* (99%) من أبناء الشعب السوداني الفضل يتركون (الزرارة الفوق) فاتحة .. * نادر جدا تلقي ليك زول (مُزرر) الزرارة الفوق ، والغريبة كل (القُمصان) عندها (زراير فوق) .. * الزرارة الفوق مخصصة ل(الكرفتة) وإحنا الكرفتة عندنا زي (البُرجم) بنلبسها مرة في العُمر .. * البُرجم بيجي للزول مرة في العُمر والكرفتة بنلبسها يوم العرس الذي هو مرة في العُمر .. * موضوع الزرارة ده ذكرني محترف المريخ (كريم الحسن) .. * كريم الحسن كان قاعد في المريخ زي (الزرارة الفوق) .. * والله صحي .. * كريم الحسن قالوا موهبتو كلها في (آكل الموز) .. * يأكل الموز وينوم في (مكيف الفندق) الدافع قروش البلجيكي .. * حاجة تكسف .. * حينما غادر سادومبا الهلال (بكى) مودعا الذكريات والجمهور ، وحينما عاد .. (بكى) الذين ودعهم لانهم إستعادوا شريط ذكريات من الألق والإبهار .. * ودموع وداع سادومبا ، ودموع إستقباله يجب ان تكون هي دافع نجاحه الأول والأخير .. * كل المنى أن يكون ساسا كما كان (جلادا للحراس) ومهاجما يزرع الفرح في القلوب .. * كنا نرجو أن يبحث الهلال عن مهاجم جديد بمواصفات سادومبا لان ساسا قدم كل ما عنده ، ولكن طالما جمهور الهلال سعيد بعودته يبقي مبروووك علينا (حبيب الأمس) .. * ومبروك علينا حسن وحسين والريدة .. * الهلال إستهل التسجيلات بثلاثة لاعبين والمتبقي ستة آخرين لتكون المحصلة تسعة إن شاء الله .. * قد يكون العدد كبير ولكنه مقبول طالما الفريق في طور البناء وتجديد الدماء .. * وإذا نجحت هذه التسجيلات كما مخطط لها فأن الأزرق في التسجيلات الرئيسية لن يكون محتاجا لإضافات جديدة .. * وبأذن الله تنجح التسجيلات ويستعيد الهلال شخصيته وقوته في الدورة الثانية ليكون (الحصان الأسود) في الأبطال العام القادم .. * بمناسبة الحصان الأسود .. * من شدة طيبتنا الشديدة بقت الكهربا لما ما تقطع في اليوم المفروض تقطع فيهو بنتصل لناس الكهربا نسألهم .. * حسب (الجدول) المفروض نقطع يوم ونكون شغالين يوم .. * أول أمس المفروض نقطع وما قطعنا ولذلك إتصلنا على ناس الكهربا وقلنا ليهم : (مالكم الليلة ما قطعتوها إن شاء الله ما في عطل) ؟؟ * الكهربا لو شغالة عندكم تأكد إنو في عطل خلاهم ما يقطعوها منكم .. * غايتو جنس غايتو !! * لن تكون العصفورة غبية إذا دخلت الغرفة بالشباك وخرجت بالباب .. * ولكن كل الغباء أن تستبدل (لجنة تسيير) ب(لجنة تسيير) .. * وإستبدال لجنة التسيير ب(لجنة تسيير) يشبه إستبدال (على جعفر) ب(مصعب عمر) .. * إتخيل .. أثناء المباراة يخرج مصعب ويدخل علي جعفر .. * مباراة البديل فيها مصعب والمستبدل علي جعفر قطع شك المريخ سيخسرها .. * حب المريخ للجان التسيير والتعيين يؤكد للمرة الألف أن (حواء الإصيفر) توقفت عن (الولادة) علي الأقل فيما يتعلق بالقيادات .. * حواء المريخ ربما هي تحتاج لمراجعة أطباء مركز (أدم وحواء) .. * فضيحة والله أن يهب المريخ كل عمره للجان التسيير والتعيين الحكومي .. * بالجد فضيحة .. * والمشكلة إنها بقت ليهم عادة .. * وإعلام المريخ بقى ما بخجل لما يطالب بلجنة تسيير .. * بكتبوا الكلام ده عدييييل كده .. * يقول ليك : دايرين جمال الوالي يجي عن طريق لجنة تسيير .. * الغاية في المريخ تببررها الوسيلة .. * الغاية عندهم (جمال الوالى) وأصلو ما مهم الوسيلة اليجي بيها .. * بس هو يجي .. * إن شاء الله يجي بالتعيين أو يجي بالقوة والتعليمات .. * لا بعرفوا إنتخابات ولا بعرفوا ديمقراطية .. * والله أنا كلو ما أشوف حال المريخ ومستوى طموحاتهم بحمدالله مية مرة على نعمة الهلال .. * وما تستغربوا لو المريخ سجل أتير توماس .. * ديل بيحبوا أي حاجة عندها علاقة بالهلال .. * تسجيلات المريخ بتبدأ بعد ما الهلال يحدد المشاطيب .. * والله صحي .. * بس أنا حابي أذكر ناس المريخ حاجة معينة .. * داير أذكركم حاجة صغيرة جدا .. * لازم تعرفوا إنو لو سجلتوا لاعبين الليلة أو بكرة ما ح يلعبوا معاكم مباراة الكوكب المراكشي .. * المعلومة دي لازم تعرفوها .. * عشان ما تفرحوا ساي .. * البطولات الخارجية دي إنتو ما بتكونوا عارفين نظامها كيف .. * لكن إحنا بنوريكم .. * لو سجلتوا لاعب الليلة لازم تنتظروا تأهل الفريق للمجموعات ولازم اسم اللاعب يمشي (الكاف) ويتم إعتماده بعد داك ممكن يشارك في المجموعات .. * وطبعا إنتو المجموعات تشموها قدحة .. * أما بالنسبة لينا إحنا فالأخ شرف شيبوب سيشارك إعتبارا من الغد في تدريبات الهلال .. * شيبوب أمضى فترة نقاهة ممتازة جدا بتونس وجا للهلال بمعنويات جديدة فمرحبا به .. * وللأمانة موضوع شيبوب ده معذب المريخاب عذاب لا يعلم به إلا الله .. * ومعاهم حق .. * ضربة شيبوب هي ثاني أكثر ضربة مؤثرة بعد ضربة علاء الدين يوسف الشهير ب(البصمة) .. * جمهور الهلال لو عارف قدر شنو ناس المريخ مضايقين من ضربة شيبوب كلهم بيمشوا المطار يستقبلوه .. * وبصراحة في حكاية شيبوب دي الكاردينال قلب الهوبا .. * عمل ليهم حركة بحركتين لقوا شيبوب في الهلال .. * الحصل في موضوع شيبوب إسمو (حركة بحركتين) .. * زي الزول البيمشي (الكلاكلة عن طريق الحاج يوسف) .. * والله صحي .. * أما حركة تسجيل جمعة جينارو في كوبر وإعارته للهلال فهذه تسمى (وهمة في شكل قلبة) .. * وأنا أفتكر إنو (الوهمة في شكل قلبة) أفضل ليكم من (الحركة بحركتين) .. * أفتكر كده .. * واي زول طبعا حر في (إفتكاراتو) .. * المهم .. * إحنا دايرين شيبوب يتسجل في يوم براهو .. * ما دايرين يكون معاهو زول .. * وأهم شئ يجي مكاتب الإتحاد لابس الكسكتة .. * وبعد تسجيله مباشرة نمشي نصلي معاهو صلاة العصر في مسجد المريخ .. * بتمنى كده .. * بتمنى شيبوب بعد توقيعه للهلال يمشى يصلي في مسجد المريخ .. * يعمل فيها زي ما قاصد كده .. * زي إنو وقت الصلاة أدركه بالقرب من مسجد المريخ .. * وبأذن الله هلال مريخ (المؤجلة) سيكون فيها شيبوب أساسيا .. * شيبوب .. ضربة إدارية وفنية .. * وشيبوب الجفل خلو أقرعو (فلان الفلاني) .. * يا بتوعين التسيير .. * تسيير ب(الهاء) ؟ * ونركب صافنات ونجيبة (هلالابية) وأصلو الزول بيموت والذكري تفضل حية .. * و..و.. * وانت (البياض) البين ضلوع البرتقال !!
