عندنا (سقف) (غرفة) وقت تجيب ليه سيرة المطرة – بقعد ليك في الواطة..تقول عندو خالة في حكومة الولاية وقت الهلال يتغلب ...(شايب الهارتي) بتشوفو (دو)..(العريس) بتشوفو زي الزول البوزع في الحاجة الباردة ناس المريخ الخروج من دور ال (32) عندهم زي الخروج من (الحوش)..نحن الموضوع باقى لينا غريب لمن الهلال يكون مغلوب اتوقع اي حاجة..الشارع لو ما فيه (كلب)..يطلع ليك فيه (كلب) وسعران كمان وانا زي بشوفك مرة (7). ومرة (91). ومرة تبقى لي رهاب – رهاب ..وانتي واقفة قدامي. متل (كرسى النص) وقت يكون بين اتنين (تخان) في حافلة ضيقة شديد.. كرسي النص يروح فيها ساكت. الكمساري – ما يعرف يقول حاجة. زي كدا. الحكاية نفس الحكاية. نفس الموضوع. والموية القاطعة. ما فى علاقة بين الرقمين. بين ال (7). و ال (91). لكن وقت الهلال يتغلب ...(شايب الهارتي) بتشوفو (دو). صحن الشية قدامك بتشوفو صحن كوارع. والفرخة تبقى ليك زي (الكمونية). ما تفهم فيها اي حاجة. العريس بتشوفو زي الزول البوزع في الحاجة الباردة. والعروس تبقى ليك زي ام العروس. رغم الفارق العمري الكبير. الهلال وقت يتغلب – الدنيا بتمسخ علينا. البطيخ كلو (بتقرع). الشباك – لو فاتح..تشوفو قافل. من غير مبرر. من غير منطق. الجغرافيا البتقفلها ...تمرق منها بي كرامة البليلة. والبنطلون البتدخل فيه – يبقى ليك كبير. الحصل شنو؟. معقولة الواحد نزل كدا. الزول البقفل ليك على (9) اسود بالاسم – تفك ليه (تريس) يجرك بيها. عملها كيف؟. جابها بي ياتو طريقة ؟– ما تسألوني. جني وجن الاسئلة في (الاعمدة الصحفية). ما تسألوني. الكوتشينة مرات بتكون عاوزة ليها سبب. مرات بجرك زول ما قافل. وما بعرف يلعب. وكيشة كمان. الجوكر بفكو بايظ اثناء اللعب. والجرة بتفوتو – عادي كدا. متل المطرة وقت تكون شايلة وما تنزل. عندنا (سقف) (غرفة) وقت تجيب ليه سيرة المطرة – بقعد ليك في الواطة. تقول عندو خالة في حكومة الولاية. الدنيا ذاتها مرات بتبقى زي (الكوتشينة). شايل الجوكرين و(معرج). زي الدكان الما فيه (طحنية). خسارة (مرواح) شغالة في الفاضى ساكت. لمن الهلال يكون مغلوب اتوقع اي حاجة. الشارع لو ما فيه (كلب). يطلع ليك فيه (كلب) وسعران كمان. ما عارف ليه الحاجات بتتعكس كدا وقت الهلال يكون مغلوب. البامية المفروكة دي بجيبوها ليك كل يوم. تضرب فيها لمن (اضنينك) يصفرن. ما بتقول اي شيء. ولا كلمة. وقت الهلال يتغلب..البامية تبقى ليك مسيخه. وملحها زايد. وبصلتها (مطفحة) زي عداد الموية. لمن الهلال يتغلب. اتوقعوا اي حاجة. الشارع بيبقى ضيق عليك. تخليه. تعمل شنو عاد. تمشي الشارع التاني. برضو تشوفو ضيق. تخلى (المرقة) تقعد في البيت. ما عشان الشارع ضيق. ولا عشان السخانة. بس عشان الهلال طلع من البطولة الافريقية. الشاي من غير ما يبرد. بتشعر بيه بارد. من غير سبب تكورك في ست الشاي. والمشكلة ما في ست الشاي. المشكلة في (ابيكو)...بفك في الكورة متل (المخزنجي) الما بشوف بعد خمسة. تحس بي صداع. من غير صداع. تشعر بالملاريا. تفحص 120 مرة. يقولوا ليك ما في ملاريا. معقولة (الاهلي الليبي) بيعمل كدا. نحن الخروج من دور ال (32) ما بنعرفو. غريب علينا. نحن ما زي المريخاب. ناس المريخ الخروج من دور ال (32) عندهم زي الخروج من (الحوش). نحن الموضوع باقى لينا غريب. الواحد فينا يقوم من النوم. يمشي (التلاجة). من غير ما يكون عاوز يشرب. بقعد يشرب. الواحد فينا بدون مناسبة بقى يفتح MBC2 عشان يحضر ليه فيلم اجنبي. الفيلم الاجنبي عاد عاوز يحلكم. الهلالاب خلوا (الجرايد). وعالم الرياضة في (الاذاعة) بقوا ما بحضروه. ساعة وقت عالم الرياضة يجي ...الهلالابي بقى يهج من البيت. يشوف ليه موضوع تاني. الناس مهجومة. ملخومة. عيونها في نص ضهرها. في (صنة) غريبة. ما غير ما تشعر..بتسأل المات منو؟. ولا في زول مات. طيب الحاصل شنو؟. الناس دي مالها مهضومة كدا؟. مالها مخلوعة كدا؟. زي البلاعة ليها شوال حطب. مالهم معسمين كدا. معقولة دا كلو عشان الهلال اتغلب. يجيبوا ليك (الفول) قدر ما يصلحوه ما يتصلح. يكبوا فيه رطل زيت سمسم. ما ينفع. يقلبوا فيه علبة تونة. ما ينفع. يعملوا ليه دكوة. ما ينفع. جبنة. ما ينفع. يقلبوا فيه طلب كبدة. ما ينفع. معقولة بس. دا كلو عشان الهلال اتغلب. والله لمن الهلال اتغلب (سمكم) ذاتو بيبقى (عدس). عشان كدا ما تشطروا على (الفول). ما تتحرفنو. الفول – فول. قالوا ليك واحد اتوهم. اتملأ ليك وهم. صاحبكم قايلها ملاريا. زولكم من معمل لي معمل. نتيجة اي فحص بقولوا ليه ما في ملاريا. زولكم ما عرف المشكلة في شنو؟. آخر حاجة زولكم مشى ليه لي دكتور. الدكتور قال ليه انا اكون صريح معاك ...انت ما عندك ملاريا. الزول قال للدكتور ..طيب وقت ما في ملاريا يا دكتور بتكتب لي علاج ملاريا ليه؟. الدكتور قال ليه : موش ناس الهلال ديل بيغلط الكاردنيال بقوموا يشيلوا كافالي...خلاص الموضوع نفس الشيء. هسع عليكم الله ناس الهلال ديل بدل ما يشيلوا عماد الطيب ..بشيلوا (ابيكو) في شنو؟. يا جماعة انتوا شيخ موكورو دا جايبنوا اختصاصي جراحة. جايبنو بتاع عظام. طيب شايلنو مالكم؟. غايتو الزول دا لو جايبنو لاعب كورة ..اصلو ما قصر. عمل العليه. لكن إلّا تكونوا جايبنو مع (الكشافات) الضاربة. الكشافات ما اشتغلت. شالوا نيلسون. وشالوا الشيخ موكورو. وشالوا سيسيه. وشالوا ابيكو. انتوا جايبنهم يولعوا ليكم. عليكم هسع خلل (الكشافات) دي في المجلس وإلّا في المحترفين؟. مالكم انتوا عاوزين تقوموا علينا (النفس). احسن الحاجات تكون واضحة. والمواضيع تكون صريحة. عشان ما نقع في نفس المشكلة في الموسم القادم. تاني اي محترف تجيبوه سلموه خطاب الشطب اول. عشان ما يخسركم اي قرش. احسن نعملها ظاهرة. ......... ملحوظة : وإلا عندكم رأي تاني. هوامش النيل شندي ..من الفرق البتلعب كورة. عشان كدا اعملوا حسابكم يا ناس الهلال. ما عاوزين تاني اي غلطة. ركزوا في الممتاز. واتخلصوا من كل عواقب البطولة الافريقية. الممتاز بطولة محببة لنا. ونحن نبحث عن ارقام قياسية فيها. فترة التسجيلات القادمة – نتمنى من الكاردينال ان يصحح كل الاخطاء. لا بد من اضافة اسماء كبيرة في التسجيلات القادمة. هذه افضل فترة لاضافة المحترفين. اضافة محترفين في مايو القادم ..يجعلهم في الموسم القادم اكثر قدرة على العطاء. واكثر عطاء في البطولة الافريقية القادمة. احسن الهلال يسجل الآن ..عشان الكاردينال لو عاوز يشيل اي محترف يشيلو في التسجيلات القادمة. احسن من يشيلو لينا اثناء الموسم. اختبروا المحترفين في الدورة الثانية. واحسموا موضوع الممتاز من الدورة الاولى. التركيز الآن يجب ان يكون في مباراة الخميس امام النيل شندي. امسكوا الممتاز مباراة مباراة. وتجاوزوا عقبة – عقبة. هذا افضل توقيت لحصاد النقاط. ناس المريخ لمن يرجعوا ان شاءالله يلقوا الدوري امرو اتحسم. مساوي دائما يأتي في المواعيد الكبيرة. ودائما هو نعم القائد. افتقدنا مساوي كثيرا في البطولة الافريقية. القائد هو القائد. الى الآن مساوي وبشه وكاريكا الاكثر عطاء. والاكثر تسجيلا للاهداف. والكبير – كبير. انتوا تعالوا هنا قصة جمال سالم شنو؟. الجماعة ديل ..نحن هسع عاوزين نصهين منهم. عندنا فهم برانا. ما تشتغلوا بيهم. الحساب بجمع. والحسابة بتحسب. اصبروا بس انتوا. واعملوا رايحين. وما تجيبوا اي سيرة. وما تكلموا زول. وما تشتغلوا بيهم. اعملوا فيها ما عارفين اي حاجة. وما سامعين اي شيء. صهينوا بس. الصهينة دي صعبة. اسكتوا. ما في حاجة بتفوت ساكت. يا مزمل. يا سلك. يا كابو. يا معاوية الجاك. عندكم فترة سماح. .... عاجل : انتوا في (مطرة)؟..وإلّا قاعد اتخيل ساكت!!.
