ما في زول في الدنيا بيطلب ليه من اختصاصي كهربة سيارات ان يعمل ليه عملية قلب مفتوح في قلب سواق العربية العندو مشكلة في البطارية ناس اسامة عطا المنان خلوا ليك معتصم جعفر زي (سرحان عبدالبصير) في مسرحية (شاهد ما شافش حاجة) ادونا حاجة (قانونية) واحدة – والله مشتهين نشوف منكم (القانون) حتى لو كان ذلك القانون في معاقبة الهلال معتصم جعفر عندما يتحدث عن (القانون) مفروض يلبس ليه نضارة سوداء ويركب ليه (قناع) في وشو ويتنكر * حديث معتصم جعفر عن (القانون) – زي حديث (عباس ود شر النفس) عن الملف النووى الايراني. * وعباس ود شر النفس دا اسمو ما بعرف يكتبو. * او زي كلام (التوم ود تر الحجر) عن السلم الخماسي – وهو محمد وردي من محمد حسني مبارك ما بفرزو. * كترتوا (الزلابية). * معتصم جعفر عندما يتحدث عن (القانون) مفروض يلبس ليه نضارة سوداء ويركب ليه (قناع) في وشو ويتنكر ..محمد سيد أحمد ما يعرفو – عشان نصدقو لمن يتكلم عن القانون. * وعشان الموضوع ما يبقى ضحك على الناس ساكت. * ما في زول في الدنيا بيطلب ليه من اختصاصي كهربة سيارات ان يعمل ليه عملية قلب مفتوح في قلب سواق العربية العندو مشكلة في البطارية. * لكن هي (زلابية) نصاح ...الحبة قدر (القطية)...ليكم حق تضغطوا على (ضمائركم). * وما في زول عاقل في الدنيا دي بمشي ليه لي (صيدلية) ويطلب ليه (زيت فرامل). * لكن (الزلابية) بتخليكم تعملوا اكتر من كدا. * حكاية معتصم جعفر يتكلم عن (القانون) – ببقى امر بالنسبة لينا مضحك..فقد خرج معتصم جعفر (في زول بتذكر الاسم دا) اخيرا وقال ح نطبق القانون على الهلال. * الزول دا كان وين؟. * يا دوب وصلو خبر (الزلابية). * قانون شنو؟. * قانون حاوية المخدرات؟. * وإلّا قانون الشطة؟. * وإلّا اي قانون والسلام. * بالمناسبة دي في زول بتذكر ان معتصم جعفر هو رئيس اتحاد كورة القدم السوداني. * نسينا. * ناس اسامة عطا المنان خلوا ليك معتصم جعفر زي (سرحان عبدالبصير) في مسرحية (شاهد ما شافش حاجة). * قاعد ساي. * يا معتصم انت آخر زول تتكلم عن القانون. * انت الآن (ضيف) في الاتحاد العام ..اخبار اتحادك بتقرأها في عمود مزمل ابوالقاسم. * قانون شنو؟. * اتحادكم دا الحاجة القانونية فيه شنو؟. * اتحاد ما فيه اي حاجة قانونية. * ولا (مادة). * ولا (زلابياية) واحدة. * لجنة الاستئنافات العليا ...هي نفسها غير (قانونية) – تم ترقيعها بما يخالف المادة 55. * دا طبعا لو عندكم قانون. * انتوا (الترقيع) ما عندكم فيه مشكلة. * ولجنة الاستئنافات التى يقول عنها اسامة عطا المنان الآن ان قراراتها نهائية (زلابيتكم قوية والله) هي نفسها التى اصدرت قرار اعادة مباراة المريخ والامل منذ شهر مارس الماضي وظل القرار (6) شهور بدون تنفيذ. * (6) شهور بفحصو فيه. * واسامة عطا المنان بطلع في صفحتو يقول قرارات لجنة الاستئنافات نهائية – (انتوا الزلابية دي بتجيبوها من وين القوية دي؟). * الظاهر عليها (زلابية) خطيرة شديد. * قانون شنو يا معتصم؟. * وسكرتير الاتحاد العام مجدي شمس الدين يشغل منصبا مخالف للوائح الاتحاد الدولي ..(ما في حاجة اسمها سكرتير). * وبتتكلموا عن القانون. * ولا في حاجة اسمها وكالات سفر. * عندكم شنو (القانوني) – بكري المدينة يوقع عقد (قانوني) تعتمده الفيفا ..انتوا بتلغوه مع الهلال وبتقوموا تحفظوا حافز بكري المدينة من الهلال كأمانات في خزينة الاتحاد العام. * قانون شنو؟. * زلابيتكم اصلو ما طبيعية. * القانون وين وانتوا بتديروا داخل مباني الاتحاد العام لكورة القدم وكالات سفر. * تسفروا المريخ – وتدينوا المنتخب الوطني وتخصموا (حقكم) من دخل المباريات. * قانون. * وبتتكلموا عن القانون. * دي (جرأة) شنو؟. * انتوا (الزلابية) دي بتخليكم تقولوا كلام بر رأسكم. * الاتحاد العام الآن جزء من السلطة ..دخلتوا البرلمان بالمدير الفني للمنتخب محمد عبدالله مازدا ..وبتقولوا نرفض تدخل السلطة في قرارات الاتحاد العام. * دي اصلو ما شغل (زلابية). * طيب يا شطارين ..لجنة تسيير المريخ دي ..كونتها (الاممالمتحدة). * جابتها ليكم (الفيفا) مع (النجيل الصناعي). * وإلّا شلتوه الصرفة الاولى في ختة صندوق. * القانوني عندكم شنو؟. * واسامة عطا المنان بيبطل ليه قاعدة (وجوبية) في لائحة النظام الاساسي وبطلع ليه (قرار) باسم مجدي شمس الدين يسمح فيه بمشاركة بكري المدينة امام الامل. * دا قانونكم. * اسامة بخالف في قرار واحد النظام الاساسي وبخالف القانون المدني عندما يزور توقيع مجدي شمس الدين. * انتوا (زلابيتكم) دي بتخلطوا فيها حاجة. * ديل (المروحة) بدون ما يشغلوها بشوفوها شغالة. * بشوفها (مدورة). * وكلو من (الزلابية). * واسامة عطا المنان بطلع وبقول انا الذي وقعت القرار وانا الذي اصدرته ولو رجعت الايام للوراء تاني بعمل كدا. * بالله الزول دا في اتحاد ثانونية بنفع يشتغل. * المكابرة على (الخطأ) ما رجالة ...والتفاخر بالغلط نوع من العبط. * الموسم الآن يوشك ان يتنسف ..ثلاثة اندية انسحبت من منافسات الاتحاد واسامة عطا المنان بقول لو رجعت الايام للوراء تاني بعمل كدا. * ديل بتعلموا متين؟. * ديل قرأوا شنو؟. * معقولة (الزلابية) بتبلد الزول لهذا الحد. * كلو منك يا اسامة ...دخلت وزير الرياضة مع وزير العدل ..ووقفت حال البلد ..وبتقول لو رجعت بي الايام للوراء بعمل نفس الشيء. * في زول بفرح باللخبطة. * في زول بتبسطو (الكوارث). * القانون عندكم شنو؟..وفهمكم ليه ايه ؟..وبرمجة المباريات المعادة يصدر بعد 48 ساعة فقط من صدور قرار لجنة الاستئنافات. * قانون شنو يا معتصم جعفر العاوز تطبقوا لينا في الجرايد؟. * انتوا (الزلابية) دي بتخليكم تلخبطو في شوارع بيتكم. * ما بتعرفوا (بيوتكم). * دي (زلابية) غريبة شديد. * مالكم بتقولوا ليكم في كلام ..طالب في سنة تالتة اساس ما بقوله. * القانون ما بدلة. * القانون ما كرفتة. * القانون ما نضارة. * ديل يفهموهم كيف؟. * القانون ما (زلابية) – الزلابية دي حاجة براها – ما عندها علاقة باعادة المباريات. * القانون عندكم شنو؟. * اخراج الشرطة من ملعب المباراة؟. * القانون عندكم عرض قائمة الحكام للمريخ ليختار حكام مبارياته بالاسم. * دا القانون. * انتوا (الزلابية) دي بتعمل فيكم كدا ليه؟. * ديل ضعفين بشكل كبير جدا امام (الزلابية). * نقطة ضعفهم (الزلابية). * تجيب ليهم زلابية بعملوا اي شيء. * القانون هو معاقبة لاعب باثر رجعي؟. * بنسأل يا بتوع القانون. * هل القانون عندكم اعتماد تقرير مزور ..خرج اتحاد القضارف كلو وقال ان التقرير مزور. * دا قانونكم. * دي (زلابية) شنو يا جماعة البتخليكم تعملوا كدا؟. * زلابية بعد اعادة المباراة تخليكم تزورو التقرير. * ادونا حاجة (قانونية) واحدة – والله مشتهين نشوف منكم (القانون) حتى لو كان ذلك القانون في معاقبة الهلال. * يا ناس الوزارة. * يا ناس المفوضية – هل القانون هو ان تحتفظوا باستقالات مجلس المريخ مجمدة منذ مارس الماضي ...واخراجها متى ما اراد جمال الوالي اخراجها. * دا قانونكم. * انتوا ذاتو وصلتكم (الزلابية). * قانون شنو؟. * عليكم الله اتكلموا عن اي شيء – إلّا (القانون). * اتكلموا عن (الحوار الوطني). * ما في زول بيسألكم. * اتكلموا عن (القنفد). * قولوا اي حاجة – قولوا الحاجة التى تريحكم. * لكن (القانون) دا خلوه بعيد. * لخبطوا في اي شيء ..بس بلاش تتكلموا عن (القانون). * خليكم في (زلابيتكم) دي. * امير كمال وافق. * امير كمال رفض (الشيك). * امير كمال يوقع في الساعات القادمة. * خليكم في المواضيع القدركم دي...بلاش قانون. * نحن ما ناقصين. * يا معتصم جعفر ..ركز في وكالة سفرك. * في شركة اعلاناتك. * في اذاعتك الخاصة. * القانون ما تقرب عليه. * كفاية تحدث باسم القانون. * نحن بطنا (طمت). * فترنا من (الكضب) دا. * ............. * ملحوظة : الظاهر عليهم زادوا (الزلابية) شوية. * هوامش * * خالد النعسان – الزول دا لسه نايم وإلّا شنو؟. * الزول دا لو ظل (نعسان) كدا – التسجيلات بتفوتو. * لجنة تسيير المريخ (حمدي) الامل ما قادرين يسجلوه. * ديل قصتهم شنو؟. * الظاهر لجنة التسيير دي ما عندها علاقة بالزلابية. * مفروض الكاردينال يسجل (حمدي) في رديف الهلال ..عشان يعلمهم القانون كيف؟. * عشان يوريهم التفاوض بكون كيف؟. * انتوا كمان بعد كل العملتوه في الامل – عاوزين تشيلو لاعبه من غير مواقفة الامل. * الجماعة ديل يكونوا افتكروا (الامل) دا دمو مهدر. * يعني ممكن يعملوا فيه اي شيء. * عشان كدا ...وعشان حضارة التفاوض ..واحترام الهلال لفريق الامل ..الكاردينال مفروض يسجل (حمدي). * عشان بس يفهموا حاجة. * جماعتكم بلة جابر ما قادرين يعيدو قيده. * حالتكم صعبة. * والله (الزلابية) فرقت معاكم. * طولنا ما شفنا الكاردينال ب (الكسكتة). * عاوزين نشوف لينا (خبطة) جديدة كدا. * ان شاءالله (حمدي). * امير كمال طبعا (الكسكتة) حقتو براها. * مختلفة خالص. * لجنة تسجيلات الهلال مفروض تسفر امير كمال الامارات. * هناك بتفقو. * ما بختلفو اصلا. * بس كيف امير كمال يصل (الامارات)؟. * امارات شنو كمان. * الكاردينال ممكن يحسم ليكم الموضوع بي تلفون. * تلفون بس. * والكاش جاهز. * يلا يا ريس ...عاوزين نشوف (الكسكتة) في صحف بكرة. * عاوزين نشوفها في صحف الجمعة. * انهى الخبطة ..وألبس (الكسكتة). * بكرة لازم تكون في (كسكتة). * عشان الرد. * وعشان الحسم. * وعشان يفهمو حاجة. * حمدي الامل بقى مطلب هلالي. * عشان القانون. * والله ما عشان حاجة تانية. * نوريكم شيء. * ندرسكم ليه دراسة. * اقولها ليكم بي صراحة ..اسامة ونسي لو ما لبس ليه (كسكتة) ما بقدر يحسم ليه (صفقة). * لبسوه (كسكتة) وجيبوا ليه (بلة جابر). * وابعدوا بعيد. * الضربة التانية ..ان مجلس المريخ ما عارف ان عقد سعيد السعودي انتهى مع المريخ. * ما عارفين اي حاجة. * انتوا (سيلا) قاعد. * الزول دا خبرو شنو؟. * شكلو بتاع (زلابية) برضو. * ............ * عاجل : في انتظار (الكسكتة).
