اذا كان في التلفزيون القومي وقدام كل الناس وعلى عينك يا تاجر يحدث ذلك – ماذا يحدث في غرف الاتحاد العام المغلقة؟ """"""""""""""""""""""""""""""""""" فيصل سيحة ممكن يطلع ليكم يوم الجمعة القادمة ويقول ليكم (شكوى) المريخ في الامل عطبرة صحيحة """""""""""""""""""""""""""""" ممكن سيحة يجيب زيكو شايل الكورة ويقول لينا زيكو ما شال الكورة – الشال الكورة دا اسامة التعاون """"""""""""""""""""""""""""""""" يا جماعة ما في زول بلقط ليه حاجات من (تلاتة اسابيع) عشان يجي يدين الهلال ويثبت ان المريخ مظلوم """"""""""""""""""""""""""""""""""""""" • استهداف الهلال بدأ من (التلفزيون القومي) الذي اصبح مثل الاذاعة الداخلية لاستاد المريخ. • لو في زول في السوق دا بيبيع ليه في (بصل) ما بيبيعو بالطريقة التى يعمل بها رضا وسيحة. • فرشو عديل كدا ..وجابوها على البلاطة. • نخشى ان يستمر الاستهداف من قبل الاتحاد العام اليوم وهو ينظر في (شكاوي) لو نظرت فيها (ملجة) ام درمان بتاعة الخضار ..بترفضها. • اذا كان في التلفزيون القومي وقدام كل الناس وعلى عينك يا تاجر يحدث ذلك – ماذا يحدث في غرف الاتحاد العام المغلقة؟. • رضا ضعيف لذلك توقع منه مثل هذه التصرفات. • والاتحاد العام اضعف ..ولا يملك قراره ومصالح قياداته كلها في يد جمال الوالي. • اهتم اتحاد كورة القدم السوداني بي (شكاوي) المريخ اكتر من اهتمامه بالمنتخب (الوطني)..فهو الذي حل لجنة الاستئنافات وادعى انها غير قانونية ليضيف لها (وجوه) جديدة على طريقة (زيتنا في بيتنا). • الزيت زيت المريخ. • والبيت بيت المريخ. • وهو الذي فشل او عجز تماما من اعادة مباراة المريخ والامل التى لعبت قبل اكثر من اربعة شهور. • الاتحاد الذي فشل في اعادة مباراة منذ اربعة شهور يجتمع الآن بدون خجل لينظر لشكاوي المريخ. • اتوقعوا اي حاجة ..وخليكم جاهزين ..لي اي شيء ..إلّا يظلموا الهلال. • فيصل سيحة ممكن يطلع ليكم يوم الجمعة القادمة ويقول ليكم (شكوى) المريخ في الامل عطبرة صحيحة. • يفتي ليكم فيها زي (ضربة الجزاء). • عادي الحاجات دي بتحصل في (عالم الرياضة). • برنامج شغال زي (الكوافير). • برنامج زي ايجار العجلات. • يشتغلوه ناس الهلال يعملوها ليك كلها (مسابقات). • يشتغلوه ناس المريخ يطلعوا ليك في المباراة الواحدة خمس ضربات جزاء لصالح المريخ حتى لو لم يكن المريخ طرف فيها. • بتحصل. • رضا وسيحة قاعدين ليهم في (تربيزة) تقول شغالين (تحويل رصيد). • تربيزتهم دي قدام محكمة اهلية ما بتصلح. • ورصيدهم كمان عشان تبقوا عارفين النوع الما بينزل ليك ... (الشبكة كعبة). • سيحة ممكن يجيكم ويتبرع ليكم في برنامج عالم الرياضة ويقول ليكم شكوى المريخ صحيحة. • الناس ديل اي حاجة عاوزها اعلام المريخ بعملوها. • البرنامج جاهز لتلبية طلبات المريخاب. • ديل لو قرأوا ليهم معلومة في عمود كاتب مريخابي بتقول (الخرطوم) عاصمة تركيا. • ممكن سيحة يطلع يؤكد ليكم الكلام دا...ويقول ليك الخرطوم عاصمة لتركيا. • لا بعرف ليك (تاريخ) ..ولا بعرف (جغرافيا). • ممكن يقول ليكم كدا – بي كل قوة عين : شكوى المريخ في الامل (صحيحة). • ليه يا سيحة؟. • عشان (المروحة) كانت شغالة في تلاتة عندما قدم المريخ الشكوي. • قالوا ليكم هو عاوز ليه (منطق). • ممكن يشترها ليكم عادي ..ولا يرمش. • كدي جيب لي الصورة يا رضا. • انت عاوز ليك (صورة) يا سيحة. • انت ضربة الجزاء بتشوفها في (الجرايد) ما في (التلفزيون). • وسيحة يلبس النضارة ويطلع (حيادو) ويقول ليك : • الفيفا بتقول في اللوائح عندما تشتغل المروحة في تلاتة الشكوى مضمونة. • الفيفا فرع جمال الوالي. • سيحة للمناسبات. • المناسبات وضربات الجزاء. • بعدين يا رضا انت لو عاوز تعتذر ..اعتذر براك ..ما تعتذر بي حقوق الاندية التانية. • ما تدخل (الهلال) طرف في اعتذاراتك. • المعنى المريخاب زعلانين من رضا ..يقوم سيحة ينبرش الانبراشة دي كلها. • ما كدا. • سيحة بعملها. • ورضا شغال ليك مع سيحة زي (الكورس). • نحن تعودنا على مثل هذه الاشياء من فيصل سيحة. • عادي عندهم. • ممكن فيصل سيحة يجيب ليه (طبق بيض) في عالم الرياضة ..ويقول لينا دا ما طبق بيض؟. • دا شنو يا سيحة؟. • دا (قالب طوب). • ممكن – الناس ديل اتقابلو كدا ممكن يعملوا اي شيء. • يجيبوا ليكم (ام فتفت) ويقولوا ليك الليلة عندنا طبق جديد ..طبق ام فتفت بي البشميلي. • عاوزين يدخلوا (ام فتفت) العولمة. • خلاص عاوزين يخربوها لينا ..ويطلعوها من مزاجنا. • الناس ديل بيطلعوا (ضمائرهم) برة الاستديو وبدخلوا بي (عواطفهم). • تقوم بينا العربية تودينا للسادة. • دا الفضل ليهم. • بس دا الناقص. • عليكم الله يا جماعة لو في عقل ..وفي انصاف وفي شوية (روح رياضية) كدا ..في زول ممكن في الدنيا يجيب مباراة هلال كادوقلي والمريخ ويقول ان هناك هدف للمريخ. • الكلام دا قبل شهر. • ويجيب مباراة المريخ وهلال الابيض ويقول هدف هلال الابيض ما صحيح. • دا بقى قصد عديل كدا. • ويجيب ضربة جزاء عبده جابر المهدرة ويقول مفروض يعيدوها عشان ضاعت. • كمان. • ما فاضل ليهم إلّا يهدوا لي عبده جابر كرتونة بسكويت هدية مع الضربة. • وسيحة بجيب مباراة الهلال والاهلي مدني ويقول ليكم (ضربة جزاء) الهلال ما صحيحة. • معقولة اربع حاجات يختاروها كدا لصالح المريخ في حلقة واحدة عشان تبين ان المريخ (ضحية) وان هناك استهداف للمريخ ..وان الخسائر التى تعرض لها المريخ دي كلها من (التحكيم). • في زول بعمل كدا ويرص ليه حاجات يمكن ان تعبيء جماهير المريخ وتخليهم يطلعوا من السلوك في المباراة القادمة. • يا جماعة ما في زول بلقط ليه حاجات من (تلاتة اسابيع) عشان يجي يدين الهلال ويثبت ان المريخ مظلوم. • الكلام دا في (دكان ود البصير) ما قاعد يحصل. • بالطريقة دي ممكن سيحة يرجع لينا لي عام 1996 ويقول لينا المريخ عندو ضربة جزاء صحيحة في مباراة القمة زي ما بقول ابوشيبة. • وممكن يختار ليه حالة من موسم 2002م ويقول المريخ عندو هدف ما اتحسب. • ممكن سيحة يجيب زيكو شايل الكورة ويقول لينا زيكو ما شال الكورة – الشال الكورة دا اسامة التعاون. • اسامة التعاون يا سيحة!!!!. • يبدو ان رضا مصطفي الشيخ يظن ان الكرسي الذي يجلس عليه لن يجلس عليه اذا لم يقل ان للمريخ (ضربة جزاء) صحيحة. • وان هدف هلال الابيض غير صحيح. • يا رضا الكرسي دا ما دائم ليه لي زول. • في كم زول قعد فيه ..ومشى منو. • اعتبروا. • واتذكروا كدا. • سيحة ممكن يقول ليكم يوم الجمعة القادم اذا ما سافر (اليونان) ان شكوى المريخ في هلال كادوقلي صحيحة. • ليه يا سيحة؟. • عشان العيد باقى ليه (19) يوم. • في علاقة بين العيد وبين ضربات الجزاء دي. • ايوا في. • الاتنين فيهم (تبرعات). • سيحة بتبرع بي ضربات الجزاء. • والعيد فيه التبرع بي جلد الاضحية. • ديل ما عاوزين ليهم علاقات. • ولا عاوزين ليهم سبب. • ديل جوا البرنامج بس عشان يخدمو. • الاتحاد العام ..ترك المنتخب السوداني تحت خدمة (الهلال والمريخ). • لو الهلال والمريخ عندهم معسكر ...المنتخب يلم لاعبيه من (المطار). • المهم الهلال والمريخ. • ولو المباراة ما مهمة ...اختيارات المنتخب يحددها الكوكي وغارزيتو...(مازدا) قاعد ساكت. • الناس الما بلعبوا مع الهلال والمريخ يمكن ان يمشوا المنتخب. • من المريخ يمشي المعز محجوب ..جابوه من (البيت) وليس من المريخ. • ومن الهلال يمشي صلاح الجزولي ولا في زول بقدر يقول حاجة. • دا الاتحاد حقنا. • دي كورتنا. • نحن في الاعلام لا نعفي نفسنا ...مقصرين مليون في المية في المنتخب. • لكن في النهاية المسؤولية مسؤوليه الدولة ومسؤوليه الاتحاد العام لكورة القدم. • الاتحاد هذا اذا كان بهذه الصورة ..عاوزين بيه شنو؟. • الاتحاد دا مفروض اربعة يوم ما يقعد. • .......... • ملحوظة : يا حليل شداد. • هوامش • لاعب منتخب الجابون اعتدى على صلاح الجزولي ..مع ذلك تم طرد صلاح الجزولي. • وقت فيها طرد – يا ريت لو صلاح اخد حقو بي ايدو. • الحقارة ما حلوة. • مازدا اعلن استقالته. • لكن برجع تاني. • يمكن مازدا زعلان المرة دي عشان الهزيمة تجاوزت الثلاثة اهداف. • حاجة تزعل. • الاربعة في النسور بشارة خير ان شاءالله لتجاوز سموحة. • الهلال في الممتاز ..في الكاس في افريقيا ..كلو تمام. • بالتوفيق ان شاءالله. • مهم ان المباراة اعادت نيسلون. • اربعة في الجابون. • واربعة في استاد المريخ. • الاربعات بدأت. • الموضوع دا خطير عليكم. • شكاوي المريخ كلها مفروضة الليلة. • ما عاوزين تأجيل وعدم اكتمال المستندات ..الحركات البتعملوا فيها دي. • الدوري ممكن يولع ..المباريات القادمة ما بتستحمل. • احسموا المواضيع من بدري. • ما تقعدوا تجرجروا لينا في الفاضي. • لو ما قادرين على الشغلة ..استقيلوا. • اصلو المنتخب خسران. • ......... • عاجل : الاهلي شندي ح يقابل المريخ في الممتاز والهلال في الكاس.
