بالعربى الكسيح محمد الطيب الأمين القرد ب(رقبتُو) بربطُو من (صلبُو) مالو ؟؟
* قرر الهلال منح الرقم (8) إعتبارا من الموسم القادم للنجم الموهوب صهيب الثعلب .. * و(8) تليق بالثعلب والثعلب يليق بها دون شك .. * ولكن على مجلس الهلال ان يبعد صهيب من (صراع) هذا الرقم حتى لا نفقد موهبه بسبب (رقم وما رقم) .. * الثعلب صغير في السن واى ضغط إضافي يمكن ان (يشِل موهبته) ، ولذلك نقترح ان يكون الرقم (8) من نصيب (محترف اجنبي) على الاقل في الوقت الراهن .. * تبقت (15) يوما لآخر الشهر ، ولعيبة المريخ بأذن الله سيصرفون مرتب شهر اكتوبر في يناير ، وسيصرفون مرتب شهر يناير في شهر ابريل .. * واللهم لا (ساماتا) .. * كان المعز محجوب اساسيا في المنتخب واساسيا في الهلال ، والان المعز إحتياطيا لجمال سالم في المريخ وإحتياطيا ل(يس يوسف) في المنتخب .. * وعلى فكره .. يس يوسف كان احتياطيا في المريخ لاكرم الهادى سليم .. * يعنى بالبلدى كده معز اصبح احتياطي لحارس كان هو احتياطي اكرم .. * غايتو جنس غايتو ؟؟ * ذكر الخندقاوى في حواره مع صحيفه (المشاهد) انه يملك نصيب في الجوهره .. * وقال : (انا دعمت الجوهره ب300 ألف دولار) .. * خلاص بدينا يا الخندقاوى ؟؟ * قمت خلاص على الحركات دى ؟؟ * واضح إنو الخندقاوى ده ما (زول طويله) .. * ده (زول قصيره) ساكت .. * الزول من يقول ليك : أنا دفعت وأنا عملت طوالى تعرف إنو ده ما زول طويله .. * اى قرش دفعتو يا الخندقاوى إحنا مقدرينو ليك بس ما (تشغلها لينا) .. * خليك هلالابي (تقيل) ما تشتم الناس والناس ما تشتمك .. * انت حاليا إستفدت من الهلال وطبيعى جدا الهلال يستفيد منك .. * قبل الهلال يا الخندقاوى (جيرانكم) ما كانو بعرفوك وهسه بقيت أشهر من معتز صباحى .. * إحنا والله العظيم ما بنحب نقلل من حجم اى هلالابي بيدعم ولا بنحب نشتِم الهلالاب وفي نفس الوقت ما بنقبل هلالابي يجى (يذلنا عشان دفع ليهو قرشين تلاته) .. * يبقى يا خندقه .. سمعنا صمتك .. * غارزيتو قال جاهو عرض من الترجى .. * بعد إستقالة جمال الوالى اى زول بيقول (جاني عرض) .. * في وجود الوالى ما كان في عروض بتجى وأول ما الوالى إستقال كترت العروض .. * و(الوالى كان إستقال كترت العروض عيب) .. * الحاجة دى ذكرتني حاجه .. * زمان كنا لما نمشى بيت مناسبه بنركز على (الضلع والمحشى) .. * يختو صينية الغداء بنضرب (المحشِى والضلع) وبنبقى مارقين .. * أول ما الضلع يكمل بنقوم ، والجماعه بيقولو ليك : (يا زول صلى على النبى انت ما أكلت حاجه) .. * والبقول لينا : صلى على النبى انت ما اكلت حاجه بنقول ليهو : ألف على الحبيب لكن فطرنا متأخرين .. * فطرنا متأخرين دى بنقولها لما (الضلع) يكمل وباقى الغداء ما يعجبنا .. * هسه في المريخ (الضلع والمحشِى) إنتهى عشان كده الجماعه كلهم عايزين يتخارجو .. * عاملين فيها (فطرو متأخرين) .. * وحركاتكم دى إحنا عارفنها .. * وإحنا على بالنعمه عارفين اى حاجة .. * وعارفين كمان اللاعب المريخي الذى عزم اصحابه (شيه في قندهار) بمناسبه خساره المريخ امام مازيمبي .. * عارفين والله .. * الهلال سيواجه المريخ في مباراة القمه ب(الرديف) فهل يستطيع المريخ المسيخ ان يواجهننا برديفه ؟؟ * رديفنا ورديفكم لو دخلناهم الملعب رديفنا بغلب رديفكم (سبعه) .. * وسبعه هو (رقم فانله الثعلب) .. * والثعلب اللابس (7) اخطر من (شلبيايه) اللابس (3) واخطر من ساماتا اللابس (9) .. * الاتحاد العام اوقف (دورى الرديف) عشان المريخ رديفو تعبان وعشان رديف الهلال نار .. * ورديفنا الما لعب دورى الرديف سيلعب معاكم في مباراه القمه فهل يستطيع الاتحاد العام ان يمنع الهلال من المشاركه في القمه بالرديف ؟؟ * غايتو راجيكم بهدله لا يعلم بها إلا الله .. * والله صحى .. * (الأمل) هو أمل شعب عطبره ولذلك صمد الأمل رغم حسادة قوه الشر .. * الإتحاد العام والمريخ عملا بقوه من اجل تدمير الامل وهبوطه من الدرجه الممتازه ولكنه صمد بدعوات جمهوره العاشق للشعار .. * ومجلس إداراة نادى الامل عليه ان يوقف كافة اشكال التعاون والتعامل مع المريخ ، لا نقول هذا من باب الهلال وإنما نقوله لان الحقيقيه تتطلب من الامل معاملة المريخ بما يستحق .. * المريخ بيعادى في الامل وبدون خجل أمبارح عايزين يخطفو لاعب الامل عمار الدمازين .. * ناس ما بخجلو ولا عندهم كرامه .. * ادارة الامل عليها ان تمنع إنتقال اى لاعب للمريخ حتى ولو دفع المريخ عشره مليار .. * هو طبعا تانى المريخ اصلا ما بقدر يقيف مع الهلال في القروش .. * مع عبد الصمد الجاييكم ده على بالحلف (كديس) ما تشيلو من عطبره .. * ما بتخجلو (رزاق) يضربك في الميدان تجرو المكاتب تقولو عايزين النقاط ..؟؟ * لمتين ح تكونو كده تسرقو في عرق الرجال ؟؟ * نهايتكم جات يا حناطير والسنه الجايه ان شاء الله ما ح تكونو (وصيف) لانو وصافتكم لينا فيها إنتقاص من قدر الهلال .. * ما بشرفنا وصيفنا يكون ماشى بالتحكيم والقرارات المكتبيه .. * دايرين لينا وصيف بأكل بيدو مش بأكلوهو الناس .. * المهم .. * حتى لا ينسى الكاردينال .. * نكرر ونقول : الهلال لن يستحمل تسجيلات (فشنك) هذا العام .. * فترتين في التسجيلات والهلال خرج بمكسيم فقط .. * والمرة دى دايرين كل البيدخل الكشف يكون زي مكسيم .. * اوع من المهاجمين الخجلانين .. * ما تجيبو لينا مهاجم خجلان زي كيبي ده .. * كيبي ده والله أ تقول (بحب من طرف واحد) .. * خجلان تقول (عامل ليهو جريمه في بلدو) .. * دايرين مهاجم (مهجُور) يا الكاردينال .. * ومهجور يعنى بعد يجيب القون يضرب الحارس (كف) .. * مهاجم ما بضرب الحارس الكف ما بينفع معانا .. * واوع من تسجيلات (مقاطع الفيديو) .. * والنكته دى بنهديها لمجلس الهلال عشان ما يعتمد على (مقاطع الفيديو) .. * قالو في واحد مغترب ناس البيت رسلو ليهو (شريط فيديو) عشان يختار ليهو عروس من الشريط .. * الزول ده (حضر الشريط مرتين تلاته) .. * بعد اسبوع ناس البيت إتصلو عليهو وقال ليهو : اها لقيت عروس في الشريط نمشى نخطبها ليك ؟؟ قال ليهم : اى لقيت البت البتجى في الدقيقه (42) .. * وصف ليهم البت العايزها بالدقيقه .. * قال ليهم احضرو الشريط والبت البتظهر ليكم في الشاشه في الدقيقه (42) دى انا عايزها .. * عشان كده يا الكاردينال إحنا لا دايرين الدقيقه (42) ولا الدقيقه ألف .. * جيب لينا لاعب نكون شفناهو في (بى آن سبورت) .. * واللهم بلغت فأشهد .. * (تحت تحت) قالو بكرى المدينة (مُحبط ومستاء) من الجو العام في المريخ .. * وجو المريخ ما بعيش فيهو إلا زول بحب الاجواء الزي جو المريخ يا بكري .. * وطبعا يا بكري انت تعلم انك تانى ما ح تشوف الهلال إلا في السماء ومعاك صلاح ادريس برضو .. * وبما إنك يا بكري تانى ما بتشوف الهلال إلا في السماء فنحن نطالبك بالصبر وإحتمال تلك الاجواء .. * بكري كان (نشيط ومتحمس) وأول ما (التلاته) مليار إنتهت إكتشف إنو الجو ما بينفع معاهو .. * وعشان الجو ينفع معاهو لازم تدوهو تلاته مليار تانى .. * اصلا صعب جدا لاعب يستحمل المريخ بدون قروش .. * هسه المغتربين ديل مستحملين الغربه عشان القروش ما عشان الغربه ولا حبا في السعوديه ولا حبنا في الدوحه ولا حبا في ليبيا ولا حبا في الصين ، مستحميلين الغربه حبا في تحسين اوضاعهم وهذا من حقهم ونتمنى لهم التوفيق والعوده سالمين غانمين .. * نفس الفكره دى بكرى المدينه إستحمل المريخ عشان القروش وهسه اول ما قروش إنتهت بقى مستاء وزهجان وندمان تقريبا .. * واوع تقول لي زول ندمان ما بيلعب بمعنويات عاليه زي بكرى في دورى الابطال .. * اوع تقول لي كده لانو بكرى مضايق الان ، يعنى يادااااااب إضايق بعد قروشو كملت .. * والله صحى .. * المهم .. * التاجر لما يفلس بيرجع للدفاتر القديمه .. * والمريخ لما يفلس بيرجع ل(الإعارات القديمه) .. * نتوقع الآن ان يقوم المريخ بإستعادة لاعبيه المعارين بقياده الطاهر سادومبا وعنبكه وسعيد السعودى وحسن كمال ومرتضى كبير وموسى الزومه ومحمد مقدم وسفارى .. * واهم من هذا يجب ان يجدد المريخ عقودات بعض الحكام .. * في حكام عقوداتهم مع المريخ ح تنتهى بنهايه الدورى وإذا لم يجدد لهم المريخ لن يحصل على المساعدات التى تعود عليها سنويا .. * سنويا ب(الفاء) .. * ونركب صافنات ونجيبه (عطبراويه) وأصلو الزول بموت والذكرى تفضل حيه .. * على فكره .. عنوان العمود ظاهريا ما عندو علاقه بالعمود لكن باطنيا عندو علاقه بالعمود .. * و..و.. * وتاتيتو قلبك بالسنين وسابني يوم عرف …(يرص العلامات) ..