زي الزول البرسلوه عشان يجيب ليه (زيادة) من جوة ..الناس كلها تقعد تفكر في (الضلع) زولكم يجيكم بعد ساعة ونص شايل ليه صحن (قرع) تفتكروا ناس (كيبي) ابو رويس دا يكون قاصدها ..و الله اصلو ما بعيدة منو.. الزول دا من شفتو في التسخينة قلت الزول دا عاوز يعيد شريط عزام * عارفكم ح تفهموني غلط. * وح تقعدوا تفسروا براكم. * وتشيلوا وتحللوا. * اصلو البلد كلها بقت (تحلل). * التحلل اجازوه عديل كدا. * ح تقولوا الزول دا قاصد شنو؟. * تفكيركم ح يمشي بعيد. * تفكيركم كعب. * زي الزول البرسلوه عشان يجيب ليه (زيادة) من جوة ..الناس كلها تفكر في (الضلع) زولكم يجيكم بعد ساعة ونص شايل ليه صحن (قرع). * نحن (القرع) غبيانين منو. * ارفكم انا. * شايفكم ..عاملين عيونكم المُتلبة برة وشيّكم دي. * ح تخلوا (اتنين) الهلال التى حققها الهلال في ام درمان ..قدام عيونكم ديل..وتمشوا تقولوا الزول دا قاصد (اتنين) عزام. * وانا ما عندي اي قضية بي اتنين عزام. * مالي ومالها انا. * اصلا انا ما عارف نتيجة مباراة المريخ انتهت كم؟. * ولا سمعت بي الخبر. * ولا جابوا لي رسالة. * ولا في زول حدثنا. * اتنين عزام انا مالي ومالها؟. * عندي فيها (مقصورة). * عندي فيها (سور). * عندي فيها (قلاب طوب). * دا شنو عدم الوطنية دي؟. * الواحد يغلب هنا في ام درمان (اتنين) ويجري ليكم جري على اتنين (عزام). * انتوا عزام مالكم امالو؟. * بتعرفوه. * عندكم معاه تؤامة. * عزام شنو؟. * لو سمحت (عزام) دا طلعو من العمود دا. * يا احمد الحاج ..العمود دا لو جاكم فيه (عزام) طلعوه. * خلوه كلو (كي ام كي). * انا عاوز اتحدث عن (اتنين) الهلال. * مالها (اتنين) الهلال عيبوها لي. * لكن احسن الواحد يوضح ليكم ..عشان ما تلخبطوا. * الوضوح ما كعب. * يعني لمن اقول (اتنين) ..انتوا تكونوا عارفين انا ما قاصد اتنين (عزام). * انا قاصد (الاتنين) حقتنا دي. * نحن برضو غلبنا (اتنين) البخلينا نتشيك في (اتنين) عزام شنو؟. * نحن ناقصين (اتنين). * الحمدلله ..نحن بي (اتنينا). * نحن ذاتو عندنا (اتنين). * والليلة ذاتو يوم (الاتنين). * نظام و الله. * علم. * فهم. * لكن الغريبة ..في شبه غريب. * يخلق من الشبه (اتينن). * ما عاوز اقول (اربعين) مالكم انتوا؟. * شبه مبالغ فيه...بين اتنين عزام واتنين الهلال. * اتنين الهلال. * قون في الشوط الاول. * وقون في الشوط الثاني. * عارفكم. * شايفكم. * وسامع بيكم. * ح تقولوا الزول دا قاصدها. * عزام عمل نفس الشيء. * جاب قون في الشوط الاول. * وقون في الشوط التاني. * انا ما عندي قضية بي (اتنين) عزام. * مية مرة اقول ليكم يا جماعة انا بتكلم عن اتنين الهلال. * لو حصل تطابق يبقى دي ما مسؤوليتي. * عاوزين تقنعوني ان الحكاية دي (صدفة). * وانها (صادفت) ساكت. * وانها صدقت. * وجات كدا. * ب الله. * عشان تعرفوا وتبقوا عارفين ..مع (الواتس آب) دا ما في (صدفة). * ما تشيلوا لينا (صدفتكم) دي وتحوموا لينا في شارع النيل. * ما القى لي واحد حايم ليه بي (صدفة). * اوعك!!. * نحن نعمل شنو؟. * نتقطع..اذا عزام جاب هدف في الشوط الاول. * والهلال عمل نفس الشيء. * وعزام جاب الهدف التاني في الشوط التاني. * والهلال عمل نفس الشيء. * تجوا تحاسبونا نحن. * انتوا كمان ما تبقوا (حساسين) للدرجة دي. * و الله انتوا بتتحسسوا ساكت. * الموضوع ما فيه حاجة. * براكم قاعدين تتعقدوا من (الاتنين). * ونحن ما قاصدين اتنين عزام. * نحن قاصدين اتنين الهلال. * تفتكروا ناس (كيبي) ابو رويس دا يكون قاصدها ..و الله اصلو ما بعيدة منو.. الزول دا من شفتو في التسخينة قلت الزول دا عاوز يعيد شريط عزام. * قالوا لي. * وجابوا لي الخبر ..(زي الكبريتة الرايحة). * الواحد يقلب المطبخ قلب عشان يلقى (الكبريتة)..وما بلقاها. * قالوا لي مباراة عزام والمريخ ما متلفزة. * قلت ليهم القال ليكم منو؟. * انتوا بتتكلموا ساكت. * انتوا بتقطعوا من رأسكم. * اوعك!!. * ناس (نزار الصاقعة) سرقوا شريط مباراة عزام والمريخ..وعرضوه ليكم في استاد الهلال المساء. * قناة النيل الازرق قامت بي اعادة الشريط. * ما حدث في تنزانيا العصر. * حدث في السودان مساء. * والغريبة الشوط الاول ..قون اول. * الشوط التاني ..قون تاني. * شفتوا النظام دا كيف؟. * المباراة كانت ممتعة. * والاولاد كانوا بنقلوا في الكورة زي (التوزيع الموسيقي). * والشاي حايم بيناتنا زي (الضحك). * والضحك ذاتو يتفقد في الوجوه...يتبّن فيها متل الوالد وقد يتبن جناهو. * انا عارفكم ح تقولوا انا قاصد مباراة عزام والمريخ ..وانا قاصد مباراة الهلال وكي ام كي. * اعمل ليكم شنو لو انتوا بتتخيلوا حاجات ما حاصلة؟. * بتتوهموا. * بتتوقعوا ليكم حاجات مستحيلة. * مقدر الحالة انا. * وشايف. * وعارف. * الغسيل برة. * والكي جوة. * اي حاجة نحن عندنا بي نظام. * الما شاف شريط مباراة عزام والمريخ يشوف مباراة الهلال وكي ام كي. * الحالة واحدة. * ما حدث هناك (عصرا) ...سبحان الله حدث هنا (مساء). * اعاده. * تاني ما اسمع لي زول يقول مباراة المريخ ما كانت متلفزة. * الحاجات دي اطبقت هنا في استاد الهلال بالورقة والقلم. * الحصل هناك نقلناه ليكم هنا بي (ضبانتو). * اصلو ما جبنا لينا حاجة من بدري. * بس فاضل محمد فضل الله. * محمد فضل الله امس ذاتو شغال المباراة كلها يشكر في (عزام) على الاعادة تقول بعيد فيها من استديو في الشهداء. * انا خلوني..محمد فضل الله دا برضو قاصدها. * شنو شغال لينا شكر في (عزام). * عزام بتاع محمد فضل الله شغال في القناة طبعا ..وضمن فريق النقل. * عشان ما تلخبطوا. * وما تفهموا غلط. * تفتكروا الحاجات دي كلها (مصادفة). * صدفة ساكت. * و الله (الصدفة) دي يوم بتكتل ليها زول. * بتجيب خبرو. * بتجيبو كاتم قبلو. * ناقص عمر. * الصدفة دي اصلو ما حاجة ساهلة. * الحاجة المحيراني ..وبتخليني اقيف اليوم كلو في خشم الباب. * في فريق كي ام كي امس في مدافع يتراوح لي كدا زي (علي جعفر). * الخالق الناطق (علي جعفر). * مندرو جنس اندراوة. * اروش جنس رواشة. * وببلع المباراة كلها في ريقو. * انا قلت علي جعفر دا جنّا. * الزول دا موش كان لاعب العصر في تنزانيا البجيبو لينا هنا شنو في ام درمان المساء. * هو المريخاب ناقصين. * ناقصين علي جعفر تاني. * وعشان تعرفوا ناس نزار الصاقعة قاصدنها. * قون عزام الاول كان غلطة من علي جعفر. * وقون الهلال الاول غلطة برضو من المدافع الزنزباري. * قون الهلال الاول غلطة من (علي جعفر) بتاع كي ام كي..يعني علي جعفر غلط هنا وهناك. * البلد دي فيها كم (علي جعفر)؟. * تلخبطوا الزول في (جعافرو). * على جعفر دا هو كم واحد؟. * غايتو نحن بتاع المريخ ما بنعرفو عمل شنو؟. * لكن بتاع كي ام كي (جلط) قدام عيونا دي .. لي درجة ان الناس في استاد الهلال قالوا هدف الهلال ما جابو نزار. * قلنا ليهم الجابو منو؟. * قالوا لينا جابو (علي جعفر) بتاع كي ام كي. * قلنا ليهم معقولة بس. * علي جعفر دا يتقطع. * يجيب هنا وهناك. * هنا وهناك يغلط. * طبعا انا هسع لو قعدت اقطع ليكم في مدافع (كي ام كي) وانتقدو ليكم ح تقولوا الزول دا قاصد (علي جعفر) بتاع المريخ. * وانا علي جعفر بتاع المريخ ما عندي معاهو اي قضية. * ما عندي معاهو اي شغلة. * ولا شغال بيه الشغلة. * انا علي بي (علي جعفر) بتاع (كي ام كي) دا. * هسع دي عملية تعملها يا علي جعفر الزنزباري. * في زول بغلط الغلطة دي ..قاعد تتشبح لينا في المباراة تقول عندكم (ترعة) كسرت. * دا شنو البتعملوا فيه دا. * وللمرة المليون انا بتكلم عن مباراة الهلال. * ما تلخبطونا ساكت. * ما تقعدوا تسرحوا لينا. * ......... * ملحوظة : يا ناس عزام قلنا ليكم لو شفتوا بكري المدينة ما بتشتكوه ..الزول دا هدية وجاتكم من السما. هوامش * الهلال مفروض يغلب تسعة. * وعزام برضو. * قالوا كدا. * احسن زول كان في المباراة الطرف اليمين في الهلال. * والطرف اليمين في عزام برضو. * يا ربي ناس عزام ديل عندهم (اطهر) برضو. * مكسيم بطلع من قونو. * حذروه من الحركة دي. * الزول دا طوالي بتقدم من القون. * وحارس عزام برضو قالوا قاعد يتقدم. * دخل المباراة كان عالي جدا في ام درمان. * وفي تنزانيا برضو. * يا جماعة دي شنو المحاكاة دي؟. * مفروض الليلة (الاتنين) يكون اليوم العالمي لجدول (اتنين). * قالوا ليك واحد ضرب للعريس (محمد محمود ) في قناة النيل الازرق الصباح ومحمد محمود قال ليه عاوز تسمع شنو؟. * قال ليه عاوز اسمع (جدول اتنين). * ويا ريت تسمعنا ليه كمان بي صوت فرقة (عقد الجلاد) يا محمد محمود. * هم ناس عقد الجلاد بغنوا (جدول اتنين). * ناس عقد الجلاد ديل ممكن يعملوها ما في حاجة صعبة عليهم. * و الله فهم. * و الله عدل. * قال ليها عيونك من الفرحة عاملات زي الاستاذ وقت يقول للطلبة (بيوت). * الفرحة تشقهم. * تقول تاني ما ح يرجعوا للمدرسة. * انتوا في جديد في (كوبري المنشية). * بعد (الاتنين) دي مفروض يفتحوا الكوبري. * ما بتجيه اي عوجة. * ......... * عاجل : باسكال دا ذاتو مستهبل ..في داعي يبكي قبل المباراة – عشم ليك ناس حاتم عبدالغفار ساكت.
