* قال الاستاذ عوض احمد طه مقرر لجنة الاستئنافات ان مبررات الاتحاد السوداني في دفاعه عن الخطاب الذي قدمه لرفع العقوبة عن بكري المدينة ليشارك امام الامل لم تكن مقنعة واوضح عوض احمد طه جزءا من هذه الدفوعات حيث قال ان الاتحاد اعتمد في دفاعه عن اللاعب بحاجة المريخ له في المباراة !! * صدقوا او لا تصدقوا .. هكذا يدافع اتحاد كرة القدم السوداني او اسامة عطا المنان عن مشاركة بكري المدينة امام الامل .. المريخ محتاج ليهو ! وهو امر ليس بالجديد فقد كان من المفترض ان تتم معاقبة بكري بالايقاف عن المشاركة داخليا وخارجيا بعد اعتدائه العنيف على مساعد حكم مباراتهم امام الاهلي شندي ولكن العقوبة جاءت مخففة لست مباريات لان المريخ محتاج له ! * نعرف ان اسامة عطا المنان يحب المريخ او يحب المدينة او انه يريد مواصلة اللاعب لمشواره من اجل المنتخب او بسبب الاموال الكثيرة التي دفعها فيه المريخ للدرجة التي جعلته يعجز عن دفع ديون طابق شاخور المعرض للدلالة .. نفهم كل ذلك ولكننا نعرف ان السودانيين مشهور عنهم (الحياء) وكنا نتوقع شيئا من الحياء في رد اسامة او اتحاد الكرة على لجنة الاستئنافات ولكن ان يكون (الحب) صريحا لهذه الدرجة فهذا امر غير مألوف .. معقولة بس ( عديل كده المريخ محتاج لي) طيب الامل عطبرة ده جاي من اسرائيل ! ما برضو فريق سوداني ومحتاج يلعب كورة ضد خصمه بعقوبة لاعبه طالما ان القوانين تقول ذلك ! والمسكين معاوية الامين لاعب الخرطوم الوطني عندما تم ايقافه لعام كامل فريقو ما كان محتاج لي ! ولا الريح علي لما كان في الموردة فريقو ما كان محتاج لي ! ولا لما انتقل بالعقوبة ورفض اتحاد الكرة رفعها اهلي الخرطوم ما كان محتاج !!ولا لاعب وقائد التعاون الذي احتج على قرارات الحكم وتم ايقافه لموسم كامل .. فريقو ما كان محتاج لي ! * يطالب البعض باستقالة اسامة عطا المنان ولكننا نقف ضد هذه الاستقالة . لان المريخ محتاج لي ! * انتهينا من قصة صلاح محمد صالح وحكاية .. ضربو كده .. لا ما ضربو كده .. بكون ضربو كده عشان كده العقوبة جاءت كده وبنحب بعض دي مؤكدة وعندك تمام ولا مش كده ..وكده وكده كده .. وانتقلنا الي قصة جدية اسمها (محتاج لي) وأنا اقول الحكم البتسواني ده صفر على ضربة الجزاء قبل بكري المدينة (يقع الواطه) مالو ! اتاريهو المريخ كان محتاج لي ! والمريخ ده يا كافي البلاء .. محتاج لي بكري المدينة ومحتاج لضربة جزاء ومحتاج لي تحويل رصيد ومحتاج لي دلاله ومحتاج كمان لرئيس جديد يا محمد عبد الماجد ! * قالوا ليك ناس العرضة جنوب من هسة بستعدوا للدلالة يوم سته !! وسته وسته جوني من النوم نصحوني .. السادس من مايو دلالة الكمبيوترات والكراسي الفاخرة والمكيفات .. معقولة بس الكراسي الفاخرة لزومها شنو .. ده اسمو البوبار في بيوت الايجار ! ما تقعدوا في كراسي عادية بدل الفضائح دي .. والبشوف ناس سلك بتكلموا ليك عن الطابق التاني والقعدة المريحة يقول الشئ ده حقهم .. تاري بالدين الاتاري ! لعب سااااكت .. * يعني احتمال المريخ ده لو دخل دوري المجموعات يلعب في استاد الخرطوم ! بعد الدلاله دي ما معروف البحصل شنو ! * غايتو الكمبيوتر لو فيهو تفاصيل انذارات اللاعبين انا بشتري .. اصلا بحب متابعة الانذارات ! * ناس الشركة الماليزية ديل شفوت .. ركزوا ليك على المكيفات والبيع في مايو شهر السخانة .. دي اكتر حاجة حتجيب ليكم قروش ! * تاني في مباريات المريخ الهتافات .. يا الله درون والمكيف فيرون ! * الزول البشتري كراسي المقصورة دي يعمل حسابو .. فيها كج غريب .. من جابوها المريخ ما غلب افريقيا في استادو .. الشركة الماليزية حجزت عليها بجاي المريخ غلب عزام وكابو سكورب والترجي بجاي ! كان في كرسي واحد بس قاعد .. شالوه في مباراة الترجي .. ضربة الجزاء دخلت ! * واحد ثقيل قال .. وقيع بكري المدينة ده لما كان في الهلال طوالي معاهو انذار للتمثيل .. هسة الحكم يصفر ضربة جزاء قبل يصل الواطه ! * ويا البتسواني .. عليك الله قوم صفر تاني وعز الله .. صفارة تاني وين .. الموضوع بقي جرس سااااكت .. * تررررن .. تررررن .. بعشرة .. انا بزيد عشرة !! مبروك عليك .. * سؤال أخير ؟ * ناس لجنة الاستئنافات ديل القال ليهم منو انو خطاب عقوبة بكري وقعه اسامة عطا المنان ؟ ما اسم مجدي موجود وتوقيع مجدي موجود !
