بالعربي الكسيح محمد الطيب الأمين شحاد وعايز (كُفتة) !! * تقديم المصلحة العامة على المصلحة الخاصة يحتاج لنبلاء ويحتاج لنفوس عفيفة وشخصيات معتدلة.. * وواحدة من أكبر مشاكلنا في السودان اننا نقدم الخاص على العام حتى أصبح الخاص في نظرنا هو العام بينما العام سقط عمدا من حساباتنا .. * ثم اننا في سبيل (ترضية فلان) بنعمل موزانات .. * والموزانات دي علي الصعيد الخاص (بتخدم الأغراض) ولكنها علي الصعيد العام تهدم الفكرة والهدف والمقاصد العليا .. * الآن مصلحة الكرة السودانية تقتضي أن يشارك الهلال بأسم المنتخب الوطنى .. * إذا تواضع الإتحاد العام ووضع المصلحة العليا في المقدمة فأنه سيختار فريق الهلال ليكون (فريقنا القومي) المشارك في التصفيات المؤهلة لنهائيات الأمم الأفريقية .. * هكذا تقتضي المصلحة العليا .. * أصلا المنتخب بقاعد يكون (هلال مريخ) .. * وما فيها حاجة لو السنة دي المنتخب بقى (هلال بس) .. * علي الأقل الهلال يضم نخبة من اللاعبين الشباب المميزين والموهوبين جدا .. * تشكيلة صقور الجديان : يونس الطيب ، عمار الدمازين ، سيف مساوي ، أطهر الطاهر ، محمود أمبدة ، أبوعاقلة ، شرف شيبوب ، نزار حامد ، صهيب الثعلب ، كاريكا ومحمد عبد الرحمن .. * هذه هى التشكيلة الأساسية .. * أما بالنسبة للأحتياطي فهم : بشة الصغير ، وليد علاء الدين ، بشة الكبير ، الطاهر سادومبا ، ولاء الدين ، الريدة وعماد الصيني .. * على أن يكون مدرب هذا المنتخب (بلاتشي) أو حتى مازدا (ما فرقت) .. * ويمكن إعتماد (رديف الهلال) في كلية المنتخب .. * هؤلاء الشباب المدعومين ببعض عناصر الخبرة يستطيعوا ان يصلوا بالمنتخب الوطنى إلى النهائيات .. * ولكن إعتماد الهلال ك(فريق قومي) يحتاج لشجاعة .. * والشجاعة دايرة زول (عينو ما مسكورة) .. * وطبعا (اللقيمات) في البلد دي (كسرت عيون كتيرة جدا) .. * كل عين كنا فاكرنها (قوية) لقيناها (مكسورة) و(لينة) .. * الله يجازي اللقيمات والله يجازي الكان سبب .. * المهم .. * بالنسبة للجمهور ، طبعا الجمهور هو جمهور قومي .. * بمعنى : جمهور المريخ يدخل الإستاد ويشجع المنتخب الذي هو (الهلال) .. * ما فيها حاجة .. * أصلا كل البلد دي هلالاب ولا يوجد خلاف ذلك إلا (الهلالاب الزعلانين) الذين أطلق عليهم المجتمع أسم (مريخاب) .. * والله صحي .. * وأنا ممكن أثبت ليك إنو المريخاب هم هلالاب زعلانين .. * قولي لي كيف ..؟؟ * مثلا عندك صلاح أدريس .. * صلاح أدريس زول هلالابي معروف .. * ولا في زول بيشك في هلالية الأرباب .. * صلاح أدريس طلع من الهلال ولما فشل في العودة زعل .. * وبسبب الزعل الأرباب مشى عمل أهلي شندي .. * يعني أهلى شندي خرج للدنيا بسبب (زعلة من الهلال) .. * وقد أنفق الأرباب أموال كبيرة في بناء وصناعة أهلى شندي وإعتمد بشكل كبير على (مشاطيب الهلال) ولعله قد أحسن البنيان .. * تجربة صلاح مع الأهلى ناجحة جدا والأهلى من الفرق المحترمة ولكنه ظهر في الوجود بسبب (زعلة ساكت) .. * والأهلى شندي لم يحقق كل أشواق الأرباب ، حيث كان يحلم بأن يكون الأهلى هو الهلال على ان يختفى الهلال من الوجود .. * وده طبعا مستحيل لانو الهلال زي (الأوكسجين) ، لا الأرباب ولا غيرو ما بيقدر يوقفه ويؤثر فيه .. * صلاح أدريس لما شاف الأهلى ما بقى هلال ، قام دعم المريخ عشان (يقوى) وهى محاولة لأضعاف الهلال .. * ودعم صلاح للمريخ لم يكن قاصرا على ترشيح (نجوم التسجيلات) بل أن صلاح وافق أن يهدم اهلى شندي في بعض المرات حتى يدعم المريخ وكان أن قدم لهم باسيرو ومالك .. * وبلغ الزعل بصلاح أدريس ان ينقذ تسجيلات (حبيبه عزو) ويقدم له محمد سيلا (متكفيا) دون ان يدفع (عزو) ولا جنيه في تلك الصفقة .. * شفت كيف المريخاب هم هلالاب زعلانين ؟؟ * يعنى لو الكاردينال ده إستمر في الهلال سنتين عادي بتلقى صلاح أدريس في طابق شاخور متوشحا بالعلم (الإصيفر) .. * وبنفس طريقة زعل الأرباب تمتلئ الآن مدرجات المريخ بمن هم هلالاب زعلانين .. * يبقى الإتحاد العام عليه ان لا يتخوف ويختار الهلال فريقا قوميا يمثل السودان لانه الفريق الوحيد في افريقيا الذي يملك (شباب موهبين) بهذه الكمية الكبيرة (ماشاء الله) .. * وقد شهد بذلك المصري طارق العشري .. * طارق العشري وهو في قمة الزعل والهروب قال : (لا أظن ان هنالك فريقا في افريقيا يملك ما يملكه الهلال من مواهب لم تبلغ سن العشرين بعد) .. * وقيمة هذه (الشهادة) تنبع من كونها خرجت من العشري وهو في قمة الزعل .. * ولذلك يجب ان يستثمر الإتحاد العام هذه الثروة البشرية القيمة .. * وتاريخنا يحتفظ بمشاركة فريق الأهلى الخرطومى في وقت سابق بأسم (منتخب السودان) .. * وبعدين إحنا نمسكها ليكم بالمنطق .. * المريخ حالين ما فيهو زول ممكن يقدم للمنتخب .. * الزول الوحيد في المريخ الممكن يفيد المنتخب الوطنى هو (شيبوب) .. * وشيبوب بحمدلله جا الهلال .. * تانى منو ؟؟ * على جعفر ؟؟ مساوى أفضل منو .. * مصعب عمر ؟؟ محمود أمبدة أفضل من عشرة زيو .. * عنكبة ؟؟ محمد عبد الرحمن بالنسبة ليهو كريستيانو عديل .. * رمضان عجب ؟؟ الثعلب أفضل منو .. * أمير كمال ؟؟ شيبوب أفضل منو .. * والقصة واضحة .. * بس دايرة شجاعة وقوة قلب .. * شباب الهلال ديل عندهم دافع وطموح وفلسفة وثقافة .. * وعلى السودان ان يستفيد منهم قبل فوات الآوان .. * كما يجب ان يكرم الإتحاد العام الكاردينال .. * هؤلاء الشباب هم حسنات الكاردينال ولعله قد أمن مستقبل الهلال بشكل مدهش للحد البعيد .. * وأنا في الحقيقة لو سمحتوا لي بطلب تكونوا ما قصرتوا .. * وبمناسبة الطلب قالوا في (شحاد) لما تديهو (باقي الأكل) بيعزل (الكفتة) وبجدع الباقي .. * شحاد وعايز (كفتة) .. * وعلى طريقة الشحاد ده أنا لو سمحتوا لي ممكن أطلب لاعبين تتم إضافتهم للمنتخب الذي هو (الهلال) .. * اللاعب الأول مهند الطاهر واللاعب التانى أبراهومة الصغير .. * والأختيار ده ما جا من فراغ .. * قول لي كيف ؟؟ * مهند لاعب (سابق) بالهلال وأبراهومة الصغير لاعب (لاحق) بالهلال .. * وعليك الله يا الكادرينال دايرين نشوف أبراهومة ده بشعار (سموحة المصري) على طريقة (شيبوب القيراون) .. * غايتو جنس غايتو !! * ونركب صافنات ونجيبة (جموعية) وأصلو الزول بيموت والذكرى تفضل حية .. * و..و.. * وقالوا (الرديف) عمران يا الله لينا !!
