أكون قاصد أكتب (الأهلي الخرطوم) بلقى نفسي بكتب في (الوحدات الأردني) والله يا حاج نحن مع قطوعات الموية دي بقينا نشترى (اللبن) عشان الموية البزيدوها ليهو مرات بكون عاوز اوصف لي زول (طرمبة) – اقوم بدون ما اشعر اقول ليه (الوحدات الاردني)
يشيلوها في (الفطور) ويجيبوها في (السحور)..نوع دا يقولوا عليه شنو؟..في حاجة ممكن تتقال غير اننا بقينا نتسحر بالكهربة
· الزول لمن يكون عاوز ليه سبب بكون ظاهر.
· زول متسبب.
· تكون لابس ليك (نضارة) – الزول بدون سبب يقول ليك (النضارة) دي (نظر)؟.
· لا سمع.
· تركب ليك فى حافلة ..وتختار ليك (ركن) عشان ترتاح في (الواتساب).
· تطرف شمال زي جعفر عبدالرازق.
· شوفوا الزمن اتغيّر كيف؟.
· زمان وقت تركب ليك حافلة بتختار (الشباك) عشان تعاين في الشارع وما في زول يكتر معاك الكلام.
· هسع الواحد بقى لمن يركب ليه حافلة بيختار ليه (ركن) عشان يأخد راحتو في (الواتساب).
· في ناس بتشمروا.
· عاوزين يعرفوا اي شيء.
· ان وصلتك رسالة (واتساب) تلقاهم اتكوموا ليك في شاشة موبايلك.
· تلقاهم جروا على (الرسالة) قبالك.
· وفي ناس كمان بنتظروا (ردك) – ح تكتب شنو؟..ح تقول شنو في السخانة دي.
· يراقبوك في الكلام البتكتبوا في الواتساب.
· تكون قاعد ليك في كرسي في الحافلة – يجي زول طالع يقول ليك : (المقعد دا قاعد فيه؟).
· وانت قاعد – تصنقع في الزول لمن تتهجم.
· لا واقف.
· الزول لمن يكون عاوز ليه معاك سبب ما بتلفت.
· بلقى السبب.
· الاسباب في الزمن دا كتيرة..الزول لو عاوز ليه (مشكلة) بلقاها.
· عمك (شيخ الدح) يوم المريخ يكون عندو مباراة بيكوس ليه سبب معاك – عشان يعمل ليه مشكلة.
· ببدأ يومو بي مشكلة من صباح الرحمان ...تلقاه عامل شبطة مع سيد اللبن.
· جايب لي (لبن) كلو موية.
· حاجة (التومة بنت مسمار) تطلع من بيتها وتقول لي (شيخ الدح) هي (الموية) وين يا حاج؟..والله يا حاج نحن مع قطوعات الموية دي بقينا نشترى (اللبن) عشان الموية البزيدوها ليهو.
· الموية بقت اغلي من اللبن.
· زمان وقت الموية بي خيرها – كانوا بزيدوا اللبن (موية).
· هسع بقوا يعملوا العكس.
· بقوا يزيدوا الموية (لبن).
· الشاي السادة بقى اغلي من الشاي ابو لبن.
· الموية مافي..اعمل ليكم شنو؟.
· اغشكم.
· اقعد اجمّل ليكم في الحاجات.
· موية مافي.
· والكهربة بقوا يجيبوها ليك ويشيلوها تقول نحن في سنة 6.
· دي سخانة يقطعوا فيها (كهربة).
· يوم داك عندنا زول كبير في السن شوية ما بستحمل قطوعات الكهربة.
· الكهربة قطعت – ما عرف يمشي وين؟.
· زولكم نام – قام مع السحور لقى الكهربة جات.
· شغل المراوح والمكيفات ورجع نام تاني ...كوز موية ما شربو.
· الصباح قالوا ليه يا حاج انت امس اتسحرت بي شنو؟.
· قال ليهم اتسحرت بالكهربة.
· الكهربة بقوا يجيبوها لينا مع (السحور).
· يشيلوها في (الفطور) ويجيبوها في (السحور).
· نوع دا يقولوا عليه شنو؟.
· في حاجة ممكن تتقال غير اننا بقينا نتسحر بالكهربة.
· مرة نتسحر بالمروحة.
· ووقت نتقل في السحور بنتسحر بالمكيّفات.
· وشيخ الدح يوم مباراة المريخ – بقعد يفتش في المشاكل.
· الشافع في الحلة يجي مار فيه ..بثبّتوا ..بقول ليه يا ولد المرة الفاتت موش انا رسلتك ..واديتك عشرة جنيه قلت ليك امشي جيب لي (امواس حلاقة) ..شلت القروش وما رجعت لي – لا جبت الامواس ولا رجعت القروش.
· بقيت زي ناس المحليات ..يشيلوا رسوم النفايات وما يجيبوا لينا عربية النفايات.
· الولد بقول ليه يا عمو دا ..ما انا ..والله انا ما شلت منك قروش.
· شيخ الدح بقول ليه دا انت بي عويناتك المقلبات ديل ..زي (المرايات) المركبة غلط.
· او زي (الستائر) الداقنها غلط.
· فيها عوجة.
· الناس في الحلة بقت عارفة اعصاب (شيخ الدح) يوم المريخ يكون عندو مباراة – بقدروا حالتو.
· عارفين اعصابو بتبوظ.
· تجي لابس ليك قميص (ابيض) فوقو ..بقول ليك يا جنا قميصك دا موش كنت لابسة يوم (الوحدات) ضربت المريخ سبعة.
· براك جبت سيرة الوحدات.
· دا يوم يجيبوا فيه سيرة (الوحدات) لو ما عاوز ليك مشكلة.
· وشيخ الدح ..يوم يشوف (عثمان) ود خالتك البتعمل (زلابية) العيد وتقسمها في الحلة – يوم يشوفو طالع في رأس البيت بصلح في (الطبق).
· يحول فيه شمال وجنوب زي العروس..بقوم (شيخ الدح) يمشي عليه ..وبكورك لي عثمان وبقول ليه انت عاوز تشمت فينا..تصلح في (الطبق).
· تصلح في طبقك من بدري.
· نفس حركاتك دي كنت بتعمل فيها يوم مباراة المريخ والوحدات.
· الزول دا اتوهم.
· اتوهم بالوحدات.
· الوحدات الدخلها الليلة شنو في الموضوع؟.
· براكم يا ناس المريخ بتفتحوا ليكم في سيرة ما حلوة.
· اصلو دا ما يوم يجيبوا فيه سيرة (الوحدات).
· مفروض ما يلمحوا ليها.
· ما كويس كدا.
· يقوم يحصل عليكم ما حصل في مباراة الوحدات.
· ما عارف ليه الليلة من دون الايام (الوحدات) بتتعارض لي في العمود دا؟.
