دق الدلجة محمد عبد الماجد لو عارفين شيبوب بيعمل كدا كنا تاني فكينا ليهم وشلناه منهم بغير وجه حق – حاول المريخاب الاحتفال بكاس الدوري والممتاز – البطولات غير الشرعية والتى منحها لهم اسامة عطا المنان وسمير فضل وهيئة تطوير وتنمية مدينة دنقلا. دنقلا ما عندها علاقة بالموضوع. اول علاقة لجنة الاستئنافات بالكورة شنو؟..وقوانينها. زي علاقة الزول البكون مسافر (القاهرة) بي المطرة الفي (انقرا). في علاقة بين القاهرة وانقرا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). المريخ كانت فرحته بالممتاز غير المستحق كبيرة فقد تم منحهم بطولة كان يتقدم فيها الهلال عليهم ب (9) نقاط. ومنحوهم كاس السودان – وهم (كورنر) ما عندهم فيهم. لذلك كانوا يعتبروا ان هذا الموسم الذي فازوا به ببطولات (سلفقة) ساكت – الموسم النموذجي لهم. واحتسب المريخاب ان فريقهم اكتسح التسجيلات – سجلوا النعسان وعطرون وخطفوا (الوك). طاروا بي (الوك) السماء. هذا شيء ما كانوا يحلموا به. باعتبار ان اللاعب (الوك) كان في قبضة الهلال وهو مرصود من غرفة تسجيلات الهلال. لذلك عملوا (بطولات) لا اول ولا اخر لها. احتفالات بلاعب لن يستفيدوا منه. الوك الساحر. الوك الظاهرة. وذهب المريخاب الى اعتماد اعادة قيد امير كمال وراجي عبدالعاطي ومصعب عمر وكوفي (انجاز) لهم. ما مصدقين ان الكاردينال بكل قدراته المالية ما يدخل منافسا لكسب امير كمال وكوفي على الاقل. خرج اعلام المريخ بعد اعادة قيد امير كمال وكوفي الى الناس ليقول متى سوف يسجل الهلال لاعب من المريخ اذا لم يسجل هذه المرة والمريخ عنده (6) لاعبين مطلقي السراح (الباشا وبلة جابر). استفزوا الناس. وقعدوا يتفاصحوا. الجماعة ناسيين تماما موضوع (شيبوب). شيبوب العليه العين ما جايبين خبرو. مرات في عريس بتقدم..وبقول ليهم والله نحن لا عاوزين الكبيرة ولا عاوزين الفي النص – نحن عاوزين (الصغيرة). الهلال لا عاوز امير كمال. ولا عاوز كوفي …ولا راجي عبدالعاطي. الهلال عاوز (شيبوب). ناس الهلال بعرفوا زولهم. بجيبوه وسط مليون لاعب. بنتظروه العمر كلو. عشان يشيلوه في الوقت المناسب. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). اعلام المريخ بعد اعادة قيد امير كمال وكوفي استفزوا الكاردينال ووجهوا له انتقادات عريضة باعتبار ان الهلال لا يستطيع تسجيل لاعب من المريخ. وذهبوا ابعد من ذلك عندما خطفوا من (الوك) من الهلال واعتبروا ذلك (صفعة) اخرى للهلال. الجماعة ما جايبين خبر. ما عارفين الحاصل هناك شنو؟. غطوا (ورقكم) اول. ما تتكلموا وورقكم مكشوف. الكسكتة الكاردينالية عملت اول حاجة على استنفاد (قروش) المريخ كلها في (امير كمال). الدعم الحكومة للجنة التسيير كله استلمه امير كمال وكوفي. قالوا ليك امير كمال بقى زي والي الولاية من القروش التى استلمها من الحكومة. الدعم كلو فات لامير كمال. لمن وصلوا لراجي ومصعب عمر …الجماعة استنجدوا ب (ادم سوداكال). محطة (الوك) وصلوها بي اخر نفس …ما كان عندهم طريقة غير يسوقوا اللاعب ويمشوا بيه بيت جمال الوالي. بذا ..كل (دعومات) المريخ وامواله انتهت في التسجيلات (الذاتية) للمريخ. الجماعة كانوا لغاية هنا ما جايبين خبر لي (شيبوب). ولا عارفين الحاصل شنو؟. معتبرين ان اللاعب في منطقة (الظل) وناس الهلال ما جايبين خبره. وهم ما عارفين ناس الهلال رصدوا اللاعب من كورتو في الاتحاد الجزائري. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). لمن الهلال فجر موضوع (شيبوب) ناس المريخ ختوا ايدهم في رأسهم ..وعرفوا ليك الكاردينال دا ما ساهل. كمل ليهم قروشهم في (مدافع) وخلاهم ليك بدون (ارتكاز). زي الباب الما عندو (مفتاح). زي الزول الواقف ليه في اتجاه غلط منتظر المواصلات – وهي ما بتجي بالشارع دا. واقف ساكت. زي الزول البدل يبشر للعريش ببشر لوزير العريس. قضية شيبوب اتفجرت …المريخاب رأسهم ضرب. شيبوب ظهر مع الكاردينال. حيلهم مات. شيبوب سافر جوبا. قالوا الزول دا لازم يرجع. لو ما رجع شيبوب والله 120 لجنة استنئافات ما بتقدر تعمل ليكم حاجة. جماعتكم ما خلوا ليهم (تلفون). ما خلوا ليهم (دولار) حايم. لقطوا ليك حكاية بتاعة (23) الف دولار – عشان (شيبوب) يرجع تاني للمريخ. سفارات واتصالات وتسلق اعمدة. ما خلوا شيء. الى ان اعادوا شيبوب. جابوه راجع الخرطوم. اتصوروا معاه. واعتبروا نفسهم وجهوا ضربة قاضية تاني للهلال. اعلنوا عن (المهرجان). ومهرجانهم قايم على (شيبوب). شيبوب فنان الحفلة. شيبوب عريس الحفلة. اي حاجة قايمة على شيبوب. ناس الهلال شفوت. قبل (24) ساعة من المهرجان زي ما رجعوا (شاحن موبايل شيبوب) – رجعوا ليك شيبوب ذاتو. بي بكل بساطة. بي كل يسر. خلوا ليك مهرجان شيبوب كلو فيه (13) نفر. الجماهير قاطعت المهرجان. الاعلام. ونص مجلس لجنة التسيير ما جاء المهرجان – ما قدروا يظهروا امام الجماهير. جماعتكم ما عارفين انوا ناس الهلال خطفوا شيبوب ورجعوه للمريخ ..عشان يكملوا ليهم باقى قروشهم. المريخ خسر في اعادة شيبوب اكثر من (23) الف دولار. يعني القروش التى خسروها في اعادة شيبوب من جوبا في كريم الحسن ما خسروها. عشان كدا رأيكم شنو ناس الهلال يعملوا ليهم مسرحية تاني. عاوزين نشوف بطولات المريخ الوهمية. اكشفوا لي ناس المريخ مكان شيبوب. خلوهم يرجعوه تاني. يتسلق بالاعمدة. يقفز من الطابق الخامس. يختفي كم يوم كدا. يمر عبر كم مطار. ويظهر في مطار الخرطوم. يتصوروا معاه. ويصرحوا. وناس مزمل وسلك وكابو يكتبوا اعمدتهم. ويعلنوا عن مهرجانهم. نقوم كدا تاني نسوق ولدنا. نحن اصلا واثقين في شيبوب. فكوه ليهم – عشان يتصوروا معاه. ما شرط المرة دي يتسلق ليه ماسورة في البرد دي. ولا شرط يقفز من الطابق الثاني. الحاجات دي كلها عفيناهو منها. بس يتصوروا لينا معاه في مطار الخرطوم. ويكتبوا اعمدتهم. ويعلنوا عن (مهرجانهم). ونرجعو تاني لقواعده سليما. الجماعة ديل بي (فلستهم) دي لو فكيتوا ليهم (شيبوب) عشر مرات – ممكن تشيلوه منهم. ممكن يرجع تاني يوم. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……………. و الهلال ح يدخل بعد السبت في المرحلة الثالثة من الاعداد. وناس المريخ لسه حايمين بالمطارات. يتلقطوا لاعب – لاعب. معسكركم بقى زي خبر البكاء. كل اتنين بيجوا مع بعض. الصيوان لسه ما اترفع. مازن شمس الفلاح شكلو عاوز الهلال. يا شمس الفلاح انت بدري عليك. لمن تثبت وجودك شوية في المريخ. الهلال عليه الانتباه للاصابات الكثيرة التى تعرض لها لاعبي الهلال في المعسكر. لا بد من وجود وحدة طبية على مستوى عالي. تعافي وشفاء محمد عبدالرحمن امر لا بد منه. قبل بداية الموسم لا بد من التأكد من سلامة اللاعبين ..عبر كشف طبي دقيق. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……… السيدة (ل) – السنة انتهت نفتح صفحة جديدة ..لا فيها ازمة غاز ولا انقطاع التيار الكهربائي. وقرّط على كدا.