* فريق الهلال قبل (50) يوم برنامجه طلع ..الهلال عارف في تونس ح يلعب مع منو؟. * الحاجات معروفة – وواضحة. * اي زول في الهلال شايف شغلو. * فوزي المرضي ..عاطف النور – عم شبشه. * الحاجات مدورة زي الساعة السويسرية. * شغالين زي (الترتيب). * الجدول طلع من فترة. * الهلال ح يتمرن كم تمرين في تونس؟. * وبيرجع متين؟. * من بدري كان معروف الهلال ح يسافر تونس متين؟ ..وبيرجع في ياتو يوم؟ ..ومتين بسافر الى بورتسودان؟. * ما عندنا حاجات خاتنها للظروف. * ولا بنعرف حاجة اسمها (صدفة). * اي حاجة عندنا بي نظام. * في بورتسودان الهلال ح يواجه منو؟. * الطيارة المغادرة الى بورتسودان فيها كم صحفي؟. * اي حاجة معروفة...ومحددة. * الجوهرة ح يفتتحوها متين؟. * قالوا ليك الكاردينال (السيخ) حاسبو. * العمود فيه كم سيخة؟..والطابق فيه كم عمود؟. * نحن (شيبوب) ذاتو عارفين برنامجه في تونس. * بسافر متين؟. * برجع في ياتو شهر؟. * بيعمل شنو؟. * حاجاتنا معروفة الحمدلله ب (شيبوبها). * عليكم الله يا ناس المريخ هسع (شيبوب) لو كان معاكم – كان ح يتبهدل البهدلة التى اتبهدلوها ناس ضفر وعلي جعفر. * والله العظيم (شيبوب) الله شافو. * الزول دا كان يمكن البهدلة البشوفها في الدوحة في جوبا ما كان شافها. * هسع البتعملو فيه دا في مطار الدوحة ..احسن منو القفز من الطابق الرابع. * افضل ليه التسلق على المواسير. * الجابرو على (البهدلة) شنو؟. * شيبوب هسع في تونس مرتاح – وما عندو اي مشكلة...حاجاتوا ماشه بالمسطرة. * نحن والله ما بندور (البهدلة). * ولا بنشمت لينا في زول. * لكن البهدلة الحصلت لي بكري المدينة عجبتنا ليه. * يستاهل. * بكري المدينة قالوا ليك وقت شاف (الشره) التى حصلت ليهم في مطار الدوحة ..قال يا ريت لو خطفني شبيبة القيروان. * ناس ضفر ..والريح علي ..وعطرون ...وبكري المدينة كلهم حاسدين (شيبوب). * حاسدين شيبوب في (نطتو) من الطابق الرابع. * حاسدنو في تسلقو على المواسير. * كلهم منى عينهم ..يلعبوا في شبيبة القيروان. * كمان قالوا ليك ناس شبيبة القيروان ديل عندهم جنس (طحنية). * عندهم (طحنية) عجيبة. * الطحنية لو ما بقت دردمة – دردمة ما بتعجب ليها زول. * المريخ في الدوحة امس حصل ليه موقف – فريق درجة تانية ما بحصل ليه. * الكلام دا نحن عندنا في السيول والفيضانات ما قاعد يحصل لينا. * ولا بنسمع بيه. * لا في فترة الكاردينال. * ولا في فترة صلاح ادريس. * ولا في فترة الامين البرير. * الكلام دا نحن عندنا في اي لجنة تسيير ما قاعد يحصل لينا. * معقولة تنقطعوا بهذه الصورة. * الناس ديل اتقطعوا عديل كدا في الدوحة. * امس قالوا ليك حسب الاخبار التى تداولتها المواقع ، عشان ما تقولوا جبنا لينا حاجة من برة : (صرف المريخ النظر عن السفر الى دبي رغم حضوره لمطار الدوحة الدولي وعمل اجراءات الخروج لكل افراد البعثة المسافرة ، وارجعت مصادر السبب في العدول عن السفر تراجع الشركة الراعية عن التزامها تجاه البعثة وعدم اكتمال تأشيرات دخول الامارات ، وتمكنت بعثة المريخ من دخول الدوحة مرة باجراء استثنائي بعد ان انهت تأشيرة خروحها من جوازات المطار في طريقها الى دبي ..وبذلك سيواصل المريخ معسكره حتى موعد سفره الي السودان في الرابع و العشرين من الشهر الجاري). * بي بساطة كدا. * ومن غير مقاطعة. * بعثة المريخ في الدوحة بقت زي وفد التفاوض. * او زي وفد الحركات المسلحة. * جماعتكم بعد ما دخلوا العفش الوزن - رجعوهم. * الشركة الراعية خدعتهم. * عليكم الله هو في شركة راعية واعية كدا – بترعى ناس ضفر وبكري المدينة وخالد النعسان. * هسع خالد النعسان ذنبو شنو؟..عشان تدخلوه معاكم مدرسة بالصورة دي. * الولد ما بقى للسفر. * ولا الاغتراب والدردرة. * الولد ما بقى للحاجات دي. * كمان قالوا ليك مطار الدوحة فيه (برد). * برد عجيب. * وناس المريخ الايامات دي زي طلاب الدورة المدرسية عندهم (قمصان) كدا – فرحانين بيها. * قاشرين بيها. * قمصان في البرد دا. * بدل ما جابوها ليهم. * كرفتات ساكت ما في. * ناس المريخ بوضعهم هذا – ذكروني ليك طلاب الداخليات ..وقت يمرقوا الخميس والجمعة ويمشوا على اقاربهم. * يمشوا يغيروا شوية من (عدس) الداخليات وقرعها الماسخ. * ناسكم ديل – هسع بقوا زي (طلبة) الداخليات يا مزمل – حايمين من مطار لي مطار. * في اديس ابابا مشوا اتقطعوا ليهم اسبوعين. * ورجعوا الخرطوم. * ومشوا اتقطعوا في الدوحة. * في الدوحة ما عرفوا يمشوا الامارات. * بعثة المريخ في الدوحة لم تتمكن من الحصول على كل التأشيرات للدخول الى الامارات. * الامارات بقت عليهم صعبة. * والله احكام يا زمن. * تأشيرات بقيتوا ما بتلموا فيها. * حالتكم صعبة. * وظروفكم مستحيلة. * كان تتصلوا بالكاردنيال. * الكاردنيال عندو (ضهر) في الامارات. * التأشيرات عند الكاردنيال ما عاوزة ليها (5) دقائق بدل تقعدوا تتبهدلوا كدا في مطار الدوحة. * الحركة دي ما لذيذة. * كان ترجعوا تتموا معسكركم في بورتسودان. * او القضارف. * احسن من تبقى عليكم غربة – وعدم قروش كمان. * الجميل ..والحاجة الظريفة ان وزير الشباب والرياضة في ولاية الخرطوم امس مدد لمجلس المريخ (5) شهور تاني. * مجلس اسامة ونسي ح يستمر (5) شهور تاني. * 5 شهور فلس. * 5 شهور بالحالة دي. * انا بقترح فتح باب التقدم للمريخاب لروابط مشجعي الاندية الاخرى. * العاوز يشجع الهلال ...يجينا عبر شبيبة القيروان. * ما في زول من المريخ بنجيبو بدون اللفة دي. * العاوز ينضم لاهلي شندي. * هلال الابيض. * الامل عطبرة. * مريخ الفاشر. * الرابطة كوستي. * الروابط كلها ترحب بكم. * ما في حاجة بتخليكم تقعدوا في المريخ في حالتو دي. * الجابركم شنو؟. * مالكم حارقين دمكم. * شيبوب غادر. * شيبوب هسع في تونس يضرب ليك في (الطحنية) ويحضر في الافلام الاجنبية. * ناس شبيبة القيروان – قالوا قالوا ليك لي شيبوب نحن ما عاوزين منك اي حاجة لغاية شهر مايو. * قالوا ليه اقعد (مقرش) كدا الى شهر خمسة. * اصلو ما عاوزين منك حاجة. * كمان يقوموا يضربوا لينا. * انتوا قايلين شهر خمسة بعيد. * التسجيلات باقى ليها تلاتة شهور وعشرين يوم. * التسجيلات يوم 11 مايو. * والله نحن منتظرين 11 مايو بي فارق الصبر. * ما عشان شيبوب. * عشان نفتح الجوهرة الزرقاء. * عاوزين نفتتح الجوهرة الزرقاء في 11 مايو. * مع التسجيلات. * عشان شنو؟. * عشان نحن اي حاجة عندنا بي نظام. * انتوا تعالوا هنا. * البرد دا حكايتو شنو؟. * يوم في برد. * ويوم تسخن. * بقينا ذاتو ما عارفين نتصرف كيف؟. * نرقد في الحوش؟. * وإلّا نرقد في الغرف؟. * .... * ملحوظة : شيبوب الله مرقو. هوامش * الليلة نحن على موعد مع الهلال. * مشتاقين جنس شوق للهلال. * عاوزين نموت بي شوقنا. * في انتظار رؤية الهلال. * الهلال في بورتسودان – الليلة الناس بتترقبوا زي هلال العيد. * والله عظمة. * الفرق كبير. * كبير جدا بين الهلال والمريخ. * الهلال عليه ان يركز في الممتاز. * بعد كدا ح ندخل للجد. * الهلال سوف يلعب مباراته الاولى امام هلال كادوقلي. * وهلال الجبال في الجبال ما بتفاهم. * بعد مباراة هلال الجبال ..الهلال سوف يواجه اكثر الاندية استعدادا وجاهزية هلال الابيض في الابيض. * عشان كدا لا بد من ان ندخل الجد. * ونكون مركزين في اي شيء. * السنة دي عاوزين موسم مميز في اي شيء ان شاءالله. * موسم خرافي. * نسأل الله ان يبعد عن لاعبي الهلال الاصابات. * وان يعود الثعلب وجكسا سريعا. * الحاجات ماشه معاكم باسطة. * الله يحفظ. * ويديم النعمة. * اشكروا الله على هذا الفضل. * وابقوا حارسين للهلال. * وواقفين معاه. * نحن في الانتظار اليوم. * عاوزين نشوف حاجة. * عاوزين نفهم لينا شيء. * عشان الجماعة يقتنعوا. * يمين – ح تتعبوا معانا شديد. * خمسة شهور تاني. * .......... * عاجل : بالطريقة دي بتنزلوا.
