دق الدلجة محمد عبد الماجد شيلسي ألحقوه ب (لجنة استئنافات) مستعجلة و(لقيمات) سخنة السؤال الذي يمكن ان يقدم لك وانت بتجيب ليك (كهربة) من احد مراكز توزيع الكهرباء – هو ان تُسأل انت ناس شيلسي ديل عندهم (همد)؟. همد منو كمان؟. عندهم الفريق طارق؟ …(اتذكرت الفريق برة اللجنة). الانجليز ما بيلعبوا في حاجات زي دي. عندهم (سلك)؟. طيب مالهم بتغلبوا الاسبوع والتاني. الجماعة ديل ما فضل ليهم حاجة غير (سيكافا) ويطلع (جمال الوالي) بتاعهم ويقول ليك : (نحن قفلنا هذا الملف). ولو طلعنا بي (جمال سالم) كفاية علينا. والله تاني يا حليل العبارة دي. لا ملف ولا بلف. جمال الوالي كان شابكنا ليك : (قفلنا هذا الملف). وعبدالصمد شابكنا ليك (قفلنا البلف). هسع المريخ بقى (لا ملف ولا بلف). طيب انتوا شغالين بي شنو؟. ناس شيلسي ديل قربوا من سيكافا. غايتو انجلترا لو فيها (اعلام الهلال) كان ناس شيلسي ديل بيتعبوا – اعلام الهلال (الانجليزي) كان بقول ليك (شيلسي يقترب من سيكافا). الرشيد علي عمر (الانجليزي) بكون قال ليهم (اتشلسوي) – لكن بقولها ليهم بالانجليزي. شلوستهم كمان شينة خلاص. اخير شلوستنا دي. يا زول (الشلوسة) مع الانجليزي شينة شديد…تخلي ليك الواحد متل كبري القوات المسلحة وقت يكون فيه حادث. وخالد عزالدين البريطاني بكون قعد يحسب ليهم شيلسي فيه كم (نقطة)؟. وسيدة فرح. وتقرير عصام مسكين. ورمضان احمد السيد بيحسب في الفرق. يكون شال حالهم. واعلام المريخ كمان هناك في بريطانيا بكون شغال تصبيرات (اي دمعة حزن لا لا). الانجليز ديل ما تخافوا عليهم قلوبهم زي الحجر…ما تسمعوا لي (الشعر) دا. ديل انجليز (دموع) شنو كمان؟. مامون ابوشيبة حقهم بكون قال ليهم عندنا ضربة جزاء ما احتسبوه لينا …(بي الشيلساوي). يقعد يغشغش فيهم كدا. وبكون قال ليهم كمان هدف الارسنال ما صحيح ..(تسلل). وسيحة يوم جمعتهم اكيد ما بقصر …كلام ابوشيبة كلو بكررو ليهم. لكن ما في حاجة اسمها الجهاز اتعطل. واللقطة ابت ترجع. يا ابوشيبة …موضوع (الحكام) دي في انجلترا من العمود التاني برفضوه ليك – شوف ليك موضوع تاني. يعني ممكن تتكلم ليهم عن شارع كوينز فيه كم (لمبة) طافية؟. والله لمبة واحدة طافية ما بتلقاها. غايتو ح تتعب جنس تعب. هجومك على الحكام البتعمل فيه هنا الانجليز ما بنفع معاهم. اما مزمل ابوالقاسم بتاع شيلسي بكون شغال ليك (تخدير) على اعلى مستوى. يكون فكر ليهم في اتحاد القضارف. ومريخاب الجنوب. لكن يا ربي الجماعة ديل عندهم اتحاد القضارف. عندهم مريخاب الجنوب. يكون. الانجليز ديل عندهم اي شيء. قالوا ليك (شارع البلدية) حقنا دي عندهم…لكن شارع البلدية حقهم فيه (مسار) للطيارات. نحن شارع بلديتنا (صراف آلي) ساكت ما فيه. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). شيلسي امس خسر امام وست هام يوناتيد 1 / 2 في الاسبوع العاشر للدوري الانجليزي. الاسبوع العاشر في الدوري الانجليزي بيعادل عندنا الاسبوع الواحد وستين…غير الشغل التحت التربيزة. و1 / 2 ذاتها بتعادل عندنا 4 / 14. انتوا قالوا ليكم (الانجليزي) دا ساهل كدا. والله انا اكتب ليكم عمود بالانجليزي ..ناس المريخ ديل ساعة ما يقعدوا في البلد دي. خسارة شيلسي امس كانت الخسارة الخامسة لشيلسي في الدوري ..اذ خسر شيلسي ثلاث مرات وتعادل مرتين. بقيت اشك. يا ربي حصلت (لخبطة) في مورينهو حقنا دا بتاع النهضة ربك ومورينهو البرتغالي بتاع شيلسي. الشغل دا ما شغل برتغال. الشغل دا شغل محمد الطيب حقنا دا. معقول شيلسي يخسر نصف مبارياته التى لعبها في البريميرليج. شيلسي ب (11) نقطة وهو في المركز الخامس عشر الآن وقد يتدحرج للمركز السادس عشر اذا انتصر (نوريتش سيتي) اليوم. الارسنال عنده ضعف نقاط شيلسي. شفتوا (الكورة) كيف؟. الغريبة ناس شيلسي مع خسائرهم دي ومع طولة لسان مورينهو …ما سمعنا لينا (شيلساوي) واحد قال ارضية الملعب ما كويسة. او المطرة. ما في زول فيهم بيشكي ليك من (حكم الراية). لا حصل طلعوا (الشرطة) من الملعب. ولا جدعوا ليهم (قارورة). ولا جابوا سيرة (داعش). يتقبلوا ليك الخسائر زي الحلاوة. ما عندهم اتحاد (بطبطب) ليهم ويعمل ليهم في (الزلابية). ابدا. اللقيمات في انجلترا فيها شهر سجن. لقيمات في العمل العام. كفاية الجاكومي. حاجات زي دي ما عندهم. لكن نحن مننا ولينا كدا قررنا نعمل (انقاذ) سريع كدا لفريق (شيلسي). شيلسي بطل المنافسة السابقة معقولة ينزل لهذه الدرجة. قررنا نتبرع ليهم ب (لجنة استئنافات). وزلابية سخنة. موش الفرق بين ارسنال وشيلسي (11) نقطة. يمين لجنة الاستئنافات في ربع ساعة تخلي ليهم الفرق (نقطة) واحدة. كمان (لجنة الاستئنافات) بتلعب. تعيد ليهم مباراتين. وتعتبرهم فايزين في احدى المباريات التى خسروها. وتقول ليهم مباراتكم الرابعة (تعادل)…الفريق المنافس عندو (جدو) مدوفون في السودان لمن كان مقاتل في جيش هكس باشا. ونتيجة لمشاركته في المعركة قررت لجنة الاستئنافات بتاعة الانجليز ديل تخليدا لذكراه اعتبار نتيجة المباراة التى خسرها شيلسي مع منافسه وست هام (تعادل). محمد سيد أحمد حقهم يطلع ليك في الاذاعات الخاصة (الانجليزية). يوم اذاعة. ويوم تلفزيون. ويوم جرايد. وفي كل مرة يقول نحن ح نطبق القانون – والارسنال دا قبل كدا عملوا ليه ..وحصل اتجاوز. طبعا محمد سيد احمد بتاع انجلترا ما في زول شغال بيه هناك ..يقول كلامو دا ويطلع. كلام ساكت. ولا تحرقوا دمكم في الفاضي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). المشكلة الشيلساب يقرأوا كلامي دا يقوموا يصدقوا. عشان كدا يا جماعة العمود دا ما يتسرب في موقع او واتساب للانجليز ديل. المكر دا عندنا نحن بس. الانجليز ديل ما عندهم حاجة زي دي. ما تعلموهم تجاوز القانون. اوعكم. يقوم الاتحاد الانجليزي يخلي كورتو ويقلبها ليكم كلها (وكالات سفر). ولقيمات. وطلب فحص. ما تعلموهم الاساليب دي. الحاجات دي خلوها لي ناس مجدي واسامة وسمير فضل. غايتو لو اسامة عطا المنان مشى عمل ليه (كورس) للانجليز هناك بعملها ليهم كلها (لجان استئناف). الانجليز ما يفهموا ليك اي شيء. اليوم التاني من كورس اسامة عطا المنان للانجليز ح تشوفوا ليك (غريغ دايك) يضرب في الزلابية. غريغ دايك دا يا جماعة رئيس اتحاد كرة القدم الانجليزي. انا ما جبت سيرة معتصم جعفر يا جماعة ولا قاصد حاجة. انت يا اسامة عطا المنان الكورس حقك كان في (الزلابية). طيب مالكم؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………. و لجنة رأب الصدع ..اول حاجة تعملها لينا تلغى لينا (الزلابية) اثناء ساعات العمل الرسمية. رجعوا لينا الفارق. الفرق 6 نقاط. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……… السيدة (ل) – لكن نحن مشكلتنا في (الضل) ما في (الفيل). وقرّط على كدا. � � حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore � � � � � �
