واضح جداً …أن مصعب عمر ملخبط في (الامساك). عندو مشكلة في الحتة دي. زولكم دا كل يوم بقرأ في الجرايد أن (الامساك) الساعة أربعة و59 دقيقة …البخليه يعمل (الامساك) الساعة حداشر وعشر دقائق شنو؟. معقولة الموضوع دا ما وقع ليه، عشان يقعد يلخبط لينا كدا. مصعب عمر أول ما شاف عزيز شيبولا عمل ليه (امساك) من الساعة حداشر وعشر دقائق. في (امساك) الساعة حداشر يا ناس. مالكم أنتوا عاوزين تعملوا لينا مشاكل مع سيد اللبن. سيد اللبن الدخلو في الموضوع دا شنو؟. لو ما عاوز ليك سبب ساكت. لكن قبل ما نتعمق في الحتة دي ..ونطلع (العناقريب) في الحوش من الفرحة. ونفتح الشبابيك. ونتفرج في الصور من (الاستوديو). خلوني أقول ليكم إن المريخ دفع ثمن مشاركة جمال سالم ..الغايب من فترة الإعداد ..حيث شارك جمال سالم في المباراة بي وزن زايد. جمال سالم مع وزنه الزايد كان بعيداً عن الفورمة ..شيبولا سجل فيه هدف …في حامد بريمة بعد العمر دا كلو ما بدخل في مرماه. حالتو دي عندو تلاتة جنسيات. المشكلة ما كانت في الوزن الزايد ..ولا كانت في ابتعاد جمال سالم من الفورمة..المشكلة كانت في غياب الانضابط. والروح والالتزام. لاعب قاعد تلاتة أسابيع في بيتو ..يجي يشارك ضد الهلال. أنتوا بتلعبوا على منو؟. نخش في حتة تانية. ناس سنة رابعة ..سادومبا قال يطلعوا بيوت. وناس خامسة عندهم توزيع ورق. سادومبا قال كدا. (الامساك) قرب. امساك (شيبولا) داخل منطقة الجزاء. زمان وقت كان مزمل أبو القاسم (صحفي) بس …كان وقت المريخ يتغلب بهاجم لاعبي المريخ. ما بخلي ليهم شيء. ما بسيب ليهم صفحة يتقلبوا عليها. هسع مزمل أبو القاسم صحفي و(عضو مجلس إدارة) – عشان كدا ما بكون أمامه خيار غير يهاجم (الحكم). ما عندو طريقة غير كدا. ما معقول عضو مجلس إدارة يهاجم لاعبيه في الجرايد. الليلة مزمل بهاجم (الحكم) زي ناس متوكل أحمد علي وعصام الحاج. بركب ماكينة متوكل (مهاجمة حكم المباراة 24 ساعة). قالوا ليك أمس بعد المباراة …(بص الوالي) اجتمع ..قالوا لازم نشوف لينا (مراقة) من الخسارة. لازم نشوف لينا (مخرج). معقولة الهلال يفوز في الدوري الممتاز على المريخ (18) مرة ..والمريخ يحقق الفوز على الهلال سبع مرات فقط. فضيحة السواد. لو بتبيعوا (دوم) في السوق ..مفروض الكلام دا ما يحصل. ليمون. فجل. كركدي. هسع الحاجات دي الدخلها هنا شنو؟. والله دخلت في العمود دا من غير ما أشعر. هسع نحن علاقتنا بيكم شنو؟. في (ند) في الدنيا ..بكون غالب نده (18) مرة مقابل (7) انتصارات فقط للمريخ في الدوري الممتاز. دي ندية شنو؟. خمس سنوات ما قادرين تغلبوا الهلال في الدوري. ما علينا. الكلام دا كبير عليكم. تقوم تصب مطرة تلخبط لينا أي حاجة. يا زول المطرة الدخلها هنا شنو؟. زي كراس الإنشاء..البكون رائح وسط كراريس الرياضات. ال (26) عضواً في لجنة تسيير المريخ ..قالوا لازم نحن نشتكي الهلال في (شيبوب). شيبوب دا (ولدنا). شالوه من (كشفنا). قلعوه قلع. وقفز من الطابق الرابع. ودخل البلد بدون جواز. واتصور مع الكاردينال. نحن نشيل الحاجات دي كلها ونمشي (الفيفا). بنلقى لينا سمير فضل في الفيفا. مزمل أبو القاسم قالوا قال ليهم ..أنا عندي ليكم شكوى مضمونة. شكوى أكيدة. موضوع شيبوب دا ما بجيب حاجة…(دا كلام جرايد) ساكت. الزول دا قفز من الطابق الرابع ..ما جاتو حاجة ..معقولة الحاجة تجيبها ليه (شكوتكم) دي. قام نصيح ما عندو أي شيء. نحن لازم نقدم شكوى في الهلال. ال (25) عضواً قاموا ليكم كلهم في صوت واحد وقالوا ليه نشتكي الهلال في شنو؟. مزمل أبو القاسم قال ليهم نشتكي الهلال في (كشافاتو)…الهلالاب ديل جابوا ليهم (كشافات)..المباراة كلها (صلاح نمر) مقهي فيها. نحن غلبتنا (الكشافات)…ما غلبنا (شيبولا). وكان لي مصعب عمر ..الإضاءة الشديدة …خلتو ما بفرق بين سادومبا وعامل المعدات في نادي المريخ. المباراة كلها (مخلوع). المباراة كلها يرشوا فيه بالموية….عشان الوعي يرجع ليه. في واحد من ناس اللجنة رفع إيدو. جمال الوالي قال ليهم في شنو؟. زولكم الفي لجنة (بص الوالي) قال ليهم نحن الجابنا هنا شنو؟. اللجنة كلها قالت ليه جابنا والي الخرطوم. قال ليهم يعني المشكلة دي مشكلة والي الخرطوم ..ما مشكلة والي المريخ. ال (25) عضواً في اللجنة قالوا ليه فعلاً – كلامك صاح. عضو اللجنة قال ليهم خلاص ..نحن لا نمشي الفيفا ولا حاجة نحن نمشي لي (مكتب الوالي). نمشي لي والي الخرطوم عديل كدا …بشوف لينا طريقة. بتصرف. بيلقى لينا (مخرج). في واحد من اللجنة قال ليه لكن نحن نمشي لي والي الخرطوم نقول ليه شنو؟. زولكم قال ليه نقول ليه (شيبولا). نقول ليه (الديون) خليها ..ما تحلها لينا …بنحلها برانا ..بس شوف لينا موضوع (شيبولا) دا. معقولة بس. ناس الهلال جايبين ليهم محترف (كراكة) ما بتثبتو. لا كراكة. ولا قطر. شفتوا (الزلابية) ما بتعمل ليه حاجة. وأنا زي عرفتك …. طالعة من جوه الحنين… بتقيفي في لحظة أنين… بدفقي الخوف ..في الكلام… بتلقطي الشوق في السلام … دا شنو هسع دا…ما لكم عاوزين تقوموا علينا (المصران). المصران البقومو شنو مع (شيبولا) دا. نحن ذاتو ما عارفين المغصة من شيبولا وإلّا من شيبوب؟. المغصة من لجنتكم الفيها 26 عضواً دي. جايبين ليكم لجنة فيها (26) عضواً (بص والي) وتتغلبوا بالطريقة دي. وين عصام الحاج. عبدالصمد. الفريق عبدالله. الفريق طارق. عملتوها ساكت في (مصعب عمر). قلنا ليكم نحن ما في زول برتاح ليه في المريخ أكتر من جمال الوالي. جمال الوالي دا نحن الهلالاب معانا مية المية. أخطر لينا من شيبولا. الغريبة – الفارق في الهلال أمس عملوه اللاعبين الذين ضمهم الهلال في التسجيلات الأخيرة. فهم والله. قاصدنها. عاملنها مخصوص. يعني لو مباراة القمة كانت في موعدها ما كان غلبنا المريخ. المريخ ما استفاد من أي لاعب سجله في تسجيلات مايو الماضي. صلاح نمر ..كان إضافة للهلال. أمير كمال عرفها. الخبرة ليها أثر. عمل فيها مصاب. فاهم والله. الهلال استفاد من شيبولا ..صاحب الهدف الأول ..وهو اللاعب الذي ارتكبت معه ضربة الجزاء. واستفاد الهلال من سادومبا الذي كان من نجوم المباراة وسجل الهدف الثاني من ضربة جزاء في (برود) يحسد عليه. واستفاد الهلال من (شيبوب) الذي دخل المباراة في توقيت صعب ..والمدرجات كلها هاجت وقامت وقت شيبوب شارك. شيبوب دا نجم المباراة. لا تقولوا لي سادومبا. لا بشه. لا نزار. لا شيبولا ذاتو. الثلاثي ضمهم الهلال في التسجيلات الأخيرة ..وتأجيل مباراة القمة أتاح لهم فرصة المشاركة في المباراة. عشان تاني تذوقوا من المباراة. لو لعبتوها في وقتها دا كلو ما كان حصل. المكر السيء يحيق بأهله دائماً. لكن أنتوا تعالوا هنا …الاعتراض في شنو؟. نحن جبنا في التسجيلات تلاتة لاعبين …أنتوا جبتوا ليكم مجلس كامل. جبتوا ليكم (26) عضواً. بص الوالي. يعني لو ما ناس جمال الوالي ديل …كان دستة ما بتحلكم مننا. لكن ناس عصام الحاج عاوزين يلعبوا ليكم. نحن ناس شيبولا بيلعبوا لينا. خلوا مزمل أبو القاسم يلعب ليكم. مزمل أبو القاسم بتمها ليكم (شكاوي). واحتجاب لظروف فنية. دي الحاجة البقدر يعملها ليكم. أكتر من كدا ..ما بقدر يعمل ليكم أي حاجة. عاوزين ليكم (مخدر) قوي. هاجموا الحكم. اشتكوا (شيبولا). اعملوا أي حاجة . اتصرفوا. جاييكم (العيد). والنشاط واقف ..لازم تشوفوا ليكم (بنج). ………. ملحوظة : يا سلك …عندك شهر …تتكلم فيه عن (الحكم) زي ما عاوز. هوامش
جمال انتصار الهلال ..في أن المريخ لعب.
وشكل خطورة كبيرة على الهلال. عشان كدا فرحتنا كبيرة بهذا الانتصار. انتصار غالي والله. مشاركة شيبوب كانت ضربة معلم. جات في وقتها. يلا ورونا شطارتكم. الفرق بقى (7) نقاط. لو اعتبرنا المريخ فايز في كادوقلي. (7) نقاط دي عاوزه ليها (سيكافا) عديل كدا. ما عاوزين نقول ليكم الفرق (10). مراعاة لحالتكم الصحية. سا سا سادومبا. عاوزين ننقط (السين). عشان تبقى شا شا شيبولا. تكتروا كلامكم بعملها ليكم شا شا شيبوب. حالتكم صعبة. نجم المباراة أمس شيبوب. إضافة (للكشافات). مصعب ..لو بيلعب في الهلال كنا أديناه نجومية المباراة. أصلو ما قصر معانا. شكراً جمال الوالي. شكراً عصام الحاج. شكراً عبدالصمد. شكراً مزمل أبوالقاسم. شكراً مصعب عمر. اتلميتوا لينا كلكم في لجنة واحدة. …….. عاجل : شيبولا عاوز يفتح ليه مدرسة قيادة..كلموا مصعب وصلاح نمر وعطرون وضفر يسجلوا.
