* اهم شئ في الدنيا سمعة الزول واي شئ بجي ويروح المال بجي ويروح وممكن تتغلب وبكره تغلب كلو وارد وجائز لكن السمعة ذي القزاز لو اتكسر مابتصلح * والناس في الدنيا لازم تعيش بالنية السليمة * الايام الفاتت دي كل الناس بتتكلم بالحركة المريبة * اعلام المريخ كلو بتكلم عن الحركة المريبة لبعثة عزام التنزاني * عزام فريق بشك وشاكي في اي حاجة السكن والترحيل والملعب واي شئ ودي عملية ماكويسة * ناس عزام يعني بتهمونا بالدجل والشعوذة وبتهمونا كمان بالتأثير على الخصم واتهامات كثيرة لابد الناس تقيف عندها * ولازم المريخ الليله يرد في الملعب عشان يعرفوا حاجة * والحركة المريبة متواصلة مادايره تخلينا * امس الأول قالوا الوالي وعبد الصمد والفريق طارق اتقدموا باستقالاتهم ودي برضو حركة مريبة لماذا اختار الثلاثي التوقيت دا * ومحسن سيد قال المريخ بضيع اهداف سهلة وبطريقة غريبة ودي برضو حركة مريبة * المريخ حاول يفك النحس الملازمو وضبح ( تلاته ) خرفان في الايام الفاتت * والمريخ محتاج ل( تلاته ) اقوان عشان يتأهل * ومافي زول يقول في حاجة مريبه * قبل ايام تراوري ابوه جاء السودان وقال بتمنى المريخ يغلب وولدو يجيب الاقوان * وقبل ايام الوالي شرف احتفالية تأبين زعيم امة الهلال الطيب عبد الله ... * المهم البلد كلها بقت حركة مريبة * واحد ثقيل قال لي الوالي بمشي صحي صحي ولا كلام كل مرة * قلته ليهو الحركة مريبة * المهم الليله الكورة * كورة الهلال وبطل زنزبار * وكورة المريخ وعزام * ان شاء الله مايكون في حركة مريبة داخل او خارج الملعب * ولازم كل السودان يشجع الهلال والمريخ وبكرة الخرطوم وان شاء الله كلهم يتأهلو * عشان مايكون في حركة مريبة * ولانو الخرفان ماعندها ذنب يضبحوها ساي * وعشان الوالي يكون قاعد في المريخ لازم يغلبو الليله وعشان مايكون في حركة ( مريبة ) ( 2 ) * قالوا ليك الايام دي الواتس اب مليان بالغناء الجديد * الغنية الواحدة بقت بعشرة آلاف دولار دا للشاعر طبعا * وامجد حمزة طبعا شاعر جميل وشعرو نبيل يستاهل اكتر من كدا * وكمان الفنانة انصاف مدني برضو تستاهل لانها فنانة كبيرة * وطبعا انصاف مدني كان عندها رأي في القروش البدوها للاعبين ، قالت اللاعبين ياخدو مليارات وقوون مابجيبو * وهسا انصاف مدني جابت قوون ( 3) * اللهم انصر الهلال * عشان الغناء يكون ظابط ومايكون في حركة مريبة
