* في عالم (الحرامية) ما بتبقى (حرامي شفت) إلا بعد ما (تسرق حاجة من زول وتجي تبيعها لنفس الزول) .. * تسرق من زول (لاب توب) وبعد (6) شهور تجي تبيع اللاب توب ده لنفس الزول السرقتو منو وهو يكون ما عارف .. * في الحالة دي ممكن (رئيس العصابة) يديك شهادة تمنحك حق ممارسة المهنة بامتياز .. * والله صحي .. * هسه إحنا سرقنا (شيبوب) من المريخ وعايزين نبيعو لناس المريخ .. * مع أبوعاقلة ده الله أعلم شيبوب يلقى ليهو خانة .. * رأيكم شنو نبيعو ليكم ؟ * بمليون دولار بس .. * السرقة بتاعت شيبوب دي كلفتنا (250) ألف دولار لكن نبيعو ليكم بمليون دولار .. * غايتو رئيس شبيبة القيروان ده ثقيل ثقالة تحيرك .. * أمبارح رئيس القيروان وفي تصريح خاص ل(قوون) قال : (لن نمانع في إعارة شيبوب للهلال) .. * زول ثقيل .. * رئيس الشبيبة بهذا التصريح فتح جروح ناس المريخ (ضلفتين) .. * ناس المريخ كانوا مفتكرين إنو الهلال هو الذي أعار شيبوب للشبيبة ، وناس الشبيبة فاكرين إنو الملكية جوبا هو الذي أعار لهم شيبوب ، وفي النهاية طلع إنو الشبيبة ستعير شيبوب للهلال .. * غايتو جنس غايتو .. * شيبوب الشهير ب(عبرت) سيلعب جوار أبوعاقلة بعد أقل من شهر .. * أقل من شهر بس والعارف يكلم الما عارف .. * وفي النهاية (العارف عزو مستريح) .. * المهم .. * أوردنا بالأمس معلومة (حصرية) تتعلق بمفاوضات قادها بالفعل أهل المريخ مع النجم مكسيم .. * واليوم نؤكد ما ذهبنا له بالأمس لأن المعلومة التي بطرفنا حقيقية وسليمة بنسبة (100%) .. * فاوض المريخ مكسيم عقب خروج الهلال من الأبطال وقد تم ذلك بواسطة أشخاص مقربين من رئيس المريخ القادم .. * نعلم أن مكسيم عقده مع الهلال ساري حتى (2017) ولكن هنالك سناريوهات قد رسمت من أجل أبعاد مكسيم من الهلال أولا ومن ثم تسجيله في المريخ .. * وأنا أضع هذه المعلومات أمام رئيس نادي الهلال حتي يتخذ ما يراه مناسباً من تدابير ومعالجات .. * حسب المخطط المرسوم سيقوم مكسيم بمقابلة رئيس نادي الهلال ويطلب منه السماح بمغادرة النادي لظروف نفسية .. * مكسيم وحسب (المخطط الأحمر) سيقول إنه أصبح نفسياً غير قادر على المواصلة ولن يفيد الهلال مستقبلاً .. * فإذا سمح له الهلال بالمغادرة يبقي (ده المطلوب) .. * وإذا لم يسمح له بالمغادرة فإن المريخ سينتظر ستة شهور يوقع بعدها عقد احتراف مع مكسيم علي طريقة (كلتشي) .. * كلتشي كان قد وقع للمريخ قبل ستة شهور من نهاية عقده مع الهلال ويومها خرج صلاح إدريس بتصريح قال فيه : (كلتشي باع الهلال) وقد تم شطبه من الكشوفات قبل أن يكمل فترته .. * سيناريو كلتشي قد يتكرر مع مكسيم بالكربون سيما وأن أهل المريخ محروقين جداً من ضربة شيبوب الشهير ب(عبرت) .. * والناس الشايفين إنو (2017) بعيدة عليهم ان يعلموا إننا في منتصف (2016) .. * يعني القصة ما بعيدة .. * ومكسيم نجم حقيقي ومحترف (5 نجوم) سيكون هو صاحب النصيب الأكبر في أي بطولة يحققها الهلال مستقبلاً .. * ولهذا التفريط فيه يعتبر كارثة بكل المقاييس .. * يبقي يا الكاردينال لازم تعرف إنو الموضوع ده ما فيهو ضمانات .. * نهائي مافي ضمانات .. * بعد الشفناهو في موضوع بكري المدينة لابنقتنع ليك بصورة ولا بعقد ولا بقروش .. * بكري ده قبض القروش واتصور معاك ومضى العقد ومشى لعب في المريخ .. * يبقى الخطوة الصاح إنك تسوق مكسيم أول يوم في فترة التسجيلات التكميلية وتمدد ليهو عقدو لحدي (2019) وتقفل الباب ده نهائياً .. * والكلام ده تفرضه مصلحة الهلال .. * ولو كمان عندك رأي كلمنا من هسه .. * جائز يكون عندك رأي لأنو مكسيم (غلط) أمام نيل شندي .. * الغلط يا الكاردينال عندك زي (كسر الرقبة) .. * أنا أتوقع إنو الكاردينال يتنازل عن مكسيم عشان غلط أمام النيل .. * والله صحي .. * الكاردينال ده بعد كده بقينا نتوقع منو أي حاجة .. * ممكن يشطب ليهو لاعب عشان ضيع ركلة جزاء .. * وممكن يشطب ليهو لاعب عشان أخد بطاقة حمراء .. * الشطب عند الكاردينال أسهل من (خلع الكسكتة) .. * احسموا مكسيم حتى لا تندموا .. * اللهم إني بلغت فاشهد .. * لن تكون مباراة الهلال أمام السلاطين سهلة إلا إذا لعب الهلال بذات القوة والروح التي لعب بها آخر ربع ساعة أمام هلال الفاشر .. * الهلال ليس في أمان .. * وبصراحة قبل أي مباراة ما في زول بيكون واثق من فوز الهلال .. * بندخل الإستاد خايفين .. * وما بنضمن فوز الهلال إلا بعد صافرة الحكم .. * الكورة لو ما انتهت ما في ضمان .. * هذا الإحساس الذي يسيطر على جمهور الهلال يجب أن يطرده نجوم الفريق .. * نحتاج أن ندخل الإستاد ونحن على ثقة بأن الفريق سيفوز وبعدد وافر من الأهداف مهما كان الخصم .. * الهلال محلياً ما بيخاف وكل الفرق في الدوري سواسية عند الهلال بما فيهم المريخ * المريخ وهلال الفاشر والنسور كلهم عندنا حاجة واحدة .. * نريد من نجوم الهلال أن يعيدوا لنا هذا الإحساس الجميل .. * إحساس إنك تمشي الإستاد بشهية مفتوحة .. * ما عايزين إحساسنا يكون زي إحساس المريخاب هذه الأيام .. * ناس المريخ لو ما شايفنها شينة عايزين يزوغوا من الجزائر .. * دايرين (يكبروها) .. * شكل المريخ هذا الأيام زي شكل الزول الداير يعطس وما قادر .. * والله صحي .. * خايفين من جابو ، وخايفين من عمايلهم السوداء العملوهم مع ضيوفنا الجزائريين .. * إنتو يا علاء الدين لما ضربتوا نجوم سطيف بدون كرة ما عارفين نفسكم ح تمشوا الجزائر ؟ * كنت فاكرين المباراة (ذهاب) بس ولا شنو ؟ * ما كنتو قايلين الشغلانية فيها (إياب) ولا كيف ؟ * معقولة ياخ زول يضرب ليهو زول (بونية) لما (خشمو يكب دم) ؟ * حركاتكم دي البتخليكم ما تتقدموا .. * عمركم ده كلو قاعدين في سيكافا .. * وحركات سيكافا دي ما بتنفع في الأبطال .. * والله أنا عندي أمنية وحيدة بس .. * أمنيتي مازيمبي يطير من الأبطال ويجي يلعب أول مباراة مع المريخ في الكونفدرالية .. * دي بس أمنيتي .. * وأي زول طبعاً حر في (أمنياتو) .. * طبعاً أنا قلت أمنيتي مازيمبي يطير من الأبطال ولم أقل المريخ يطير لأنو أصلاً طيران المريخ حاصل حاصل .. * بل أساساً مشاركة المريخ في الأبطال غلط .. * شحدت الله تقابلوا مازيمبي في الكونفدرالية عشان نشوف البودي قاردات والطباخين .. * طباخين ب(الثاء) .. * و..و.. * وجاني (سيطفو) طائف وأنا من (مباراة الإياب خايف والله خايف) ..