اتلملم سحاب عارفو ولا بيصب كلهن احتمالين يا شقي.. ياشقي عمر الضحكة اقصر من مانشهقه حيل المنية افتر من اتعلقه ( 1 ) الدنيا حظوظ والمال قسمة !! في ناس في الدنيا دي كدا محظوظين الواحد بتمشي معاه باسطة تلقاه في الثانوي اموره ملخبطة والنوع البمشي كداري وفي الجامعة بنطلونو واحد بس يتخرج بعد كم سنة كدا تلقاهو عمل قروش وبقى زول يهز ويرز طبعا الناس مابتخلي الامور ساي وذي دا طبعا بقولوا ليك هو لقي القروش وين ؟ الا يكون بتاع غسيل اموال او ... !! بس التانية بجيب هواء المهم الحظوظ دي ما في القروش بس وفي واحدين تلقي كورتو عادية وبعد سنة كدا تلقي الجرائد تتكلم عنو ويقولوا ليك نجم التسجيلات، وبعد شوية يسجل للمريخ ويستلم مليارات ويركب اسبورتاج ويشتري بيت في امبده ويشتري فنايل النوع العجيب داك وبناطلين كباية وكريمات شعر ويبقي نجم مجتمع وكورتو ركشة مفروض ماتركّبو المهم دي برضو حظوظ ماهي الدنيا كدا وواحد يكون رئيس نادي قدر ما الامور تتلخبط وفريقه منتهي تلقي الفريق المنافسو مشاكلو تقوم وتقعد او يتعادل بدون سبب المهم برضو حظوظ .. (2 ) انا في شيء واحد محيرني في البلد دي !! جمال الوالي دا قاعد 13 سنة كيف في المريخ ؟ الوالي 13 سنة بي 3 كاسات ممتاز الوالي سجل لاعبين بالكوم محترفين ووطنيين ودفع قروش لو دفعها للمساكين كان السودانيين مافي زول فيهم مفلس ودا كلو ما عمل شيء وكل سنة الوالي بقول ماشي وناس المريخ يقومو ويقعدو والوالي خط احمر وتطلع لافتات وهتافات يقولوا فيها ( لن نوالي غير الوالي ) وناس التجمع يجوطو والجمعية العمومية فيها سبعة انفار والوالي قاااعد ياربي الوالي يكون فكي ؟ (3) امس مريخ الفاشر قالوا غلب هلال كادقلي وصعد للمركز التاني شفتو الحظ دا كيف !! والسكة لسه في اولها ودا الاسبوع العاشر يعني السنة دي في كلام كتير ناس مريخ الفاشر واهلي شندي والخرطوم الوطني عندهم كلام كتير وصلاح ادريس حايكون مؤثر جدا في الدورة التانية صلاح ادريس دعم عدد من الاندية منها مريخ الفاشر وهلال الفاشر وهلال كادوقلي والامل عطبرة واهلي مدني والسنة الفاتت بعد حسم المركز التالت اشتغل بالريموت اهلي شندي يغلب ويتغلب والصقة ماشه في النهاية مثّل الخرطوم في الكونفدارلية ونجا هلال الفاشر وهلال كادوقلي من الهبوط وهبط اهلي عطبرة المهم الامور برضو مشت بي هنا ماحظوظ هنا علاقات وانا مابفسر وانت ماتقصر ( 4 ) الليلة قالوا توقيع عقد الجوهرة الزرقاء ياكاردينال ما تنسى ناس سلمى سيد ونسرين سوركتي على الاقل مذيعات مقبولات ومقتدرات وجميلات وبنجحن حملة الجوهرة (5) ياربي يكون السرّب تقرير الحكم منو ؟