دق الدلجة محمد عبد الماجد مريخابي قالوا ليه (بكري المدينة) وقّفوه قال ليهم وقّفوا (علي جعفر) برضو نحن غايتو رأسنا ح يضرب. ح نقول شنو تاني؟. بكري المدينة (وقّفوه). نكتب عن منو؟. بكري دا لو طول في الايقاف ..ح يقطع لينا رأسنا ..وما ح نعرف نتصرف كيف؟. زول كان في اي فرصتين في المباراة بضيّع ليه اربعة فرص…(دي غير الخرفان البيضبحوها). في شوال البطاطيس بضيع ليه اربعة شوالات (و13 حمل).. في الكيلو بضيّع سبعة كيلو وكبش اقرن. شغال كدا بالجملة. يضيّع في الاقوان تقول عندو مزرعة دواجن. الزول دا يا ربي وقت يكون عاوز يدخل بيتهم بيدخل مدرسة الاساس؟. وقت يكون ماشي السوق – يا ربي بمشي البيت. وقت يكون عاوز ياكل ليه موزة ..يا ربي بكد ليه دومة. إلّا كدا. نحن (التحاليل) دي غلبتنا. اصلو ما عرفنا ليها. الاتحاد العام ما كان يوقف بكري المدينة ..الزول دا السنة كلها (جاري). وروني ح يقيف كيف؟. بكري في الاستوب ما قاعد يقيف. ما عندو فرامل. لو عندو فرامل بيضرب ليه حكم؟. انت يا بكري المدينة قالوا ليك نحن قاعدين نلعب كورة بقوانين الكورة في دولة المهدية. فاكرنا بنلعب بي قوانين حمورابي. طبعا حمورابي الضربة لو كانت في (الصعيد) بيحسوبها ضربة جزاء. والبونية لو المباراة كانت ما متلفزة ما فيها حاجة. حاجة عادية زي (الطحنية). مع ان (الطحنية) ما عندها علاقة بالموضوع دا ..لكن في قانون حمورابي موجودة. قانون حمورابي جاب اي حاجة. ما خلى ليه شيء. الاتحاد العام قطع رأسنا في بكري المدينة. تاني نلقى لينا (كشافات) وين عشان نضحك فيها ؟. رأسنا ضرب. لو كوبري المنشية فتحوه ..تاني إلّا نكتب ليكم عن حملة مكافحة الملاريا. نكتب شنو؟. الجقور مالها؟. الجقور عيشتها تطير. عنكبة ما بلعب طوالي – وعلي جعفر طلعوه من التشكيلة وبلة جابر اختفى في ظروف غامضة. بلة مع (الخرفان) الكتيرة دي لا فاضي ليكم ولا حاجة. ولا عندو وقت عشان يعكس ليه كورة من كورنر. بدل يعكس ليه كورة – احسن ياكل ليه مرارة. الاتحاد العام لكورة القدم السوداني اوقف بكري المدينة الى حين مقابلة اللجنة المنظمة. واحتمال بكري المدينة بعد مقابلته للجنة المنظمة يوقفوه (سنة). دا لو ما ضرب ليه زول من ناس اللجنة. اعملوا حسابكم. زول ضارب ليه (حكم) بونية…الكلام دا في الحفلات بقينا ما قاعدين نشوفو. في الدافوري اختفت حكاية (البونيات) دي. بكري المدينة في شندي عاوز يضرب ليه حكم بونية. صاحبكم يكون فاكر المباراة ما متلفزة. تكون شايله حماسة مباراة عزام. فاكر الحكم اجنبي. زول قبل اي مباراة بيضرب ليه خروف ..ما عاوزنو يضرب ليكم الحكم. البضرب الخروف – بيضرب الحكم. المضحك ان مجلس المريخ الذي يتحدث عن السلوك وعن الصحف الرياضية رفض عقوبة بكري المدينة. وينها الاخلاق؟. وينو الانضباط البتتكلموا عنو؟. انتوا يا بتوع السلوك. متوكل احمد علي ..لا بقدر يدفع ولا بقدر يساهم بي حاجة. متوكل بيظهر في مثل هذه الاحداث ..عشان بس يبرر وجودو. زولكم ما زول قروش. مهمتو في المجلس التصريحات. عاوز يعلن عن وجودو. المعنى انا موجود. انا قاعد. يقول ليه كلمتين ..ويختفى على كدا. جماعتكم قالوا ان الاتحاد العام بيتسهدف المريخ. اتحاد معتصم جعفر. اتحاد اسامة عطا المنان. اتحاد مجدي شمس الدين. ديل بيستهدفوا المريخ. ديل بيخدموا المريخ اكتر من متوكل أحمد علي. اكتر من عبدالصمد ذاتو. وروني بيستهدفوه كيف؟. ديل بيستهدفونا نحن القطعوا رأسنا في بكري المدينة. بعدين تعالوا هنا انتوا ما قلتوا عاوزين الانضباط. الانضباط دا انتوا فاكرنو (شعيرية). قايلنو (سكسوكانية). زلابية. انضباط شنو بدون ايقاف لاعب ضرب ليه حكم؟. انتوا منتظرين بكري المدينة يكتل ليكم قيتل عشان يوقفوه ليكم. اما الذي سوف تضحك له هو ما صدر من (بيانات) من روابط المريخ. قالوا شنو؟. قالوا روابط المريخ ترفض عقوبة بكري المدينة. بالله. تعالوا دورها انتوا عليكم الله. الله تعالوا امسكوا الاتحاد. من متين كانت عقوبات سوء السلوك بتحددها الروابط. جماعتكم ديل بكونوا صدقوا. قبل كدا في مباراة مع مريخ الفاشر طلعوا ليهم (الشرطة). طلعوا ليهم الشرطة برة الملعب. في مباراة شندي عاوزنهم يطلعوا ليهم (الحكام). وفي سيكافا كان المريخ اعتدي على سيمبا والمباراة اتلغت …اللجنة المنظمة اعتبرت ان هذا الجمهور هو جمهور سيكافا. المباراة مات فيها (صحفي) ..مع ذلك قررت اللجنة المنظمة اعادة المباراة والمريخ كان مهزوم في المباراة التى لم يسمح جمهور المريخ من مواصلتها. جماعتكم على (التعويدة) دي ..بكونوا متخيلين …الاتحاد يعاقب ليهم الحكم (المفلوق). ويقولوا ليه انت بتتفلق ليه؟. اتفلق ليه؟. البخليك تقيف قدام بكري المدينة شنو؟..عشان يضربك (بونية). كان تتخارج وتشوف ليك صرفة. انت ما عارف بكري زول منفعل. ما عارف ؟..ما كلموك. لذلك بكري المدينة اصلو ما غلطان ..غلطان الحكم. عليكم الله قون عماري دا ..هسع ما بخلي الزول يضرب ليه (60) حكم. ممكن مجلس المريخ يستأنف ..ويقول ان قون عماري كان مستفز شديد. علي جعفر تقول (حلاق) صلح ليك الكورة ..الكورة ماشه في (الواطة) لقاها ليك علي جعفر قومها من الارض. الكورة اتصلحت. المعز محجوب قايل نفسو بيلعب في الهلال الى الان ..فاكر ناس مساوي واتير بطلعوها. ما عارف حاجة. الكورة جاءت لي عماري …عماري ما كضب لعبها بصورة خليفية في المرمى. المعز محجوب قبل ما ينزل في الواطة لقى ليك الكورة في القون. كل من جمال سالم..في زول من الله خلقكم بتعوق في (التسخينة). نوع الحالة دي عليكم الله ما بتخلي بكري المدينة اول حكم يقابلو قدامو يضربو (بونية). الحمدلله ما كانت معاه (سكينة). برضو جاءت سليمة. جماعتكم رجعوا من شندي …خسرانين اي حاجة. اول حاجة خسروا تلاتة نقاط. من الدقيقة العاشرة بيبحثوا عن التعادل ما لامين فيها. تاني حاجة فقدوا بكري المدينة للايقاف. اول مرة اشوف لي مهاجم يوقفه الاتحاد المحلي ..وفي الطريق ايقاف الاتحاد الدولي. وكل ايقاف بي طريقتو. كل ايقاف ما عندو علاقة بالايقاف التاني. يعني بكري المدينة موقوف (تربيع). ايقاف بواسطة الاتحاد السوداني. وايقاف بواسطة الاتحاد الدولي. دي كارلوس ما حصلت عليه. وفقدوا علي جعفر لعوامل نفسية. ضفر ذاتو راح فيها. صاحبكم كان مصدق انو جاب ليه هدف في عزام. نسيتوا باسكال. الشيء الجميل ان مريخابي قالوا ليه الاتحاد اوقف بكري المدينة. المريخابي اتبسط ليك ..وقال ليهم علي جعفر ذاتو مفروض يوقفوه. علي جعفر ذنبو شنو؟. علي جعفر ما ضرب ليه حكم..لكن ضرب المريخ في مقتل. ……….. و امس انتصر الهلال وحافظ على الصدارة. ح نقعد نتفرج في باقى الافلام. نشوف البحصل شنو؟. يا ربي مباراة اليوم ضبحوا ليها كم؟. الامل عطبرة هو الذي يفترض ان يقدم استئناف في قرار ايقاف بكري المدينة. اكتر نادي متضرر من القرار دا الامل عطبرة. بشه في طريقه لأن يكون هداف الدوري. كاريكا رجع. وبكري وقفوه. صلاح الجزولي فتح. وهناك كيبي. وهناك محمد عبدالرحمن. الموضوع عاوز ليه صبر. الفاتح النقر ما قصر. بتلقوه ساعة الحارة. ………. السيدة (ل)….الفول بكون نفسو يبقى (طعمية). وقرّض على كدا.
