة) دي الصينية كلها تقوم ليك في الشافع – زي المحلية – تقول ليه تجيب لينا الشطة والليمون بعد ما قمنا ما تقعدوا تنكروا الموضوع ساكت..وتعملوا فيها (مثقفين)...الموضوع ما عندو علاقة بالثقافة * في الديجتال في اكتر من (1200) قناة. * غير تلفزيون السودان القومي ...(ما قاعدين نحسبو). * (341) قناة بتكون طاشه. * مرصوصات (تعب) بس. * زي (الدكاكين) الما فيها (طحنية). * عطلة ما اكتر. * في (859) قناة ممكن تلقي في ال (800) قناة فيلم شغال. * كل (15) يوم تلقى الفيلم دا شغال في قناة. * حايم – حوامة (بشه) بس. * تغيب ..وتسافر وتخلي التلفزيون سنة ونص. * ترجع يقابلك نفس (الفيلم). * القصة ما في الفيلم. * القصة في انك قدر ما تكون حايم بالريموت كنترول وتصادف هذا الفيلم – بتصادف الفيلم في نفس (اللقطة) التى تجده عليه على الدوام. * زي الزول البقابلك الصباح قدام الطابونة. * من زمن ازمة الرغيف – الزول دا واقف في حتتو دي. * اتعود على الازمة. * لقطة معينة في الفيلم ...قدر ما تصادف هذا الفيلم تصادفك. * الموضوع دا قلتو ليكم. * لكن انسوه الان. * الحكاية دي بتحصل لي – وبتحصل ليكم انتوا – واي زول بشكي منها. * مشكلة عامة في البلد. * البلد كلها بتعاني من مشكلة (الغاز) دي. * غاز شنو؟. * اقصد مشكلة الفيلم. * اي زول وقت يشغل التلفزيون – يقول ليك هو الفيلم دا ما فيه غير (اللقطة) دي. * زي كأنو (السادات) ما اقتيل في المنصة. * علاقة دا بي دا شنو؟. * ما تسألوني. * ما تبقوا زي (النسيب) وقت يسجل زيارة لاهل العريس...اي شافع يقابلو يحقق معاه. * يسألو جنس اسئلة. * ما يخلي ليه حاجة (عاوز يعرف اي شيء عن العريس). * تغيب وتجي. * وترجع. * وتلقى الفيلم في نفس الحتة. * نفس اللقطة. * الناس بتشابهوا في الحتة دي. * اي زول في فترة من الفترات بكون عندو بنطلون جينز واحد. * بكون البنطلون دا عزيز عليه شديد. * ما بحب في الدنيا دي شيء قدر بنطلون الجينز دا. * وقت يقشر بيه ويطلع ..اكيد عندو (كتلة) في حتة. * ما بسأل في اي زول. * اي زول عندو الحتة دي. * حتة عزة بنطلون الجينز. * السنة كلها بتكون لابسو. * تقرأ بيه الجامعة. * وتتخرج بيه. * ترجع لي صورك القديمة – بتلقى (الجينز) ذاتو الما بيغباني. * جينز عندو معزة خاصة. * الناس في السودان كلهم شركاء في هذا الجينز. * متل كتاب (الجغرافيا). * تكون قريت فيه انت. * وقرأ فيه ود خالتك. * واخوك الكبير. * وكل واحد يصرفو ليه الكتاب دا – بكون كتب فيه (ذكرى) وانتقل الى الفصل الآخر. * ثم انتقل الى مرحلة اخرى. * هسع حكاية (الجينز) العزيز دا اختفى. * ولاد الزمن دا ما عندهم (جينز) عزيز عليهم. * ولا في كتاب جغرافيا .. بكون اهلك كلهم بقرأوا فيه. * الحاجات دي راحت وين؟. * اختفت ليه؟. * والناس بتشابهوا. * حاجاتنا كلها واحد. * ما في اي اختلاف. * انبوبة الغاز عندنا بتقطع مع ابنوبة غازهم. * شعورهم واحد. * احساسهم كدا. * يا ربي دي محبة زايدة. * وإلّا ترجمة حرفية لبيت الشعر العربي التليد (واحبها وتحبني ويحب ناقتها بعيري). * بعير متعولم. * خلوها انبوبة الغاز. * تتخيلوا وقت نكون عاملين (قراصة) هم نفس الشيء بكونوا عاملين (قراصة). * قراصتنا واحدة. * الموضوع دا بحصل لي اي زول. * في شبه في قطعة انبوبة الغاز. * وفي شبه في (القراصة). * وفي شبه في (الشافع) البيجيك جاري بعد ما الناس يكونوا قاموا من الصينية يجيك شايل (الملاحة) وليمونة في ايدو. * الصينية كلها تقوم ليك في الشافع دا – زي المحلية – تقول ليه تجيب لينا الشطة والليمون بعد ما قمنا. * تقول قاموا عمره. * مروحة الصالون في اي بيت ..بتعمل (صوت). * وفي اي حتة ..صاحب البيت بكون عندو فكرة يجيب ليه (فني) يشوف صوت المروحة دا طالع من وين؟. * لكن لمن المروحة تتعطل وتقيف ما بتجيب ليك زول عشان يشوف الصوت طالع من وين؟. * اي ناس عندهم الحركة دي. * عندهم مشكلة في المروحة. * وعندهم (صهينة) عامة – من الصوت. * الناس بتشابه في (مراوحهم). * نفس الشيء. * قدام اي بيت ..في اي شارع رئيسي ...بتلقى ليك فيه (كلب) قاعد. * وماسورة مكسورة. * يمكن الكلب يكون مافي. * لكن كسرة الماسورة ثابتة في اي شارع. * اي ناس عندهم المشكلة دي. * وعايشين في الازمة دي. * نحن بنتشابه. * بنتشابه في اي حاجة. * مشاكلنا دي زي كأنها مكررة في اي حتة. * نفس المشاكل. * نفس الازمات. * مع ذلك – ومع تكرر هذه المشاكل وتشابه الازمات ..ما قادرين نحلها. * طيب نحن لو كان في كل حارة او في كل فترة ...بتظهر لينا مشكلة جديدة – كنا ح نعمل شنو؟. * بنصرف كيف؟. * مشاكلنا المعيودة دي من زمن الاستقلال ما قادرين نلقى ليها حل. * يعني يجيبوا ليكم (الانجليز) يحلوها ليكم ويرجعوا. * في اي حارة. * في اي حلة..بتمشي (الطابونة) عشان تجيب ليك رغيف. * بتمشي المخبز يعني. * اي زول بمشي (الفرن) بلقى الزول البيبع رغيف ما فيش. * تفيق ربع ساعة كاملة ..بعد داك بيظهر ليك الزول البيبع الرغيف من جوة. * ليه الحكاية دي بتحصل في فرن. * الموضوع دا قلتوا ليكم. * لكن الحكومة الي الان ما قادرة تشوف لينا (حل) لحكاية الفراني البدخل جوة وما بطلع. * صوتك يروح ..وانت بتكورك ليه. * مرات تزهج ..تقوم تشيل ليك (ِكسرة) من جوار الفرن ..وتقول في نفسك ...الرغيف ذاتو خليتو. * ليه الفرانه بعملوا كدا. * الفرانه خلوهم. * ليه وقت تقعد في الشارع...الشارع العديل دا عشان تشرب ليك شاي..وتشرب شاي فعلا. * وتقوم عشان تحاسب ..بتلقى ست الشاي مافي. * تنتظرها ساعة عشان تحاسبها. * ليه ستات الشاي بتشابهن كدا. * الشبه دا شنو؟. * الناس بتشابهوا. * اي واحد فيكم – عندو مرحلة (قرّيض) للرغيف. * ما تقعدوا تنكروا الموضوع ساكت..وتعملوا فيها (مثقفين)...الموضوع ما عندو علاقة بالثقافة. * لو فيكم زول ما عبر بالمرحلة دي ..بكون عندو حاجة ناقصة. * لازم ..قبل الغدا ..تحس بي (جوعة) كدا. * تقوم بدون ما تشعر تسلل وتدخل على (المطبخ). * تقرّض ليك (رغيفة) وتعمل كما كنت. * العسكرية تصرف. * لازم تصرف. * الموضوع دا ما فيه حاجة. * ما تتعقدوا منو ساكت. * عادي. * الناس بتشابه. * كلهم كدا. * اثبت ليكم – اننا كلنا واحد. * كلنا سودانيين. * وقت يجيبو في الراديو اغنية لمحمد وردي وهو بغني في (لو بالصد ابيتني)...ليه الزول بدون ما يحس بلقى نفسو مشى على الراديو ورفع الصوت؟. * ليه بتتكيف شديد وتنبسط. * وتنطط عيونك ..وتعيش في شعور تانيه. * وتشعر انك المقصود بالاغنية دي. * معقولة وردي قصد الشعب السوداني دا كلو. * ليه وقت الهلال يكون لاعب مباراة..ان شاءالله مع (التعاون)...ليه بتمشي تقيف في الشارع. * وتقعد تعاين للساعة. * ليه بتخاف من التلفون. * الناس كلها (هلالاب). * الناس كلها بتشابه. * الناس كلها واحد. * نحن كدا. * صلّحوا الفطور. * الله لو لقينا لينا علبة (تونة) قلبناها في الفول. * لا التونة مع الفول ..بتشيل طعم الفول. * ما تشيلو لو شالتو..وهو نحن عاوزين من التونة شنو اكتر من انها تشيل طعم الفول. * الفول من طعمو ..عشان نحافظ على الطعم. * وهو المطلوب. * ليه – كلنا بتحصل عندنا التفاصيل دي قبل الفطور. * وليه واحد من المجموعة بقول الليلة انا ما عاوز فطور. * يرفض يطلع مع الجماعة. * يا زول انت مالك؟. * اصلك ما طبيعي؟. * الليلة انت ما براك؟. * الناس بتشابه. * كلنا سُمر. * وعيون عسلية. * وما صارفين كمان. * كلهم كدا. * بنشابه. * عاوزين لينا (باسطة). * الليلة في رغبة جماعية للباسطة. * نحن شركاء في الحاجات دي. * في مشوار العصاري...ولمة الاماسي...وحنية الخالات ..وحكمة العمات...والعم الصعب ما بقبل الخمج. * كلنا عندنا الحاجات دي. * وكلنا لمن تبدأ السهرة في التلفزيون ..بنقعد ننظر. * ما في حاجة عاجبانا. * امشي لمدرستك التى درست فيها. * امشي اي (صهريج) كنت زمان بتلعب تحتو...ح تلقى في (تذكار) منك. * زمن. * اقول ليكم حاجة...ما تضيعوا زمنكم ساكت. * الحفلة بدأت. * ....... * ملحوظة : طبعا مباراة الهلال مع التعاون ما شغال بيها كتير. هوامش * تعاون شنو؟. * نحن عاوزين نصرف لينا سكر. * انتوا الاندية دي بتجيبوها من وين؟. * اول مرة نسمع بيها. * الهلال بقى يغلب واحد بس في اي مباراة. * انتوا المدرب البلجيكي دا ما صرف. * الشغل دا شغل زول ما صارف. * البرد دا قربو يصرفوا لينا معاه (لوح تلج). * يا ناس الهلال يقولوا ليكم الكلام مية مرة. * ناس المريخ ديل ما بستحقوا اكتر من (الرديف). * الرديف بيجيهم ليكم. * ولا تتعبوا. * ولا عاوزين ليهم معسكر في الامارات. * من بوتسودان بنجيب خبرهم. * ...... * عاجل : برهان مسكين ..قالوا سأل مباراة المريخ وشالكا في ياتو قناة؟.
