بالعربي الكسيح - محمد الطيب الأمين * حتى وقت قريب كانت (موية الصحة) من علامات الثراء في الشارع السوداني .. * لو شفت زول شايل (قارورة موية) في الشارع بتعرف إنو مرتبو كبير .. * ولو شفت زول بيشرب من (زير السبيل) طوالى تعرف إنو (كاتمة فيهو) .. * وقارورة الموية حلت محل (زير السبيل) ولذلك بنات حلتنا لهن غرام خاص مع الشباب البيشربوا (موية صحة) .. * الواحدة تقول ليك : الولد ده راقي .. تقول ليها عرفتي كيف ؟؟ تقول ليك : كل ما أقابلو بلقاهو شايل موية صحة .. * صحة ب(الفاء) ؟؟ * حبينا (بنات كثيرات) ب(زير السبيل) وأول ما ظهروا شباب (موية الصحة) البنات باعونا .. * قبل ظهور موية الصحة الزول لو عطش بيمشي تحت أى شجرة بيلقى سبيل يشرب ويقش خشمو ، وهسه لو عطشت بتمشي أي دكان تشيل قارورة وتبقي مارق .. * المهم .. * أنا عايز أقول (موية الصحة) في الهلال ، والسبيل في المريخ .. * قالوا الأيام دي لعيبة المريخ كل تلاتة بتشاركوا (قارورة واحدة) .. * أبراهومة الصغير والمعز وعبده جابر عندهم (قارورة) وشمس الفلاح وأبراهيم جعفر وبرنس عطبرة عندهم (قارورة) .. * وهذا الوضع بأذن الله سيستمر حتى نهاية فترة الأخ الكريم أسامة ونسي .. * ولو قابلتوا الهلال بعطشكم ده السبعة ما بتحلكم .. * كل المطلوب من الرجل الهلالابي الكبير أسامة ونسي ان يستعين بنصف دستة من (الأزيار) لتخفيف وترشيد الصرف البذخي الذي يصل مرحلة ان يتشارك كل ثلاثة لاعبين (قارورة موية) .. * ده بزار والله .. * موية صحة لشنو ؟؟ * ما ضروري .. * جيبوا ليهم أزيار خلو الأولاد ديل (يبلو الريق قبل حلول رمضان) .. * وكت ما في مرتبات جيبوا ليهم موية باردة .. * ما يبقى عليهم فلس وعطش .. * غايتو جنس غايتو .. * (العين الحمرا) التى يشهرها هذه الأيام مدرب الهلال الخبير بيلاتشي للنجم الصاعد ولاء الدين يمكن ان تكون (عين خير) وليس (عين شر) .. * الكل يعلم أن ولاء الدين مشروع مهاجم (ما ساهل) وأظن ان بيلاتشي قد وصل لهذه الحقيقة ولذلك تجده يقسو على ولاء طمعا في تطويره .. * نرجو أن يوسع ولاء الدين صدره ويستقبل نصائح مدربه بأريحية لأن الغرض هو مصلحته ولا شئ سواها .. * إرتدت شيكات المريخ الخاصة بتسجيل اللاعب محمد الرشيد .. * وقد مهل الإتحاد المريخ فرصة حتى يوم الأحد القادم لتدارك الموفق أو عودة اللاعب لفريقه السابق .. * وأنا حقيقة لا ألوم ناس المريخ بقدر ما أنني ألوم محمد الرشيد .. * محمد الرشيد شاف المريخ (طار) ومع ذلك وافق على الشيكات وظن إنها لن تطير .. * أقول ليك المريخ ذاتو طار تقول لي الشيك ما يطير ؟؟ * ثم ثانيا يا محمد الرشيد .. * في زول داير يلعب كرة بيمشي المريخ يا أبوحميد ؟؟ * بالغت والله .. * أن يسجلك الهلال ب(50) مليون أفضل من أن يتم تسجيلك في المريخ بمليار .. * اللهم إلا لو كان الهدف هو الحصول على القروش وليس ممارسة الكرة .. * وحتى لو داير قروش يفترض تمشي (الدهب) لان المريخ حاليا لا فيهو قروش ولا فيهو كورة .. * المريخ حاليا فيهو (مسيرات هادرة ، وإعتصامات ، وتحانيس) .. * حاجة تكسف .. * من باب التذكير نقول للكاردينال أن إضاءة إستاد الهلال (مُغبشة) .. * والله صحي .. * الإضاءة ما واضحة .. * وأعتقد أن شيبوب قد غطى على (غباشة) الإضاءة أمام سانت جورج .. * لكن في النهاية الإضاءة ما مية مية .. * واللاعب في أرض الملعب بيكون عندو (3) ظل .. * أقول ليك حاجة يا الكاردينال .. * قبل تلات سنوات لما سادومبا ينزل أرض الملعب كانت (صلعتو بتلمع) .. * ويوم مباراة سانت جورج لما سادومبا نزل الملعب (صلعتو ما لمعت) .. * قوة الإضاءة بنعرفها من خلال (صلعة) ساسا .. * والإضاءة حاليا ما ياها .. * فياريت يتم تحسينها قبل إنطلاقة السباق .. * يا ريت .. * المهم .. * إذا سمعت (ضجيج) ولم تر (طحين) فتأكد أن مصدر الضجيج إعلام المريخ ومصدر الطحين جمال الوالى .. * الضوضاء العاملناها ل(عزو) لم يجد ربعها فيصل العجب .. * مع إنو العجب عندو (عرق) في خدمة المريخ .. * البيشوفكم فرحانين بجمال الوالى كده يقول شال معاكم تلات متواليات أفريقية .. * يقول ليك دايرين نطلع مسيرة .. * هسه سبعة الأردن دي دايرة ليها مسيرة !! * أنا عندي ليكم إقتراح .. * أعملوا لجنة .. * واللجنة دي سموها لجنة (التحنيس) .. * ونفس اللجنة دي تنبثق منها لجنة تانية .. * اللجنة الأولى تحنس الوالى واللجنة المنبثقة تحنس الوزير .. * أو ممكن اللجنة المنبثقة تحنس الوالى .. * لكن أنا شايف إنو أحسن وأفضل ليكم اللجنة المنبثقة تحنس الوزير .. * والله صحي .. * لانو الوزراء أصلا بيحبوا إنبثاق اللجان .. * الوزراء عندنا لو ما عملوا لجنة وإنبثقت منها (16) لجنة ما بحلوا مشكلة .. * المهم غايتو إنتو شوفوا براكم الأحسن شنو .. * وبعدين برضو ممكن (تبثقوا) لجنة تالتة عشان تقنع أسامة ونسي ما يكمل فترتو .. * وعلى فكرة .. ده كلو هين ، الكلام عقوبات (الكاف) .. * البتعملوا فيهو ده ما بحلكم .. * (الكاف) عادي ممكن يرشكم ب(5) سنين والله تانى مطار الخرطوم ده إلا تشوفوا في (نشرة عشرة) .. * يمشي ونسي ولا يجي عزو المهم إنو (الكاف) منتظركم .. * قايلين ضرب الحكم رجاله ولا شرف ؟؟ * الشغل البتعملوا في سيكافا والدورات الوهمية (الكاف) ح يوريكم ليهو .. * لما العقوبات تطلع بتعرفوا (البونية) الصحي صحي .. * وأنا في حاجة متأكد منها .. * (الكاف) لو عايز يعاقب المريخ بالابعاد (5) سنين ممكن يعملوها ليهم سنتين عشان خاطر الهلال .. * لو العقوبة المفروض تكون سنتين ح يعملوها ليكم سنة عشان إنتو تبع الهلال .. * يعني نفس فكرة مشاركتنا إحنا الأتنين في الأبطال .. * وطبعا إنتو عارفين إنكم بتشاركوا في الأبطال بفضل الهلال .. * ولا ما عارفين كمان ؟؟ * لا أحسن تكونو ما عارفين ؟؟ * نرجع ونقول .. * كل المنى أن لا يحرم الكاف المريخ من المشاركة الأفريقية ، لان حرمان المريخ من المشاركة يصب في مصلحته .. * زي ما قلنا .. أفضل عقوبة للمريخ إنك تخليهو يشارك عشان يتمرمط من الاندية الهابطة على شاكلة (المراكش) .. * حاجة تكسف .. * ونركب صافنات ونجيبة (محسية) وأصلو الزول بيموت والذكرى تفضل حية .. * و..و.. * وكنت جمبك أشيل همك ويا خسارة الريد البعتو ب.....(موية صحة) !!
