عليك الله لو ما حركات منكم يا ناس الجرايد (مواصلات الكلاكلة) - دخلها شنو في الموضوع دا؟ نحن الدخلنا في الحتة دي ذاتو شنو ما عارفين؟..بقينا من غير ما نشعر بنشجع في شبيبة القيروان اعتبارا من 14 فبراير (عيد الحب) ح نقعد نحرق في اعصابنا ونسأل عن مباراة شبيبة القيروان كم؟ شيبوب قالوا عندو (دراسة) جامعية ح يرجع يكملها في شهر مايو القادم...احسن الموضوع يكون واضح ليكم من الاول
* العلماء العندنا في الحلة – عارفين اي حاجة...وعندهم رأي في اي شيء...الموية ..الكهربة ...جداول الضرب...حركة 6 ابريل. * ملعب النقعة. * اللحمة ...العدس ..مواصلات الكلاكلة. * اي شيء. * عليك الله لو ما حركات منكم يا ناس الجرايد (مواصلات الكلاكلة) - دخلها شنو في الموضوع دا؟. * هم عندهم فيها رأي. * ولا في زول بيقدر يقول ليهم حاجة. * نقول شنو؟ – عاد في الزمن الصعب دا – الواحد يسكت بس. * اكتر حاجة ممكن تعملها – تشكي من المواصلات. * ولو بالغت شديد كدا ...ممكن تهاجم (حكم) الرأية. * اكتر من كدا ما بتقدر تقول شيء. * لو اتحرفنت شديد بتشكي من (الزايدة). * الزايدة الدودية. * العلماء بتاعين الحلة عندنا شغالين بالفارغة. * ما عندهم موضوع. * واي واحد فيهم عامل ليك فيها (عالم كبير). * الواحد فيهم يمشى الدكان مخصوص الساعة 12 في النهار دا ..يجيب ليه (طحنية) عشان يقعد يفتي فيها. * ولا قصدو بتكون الطحنية. * قصدو (الافتاء). * يطلعوا ليك (الطحنية) دي من (علبها) ..اتصنعت متين؟..وبتنتهي متين؟..وسمسمها من وين؟. * وشن جنسها؟. * وجابوها من وين؟. * والطحنية القبالها كانت احسن منها...(ليه دائما الطحنية السابقة بتكون احسن من الطحنية الجديدة في المحل). * نظرية. * يمكن ما تهمكم كتير. * دا شغل (علماء) ما تشتغلوا بيه كتير. * بيقربوا يدخلوا ليك (الطحنية) دي في (الدستور). * بقولوا ليك في القانون المدني المادة 920 ..الطحنية لو قلبت فيها علبة زيادي بتبقى حاجة ما بتخلص. * قلنا ليهم لكن دا قانون؟...بيقولوا لينا دمج فاتورة الموية مع فاتورة الكهربة قانون!!. * بقت على الطحنية يعني. * العلماء ديل. * كل واحد فيهم عمل ليه (صلعة)..وطلع ليه شهادة من اللجنة الشعبية وكرسي قدام البيت وعمل فيها (خبير). * خبير في اي شيء. * ناسنا ديل اصلهم كدا – كلهم (خبراء). * امشي ليك اي مناسبة بتلقاهم عاملين ليهم مجلس افتاء. * الكورنر يقعدوا يحللوا ليك متل (الملاريا). * يمين الناس الذين اخترعوا الكورة ما بفكروا في (الكورنر) تفكيرهم دا. * العلماء ديل (كتر خيرهم) – اصلو ما قصروا. * يوم داك ...(الكلام دا ما طول) العلماء ديل جابوا سيرة شيبوب. * المريخاب كلهم فتحوا خشمهم. * متل الناصية الفاتحة من اربع اتجاهات. * قلنا ليهم شيبوب مالو؟. * الزول دا اتلحتوه كدا من مطار لي مطار. * حايمين بيه (4) مطارات – واخر شيء مرقها في شبيبة القيروان. * شبيبة القيروان علاقتها شنو بالكاردينال؟. * قالوا الكاردينال رئيس نادي الهلال ..عندو جدو التاسع عشر (تونسي). * عشان كدا العرق دساس. * شيبوب مشى شبيبة القيروان. * امس في قوون (سيسجل شرف الدين شيبوب لاعب وسط المريخ السابق والمنتقل حديثا الى فريق شبيبة القيروانالتونسي حضوره الاول في الرابع عشر من فبرائر الحالي ، في مباراة فريقه ضد اتحاد بن قردان في دوري الرابطة المحترفة الاولى في استهلالية النصف الثاني من الموسم. ومن المعروف ان الاتحاد الدولي لكرة القدم (فيفا) اعتمد تعاقد شيبوب مع شبيبة القيروانالتونسي واصبح مؤهلا للمشاركة مع الفريق). * شوفوا الحقارة. * العلماء قالوا الكلام دا بالانجليزي. * خلاص شيبوب بقى على المشاركة. * ح يلعب رسمي. * والله نحن الدخلنا في الحتة دي ذاتو شنو ما عارفين؟..بقينا من غير ما نشعر بنشجع في شبيبة القيروان. * هسع نحن مالنا ومال شبيبة القيروان؟. * يعني اعتبارا من 14 فبرائر (عيد الحب) ح نقعد نحرق في اعصابنا ونسأل عن مباراة شبيبة القيروان كم؟. * والدقيقة كم في المباراة؟. * ح نقعد نتابع مباريات شبيبة القيروان كدا. * وبدون ما نشعر ..شبيبة القيروان لو اتعادلت ح نزعل. * ولو اتغلبت لا قدر الله يمكن نضحي بالعشاء عادي. * ونحن الحاجات دي ولا عندنا ليها اعصاب. * ولا فايقين ليها. * عشان كدا احسن يا الكاردينال الزول دا تقطعوا ليه (الغربة) وترجعوه. * الولد دا صغير. * بدري عليه. * رجعوه شهر مايو ..خلوه يكمل دراستو. * شيبوب قالوا عندو (دراسة) جامعية ح يرجع يكملها في شهر مايو القادم...احسن الموضوع يكون واضح ليكم من الاول. * ناس المريخ قطعوا ليه دراستو الجامعية. * دراسة الولد ومستقبله عندنا اهم شيء. * العلماء بتناقشوا في الحتة دي...قالوا شيبوب لو رجع يلعب كورتو مع الهلال مالو؟. * ما فيها حاجة. * ناس المريخ ديل بدل ما يتعاقدوا معاه بي (رباط) تعاقدي (احتراف يعني) ..جابوا ليه (رباط) صليبي. * الزول دا من المريخ ما شاف حاجة غير الرباط الصليبي. * فترة علاجو في الامارات ..مجلس المريخ في وجود جمال الوالي دفعوا ليه 2 الف دولار. * في رباط صليبي بيعالجوه ب (2) الف دولار...نزلة دي!!. * دا رباط شنو؟. * قروشكم دي رباط كدارة ما بتجيبو ..انتوا عاوزين تعالجوا بيها رباط صليبي. * بعدين زي ما قالوا ليكم وقلنا ..زول عندو رباط صليبي كيف يقفز من الطابق الرابع. * ناس مزمل ابوالقاسم قالوا لينا الرباط الصليبي بتاع شيبوب ما عندو علاقة بي القفز. * يعني ممكن يقفز بيه عادي من الطابق الرابع. * وما يعمل ليه اي حاجة. * قلنا ليهم دا رباط السرور ..الما عندو مشكلة في القفز من الطابق الرابع. * طيب قولوا الرباط الصليبي عند شيبوب ..بقدر يتعامل مع القفز من الفنادق ..عاوزين نعرف الزول دا يوم 14 فبرائر (عيد الحب) كيف ح يلعب مع شبيبة القيروان. * قلنا بيقفز بي رباطو الصليبي ..ح يلعب كيف يوم 14 فبرائر (عيد الحب) مع الشبيبة بي رباطو الصليبي؟. * يمكن الموضوع عندو علاقة بي عيد الحب. * الرباط الصليبي بيقدر المناسبة ...عشان كدا بيسمح بمشاركة شيبوب في المباراة يوم الفلانتاين. * الفيفا دي تقول قاصداها. * تقول عاملاها مخصوص. * في داعي تخلى اول مشاركة رسمية لشيبوب مع شبيبة القيروان في (الفلانتاين). * يا الكاردينال عملتها ظاهرة. * الموضوع بقى واضح. * ومكشوف. * اصلكم ما تقولوا لي موضوع عيد الحب دا وقع صدفة. * ما في صدفة بتخلي شيبوب يمرقها لي تونس. * ويلعب في شبيبة القيروان. * الغريبة والحاجة العجيبة ...امس قرأت تقرير نشر في صحيفة (المجهر السياسي) وفقا لمجلة (Washington) ان اكثر من 1,000 مقاتل يتدفقون الى سوريا شهريا..وقال التقرير ان اكثر من 20 الف مقاتل اجنبي سافر الى سوريا للانضمام للتنظيمات الملسحة ك (داعش) منذ بداية القتال في سوريا سنة 2011. * الكلام دا يمكن ما تقيفوا فيه كتير. * ويمكن ما يهمكم في الكورة. * وتقولوا هسع المناسبة شنو؟. * المناسبة ان التقرير جاء فيه احتلال (تونس) للمركز الاول عالميا من حيث عدد المقاتلين الذين يقاتلون في صفوف التنظيمات المسلحة في سوريا والعراق وتظهر احصائيات حكومية ان حوالي ثلاثة آلاف تونسي يقاتلون في صفوف هذه الجماعات. * الكلام دا نشر امس في (المجهر السياسي) عن دراسة امريكية متخصصة في الدراسات الامنية. * عشان كدا يا الكاردينال ..(شيبوب) دا احسن تعجلوا ترجعوه..تونس دي بقت مفتوحة للدواعش. * كمان الولد يقوم ينضم ل (داعش). * خالد بدرة ..ما بتفوت عليه زي مجلس المريخ. * خالد بدرة وقع مع اللاعب عقد احترافي...يعني ما فيه اي طريقة للقفز من الطابق الرابع ..والتسلق على المواسير. * ولكن لسلامة الولد ..رجعوه...تونس دي بقت ما مضمونة. * كدا الواحد يكون ريّح ضميره ..وقال الفي دواخلو. * ويكون العلماء بتاعين حلتنا ..بي حالتهم دي ما قصروا. * .......... * ملحوظة : وإلّا كيف؟. هوامش * الدوري الممتاز بقى ما مفهوم. * وممكن تحصل فيه اي حاجة. * عشان كدا الليلة اتحركوا من عصر بدري على ستاد الهلال. * فريق الاهلي مدني بقيادة حداثة ما بقل من هلال الابيض. * والهلال الى الآن لم يصل الى المستوى المطلوب. * عشان كدا الحقوه بالمساندة والتشجيع. * وان شاء الله الهلال يتجاوز المباراة من غير اي اضرار او خسائر. * وان شاء الله ترجع (السامبا) الهلالية كما يقول ميرغني يونس. * طبعا ميرغني يونس عامل السامبا (هلالية) ما برازيلية. * حقتنا برانا. * مباراة الفاشر ما عاوزين نقول فيها اي كلمة. * ما عاوزين نسبق الاحداث. * انسوها. * ما تشتغلوا بيها. * وركزوا مع الاهلي مدني. * .......... * عاجل : ان شاء الله (الفرحة) الليلة يقسموها مع شاي المغرب للهلالاب فقط.
