* تقديم المصلحة العامة على المصلحة الخاصة يحتاج لنبلاء ويحتاج لنفوس عفيفة وشخصيات معتدلة.. * وواحدة من أكبر مشاكلنا في السودان أننا نقدم الخاص على العام حتى أصبح الخاص في نظرنا هو العام بينما العام سقط عمداً من حساباتنا .. * ثم أننا في سبيل (ترضية فلان) بنعمل موازنات .. * والموازنات دي على الصعيد الخاص (بتخدم الأغراض) ولكنها على الصعيد العام تهدم الفكرة والهدف والمقاصد العليا .. * الآن مصلحة الكرة السودانية تقتضي أن يشارك الهلال باسم المنتخب الوطنى .. * إذا تواضع الاتحاد العام ووضع المصلحة العليا في المقدمة فإنه سيختار فريق الهلال ليكون (فريقنا القومي) المشارك في التصفيات المؤهلة لنهائيات الأمم الأفريقية .. * هكذا تقتضي المصلحة العليا .. * أصلاً المنتخب قاعد يكون (هلال مريخ) .. * وما فيها حاجة لو السنة دي المنتخب بقى (هلال بس) .. * على الأقل الهلال يضم نخبة من اللاعبين الشباب المميزين والموهوبين جداً .. * تشكيلة صقور الجديان : يونس الطيب ، عمار الدمازين ، سيف مساوي ، أطهر الطاهر ، محمود أمبدة ، أبوعاقلة ، شرف شيبوب ، نزار حامد ، صهيب الثعلب ، كاريكا ومحمد عبد الرحمن .. * هذه هى التشكيلة الأساسية .. * أما بالنسبة للاحتياطي فهم : بشه الصغير ، وليد علاء الدين ، بشه الكبير ، الطاهر سادومبا ، ولاء الدين ، الريدة وعماد الصيني .. * على أن يكون مدرب هذا المنتخب (بلاتشي) أو حتى مازدا (ما فرقت) .. * ويمكن اعتماد (رديف الهلال) في كلية المنتخب .. * هؤلاء الشباب المدعومين ببعض عناصر الخبرة يستطيعوا أن يصلوا بالمنتخب الوطنى إلى النهائيات .. * ولكن اعتماد الهلال ك(فريق قومي) يحتاج لشجاعة .. * والشجاعة دايرة زول (عينو ما مسكورة) .. * وطبعاً (اللقيمات) في البلد دي (كسرت عيون كتيرة جداً) .. * كل عين كنا فاكرنها (قوية) لقيناها (مكسورة) و(لينة) .. * الله يجازي اللقيمات والله يجازي الكان سبب .. * المهم .. * بالنسبة للجمهور، طبعاً الجمهور هو جمهور قومي .. * بمعنى : جمهور المريخ يدخل الإستاد ويشجع المنتخب الذي هو (الهلال) .. * ما فيها حاجة.. * أصلاً كل البلد دي هلالاب ولا يوجد خلاف ذلك إلا (الهلالاب الزعلانين) الذين أطلق عليهم المجتمع اسم (مريخاب) .. * والله صحي .. * وأنا ممكن أثبت ليك إنو المريخاب هم هلالاب زعلانين .. * قولي لي كيف ..؟ * مثلاً عندك صلاح إدريس .. * صلاح إدريس زول هلالابي معروف .. * ولا في زول بيشك في هلالية الأرباب .. * صلاح إدريس طلع من الهلال ولما فشل في العودة زعل .. * وبسبب الزعل الأرباب مشى عمل أهلي شندي .. * يعني أهلى شندي خرج للدنيا بسبب (زعلة من الهلال) .. * وقد أنفق الأرباب أموال كبيرة في بناء وصناعة أهلى شندي واعتمد بشكل كبير على (مشاطيب الهلال) ولعله قد أحسن البنيان .. * تجربة صلاح مع الأهلى ناجحة جداً والأهلى من الفرق المحترمة ولكنه ظهر في الوجود بسبب (زعلة ساكت) .. * والأهلى شندي لم يحقق كل أشواق الأرباب ، حيث كان يحلم بأن يكون الأهلى هو الهلال على أن يختفى الهلال من الوجود .. * وده طبعاً مستحيل لأنو الهلال زي (الأوكسجين) ، لا الأرباب ولا غيرو ما بيقدر يوقفه ويؤثر فيه .. * صلاح إدريس لما شاف الأهلى ما بقى هلال، قام دعم المريخ عشان (يقوى) وهى محاولة لإضعاف الهلال .. * ودعم صلاح للمريخ لم يكن قاصراً على ترشيح (نجوم التسجيلات)، بل أن صلاح وافق أن يهدم أهلى شندي في بعض المرات حتى يدعم المريخ وكان أن قدم لهم باسيرو ومالك .. * وبلغ الزعل بصلاح إدريس أن ينقذ تسجيلات (حبيبه عزو) ويقدم له محمد سيلا (متكفياً) دون أن يدفع (عزو) ولا جنيه في تلك الصفقة .. * شفت كيف المريخاب هم هلالاب زعلانين ؟ * يعنى لو الكاردينال ده استمر في الهلال سنتين عادي بتلقى صلاح إدريس في طابق شاخور متوشحاً بالعلم (الإصيفر) .. * وبنفس طريقة زعل الأرباب تمتلئ الآن مدرجات المريخ بمن هم هلالاب زعلانين .. * يبقى الاتحاد العام عليه أن لا يتخوف ويختار الهلال فريقاً قومياً يمثل السودان لأنه الفريق الوحيد في أفريقيا الذي يملك (شباب موهبين) بهذه الكمية الكبيرة (ماشاء الله) .. * وقد شهد بذلك المصري طارق العشري .. * طارق العشري وهو في قمة الزعل والهروب قال : (لا أظن أن هنالك فريقاً في أفريقيا يملك ما يملكه الهلال من مواهب لم تبلغ سن العشرين بعد) .. * وقيمة هذه (الشهادة) تنبع من كونها خرجت من العشري وهو في قمة الزعل .. * ولذلك يجب أن يستثمر الاتحاد العام هذه الثروة البشرية القيمة .. * وتاريخنا يحتفظ بمشاركة فريق الأهلى الخرطومى في وقت سابق باسم (منتخب السودان) .. * وبعدين إحنا نمسكها ليكم بالمنطق .. * المريخ حالين ما فيهو زول ممكن يقدم للمنتخب .. * الزول الوحيد في المريخ الممكن يفيد المنتخب الوطنى هو (شيبوب) .. * وشيبوب بحمدلله جا الهلال .. * تانى منو ؟ * على جعفر ؟ مساوى أفضل منو .. * مصعب عمر ؟ محمود أمبدة أفضل من عشرة زيو .. * عنكبة ؟ محمد عبد الرحمن بالنسبة ليهو كريستيانو عديل .. * رمضان عجب ؟ الثعلب أفضل منو .. * أمير كمال ؟ شيبوب أفضل منو .. * والقصة واضحة .. * بس دايرة شجاعة وقوة قلب .. * شباب الهلال ديل عندهم دافع وطموح وفلسفة وثقافة .. * وعلى السودان أن يستفيد منهم قبل فوات الآوان .. * كما يجب أن يكرم الاتحاد العام الكاردينال .. * هؤلاء الشباب هم حسنات الكاردينال ولعله قد أمَّن مستقبل الهلال بشكل مدهش للحد البعيد .. * وأنا في الحقيقة لو سمحتوا لي بطلب تكونوا ما قصرتوا .. * وبمناسبة الطلب قالوا في (شحاد) لما تديهو (باقي الأكل) بيعزل (الكفتة) وبجدع الباقي .. * شحاد وعايز (كفتة) .. * وعلى طريقة الشحاد ده أنا لو سمحتوا لي ممكن أطلب لاعبين تتم إضافتهم للمنتخب الذي هو (الهلال) .. * اللاعب الأول مهند الطاهر واللاعب التانى إبراهومة الصغير .. * والاختيار ده ما جا من فراغ .. * قول لي كيف ؟ * مهند لاعب (سابق) بالهلال وإبراهومة الصغير لاعب (لاحق) بالهلال .. * وعليك الله يا الكاردينال دايرين نشوف إبراهومة ده بشعار (سموحة المصري) على طريقة (شيبوب القيراون) .. * غايتو جنس غايتو !! * ونركب صافنات ونجيبة (جموعية) وأصلو الزول بيموت والذكرى تفضل حية .. * و..و.. * وقالوا (الرديف) عمران يا الله لينا !!
