كان لي رضا مصطفى الشيخ ..اتوقعو يقعد (يعتذر) ليك من يوم الخميس...الجهاز اتعطل..والمصور كان مشغول بالمباراة التانية ضربة جزاء للنيل صرفها الحكم ..وضربة مباشرة قال ما مباشرة..اتوقع الجمعة القادمة ..فيصل سيحة يقول عندو (لوز) ما بيقدر يتكلم اذا بتلبسوا في (الكمامات) من الاسبوع الخامس ...وقت شيبوب يرجع تعملوا شنو؟ في حاوي في الدنيا بقدر يمنح المريخ بطولة الممتاز وهو وصيفها بفارق (9) نقاط لصالح الهلال
* يس علي يس امس كتب عمود جميل تحت عنوان (فعلا عاوزة كمامات !!) رصد فيه كل تجاوزات الحكم لصالح المريخ امام النيل شندي. * خالد النعسان (نام) عديل في مدافع النيل شندي ..والحكم لم يحسب اي مخالفة. * وضربة جزاء. * وضربة مباشرة قال ما مباشرة. * و 8 مليار جنيه. * اتوقع الجمعة القادمة ..فيصل سيحة يقول عندو (لوز) ما بيقدر يتكلم. * وكان لي رضا مصطفى الشيخ ..اتوقعو يقعد (يعتذر) ليك من يوم الخميس...الجهاز اتعطل..والمصور كان مشغول بالمباراة التانية. * والزمن انتهى. * ونخليها للاسبوع القادم. * انتوا يا رضا مصطفى الشيخ (التلفزيون القومي) دا لو ما عندكم ليه (اجهزة) – اتبرعوا ليه واقلبوه (تلاجة موز). * معقولة بس جايبين لينا مسرحية (التتويج) في نص الدوري. * دي زي (المطرة) في فصل الشتاء. * زي الحلة السوداء في نص الحوش. * زي (العضم) في الفول. * الليلة ما عاوز اجيب ليكم اي سيرة لي (الطحنية). * يس على يس لم يكتف بهذا ..رجع ليك ل (6) ضربات جزاء منحها الحكم للمريخ العام الماضي في البطولة الافريقية. * ناس الترجي التونسي الى وقتنا هذا الضربة التى احتسبها الحكم ضدهم لصالح المريخ عاوزة تشقهم. * مستغربين فيها. * بكري المدينة وقع في (مصفاة الجيلي) ..والحكم احتسبها ليهم داخل الخط. * في ضربة جزاء بيحسوبها من (الكدرو). * الكمامات التى كتب عنها يس علي يس .. حفزتني للوقوف عندها..مناسبة زي دي اصلو الزول ما يتجاوزها. * ما يفوتها. * كمان حاجات زي دي بتتلقى وين؟. * الناس ديل (الما هنا) قالوا حكاية لجنة الاستئنافات اتكشفت. * وبقت معروفة. * وما جايبه حقها. * يعني سمير فضل دا تاني إلّا يشتغل (حاوي) بدل رئيس لجنة استئافات. * والله عمليتك دي (حاوي) ما بيعملها. * في حاوي في الدنيا بقدر يمنح المريخ بطولة الممتاز وهو وصيفها بفارق (9) نقاط لصالح الهلال. * الجماعة ديل (الما هنا) ..قالوا حكاية (لجنة الاستئنافات) دي بقت مكشوفة..تاني ما بتمشي. * واسامة عطا المنان ..ناس خالد عزالدين قاعدين ليه في (رقبتو). * بقوا يحسبوها ليه تذكرة – تذكرة. * عشان كدا الجماعة ديل (الما هنا) قالوا السنة دي يجوا ليهم بي (حيلة) جديدة. * فكرة مختلفة. * قاموا عملوا شنو؟. * قاموا المرة دي جابوا ليهم (كمامات). * فيلم هندي بس. * في الفيلم الهندي طبعا دائما (البطل) بكون من اسرة فقيرة. * والبطلة من اسرة غنية. * يقوم يقع (الحب). * يجبوهم ليك في نهاية الفيلم متزوجين. * البيعملوا فيه ناس المريخ دا (فيلم هندي). * وقت قعدت في التلفزيون عشان اشوف المباراة استغربت - قلت يا ربي (طبق النيلين) دا جنّ وإلّا شنو؟. * الكمامات دي جابوها من وين؟. * يا ربي لفيت (الطبق) غلط. * الكمامات شنو كمان؟. * جنس (حنكشة). * الناس ديل خلوا الكورة وبقوا بتاعين شعارات. * غايتو يا ناس المريخ بتعملوا ليكم في حاجات...من الله خلقنا ما شفناها. * انتوا وقت فالحين كدا. * وقت شاطرين شديد. * ومفتحين. * وشفوت. * وعارفين اي حاجة يا (الما هنا). * كماماتكم دي ما كان تلبسوها في زيادة الغاز. * كان تلبسوها في زيادة الموية. * في ازمة المواصلات. * في قفلة الكبري. * كان تلبسوها في (الحوار الوطني). * هسع ما بتخجلوا كماماتكم دي لابسنها في هدف الاهلي شندي (التسلل). * عدم موضوع بس. * والله تتابعوا لي (بشه) دا ..مباريتكم القادمة تدخلوها متنكرين. * تدخلوها ب (قناعات). * ما بتقيف عند (الكمامات). * عاملين فيها عندهم (ثقافة) جديدة. * خلوا (القارورات). * وخلوا (الشتائم). * وبقوا يلبسوا (كمامات). * هسع علي جعفر ..لو شافكم بي (كماماتكم) دي يقول شنو؟. * الزول دا ما بتاع (كمامات). * اذا بتلبسوا في (الكمامات) من الاسبوع الخامس ...وقت شيبوب يرجع تعلموا شنو؟. * الحاجة المتوقعة. * الحاجة البقولها ليكم. * يوم الجمعة القادمة ..اتوقع رضا مصطفى الشيخ يجيكم لابس (كمامات). * اصلو الزول دا بتأثر شديد بجمهور المريخ. * الزول دا خفيف. * كل جمعة طالع (يعتذر). * عالم الرياضة قلبوا لينا (احلي عشرين قصيدة حب) شغال لينا اعتذارات بس. * الحاجة الما واقعة لي. * وما قادر افهمها. * وما عارفها ليه. * ناس عالم الرياضة ديل كل جمعة بفتتحوا لينا البرنامج بي شيء مشاترة. * مرة يجيبوا لينا عربية مقلوبة. * ومرة تور هايج. * ومرة طيارة في الهواء. * ومفتكرين الافتتاحية دي (ابداع). * قايلنها فلاحة. * عليك الله يا رضا ..ما تعمل لينا البرنامج كلو تيران هايجة وطيارات واقعة ..وبعدين تجي تقول زمن البرنامج انتهى. * هسع من الآن عاوزنك الاسبوع القادم تخصص لينا فقرة كاملة للكمامات. * اعمل ليها حلقة. * شوف لينا (الثقافة) دي جات من وين؟. * بالله شوف الناس الفاضيين ديل. * انتوا الكمامات ما لبستوها لي (حلايب). * ما لبستوها للقدس. * عاوزين تلبسوها لي هدف محمد كوكو. * الكورة لو غلبتكم قولوا لينا. * لو فكت منكم ..كلمونا. * نظام شنو يعني؟. * نظام عندهم (رسالة) عاوزين يوصلوه. * بقيتوا راقيين. * بقيتوا (فرنسيين) عديل كدا. * يمكن الكمامات عندها علاقة بي عيد الحب. * الشغل دا شغل (فلانتاين). * عليكم الله واصلوا في رسالتكم دي. * المباراة القادمة ..تعالوا شايلين ليكم (زهور). * والمباراة البعدها جيبوا ليكم (حمام) – فكوه في الملعب. * وقت بقيتوا تلبسوا (الكمامات) – ممكن تعملوا اي شيء. * يا راقيين. * يا متحضرين. * يا صفوة. * مريخ الكمامات يفوز على النيل شندي بهدف. * والله (الكمامات) دي تاني ما نخليها ليكم. * بس انتوا ساعدونا ..في اي مباراة تعالوا لابسين ليكم (كمامات). * تعالوا وصلوا رسالتكم للكونغرس الامريكي. * ضاربين ليكم (حكم). * ومطلعين (الشرطة) من الملعب. * وعايدين ليكم المباراة. * ومعتبرنكم فايزين في مباراة تعادلتوا فيها. * ومتبرعين ليكم ب (8) مليار جنيه. * وتلبسوا في (الكمامات). * عليكم الله في استهبال قدر دا. * قابلكم شغل بالشكل دا. * يا جماعة انتوا (النفط) قسموها ليكم. * الكمامات على شنو؟. * لكن لو جينا للجد. * ناس خالد النعسان ديل ..محتاجين يساعدوهم ب (الكمامات). * عاوزين ليهم (جكة). * اصلو الجماعة ديل جربوا اي شيء. * لجنة الاستئنافات. * اسامة عطا المنان. * معتصم جعفر. * الشرطة. * جربوا اي شيء. * قالوا المرة دي يجربوا (الكمامات). * .......... * ملحوظة : الفيلم الهندي دا شفناهو قبل كدا. هوامش * نتمنى التوفيق لطارق العشري. * وقبل ذلك نتمنى ان يصبروا عليه. * المشكلة ما في العقد. * ولا التوقيع لمدة عام. * والكلام دا. * الكلام دا كلو ما مهم ..اذا كان الاستغناء على المدرب بتم بعد 5 مباريات. * اقترح اضافة بند في العقد ...وهو ان يتم انهاء التعاقد مع المدرب بعد اول تعادل. * الله لا جاب التعادل. * مباراة كوستي في هذه الظروف قد تكون صعبة على الهلال. * علما ان مباريات الولايات اصلا هي عقبة. * خاصة بعد اصابة بشه. * مجلس الهلال بعد الهزة التى احدثها في الجهاز الفني ...يتحمل اي نتيجة سلبية في كوستي. * ركزوا ..المباراة ما ساهلة. * السنة دي اي مباراة في الولايات ..صعبة. * وممكن تكون مشكلة. * ناس المريخ يلعبوا لي مع ناس الامير والنيل ..والهلال يلعب مع الاهلي شندي وهلال الابيض. * والله الكاردينال لو لقى (البلجيكي) بتاع المريخ دا ..فيه حلاة (اطاحة). * نوع البلجيكي بتاع المريخ الكاردينال اسبوع ما بيصبر عليه. * ولا بعاين ليه. * الزول الفرحان دل صابرين عليه كيف يا ناس المريخ. * المريخ لو واجه الهلال بالبليجكي دا ستة ما بتفكوا من الهلال. * ولا بمرقوا مننا. * تجوا بي كماماتكم. * تجوا بي سمير فضل. * اسامة عطا المنان. * الستة ما بتمرقوا منها. * ............ * عاجل : اتخيلوا نجوم المريخ هذه الايام عمر بخيت وعنبكة وخالد النعسان.
