مجلس الهلال عليه ان يخاطب الاتحاد العام ويثبت موضوع (صدارته) للممتاز - دي يا الكاردينال لا عاوزه لوزان – لا عاوزه الحارة مية """""""""""""""""""""""""""""""""""""""""" الاتحاد العام قدر ما عمل واتحايل من اجل مصلحة المريخ – كان الهلال يفوز بالبطولة """"""""""""""""""""""" المشكلة البعيشو فيها المريخاب الآن – ان الهلال الذي يتصدر مجموعته يمكن ان يواجه المريخ وصيف مجموعته """""""""""""""""""""""""""""" ردوا للهلال حقوقه ..واحسموا فوضى الاتحاد العام وتفلتات القناة الناقلة التى تقدم معلومات مضللة """""""""""""""""""""""""""""""""" • نحن اسياد بلد نقعد نقوم على كيفنا. • على كيفنا. • نقعد نقوم. • الكلام دا نحن طبقناه بالورقة والقلم في بطولة الدوري الممتاز. • الاتحاد العام قدر ما عمل واتحايل من اجل مصلحة المريخ – كان الهلال يفوز بالبطولة. • يختاروا حكامهم براهم. • يطلعوا (الشرطة) برة الملعب. • ضربات جزاء وهمية. • طرد لاعبين بصورة غير شرعية. • ينتفوا سلك عربية التلفزة. • ينقلوها. • ما ينقلوها. • يجيبوها ارضي. • برضو ..الهلال بطل الممتاز – ارقام مدهشة ..وانجازات تحدث عنها الاتحاد الدولي لكورة القدم. • يجيبوا طمبل. • كلتشي – مجاهد - ريتشارد – الباشا – البلدوزر – علاءالدين يوسف. • ديل جابوا هيثم مصطفى ...ولحقوا حتى بكري المدينة...المعز محجوب. • عمر بخيت في الاهلي الخرطوم لحقوه. • وبرضو الارقام خالصة للهلال. • فروقات شاسعة. • وارقام خيالية. • بي وليد علاءالدين ..بي محمد عبدالرحمن ..اطهر الطاهر – الصيني – والكسمبر. • والهلال بطل للممتاز. • سيد البلد فعلا. • بطولة الممتاز بصورتها الحالية – (هي الصورة اقرب للدوري المحترفين)..حقق فيها الهلال ارقام قياسية. • ارقام (خرافية). • اي حاجة عملها الهلال في الدوري الممتاز. • الممكن والما ممكن. • اي حاجة. • الهلال في بطولة الدوري ..اي حاجة في (الوصيف) طبقها. • جيب لينا ولي امرك. • امشي اشتغل الواجب المدرسي دا في البيت. • لو ما جبت قروش الحصة بكرة ما تجي. • صالون حلاقة بس. • مرة يشيلوا الكورة ويطلعوا. • نسيتوها. • كورة الى الآن ما معروفة مشت وين؟. • الى وقتنا هذا الكورة في عداد المفقودين. • ومرة نخليهم يتقدموا ب (11) نقطة. • ونجي نفوز بعد دا كلو. • اي حاجة عاوزنها عملناها. • فزنا بي بطولة الممتاز عدد من المرات بدون خسارة ..(ما تعدو). • وفزنا بالبطولة بفارق (18) نقطة. • 18 نقطة كان الفارق بين الهلال والمريخ. • وفزنا - والهلال في موسم واحد قاده ثلاثة مجالس ادارة. • فزنا - والهلال يشرف عليه فنيا في موسم واحد 8 اجهزة فنية. • تاني نعمل شنو اكتر من كدا؟. • فزنا خمس مرات بالممتاز على التوالي. • انسحبنا. • ورجعنا ..وفزنا بالممتاز. • على كيفنا. • الفارق بين انجازات الهلال والمريخ في الدوري الممتاز – زي الفارق بين انجازات المريخ والخرطوم الوطني في البطولة نفسها. • ارقام وألقاب لا تحصى ولا تعد. • مع ذلك يأتي معلق قناة بي ان سبورت كما اشار الرشيد علي عمر في كتابة سابقة ويغفل كل هذه الانجازات في مباراة وفاق سطيف والمريخ. • هذا الامر يجب ان لا يمر ساكت. • الموضوع دا خطير. • كمان عاوزين تاكلوا بطولاتنا. • عاوزين تزوروا التاريخ زي (البصمة). • ادارة نادي الهلال يجب ان يكون عندها موقف من القنوات الناقلة للبطولات ..حتى لا يقدموا معلومات غير حقيقية وعلى حساب الهلال صاحب الانجازات الاكبر في بطولة الممتاز. • معلق قناة بي ان سبورت في مباراة وفاق سطيف والمريخ – إلّا كان بتكلم عن بطولات اخرى. • بقطع ليه في حاجات من رأسو. • او بتكلم برة رأسو. • اهمل المعلق اهم بطولة محلية وهي البطولة التى تؤدي الى المشاركة في بطولة الاندية الافريقية للابطال. • المعلق اهمل تلك البطولة – اهمل الطريق الذي يؤدي الى هذه البطولة وخرج يحدثنا عن كأس السودان. • كأس السودان البطولة التى تلعب في مكاتب الاتحاد ..يتحدث عنها معلق المباراة ويهمل بطولة الممتاز. • عليكم الله المعلق دا عندو رأس. • مجلس الهلال يجب ان يكون عندو موقف. • ويجب ان تقدم في مباريات الهلال سجلات الهلال وانجازاته الضخمة في بطولة الممتاز..عشان يضع المريخ في وضعه الطبيعي. • ما معقول معلق يجي في قناة الناقلة للبطولة (راسب في التاريخ) عشان نشاهد مباراة في البطول بي قروشنا ..ويجي بعد دا كلو يحدثنا المعلق عن معلومات غلط وما عندها اي اساس. • بعدين القال ليكم منو المريخ متصدر الممتاز؟. • كيف تخرج هذه المعلومة لمعلق مباراة المريخ وفاق وسطيف ..وهناك قرار رسمي من لجنة استئنافات باعادة مباراة المريخ والامل. • هذا يعني تلقائيا اسقاط ثلاثة نقاط من حساب نقاط المريخ. • اذا لم يحدث ذلك – إلّا لجنة الاستئنافات دي (لجنة سيول وامطار). • او لجنة اولياء امور الطلاب. • او لجنة شغالة في الميناء البري. • يجب ان يضع حدا لمثل هذه التفلتات ..واذا ما قادر الاتحاد العام اعادة مباراة المريخ والامل يفترض ان يضع الهلال في صدارة المنافسة. • ما عاوزين تعيدوها ما تعيدوها بي طريقتكم. • لكن كمان من حقنا ما نحسب ليكم نقاط مباراة غير قانونية. • الزميل حسن فاروق كان قد كتب في هذا الموضوع كثيرا – ونحن نرد عليه حقه في ذلك. • مجلس الهلال عليه ان يخاطب الاتحاد العام ويثبت موضوع (صدارته) تلك. • دي يا الكاردينال لا عاوزه لوزان – لا عاوزه الحارة مية. • ما تقعدوا تجاملوا على حساب الهلال. • ردوا للهلال حقوقه ..واحسموا فوضى الاتحاد العام وتفلتات القناة الناقلة التى تقدم معلومات مضللة. • نعود ونقول (قانونيا). • وبالورقة والقلم. • المريخ وصيف (الممتاز). • وحكمة الله ..طلع المريخ برضو (وصيف) المجموعات. • وصافة برة وجوة. • ووصافة في الممتاز. • ووصافة في المجموعات. • (الوصافات) الكتيرة دي قاعدين فيها كيف؟. • حياتكم كلها وصافات. • يعني ان مرقتوا من الهلال – تقعوا في (وصافة) المجموعات. • المشكلة البعيشو فيها المريخاب الآن – ان الهلال الذي يتصدر مجموعته يمكن ان يواجه المريخ وصيف مجموعته. • طبعا المريخ احسن موقع يمكن ان يتحصل عليه في مجموعته – هو ان يكون (وصيفا) لمجموعته. • هذا اذا تأهل. • ولو المريخ جانا بي (وصافته) دي..بيتعب معانا. • نحن الوصافة المحلية – ما قاعدين نرحمه..اتخيلوا الوضع لمن يجينا وهو وصيف لمجموعته. • عشان كدا – احسن ليكم تتخارجوا من بدري. • الكلام دا لا بتقدروا عليه ولا حاجة. • احسن ليكم الخروج من المجموعات من ملاقاة الهلال. • ناس نزار حامد واندرزينهو ديل لا بتقابلوا ولا حاجة. • واحد بجيبها من النص. • والتاني اي مخالفة عندو امام صندوق (قون). • نحن جايبنو من البرازيل مخصوص للحاجات دي. • دي مهمتو. • من الكنبة للقون. • ............... • ملحوظة : الغريبة المريخاب بي وصافاتهم الكتيرة دي قاعدين يتفاصحوا. هوامش • فريق الزمالك ..اخرج عددا من الاغاني والفيديو كليبات بعد فوزه بالدوري الممتاز في مصر. • الهلال مفروض من الآن يرتب لاغنياته الجميلة للاحتفال ان شاءالله بالفوز باللقب الافريقي. • الهلال اصلا عنده اناشيد واغنيات جميلة. • اغاني الحقيبة المكتوبة في الهلال وعن الهلال ..هي برضو لا حصر لها. • يجب الاعتناء والرجوع لهذه الاغنيات. • مباريات الهلال القادمة في المقبرة امام التطواني ومازيمبي يجب ان تكون في اجواء احتفالية. • يجب ان يكون هناك ترتيب وتجهيزات منذ الآن لمباريات الهلال في نصف النهائي والنهائي. • اخرجوا اغنيات الهلال واناشيده وقدموها. • ناس المريخ ما يشيلوا الفكرة. • اصلا ناس المريخ ما عندهم اغاني حقيبة. • لكن الهلال عنده اغاني عديدة من اغاني الحقيبة. • مباراة الهلال غدا امام هلال الابيض ..لا نريدها ان تأتي على حساب افراح الهلال. • هلال الابيض يمتلك فريقا قويا ومحترما ..ويقوده جهاز فني كبير. • الهلال كان قد تعادل مع هلال الابيض في الدورة الاولى. • لذلك يجب ان يلعب الهلال مباراة الغد امام هلال الابيض بمسؤولية. • اي تقصير او استهتار يمكن ان ينعكس حتى على الهلال افريقيا. • الممتاز نحن ما بنقبل فيه تهاون. • هو بطولتنا المحببة. • جمهور الهلال مطلوب غدا ان يقدم دفعات قوية للاعبيه. • مطلوب على الاقل ان يشكرهم على ذلك الاداء والقوة. • جابوا من مازيمبي نقطة في رمضان. • وجابوا نقطة من التطواني في العيد. • تاني يعملوا ليكم شنو؟. • ............. • عاجل : الوصيف يبقى وصيف حتى في المجموعات.
