أصوات شبابية احتلت في وقت وجيز مكانتها في خارطة الإذاعات والفضائيات.. وبذات القدر وجدت من المدح والقدح ما يلفت الانتباه إليها .. ومضت بعض الأقلام القادحة إلى أن كل هذا الانتشار إنما هو مجرد علاقات عامة ناجحة من الشباب أو فراغ في برامج الوسائط الإعلامية .. لكن أن تجد هذه الأصوات مساحات واسعة في جدول سماع الناس فهذا ما يشير إلى أن لديهم – بعضهم – ما يغري بالمتابعة والاهتمام .. شموس واحدة من هؤلاء الشباب خرجت من نجوم الغد .. غنّت عربي ثم سرعان ما قدمت نفسها بالغناء السوداني الأصيل .. إلتقيناها مساءً بمكتب الأخ رئيس تحرير (قوون) الأستاذ طلال مدثر .. وبرعايته تم حوار بعيدا عن مساحيق التجميل .. تفاجأت ببعض إجابات جعلتني أعود لسماعها بمزيد من التركيز .. شموس .. ما حاسة إنك ظلمتي أهلك ؟ ما ظلمتهم .. بالمناسبة أنا اسمي الحقيقي نور الشام وفي كل مرحلة بشتهر بي اسم .. مرة أكون نور ومرة شامة والآن شموس .. منو الاختار ليك شموس ؟ أمي الله يديها الصحة والعافية باعتبار أني شمس البيت لأني البت الوحيدة وسط أخوان من متين جاتك فكرة الغنا؟ من وأنا صغيرة طوالي مع الراديو بتابع الغنا وخاصة المغنيات تلقاني بديت أردد معاها وعندي إحساس إنو صوتي أحلى من اي فنانة ..(يضحك)..وبعده انتقلت لمرحلة المسجل .. يعني شنو؟ يعني أجيب مسجل وأسجل وأسمع صوتي .. وغيرك أنتي ..منو القال ليك صوتك جميل ؟ أمي ..بتسمعني وأنا بدندن في البيت أو تسمعني أنا وأخوي بنغني دويتو ..وبالمناسبة أنا في مرحلة الأساس كنت بمدح ..وبشارك في برامج الصباح بتلاوة القرآن وكان صوتي فيها جميل جدا .. ..............................؟ أنا درست خلوة وحافظة كتير وبتجويد ياتو مثل أعلى شايفاه قدامك ودايرة توصلي لمستواه؟ (صمتت قليلا) والله أنا دايرة أوصل لمستوى بعيد جدا .. وأقدر أخلى أعمال خالدة زي ما الخالدات عائشة الفلاتية ومنى الخير خلّدوا أغنياتهن.. حاسة إنو الأجيال القدامكن دي حاصرتكم ..خاصة لما الناس يقارنوكم بيهن؟ بالعكس ده بخلينا نجتهد أكتر ونقدم أفضل ما عندنا .. في تصنيف لأجيال سبقتكم بأنها أفضل منكم ..و.... (تقاطعني) شوف أنا والله دائما بحب الغنا القديم وبحب شديد المبدعين الكبار وبحترمهم جدا .. والناس ليهم حق في تصنيفهم للزمان الفات بالعصر الذهبي ..وأقول ليك بصراحة أنا ما لاقية ألحان زي ألحان زمان .. إمكن لأنو زمان الجو كان صحي ..بشتغلوا بنظام الورش ويتحاوروا حول الأغنية لغاية تجهز .. الآن ؟ الآن بقت الحكاية حفلات .. يعني تفتش الشاعر والملحن البديك أغنية خفيفة تنفع للحفلات .. إنتي بتسمعي لمنو ؟؟ أحمد المصطفي يطربني حد الطرب ورغم ده ما اتغنيت ليهو حتى الآن .. وطبعا عثمان الشفيع واشتهرت بأغنياته ..وبرضو حسن عطية .. شكلك ما بتسمعي للشباب؟ لا لكن تركيزي دائما مع العمالقة ديل .. لكن يعجبني طه سليمان في الغنا الخفيف والتقيل .. بدي أي أغنية نكهتها .. ومن الفنانات ؟ حنان النيل .. النقد البتقدم ليك بضايقك؟ النقد مهم جدا للفنان .. لأنو لو فعلا هو نقد منطقي بتستفيد منه وتمشي بيهو لقدام .. لكن في نوع يتطرق للفنان في شكله وتعامله ده ما مفيد .. ...........................................؟ في زول أصلا ما بكون بحبك فمهما تعمل هو ح يظل يقول إنك ما بتعرف تغني وما عندك مستوى وخلافه .. ده شخص أنا ما أهتم لما يقول . منو البتحرصي يسمع شغلك قبل تطلعي بيها ؟ أولا ناس بيتنا .. أمي وأخواني .. وبعدهم فرقتي الموسيقية بستشيرهم وبتناقش معاهم .. في ناس بختاروا ليك غناك؟ لالا .. أنا لازم أحس اللحن والكلمات أولا حتى لو رشحها لي مين من كان ..لو ما حسيت الأغنية ما بقدر أحفظها .. عشان كده ما بحب زول يختار لي .. الحفلات الجماهيرية ممكن تكون مزعجة للفنانة ؟ أنا بالنسبة لي ما مزعجة .. أنا بحب الحفلات الجماهيرية والمسرح صعب ما أي فنان بقدر يغني فيه .. وأنا بحبو جدا لأنو بتكون مباشرة مع الجمهور وبتعرف في وقتها تواصل الناس معاك ووصولك ليهم .. حصل نزلتي من مسرح مدبرسة لأنو أدائك و تواصلك ما كان جيد مع الناس ؟ الحمد لله ما مريت بي تجربة زي دي .. لكن مهما أعمل بكون حاسة إني ما قدمت أفضل ما عندي .. ودي طبيعة عند الفنان .. نجوم الغد بلقى اهتمام ومتابعة كبيرة .. هل فعلا يستحق نقيف على ما قدم ؟ بالجد برنامج يستحق .. لأنو بصراحة قلل العناء للشباب .. إمكن لو نظرنا لتجارب من سبقونا بنلقاهم تعبوا شديد جدا عشان يوصلوا للناس .. الآن نجوم الغد بقدم الشباب في طبق من دهب وعلى الشاب الاجتهاد والمنافسة .. لكن رأيك شنو في قول إنو قدم فنانين أكتر من اللازم ؟ هو بقدم فنانين كتار دي في فترة المنافسات الأولية لكن الفنان الحقيقي هو البستمر وديل ما كتار للدرجة المزعجة دي .. أنتو في نجوم الغد كنتو في الدفعة الكم ومعاك كم ؟ الدفعة 14 .. وكان معاي ستة وتلاتين شاب وشابة .. وكم الذين صمدوا وتواصلت مسيرتهم ؟ من دفعتي فيها كتير من المتميزين ..فهيمة وعثمان بيكا وميرفت عمر ونادية الطيب ومكارم بشير وشول منوت الذي غادر إلى دولة جنوب السودان .. وقدم بنات أكتر من الأولاد؟ إمكن لأنو البنات بصمدن ..بصراحة البنات دايما مثابرات ..ما في الفن بس ..لا البت تلقاها طالبة أو موظفة وترجع البيت تلقاها شغالة وهنا وهناك بتحقق عمل كبير .. ولو شفت نتيجة الشهادة السودانية السنة دي بتلقى البنات أكتر في المائة الأوائل من الأولاد .. الشكل عندو دور في إظهار البنات وأختيارهن من جانب البرنامج .. جمهور أو الآخرين ؟ الفنان محتاج يكون جميل في كل شي .. في زول حسيتي إنو إتظلم في دفعتك أو غيرها من دفعات البرنامج ؟ أعتبر إنو دفعتنا كانت أقوى دفعة .. وفيها عدد كبير من الناس المتميزين لكن سنة البرنامج بتحدد 3 بس يطلعوا .. ومن الناس الكنت زعلانة عليهم شديد مكارم بشير لأنها أبعدت قبل النهائيات ..والحمد لله الآن أثبتت للناس إنها عندها موهبة كبيرة .. وفي برضو وضاح وحازم .. نسمع شهادتك حول برنامج (أغاني وأغاني) ..؟ أنا بعتبرو بعد نجوم الغد قدم لي الشهرة وقدمت نفسي فيه بشكل محترف .. وأنا اشتغلت في دورة 2010 و2012م .. في حساسيات في البرنامج بين الكبار والجدد ؟؟ لا والله بالعكس جو البرنامج جميل جدا .. ما عدا الغيرة الفنية بس ودي إيجابية منو الأقرب ليكم من النجوم الكبار ؟ أنا أول يوم جيت خاشة لاجتماع البرنامج في 2010م وما كنت قابلتهم أصلا وما فاهمة الحيحصل شنو ..وأول زول قابلني كان الراحل المقيم نادر خضر ورحب بي ترحيبا شديدا وجمال فرفور وعصام محمد نور طيب جدا ومحمود عبدالعزيز كان فرحان إنهم اختاروني للبرنامج .. لكن يظل نادر خضر دورو كبير معاي .. في زول كان بعمل ملاحظات على الأداء أثناء التسجيل ؟ البرنامج شغال بنظام الورشة ..أي زول من أعضاء فريق البرنامج من حقو يقول ملاحظاتو والناس بتديها اعتبارها .. منو البديك ملاحظات على شكلك؟ بنات خالاتي وصديقاتي وناس البيت وأنا عندي زولة مختصة بالميك أب.. في اتهام ضدكن أنكن كفنانات - والمذيعات برضو – بتسعين نحو تبييض البشرة ؟ (تضحك) لا لا لا أبدا ..شوف البياض عمرو ما كان هو عنوان الجمال .. وما في أجمل من الطبيعة وأنحنا طبيعتنا السمار .. وشنو الكريمات الكتيرة دي ؟؟ أبدا ..بس الواحدة بتكون دايرة تظهر نضرة كده ومشرقة .. الكريمات بتكلفكن كتير في الشهر ؟ (تضحك) ..قصدك المكياجات ؟ نقول المكياجات ؟ طبعا ما في حاجة رخيصة .. بالقرش والتعريفة كده ..بكلفك كم ؟ حسب الماركات .. في ناس بشتروا رخيص وفي ناس لا .. دايرين ماركة .. الماركة دي بكلف كم ؟ في بدرة بتكلف بين 900 إلي ألف جنيه ..وبعد داك على حسب الاستهلاك .. الاستهلاك حسب الشغل ؟ ما شرط .. أنا شخصيا ما قاعدة أربط حاجاتي بالتلفزيون والحفلات .. منو البحدد ليك عداداتك وارتباطاتك ؟ ما دايرة أقول ليك مدير أعمال .. لأنكم لاقيتو فيه انتقاد كبير ..ديل أولاد متين العملوا مديري أعمال ؟ أنا بسميهو منسق .. ودورو مهم جدا .. وما جميلة تكون إنت فنان تقوم تتفاصل مع الناس في القروش .. بتشتغلي حفلات أعراس ؟ وكتير .. الدلوكة ما أثرت سلبا على حفلاتكم؟ لا .. أبدا .. أذواق الناس واسعة .. وشموس أكاديميا ؟ أنا تخرجت من آداب إنجليزي والحمد لله كنت في امتحانات التخرج بالتزامن مع المراحل النهائية من منافسات نجوم الغد وقدرت أتفوق هنا وهنا .. ما غنيتي بالإنجليزي؟ لسة لكن ناوية وقريب جدا .. مهم عشان تنتشري تغني عربي ؟ السوداني مهم يقدم نفسو للناس بي غنانا وبي سلمنا .. وفي تجارب سودانية من سيد خليفة مثلا تقول إننا ممكن نوصل للناس..إنت عارف إنو أنا كنت بغني عربي لأم كلثوم وفيروز ومحمد عبدالوهاب ..بس قالوا طبيعة نجوم الغد تفرض علينا الغنا سوداني بس..
وبعيدة عن سوق الكاسيت؟
لحسن الحظ إني دخلت التجربة دي قبل 3 شهور وسجلت أول ألبوم خاص وح ينزل بعد العيد ..اسمو(قلبي المعاك) وعملت منه 3 فيديو كليب وصورتها وجاهزة الآن للبث
صورتيها وين؟
مثلا أغنية (مظلومة) من كلمات الحلنقي وألحان عماد يوسف صورتها في المحيط الأطلسي في تونس والمخرج يس نيلز .. وأغنية (الكان قريب) صورتها في الفجيرة والمخرج حسن مصطفى (قلبي المعاك) من كلمات الشاعر الكبير صلاح حاج سعيد وألحان الفنان علي السقيد دي برضو في الأمارات..الألبوم كله خاص إلا أغنية واحدة مسموعة لحنان النيل ..
شموس والكورة ؟
طبعا بحب الهلال شديد ..وبتابع دائما متابعة مبارياته ..لكني بكون مشدودة جدا لمباريات المنتخب الوطني ولما يكونوا لاعبين برة السودان بكون نفسي اكون معاهم وأشجعهم
في فكرة للزواج؟
الفكرة موجودة طبعا ..وأن شايفة بعد كده مفروض يكون..
في مشروع الآن يعني ؟
لا
طيب في خيارات ؟
(تضحك) الخيارات موجودة طبعا ..
لو حصل تفضيلك بين الحياة الزوجية والفن؟
بصراحة الحياة الزوجية لابد منها فيها تكملة لنصف الدين وتحقق الاستقرار النفسي ..ولو بقى تختار بين الفن والحياة الزوجية يبقى الحياة الزوجية ..
في معجبين مزعجين ؟
هوما بقدر أقوليك إنو معجب مزعج ..ممكن تقول معجب بدون حدود..
شنو يعني الاعجاب البدون حدود ده؟
يعني بكون ديرين يسمعوا منك كل أخبارك العامة والخاصة ويشوفوك في أي حتة ..وكده .. وبرضو هم درجات ..
كيف يعني؟
يعني مثلا في واحدين بكونوا معجبين بيك في أغنيات أو أغنية محددة ..وفي واحدين بكونوا معجبين بيك كلك كده ..
ممكن تصنفي معجبينك بالعمر ؟
وقت كنت في فترة نجوم الغد ولأني كنت بغني لعثمان الشفيع كانوا كلهم كأعمامي ما شاء الله..والحمد لله بعد أغاني وأغاني لقيت في شباب بقت تسمع للأغنيات القديمة المعتقة ..وأفتكر لو غنانا الجميل ده كله جددناه ممكن كل الأجيال تسمعه ..
تصدق معظم الطلبات سواء من العرسان أو المعازيم بتكون أغنيات استماع زي أغنيات عثمان حسين أو الشفيع أو حسن عطية ..إمكن لأني اشتهرت بالنوعية دي من الأغاني ..حتى لو الناس كانوا برقصوا بعدها بصفقوا لي ..معناها سامعني .. بريحك يهججوا ولأ يسمعوك ؟
صحي مرات تشوف في حق للناقد للنوع ده من الغنا لكن من زاوية تانية تعذر الشباب وذوقهم لأنو دي لغتهم وده عصرهم وإيقاعهم ..لكن صراحة في كلمات ركيكة وبتضايقني جدا لكن ما شايفة إنها ح تأثر على الأغنية السودانية ..فورة وح تنتهي بسرعة ..
حياتك اختلفت بعد النجومية ؟
أكيد
وعلاقاتك القديمة مع الأصدقاء والجيران اختلفت برضو ؟
زمان كان عندي زمن أمشي مناسبات ..أزور الجيران وأقعد أتونس ..الآن لا ..ممكن تكون في مناسبة في الحلة وأنا ما موجودة زي زمان .. في ناس بقدروا يستوعبوا تغيير نمط حياتي ..وفي ناس لا ..
صديقاتي نفسهم أم حصل تحديث ؟
كل زمن بقترح ليك أصدقاء جدد ..لكن الحمد لله عندي صديقات من الإبتدائي والثانوي والجامعة ومتواصلين معي وجود صداقات جديدة في مرحلة الفن ..
شموس منقطعة عن عد الفرسان ودي منطقتك ؟
(تضحك) يا سلام على غنا كردفان .. صحي أنا ما غنيت ليهم لغاية الآن لكن بجهز في ألبوم ح يكون فيه غنا كردفان بكل إيقاعاتها وتنوعها إن شاء الله في 2016م ح يصدر ..
وأغنية تتمني يسجلوها باسمك؟
الشاغل الأفكار للراحل المقيم عثمان الشفيع عليه رحمة الله.
