دق الدلجة محمد عبد الماجد العيد مبارك عليكم ..والممتاز برضو انتوا فاكرين شنو؟. عارفين بكري المدينة ضرب حكم مباراة الاهلي شندي والمريخ في مدينة شندي ليه؟. عشان الحكم قال ليه (لوزان). لو عاوز تبوظ اعصاب المريخاب قول ليهم (لوزان). الواحد فيهم لمن يسمع الكلمة دي لونو بيقلب. الشقلبة البعمل فيها بكري المدينة الايامات دي – فاكرها بتمرقو من (لوزان). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). مباراة الامل ماشى ليكم عليها. بكري المدينة قايل لو المحكمة الرياضية شافت (شقلبتو) دي ..تقوم تفتكر الزول دا ما مسؤول عن تصرفاته. الزول دا حاجاتو كلها (مشقلبة). انا بجيب ليكم سيرة (لوزان) يوم مباراة الهلال والامل ..عشان عارف السيرة دي بتجهجه ناس المريخ. وعشان عارفكم امس قعدتو تحلموا فينا. وفكرتوا في الممتاز. المريخاب عاشوا شوط اول نموذجي. فرحوا وافتكروا ان الهلال في احسن الظروف …لو بالغ كدا ..بتعادل. كمان في فريق بعد ما يكون متأخر في عطبرة وامام الامل بقدر يتقدم. بقدر ينتصر. دي ما بعملها إلّا الهلال. في عاصمة الحديد والنار ..ممكن الهلال يتقدم بعد ان انهى الشوط الاول مهزوما. والله نحن ذاتو شكينا. وقعدنا نحوم في الحوش. اي حاجة مسخت لينا. التلاجة بنشوفها زي (الزير). انتوا ما قالوا ليكم …رمضان دخل في (العضم). عضم شنو؟. هو (العضم) ذاتو فضل فيه حاجة. نحن بقينا شغالين بدون (عضام). رمضان دخل في (الخشبة) القدام البيت…ما يدخل في العضم. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). في الحلة في واحد كل يوم بلاقني بقول الليلة يوم كم رمضان ..اقول ليه الليلة يوم تسعة رمضان. يقوم يقول لي هو يوم تسعة دا اصلو ما بنتهي. يلاقيني اليوم التاني ويقول لي : الليلة يوم كم؟. بقول ليه : الليلة يوم عشرة رمضان. بقوم يقول لي انت يوم عشرة دا اصلو ما بنتهي. يلاقيني يوم 11 رمضان ..يقول لي الليلة رمضان فيه كم؟. اقول ليه الليلة رمضان يوم 11. يقول لي انت يوم 11 دا اصلو ما بنتهي. الواحد مرات من (العطش) يقوم نص الليل عشطان – يقول يشرب ليه موية ..بلقى نفسو ضرب ليه تلفون. بدون ما تشعر. رقم انو ما في اي علاقة بين التلفون وشراب الموية. التلفونات دخلت في اي شيء. الواحد بقى يمشي يطلب يد بنت عمو ..يقولوا ليه خلاص بنرجع ليك بي تلفون. علاقة التلفون بالعرس شنو؟. او ممكن الواحد يلاقيك في المقابر ..يقوم يقول ليك : بيناتنا تلفون. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). اللخبطة حصلت. الحاجات اتلخبطت علينا..وبقت ما واضحة – وما معروفة. رمضان ما خلي فينا حاجة. تجوا يا ناس الهلال تجهجهونا كدا. نحن عندنا حيل للحاجات البتعملوا فيها دي. قالوا ليكم نحن عندنا صبر قدر دا. الشوط الاول في المباراة انتهى بتقدم فريق الامل على الهلال بهدف. ودي حاجات نحن ما بستحملها. ولا بنقبلها. الهدف في عطبرة بساوي (21) هدف في كوستى. يعني معادلة الهدف ..حاجة صعبة في عطبرة. انهى الامل الشوط الاول متقدما على الهلال بهدف. الوضع ما مطمئن نهائي. قدر ما شربنا ما روينا. قلنا خلاص ..نحن المباراة دي لو طلعنا فيها ب (التعادل) ما كعبة معانا. بقينا نفكر في التعادل. وبدينا نبرر للتعادل. التعادل ما كعب معانا. مالو التعادل؟. برشلونة في احسن حالتها بتتعادل. الفريق عائد من الكنغو. والارهاق. والتعب. والشغيل ما لاعب. وادرزينهو ..هذه اول مشاركة ليه. التعادل ما كعب معانا. بنقنع في نفنسا. لكن التعادل هو ذاتو وينها؟. الله يلمنا في التعادل. بقينا بنشوف لينا (مبرر) فيه شوية منطق واقناع. ما خلينا حاجة. قلنا الدنيا رمضان. ودي ما درجة حرارة يغلبوا فيها. كفاية علينا التعادل. بعدين نحن ذاتو مركزين على البطولة الافريقية. مركزين على مازمبي. ناس الامل ديل بنلعب معاهم بالصف التاني. طبعا الكلام دا بنقول فيه ساكت. كلام جرايد ساكت. نحن ذاتو ما مقتنعين. والله الامل وقت جاب ليه هدف …الواحد بقى يشوف التلفزيون القدامو سبعة – سبعة. كل من ناس النيلين ديل. عندهم طبق ..القون يكون صحيح – يطلعوا ليك تسلل. الدنيا مسخت علينا. هسع دا يقولو عليه شنو؟. التعادل دا يتبلع لينا كيف؟. يا ربي (الحكم). كلو من الحكم. اصلو لو ما جابوا لينا طاقم تحكيم بهذا المستوى الهلال ما بسجلوا فيه هدف. بعدين ارضية الملعب ذاتها ما مساعدة. والسفر. والارهاق. والكوكي ذاتو قاعد ينظر كتير. طبعا الكلام دا نحن بنقول فيه والهلال متأخر بهدف. بعد الشوط الاول ما انتهى. قالوا ليكم نحن (شوط) بنستحملو والهلال مغلوب. فارق (5) نقاط ما بتتعوض تاني. نحن ممكن نغلب المريخ ..لكن فرق النقطتين نجيبو من وين؟. التلات نقاط امام المريخ مضمونة. لكن اتساع الفارق بين الهلال والمريخ لخمسة نقاط لصالح الاخير ..يجعل البطولة المحببة من الهلال تهرب. تفلت. ونحن والله تيمنا دا ما تيم (وصافة). فرق الوصافة ظاهرة. نحن عندنا (فريق) بطولة. الكلام دا بنقول فيه والهلال متأخر بهدف. بين الشوطين. في الاستراحة. الى ان بدأ الشوط التاني ..وسجل (كيبي) في الدقيقة السادسة من الشوط التاني. قعدنا نضحك. وبقينا نفكر في العيد. وفي واحد مع (هدف) كيبي دا قال رمضان السنة دي (29) يوم. اتبسطنا. وقلنا التعادل مع كعب معانا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). اربعة دقائق تاني …وكيبي تاني سجل ليه قون. دا شنو دا؟. دا عيد رسمي. انتوا الامل لاعب ضد الهلال وإلّا لاعب ضد كيبي. كيبي براهو غلب الامل. في (4) دقائق حسمنا المباراة. بعد ما اتقدم الهلال 2 / 1 ..في واحد قال لينا رمضان السنة دي يمكن يكون 28 يوم. الناس ديل صاموا يوم ساكت. صومونا ساكت. شعرنا ليك بالعيد. في ناس خبزوا. وفي جماعة بدأوا يوزعوا في الحلاوة. وفي شفع لبسوا هدوم العيد وطلعوا في الليل داك. وطلعنا نبارك في العيد. ونبارك الممتاز ايضا. الممتاز مبروك عليكم يا الهلال. خلاص اتجاوزتوا اصعب محطة. اتجاوزتوا محطة عطبرة. الانتصار على الامل ببطولة الممتاز كلها. الممتاز بقى مضمون للهلال ان شاءالله. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …………. و الله شافنا. هسع لو الهلال اتغلب او اتعادل ..مع النهارية دي نمشي وين؟. نقول شنو؟. الممتاز بقى حقنا. خلوا ناس المريخ يفكروا في كأس السودان. وكأس السودان ذاتو الاهلي شندي عندو رأي. ناس الاهلي شندي ..بس فلاحتهم معانا نحن. …….. السيدة (ل)…الليلة ما عاوز اقول اي شيء. قرّض على كدا. شارك هذا الموضوع: * البريد الإلكتروني * * * *