* صوت (الراديو) في الغالب بيسبق صوت (التلفاز) .. * وهذه معلومة يعرفها الذين يتابعون المباريات من خارج الاستاد .. * لما تكون بتحضر مباراة في التلفزيون وبتسمع في الإذاعة (القون بيجي في الإذاعة قبل التلفزيون) .. * وحقيقة أمنياتنا إحنا مع الهلال أصبحت مثل القون البيجي في الاذاعة قبل التلفزيون .. * إحنا وعلى طريقة (قون الاذاعة) هزمنا الاهلي الليبي وخطفنا ورقة التأهل .. * بينما على طريقة (قون التلفزيون) نجد ان الاهلي هزمنا .. * مشكلتنا أمنياتنا بتتجاوز الواقع .. * بنتمنى وبنصدق المنى .. * عشان كده ما يخالف أمانينا دائما يكون قاسيا وصعب التصالح معه .. * وخسارة الهلال بالامس هي ليس (خبرا) ، النتيجة مقبولة لحد ما بحسابات (الذهاب والأياب) .. * ولكن ما هو غير مقبول ذلك المستوى الباهت الذي ظهر به الفريق .. * الهلال وهو يلعب أمام الأهلي الليبي أمس لم يختلف كثيرا عن الهلال الذي لعب أمام قورماهيا الكيني بملعب استاد بورتسودان مؤخرا .. * نفس الهلال .. * ونفس التواضع .. * ونفس التخاذل .. * إفتقدنا (النكهة) و(الحضور) و(الإنضباط) .. * وهذه بداية سيئة جدا لفريق ينشد تحقيق البطولة .. * وأنا والله أخشى ان أقول ان الهلال بدأ ابطال هذا العام من حيث انتهى العام السابق .. * ليس هنالك (جديد) في هلال هذا العام مقارنة بهلال العام السابق .. * وإذا كان الهلال في العام السابق قد بلغ المربع بمستواه الضعيف فان هذا العام غير .. * صحيح هي جولة وهنالك جولة اخرى ولكن الشكل العام ربما هو لايبشر بالخير الذي ننتظره .. * عناصر الخبرة بالهلال حينما نحتاج لخبرتهم لا نجدهم ولا نجد خبرتهم .. * في الهلال هنالك لاعبين لعبوا (50) مباراة في المطر والخريف والشتاء والنجيل الكعب ومع ذلك لم يتعلموا ولم يستفيدوا .. * نخسر ونعلق الخسارة علي شماعة الخريف والمطر والبرد ورمضان .. * أمبارح كان في مطر .. * والمطر والله العظيم ما بيخلي اللاعبين يمرروا غلط .. * ولا بيخلي الفريق يظهر بهذا الشكل غير المشرف .. * الموضوع موضوع غيرة على الشعار وحرارة قلب .. * ناس الاهلي الليبي ديل برضو كانوا لاعبين في المطر .. * الميدان واحد .. * الشماعات التى نعلق عليها فشلنا هي اسوأ من الفشل نفسه .. * قبل كده المريخ ده أخدها سبعة وقالوا ده بسبب البرد .. * برد ؟؟ * في زول بيخسر بسبب البرد ؟؟ * البيخسر بسبب البرد عادي ممكن يخسر بسبب (الدعاش) .. * وناس المريخ الليلة الله شاف ليهم .. * كنا نود الحديث عن (الإصيفر) الذي لعب وديا في مصر امام فريق (أولاد الحلة) وقالوا لينا لعبنا مع الإنتاج الحربي .. * لكن الحديث عن سلبيات الهلال أهم من المريخ .. * الكتابة عن المريخ إحنا ما مستعجلين ليها لانو بكرة لو الله اراد بنكتب عن المريخ بمزااااااااج .. * المهم .. * ما في مدرب في العالم بيكون عندو لاعب بقدرات وامكانيات صهيب الثعلب ويجلسه على الكنبة .. * ما في والله .. * لو التشكيلة قالوا فيها أربعة لاعبين فان الثعلب سيكون هو رقم ثلاثة في التشكيلة .. * وإحنا بنعرف كورة وشفنا الثعلب .. * الثعلب ده شفناهو يا هيثم مصطفى .. * شفناهو يعني ما حكوا لينا بيهو .. * واضح إنو في حاجات غلط في الهلال .. * الثعلب وبشة الصغير ووليد علاء وغيرهم من الشباب الموهوب هم أحق بالمشاركة .. * لمصلحة من يجلس الثعلب في الكنبة ؟؟ * وهل العشري بقناعاته أهمل الثعلب أم ان هنالك طرف ثالث ؟؟ * وهل الكاردينال الذي رفع شعار الشباب وشطب مهند الطاهر هل هو راضي عن التشكيلة الخالية من الشباب ؟؟ * ما في منطق بيخلي لاعب بقدرات الثعلب لا يشارك .. * والكلام ده ما بخش العقل .. * الناس حقو تشتغل من اجل مصلحة الفريق .. * نعم مشكلة الهلال لا تكمن في عدم مشاركة الثعلب فقط .. * المشكلة أكبر من كده .. * ولكن عندما نحارب الشباب علينا ان لا ننتظر جديدا من الكبار .. * مجلس الادارة عليه ان يجلس مع الجهاز الفني حتى يستفسر اسباب عدم مشاركة الشباب .. * خليك من الشباب .. ايشيا ما بيشارك ليه ؟؟ * لو الموضوع فيهو موازنات من هسه بقولها ليكم أقنعوا .. * إحنا ما بنعرف موكورو الجابو منو وايشيا الما جابو منو .. * بنعرف الهلال وبس .. * دايرين الهلال يلعب كرة قدم وبعد داك ان شاء الله يخسر ما مشكلة .. * ايشيا حتى لو جابو صلاح ادريس ما بيهمنا .. * المهم عندنا بيعرف ولا مابيعرف ؟؟ * وأنا والله ما زعلان من الخسارة .. * لانو واثق الهلال ح يتأهل .. * لكن البيزعل إنو الهلال ما قاعد يلعب كورة .. * الاهلي الليبي سيودع الابطال من أم درمان .. * سيودع بأمر حناجر جماهير الهلال .. * والاهلي الليبي ليس أقوى من ناصاروا ولا أقوى من أهلي مصر .. * إحنا واثقين من التأهل .. * بس ما واثقين من مستوى الهلال .. * الفريق الداير يشيل بطولة ما بيكون زي الدولار (يوم طالع ويوم نازل) .. * مباراة كويس ومباراة كعب .. * فرق البطولات بتبدأ تعبانة وبتفتح مع الايام حتى تصل قمة المستوى الفني في النهايات .. * الآن أمام الهلال أسبوع قبل مباراة الاياب .. * ومن واقع شكل الفريق فان الاسبوع لا يكفي .. * اسبوع ما بيكفي لان الهلال وعلي ما يبدو محتاج فترة اعداد من اول جديد .. * ولكن على الجهاز الفني ان يتدارك هذا السوء سريعا .. * إنتقدنا الراحة السلبية التى منحها العشري للاعبين بعد مباراة الأمير الضعيفة .. * العشري بعد مباراة الامير منح اللاعبين راحة ليومين وسافر .. * والعشري يعلم ان فوز الهلال بالثمانية نتج عن ضعف الأمير لان مستوى الهلال الحقيقي كان أمام النسور في المباراة التى سبقت مباراة الامير .. * إنتقدنا الراحة السلبية بعد لقاء الامير لانها لم تكن مبررة .. * وقد وقع الفأس في الرأس .. * يبقى الاسبوع المتبقي غير كافي .. * ونحن نخشي ان يلعب الهلال مباراة ودية في مصر قبل العودة للخرطوم ويحقق الفوز بالخمسة ويأتي ويتواضع في لقاء الاياب .. * لو لم يحل الجهاز الفني مشكلة (الدولار) التى يعاني منها الهلال سيكون المستوى متباين من مباراة لاخرى .. * أمنحوا الشباب فرصة وأعيدوا ترتيب الامر لان سيف الوقت سيقطع الهلال .. * و..و.. * ومعليش إحنا بنتبهدل .. *
