الجماعة قاعدين في السهلة ..متل (الفاصل الأخير) في الحفلة ..تلقى قزاز البارد مجدع بين الكراسي """""""""""""""""""""""""""""""""" المريخاب ديل طبعاً خبر (البكا) عندهم من الساعة سبعة لكن ما طلقوا (البكا) إلّا بعد مباراة الهلال """""""""""""""""""""""""""""" البقول ليك المرحوم ما كان عندو أي شيء ...الزول دا العصر كان راكب عجلتو وحايم في الحلة """""""""""""""""""""""""""""""""""" خامساً – جمال الوالي بقول أنا ماشي ..بقول أنا ما قاعد ..أنا الجماعة ديل عملت ليهم أي شيء وبطلعوا لي من دور ال (64) """""""""""""""""""""""""""""""""""""""""" • فالحين لي في (علي جعفر). • وينو البصل؟. • شطارتكم بس في علي جعفر. • وينو الفحم؟. • علي جعفر – حوّل المواقف. • حول المستشفيات. • علي جعفر – صدع كوبري المنشية. • وينو الدقيق؟. • علي جعفر – قال قاطعوا الانتخابات. • علي جعفر – عمل أزمة الغاز. • وينو اللبن؟. • الولد مسكين اتسبب في (القون) الأول لعزام – البلد كلها قامت فيه. • طيب (الأقوان) البتدخل في البلد دي من صباح الرحمن ..سببها منو؟. • لو عرفتوا السبب ح تقدروا تقولوا شنو يعني؟. • ولا حاجة. • أحسن نتابع مسلسل (نساء حائرات). • غايتو الزول وقت يكون ما قادر يقول أي حاجة ، ولا كلمة – بكون ما عندو خيار غير (علي جعفر). • لذلك اعذرونا. • علي جعفر الوحيد البستحمل النقد وما بقدر يقول أي حاجة. • ولا بقدر يعترض. • ما عاوزين نطلع من الموضوع. • أحسن نفش غلنا في (عزام). • ليه عزام يغلب المريخ اتنين؟. • وين قانون حماية المستهلك؟. • وين قانون الرقابة؟. • وين ناس المرور؟. • اتنين ليه؟. • اتذكرت لي (حكاية). • أمس طبعاً ما كان عندنا غير الجرايد الرياضية. • ما في غير الجرايد الرياضية. • الجرايد الاجتماعية ذاتها أمس كانت مافي. • عشان كدا فتشنا ليك الجرايد دي حرف – حرف. • ما خلينا فيها شيء. • الإعلانات قريناها. • حرف ما سقط مننا. • ما عندنا خيار غيرها. • قريت للمريخاب ..لقيت ليك الجامعة عندهم أزمة عزام أخطر من أزمة الغاز. • الجماعة قاعدين في السهلة ..متل (الفاصل الأخير) في الحفلة ..تلقى قزاز البارد مجدع بين الكراسي. • وتلقى ليك شافع أو اتنين ما عارف – بيراجعو في صحانة العشا الفارغة. • قريت للمريخاب ..لقيت زي العندهم خبر وفاة. • زي المات ليهم زول. • حسيت ليك بالبكا ذاتو فيه ترتيب. • فيه نظام. • الجماعة ديل طبعاً خبر (البكا) عندهم من الساعة سبعة لكن ما طلقوا (البكا) إلّا بعد الساعة عشرة. • بعد مباراة الهلال. • ح تقعدوا تشرعوا لي. • وتقولوا لي كيف الكلام دا؟. • الموضوع في منتهى البساطة. • في منتهى (الأناقة). • ناس المريخ ديل بعد ما اتهزموا من (عزام) صفر / اتنين ..قالوا أحسن ما نطلق البكا. • قالوا أحسن نسكت. • وما نقول أي حاجة. • لمن نرتب أوضاعنا ..ونشوف مباراة الهلال ح تنتهي كم؟. • وبعدين نقدر الأوضاع. • لو الهلال لخبط في المباراة وما حقق ليه نتيجة كويسة ..تبقى الحالة واحدة..لا نحن بنقدر نقول شيء ولا هم بقدروا يقولوا شيء. • ولو كمان الهلال انتصر ووضع قدم في دور ال (32) ...نطلق الكواريك طوالي. • أصلو ما بنصبر. • وأصلو ما بنسكت. • بس يا جماعة خبر البكا دا دسوهو لمن تنتهي مباراة المريخ. • ديل العقلاء – ديل الحكماء في المريخ كانوا عشمانين. • عشمانين (كي أم كي) يعمل ليه حاجة أمام الهلال. • الهلال الأيامات دي ما مقنع ..يعني ممكن يتعرقل في أرضو ووسط جمهورو. • عشان بنتعرقل ليكم. • يا جماعة نحن (التمهيدي) دا ذاتو مفروض ما نلعب فيه. • نحن التمهيدي دا جاملناكم فيه ساكت. • تمهيدي شنو؟. • كمان وقت نتواضع ونلعب في (التمهيدي) عاوزين تطلعونا من دور ال (64). • والله مسخرة. • أوعك!!. • انتهت مباراة الهلال ...والحمدلله الهلال انتصر. • الجماعة طلعوا ليك في الشارع. • سمعنا لينا أصوات غريبة. • بكا شديد. • بكا مبالغ فيه. • طوالي دخلنا فيهم شمال ..يا جماعة المرحوم مالو؟. • المرحوم كان عندو شنو؟. • البقول ليك ما كان عندو أي شيء ...الزول دا العصر كان راكب عجلتو وحايم في الحلة. • والبقول ليك ..شرب كباية اللبن وتاني ما قام. • والبقول ليك كان بقرأ ليه في جريدة ..هبشناه لقينا ما في نفس. • والبقول ليك ...الأيامات تمت بس. • لكن تحت – تحت قالوا المرحوم كان عندو (عزام) في البنكرياس. • قلنا ليهم (عزام) دا شنو؟. • كمان عزام وصل البنكرياس. • الجماعة ديل ما عندهم (دفاع). • الجماعة ديل المناعة حقتهم مالها ضعيفة كدا. • كيف يخلوا (عزام) يصل (البنكرياس). • دا إهمال شديد. • الناس ديل موش كانوا في معسكر مقفول في قطر ومصر. • موش لعبوا أمام شالكا. • طيب مالهم ..البوصل (عزام) البنكرياس شنو؟. • بعدين تعالوا هنا يا جماعة ..عاوز أسأل سؤال محرج شوية. • سؤال فيه شوية (استفسار). • عزام دا حاجة غير (الورم). • غير التليف. • غير الجلطة. • غير السكتة. • عزام في النكرياس دي أول مرة نسمع بيها. • يعني تاني الواحد وقت يمشي ليه لي دكتور من الحالة الفيها (علي جعفر) ديل ..بسأل الله بس ما يكون عندو عزام في البنكرياس. • بعدين أنتوا يا جماعة لو جيتوا للجد البلد دي (بنكرياساتها) انتهت. • لا عندها (بنكرياس) ولا حاجة. • نحن بنكرياساتنا دي لو كانت من (الحديد الصلب) ما بتستحمل البعملوا فيها دا. • كوبري المنشية ما استحمل. • نستحمل نحن. • شن قدرنا نحن على الحاجات دي. • شفتوا الزول من تلقوه (بشوبح) في عيونو. • وقاعد (ينكرش) كدا أعرفوه عندو (عزام في البنكرياس). • ما قلت ليكم..(عزام في البنكرياس) – دي زي (صعايدي في الجامعة الأمريكية). • حاجة ما بتخلص. • مرة عندنا واحد تعب. • فجأة كدا قام واقع لينا. • قلنا ليه يا زول أنت البوقعك في آخر الشهر شنو؟..أنت ما تراعي ظروفنا شوية. • ما تقع لينا في ظرف أحسن من الظرف دا. • المهم اتلقطنا وشفنا لينا (لوري تراب) ومشينا على المستشفى. • الدكتور يدخل ويطلع فينا. • آخر حاجة قال لينا جيبوه جوه. • شلناه جوه. • الدكتور من عاين ليه كدا قنع منو؟. • قال لينا الحالة دي عندو من متين؟. • قال لينا من كورة المريخ وعزام. • الدكتور قال لينا بس كدا أنا وصلت للتشخيص الصحيح – الزول دا عندو (عزام في النكرياس). • نحن كنا ما عارفين – قلنا ليه يا دكتور المرض دا خطير. • قال لينا خطير الشوية دي. • يا دكتور وأعراضو شنو؟. • قال لينا جيبوا ليكم ورقة وقلم واكتبوا الأعراض. • أولاً – هجوم عنيف على (علي جعفر). • ثانياً – صهينة من (الريح علي). • ثالثاً – التهاب في الأطراف (بله جابر ومصعب عمر). • رابعاً – شعور بالحاجة الملحة للشطب. • خامساً – جمال الوالي بقول أنا ماشي ..بقول أنا ما قاعد ..أنا الجماعة ديل عملت ليهم أي شيء وبطلعوا من دور ال (64). • جمال الوالي تاني ما بقعد. • الخسارة دي زعلتها على الأقل (6) شهور. • سادساً – خروج من دور ال (64)...خروج من التمهيدي. • طيب يا دكتور والعلاج شنو؟..الحالة دي يخرجوا منها كيف؟. • الدكتور قال لينا الخروج من الحالة دي تشاركوا في (سيكافا). • وسيكافا ذاتها تشاركوا فيها بصورة مستعجلة. • الموضوع ما بيستحمل. • ما بيستحمل أي تأخير. • كلموا عبدالصمد محمد عثمان من هسع يكثف الاتصالات ..ويعمل اللازم. • خلوه يشوف ناس (كي أم كي) ديل ..بلعبوا معاكم في سيكافا. • أصلو الهلالاب ديل تاني ما بسكتوا ليكم إلّا بي (سيكافا). • ما في حاجة بتسكتهم غير (سيكافا). • ...... • ملحوظة : مباراة الإياب ما عندكم حل غير تلعِّبوا (عبدالصمد) رأس حربة ..بكري المدينة ذاتو تاني ما فايق ليكم. هوامش • سلك عمل طناش. • وين رسالتك إليَّ يا سلك؟. • وين الاحتجاب لظروف فنية؟. • وين عثمان حسين؟. • مزمل قال ليهم رجعوا عادل أبوجريشة. • أبوجريشة لكن بحلكم. • إلّا ترجعوا ود الياس. • المشكلة فوق..المشكلة ما في مدير الكورة. • يشيلوا مدير الكورة. • يرجعوا مدير الكورة. • يشيلوا مدير الكورة. • يرجعوا مدير الكورة. • نحن فترنا من الحاجات دي. • اعملوا ليكم حاجة أكبر من كدا. • بكري المدينة يضرب في (الباكمبا) ما عارف الراجيه شنو؟. • ما عارف (الفيفا) بتعمل ليه في شنو؟. • لو كنت عارف يا بكري ما بتاكل ليك باكمبا. • ........ • عاجل : بكري المدينة باقى ليه 37 ساعة ..خلاص يا بكري أبقى مارق.
