* عشان عين واحدة تُكرم (50) مليون عين .. * و(50) مليون عين من ناحية حسابية هي موزعة في (25) مليون رأس .. * و(25) مليون رأس هي قوام جمهور الهلال العظيم .. * ومن أجل هذه العيون يلعب نجوم الهلال رغم الإحباط وسوء الأحوال .. * العلاقة بين الجمهور والهلال ك(فريق) هي علاقة قوامها العشق المتبادل، قد تتأثر بالسياسات الإدارية ولكن في الأخير تنتصر المحبة الحقيقية وينبسط الجمهور .. * وعشمنا كبير في كل نجوم الهلال لتجاوز هذه المرحلة الصعبة والحرجة والمحافظة على الصدارة والسعي لتحقيق الانتصارات الدائمة .. * وقد ضرب الهلال (عصفور الأمل) وتبقى له (عصفور الأهلي) ليكون قد ضرب عصفورين بحجر واحد .. * كل الملطوب أن يلعب نجوم الهلال من أجل عيون هذه الجماهير العظيمة التي تحب دون مقابل ، بل إنها جماهير (تصرف على الحب) وهذا أعظم ما في جمهور الهلال .. * الهلال احتاج لجمهوره في أوقات كثيرة وقد كان الجمهور حاضراً في كل الأوقات ، الآن الجمهور محتاج لنجوم الهلال .. * الجمهور في هذا التوقيت يحتاج للاعبين ويحتاج للسعادة التي يمكن أن تغطي بذور (الفتنة) التي زرعوها أصحاب المصلحة وسط الجماهير .. * لا نميل ولا نحبذ استخدام مفردة (مؤامرة) أو (استهداف) ولكن بالفعل هناك محاولات تستهدف جمهور الهلال وللأسف هي محاولات يقودها هلالاب ربما يعجبهم منظر (الدم والدمع) .. سامحهم الله .. * محاولات تقسيم الجمهور لن تنجح لأن جمهور الهلال أذكى وأرفع من ذلك .. * الرابط بين جمهور الهلال (محبة قديمة) وهي محبة شربت من (عرق) والي الدين محمد عبد الله وشربت من عرق ياسر رحمة وأنس النور وبشه وكاريكا .. * محبة ارتوت بعرق النقر وجكسا وقاقا وساسا والديبة وحمد وصلاح الضي وحمودة بشير ومهند الطاهر وبوي وطارق أحمد آدم .. * محبة بهذه القيمة والعمق لن تؤثر فيها (خزعبلات) الكاردينال ومن معه .. * ولذلك يجب أن يتحد جمهور الهلال ونجوم الفريق من أجل العبور بالهلال إلى الأمام .. * ونحن على ثقة بأن (مرتبات نجوم الهلال) يمكن أن تكون من (جيوب جماهير الهلال مباشرة) .. * جمهور الهلال يستطيع أن يسير فريق الكرة .. * فقط كل المطلوب مزيد من الجدية والاجتهاد من أخوان بشه حتى يدعمهم الجمهور الدعم الذي يليق بهم ويليق بالهلال العظيم .. * والمال لن (يُؤلف) بين قلوب مبعثرة ومهمومة بالمصالح ، والسعادة رأس مالها (كلمة) .. * والجوهرة الزرقاء قبل أن تقف شامخة تحتاج لنفوس متسامحة وراضية ومتصالحة .. * كنا حلوين مع (المقبرة) ولن نكون أعداء حتى ولو كانت (الجوهرة) مثل ملعب الريال أو برشلونة .. * وإذا كان رئيس الهلال مخلوع بالهلال فإن جمهور الهلال غير مخلوع بالجوهرة .. * شخصياً أنا واحد من أكثر الناس فرحاً بالجوهرة وبما فعله الكاردينال ، ولكن لا أقبل أن تكون الجوهرة على حساب حاجات هي من ثوابت مجتمع الهلال .. * ولا اعتقد أن جمهور الهلال سيقبل بأن تحل الجوهرة محل أدب الهلال ومبادئه السامية ومجتمعه الطاهر .. * ولن نتردد يومياً في إرسال النصائح للكاردينال حتى يصالح نفسه ويعرف أنه يسير في طريق من اتجاه واحد .. * وخطورة الطريق البيكون من اتجاه واحد : (يا وقفت عاجزاً في آخر الطريق ويا رجعت خلف) وفي الحالتين ما دايرنها للكاردينال .. * وأسوأ حاجة هي المكابرة وقوة الرأس و(المكاواة) .. * رئيس الهلال تاريخياً بيكون حكيم ومتزن وراشد في تصرفاته وأقواله وأفعاله .. * بالمحبة والكلمة الطيبة والتواضع تستطيع أن تؤلف بين قلوب كل شعوب الأرض .. * الكاردينال محتاج يتواضع .. * ومحتاج يعرف إنو الدنيا دي لا أنا ولا هو ولا مكسيم ولا كافالي ما في زول بيشيل من الدنيا دي حاجة .. * كلنا بنمشي نخليها .. * الموت في، والمرض ف ، عشان كده الزول يتواضع ويحمدالله على نعمة الإسلام ونعمة الهلال .. * القصة ما ركوب رأس .. * لو ركوب رأس علي بالقسم حسني مبارك ما بفارق الكرسي .. * خليك من حسني مبارك .. * لو الشغلانية ركوب رأس بلاتر ما بروح شمار في مرقة .. * وحكاية أن تحكم (25) سنة دي عليك الله يا الكاردينال ما تقولها لينا .. * ما تقولها لينا لأنو الشال بلاتر وحسني مبارك والقذافي بيقدر يشيلك زي الماحصل .. * حكاية ال(25) سنة دي تقولها لزول ما عندهم قناة الجزيرة .. * لكن ما تقولها لينا إحنا .. * اعتصام واحد في شارع المطار بتلقى نفسك يا الكاردينال بره الهلال .. * وفي النهاية البلد دي فيها حكومة .. * والهلال سيد البلد دي .. * والكلام ده كلو ما في ليهو داعي .. * كل المطلوب منك إنك تتواضع وتسمع أهل الهلال وتعيِّن الزول المناسب في المحل المناسب .. * يعني زي محمد عبد اللطيف هارون ده تشوف ليهو شغلة مناسبة في واحدة من شركاتك .. * شغلو معاك بهناك إحنا في الهلال ما دايرنو .. * رجع لينا ناس عاطف النور وعبد المهين والناس البيدفعوا من جيبوبهم عشان يحلحلوا مشاكل اللاعبين البسيطة .. * رجع لينا ناس الهلال البيدفعوا من الجيب الخاص عشان يعالجوا اللاعب المصاب مش الناس البيجيهم اللاعب مصاب بيقولوا ليهو أنت كويس .. * زي بوي .. * جا مصاب داير يعمل عملية ب(31) مليون قالوا ليهو : (ما بتحتاج أخد راحة بس) .. * جا داير يعمل عملية ربطوا ليهو (فاول) .. * والله بدل الفاول ده كان تربطوا ليهو (جرتق) .. * ديل ناس جونا في غفلة لكن ما بنخليهو يلعبوا بينا والله العظيم .. * البيحب الهلال بنشيلوا في رأسنا فوق والجاي يستغل الهلال ويقشر بالهلال ما عندنا ليهو حاجة .. * هسه أسألك يا الكاردينال سؤال ؟ * المدرب الجديد ده مشى عطبرة ورجع في نفس اليوم لشنو ؟ * مشى يشيل فاتحة ولا شنو ؟ * يعني زاتو في حاجات كده تحيِّرك .. * ما تقدر تفهم الناس دي بتعمل كده لشنو ؟ * مدرب مشى عطبرة قعد ساعتين وجا راجع ، لا شاف تمرين ولا شاف كرة أصلاً .. * واحتمال كبير المدرب ده لما وصل عطبرة يكون لقى اللاعبين نايمين .. * والله صحي .. * يا الكاردينال .. والله والله والله إحنا ما عندنا معاك مشكلة ولا حصل قابلناك والعملتو لينا في الجوهرة ما عملو زول فياريت والله تتخلص من عيوبك وصدقني بتلقى أمة الهلال وراك متوحدة .. * إحنا زاتنا فترنا من المشاكل دي .. * دايرين نرجع نكتب في مريخ الحكومة وما لاقين طريقة .. * المريخ طار وإحنا لسه مع الكاردينال كل يوم فصل جديد من فصول مسرحية بايخة وعبيطة .. * أسدل الستار يا كاردينال وإتواضع عشان كلنا نغني ليك من قلوبنا (عدي بينا يا ريس) .. * وعلي فكرة يا الكاردينال : (عدي بينا ياريس لما تجي من القلب ما زي لما تجي من اللسان) .. * وأنا ما بفسر وأنت ما تقصر ..
