جاسوس شنو؟.. البعمل فيه عبدالصمد محمد عثمان لا جاسوس ولا الشياطين ال (13) بعملوه """""""""""""""""""""""""""""" كأنو باسكال الذي لعب في المريخ أكثر من أربعة مواسم ..عندما كان بيلعب في المريخ لا بتكلم ولا بسمع ولا بشوف """""""""""""""""""""""""""""""" • الشافع البتلقاه معلق ليه في (فرع شجرة) ، اغبش و(زراير) قميصو مقطعة وفردة نعالو رايحة. • اليوم كلو برة البيت ، حايم من حلة لي حلة – اعرف طوالي ان هذا (الشافع) تربية سلسلة الغاز (المغامرون الخمسة). • والشافع المن يجيبوا ليه سيرة (التسميع) يقول ليك عندي (وجعة) وما قادر امشي المدرسة الليلة. • اعرف طوالي انو من خريجي (المغامرون الخمسة). • والشافع ..البعمل غارات جوية وليلية على (التلاجة) وينسف كل ما لذ وطاب فيها .. • ما يخلي ليه (موزة) طايرة. • اعرفوه من جماعة (المغامرون الخمسة). • والشافع الما بسمع الكلام ..وما بترسل ..ولا بخليك تنوم ...من دون شك هو من تلامذة (المغامرون الخمسة). • في مقدمة اي (لغز) من لغز (المغامرون الخمسة) توجد هذه المقدمة – (عشان ما تقولوا نحن بنتكلم ساكت). • عشان ما تقولوا نحن بنقطع من رأسنا. • وعشان نحددها مع جماعتنا ديل. • ما تبقوا لينا زي (المهاجم) وقت يضيّع ليه فرصة مضمونة بقوم يمسك (ركبتو). • او يقعد في الواطة ويربط في (كدارتو). • المقدمة بتقول : (من هم المغامرون الخمسة ؟ إنهم أصدقاؤك الذين يتدخلون لحل الألغاز والإيقاع باللصوص وإنقاذ المظلومين..وهم في مثل سنك تقريباً (محب) وأخته (نوسة) و(عاطف) وأخته (لوزة) وقد كان هؤلاء الأربعة يشرعون للقيام بالعمل معاَ، ثم انضم إليهم (توفيق) وهو أكبر منهم قليلاً. وقد أطلقوا عليه لقب (تختخ) حسب الحرف الأول من اسمه الرباعي (توفيق خليل توفيق خربوطلى ..و(تختخ) ولد ذكي وقد أصبح رئيساً للمغامرين الخمسة. وهو عقلهم المفكر، وبطلهم الشجاع. ويبقى أن نقدم لك (زنجر) الكلب الأسود الذكي. هؤلاء هم المغامرون الخمسة وكلبهم (زنجر) أبطال الألغاز التي تحبها). • الاجيال الجديدة طبعا ما عارفة الموضوع دا..قلنا نسهل ليهم الحكاية. • بالله زمان ..نحن اصعب حاجة عندنا (المغامرون الخمسة) لا بنعرف (داعش) ولا سمعنا بيها. • لو فكرنا بعيد كدا – تفكيرنا ما بمشي ابعد من (الغول). • والغول ذاتو في الحقيقة ما في. • الغول من صنيعة خيال سينما الحبوبات. • اكبر حاجة عندنا (العجلة). • وقت يقولوا ليك (عجلة دبل) خلاص – الحديث انتهي. • الواحد فينا كان لمن يشهق ليه شهقة – ويجري على (الزير). • اعلام المريخ في هذا العصر ..عصر المعلومات والفيس والواتساب والانفتاح والحريات والحوار وما في حاجة (مغتغتة) ..يريد ان يتعامل على طريقة (المغامرون الخمسة). • الحصول على المعلومة لم يعد امر صعب. • يمكن لرجل من اقليم السند ان يحدثكم عن فريق (الموردة) العاصمي من الالف للياء. • يكلمكم عن اي شيء. • بدون ما يكون محتاج ليه (جاسوس). • عليكم الله في زول في عصر التنكلوجيا دي بكون محتاج ليه لي (جاسوس). • جاسوس في كورة. • انتوا بتلعبوا في (السر). • يمكن عشان كدا قالوا ما عاوزين (تلفزة). • كتمة شديدة. • جماعتكم شابكننا في جرايدهم واعمدتهم (الغاز) وجواسيس – لمن نحن افتكرنا المريخ دا ح يلعب امام (مانشيستر يوناتيد) ما (عزام). • يا جماعة (عزام) دا – ما عاوز ليه (شماعات) قدر دي. • قومة النفس في شنو؟. • ما تغشوا الجماهير ساكت. • كفاية انكم غشيتوا الشرطة. • عاوزين تكضبوا علينا نحن كمان. • البسمع اعلام المريخ بتكلم عن (الجواسيس) يفتكر ناس (عزام) ديل دخلوا البلد بي (دبابات). • او اتسللوا بالحدود الشرقية للبلاد. • الكضب على شنو؟. • الجماعة ديل – ما فاضل ليهم إلّا يطلعونا (جبهة ثورية). • ثقافة (التخوين) والتهويل دي جبتوها من وين؟. • دي شنو الظنون والشكوك الكتيرة دي؟. • وهم. • وهم مبالغ فيه. • وهم يحتاج الى علاج نفسي عديل كدا. • والله انتوا ما طبيعيين ..انتوا ما كويسين ..كدا شوفوا درجة حرارتكم كم؟. • اعملوا فحص. • اصلو ما طبيعيين. • ناسكم اتوهموا عديل كدا. • جماعتكم ديل فلاحتهم في (الجواسيس)...ما بقدروا يقولوا اي كلمة في جمال الوالي. • ولا عبدالصمد. • والجواسيس ذاتها عشان شيء مطلق بتكلموا عنها وبهاجموها. • حددوا لينا (جاسوس). • اتوفسيتر عندما لعب الهلال احد مبارياته الافريقية مشى برج الفاتح عديل كدا وجلس مع الجهاز الفني للفريق الذي سيباري الهلال افريقيا. • وقت اعلام الهلال اعترض على الخطوة دي – ليه اعلام المريخ قال الزمن دا ما في حاجة للجواسيس او العملاء. • ليه قالوا العالم مفتوح – والهلال كتاب مفتوح للجميع. • اعلام المريخ عن بكرة ابيه - لم يفتح الله على (قلم واحد) فيهم لكي يقدم نقدا او اعتراضا او حتى (ملاحظة صغيرة) كدا على الاستقالات التى تقدم بها جمال الوالي وعبدالصمد محمد عثمان وطارق عثمان الطاهر. • ما في زول دق صدرو وقال الكلام دا غلط. • واحد فيهم قدر يقول كلمة ما في وضباط المجلس وقياداته يتقدمون باستقلاتهم في توقيت (جاسوس) ما بقوم بيه. • جاسوس شنو؟. • البعمل فيه عبدالصمد محمد عثمان لا جاسوس ولا الشياطين ال (13) بعملوه. • لو قالوا لي ناس عزام اعملوا ليكم حاجة كبيرة كدا في المريخ ..عشان تفوزوا بيها - ما بصلوا لحتة استقالة جمال الوالي وع
بدالصمد والفريق طارق. • لو جبت ليك مخرج هندي وقلت ليه اعمل لينا فيلم (خيال علمي) عشان المريخ يخسر امام عزام ما بصل لمستوى ان يقدم جمال الوالي وعبدالصمد الرئيس ونائب الرئيس والامين العام استقالاتهم في هذا التوقيت. • صلاح ادريس لو مسك المريخ بي هلاليتو دي ما بعمل كدا...ولا بقدم استقالتو في هذا التوقيت. • اعلام المريخ بتفرّس وبتشطّر على (الجواسيس) بحاولوا يستدروا عواطف جماهير المريخ ان هناك (جواسيس) بنقلوا معلومات عن المريخ لفريق عزام. • بضحكوا على جمهور المريخ الواعي. • جمهور المريخ (الصفوة). • بغشوهم وببرروا ليهم الخسارة والخروج ان حدث. • وكأن فريق المريخ هذا جاء سرا من (عطارد) لكي يلعب امام عزام ويرجع. • وكأنو باسكال الذي لعب في المريخ اكثر من اربعة مواسم ..عندما كان بيلعب في المريخ لا بتكلم ولا بسمع ولا بشوف. • باسكال عارف اي كبيرة وصغيرة في المريخ. • عارف علي جعفر بتعشى بي شنو؟. • وضفر بسمع منو؟. • وامير كمال بقوم الساعة كم من النوم؟. • جواسيس شنو؟. • انتوا فاكرين نفسكم في القرن الرابع عشر. • الحركات البتعلموا فيها دي ..ما بتحقق ليها نصر ...ما تحاولوا تخلقوا ليكم (خصوم) مخيفة ..عشان تنتصروا عليها وهما. • ما تحاولوا تكبروا كومكم ساكت ..وتظهروا ان المريخ مستهدف وان هناك جماهير ساندت فريق عزام التنزاني. • الجماهير دي يا ربي طلعت من علب لباشكري. • ظهرت من (الواتساب). • ما هذه (الاوهام) التى يوزع فيها اعلام المريخ على الناس ..وكأن المريخ لأول مرة يلعب في البطولة الافريقية. • وكأنه لم يخرج العام الماضي من دور ال (64). • اعلام المريخ اشاع ان هناك (جواسيس) بعملوا ضد المريخ وبنقلوا اخبار المريخ ..ومباراة المريخ امام عزام ما في الحرب العالمية الثالثة. • ولا في العراق. • اعلام المريخ وهم ليك الجماهير ..ونشر بينها ان بكري المدينة (مكتوب) ومعمول ليه عمل عشان كدا ما جاب ليه قون. • وبكري المدينة اصلا طبعو كدا. • كورتو كلها كشافات. • جماعتكم من (الوهم) الدخلهم ..بقوا كل يوم يجيبوا ليهم (خروف) يضبحوه في استاد المريخ. • تقول المريخ عاوز يلاعب (عزام) على صحن شية. • او صحن مرارة. • اعلام المريخ صنع ليه (اوهام) من مافي ..وطلع ليه (جواسيس) من عجوة ، لتكون مباراة المريخ ضد الاوهام والجواسيس بدل ما تكون ضد عزام. • قبل الانتصار على عزام – بل قبل اللعب امام عزام – انتوا محتاجين تنتصروا على تلك (الاوهام). • انتوا اتوهمتوا عديل كدا. • عشان كدا اذا خسر المريخ اليوم ..فان خسارته ليس من قوة عزام وانما من الاوهام التى صنعها اعلام المريخ. • معقولة كل يوم جايبين ليكم (خروف). • الخروف بحلكم. • ........ • ملحوظة : عليكم الله واحد فيكم يقول لعبدالصمد البتعمل فيه دا غلط. هوامش • في الهلال اذا تعادل الهلال في الابيض ..الاعلام ما بكضب ..طوالي بهاجم ليك (الكاردينال). • في المريخ اي قلم مريخي لا يستطيع ان ينتقد جمال الوالي. • الجريدة البتنتقد جمال الوالي بقفلوها. • الصحفي البكتب ضد جمال الوالي بشيلوه. • الاذاعة البتتحدث عن اخفاقات في المريخ بقولوا بستهدف المريخ. • وهم. • وهم. • الهلال في منتهى الهدوء. • في ظروف مثالية بعيدة عن الشد والجذب ..يلعب اليوم عصرا. • لو خرج الهلال اليوم لا قدر الله ...سوف نقول ان مستوى الهلال غير مقنع. • وان اتأهل ..لا يعني ان مستوى الهلال جيد. • برضو ح نقول الهلال غير مقنع. • لا جاسوس. • ولا بنجيب لينا خروف. • حاجات زي دي نحن ما عندنا. • نتمنى للقمة السودانية عصرا ومساء بعد دا كلو ان تتوفق وان تتأهل لدور ال (32). • رغم مناكفاتنا ..إلّا ان الهلال اذا صعد والمريخ خرج – برضو الهلال سوف يتأثر. • والقمة السودانية كدا. • بتتأثر بي بعض. • ........ • عاجل : قبضوا ليهم (جاسوس) في ليبيا ...قالوا ليه الحاصل شنو؟..قال ليهم علي جعفر فلق (ضفر)..او مرة اسمع لي بي زول بفلق ضفر – هو ضفر بتفلق.