قبل بداية التسجيلات ..وبعد ان وقع نجم التسجيلات الاول (نزار حامد) عقدا مبدئيا مع الهلال بموافقة نادي الامل عطبرة واقسم اللاعب على اللعب للهلال ونشرت الصحف صوره وهو (يقسم) ...خرجت صحف المريخ بعد ذلك مؤكدة ان السيد جمال الوالي رئيس نادي المريخ قد وجد مخرج لنزار حامد من الهلال وان اللاعب سوف يوقع للمريخ. قايلنو (ضفر)..بحلف ويوقع. وكانت بعض الصحف قد ذهبت ابعد من ذلك وهى تؤكد ان اللاعب سوف يصوم 3 ايام لكي يكفر عن قسمه وينتقل من بعد لنادي المريخ. يعني ما في أي مشكلة. يحلف او ما يحلف ..برضو ح يلعب في المريخ. جمال الوالي دا ما عندو قشة مرة..اي حاجة عندو ليها حل. قروش موجودة ما في أي مشكلة. تواترت الانباء بعد ذلك وقالت بعض الصحف التي اخرجت (الكذبة) وصدقتها من بعد ان اللاعب (صايم) الان. يعني خلاص عاوز يتحلل من ارتباطه مع الهلال. وكنت قد علقت على اداء اللاعب غير الجيد امام الهلال في مباراة الامل والهلال في عطبرة بتبرير منطقي وهو ان اللاعب لم يظهر بمستواه المعروف لأنه (صايم) حسب ادعاء الاعلام السالب. وكانت صحف المريخ من فينة لاخرى تجزم وتؤكد ان اللاعب سوف يوقع للمريخ ..لا سيما وان اللاعب قد نال اعجاب جمال الوالي واصبح لاعبه المفضل حسب شهادة الاستاذ خالد عزالدين. واضح اعجاب جمال الوالي بكورة نزار حامد ...وللامانة فان هذا اللاعب يشكل تطور كبير وتقدم في خامات لاعبي الارتكاز ..خاصة وان اللاعب يتمتع بكل المحسنات ..طول ..ومهارة وموهبة ..(وصغير في السن). حكاية صغير في السن دي طبعا بضايق ناس (مجدي ام بدة). ناس مجدي وسلك. مجدي ام بدة دا على ما اعتقد كدا ..وحسب كتابات (بابكر سلك) عنه ..واضح انه كان (الدفعة) القدام سلك ...لأن كتابة سلك عن (مجدي ام بدة) كتابة زول بكتب عن (سنيرو). واضح ..الموضوع ما عاوز ليه غلاط. ما تقعدوا تفوروا دمنا ساكت. العجب اخيرا لقي ليه زول اكبر منو في السن. ابسط يا عم. رفع الحرج من (عجبكو الهندسية). المسكين بقي بي سطر ما بتذكرو. انتوا قايلين العجب دا كان بيلعب في الخرطوم 3. شنو ما شغالين بالزول كدا. الزول دا كان بيلعب معاكم يا مزمل ..بقيتو ما بتجيبوا سيرتو. نكرتوه عديل. وين الملك فيصل ..وعجبكو الهندسية. وين الكلام دا. العجب بعد ما شاف مجدي ام بدة ..قال ليهم ما عاوز لي زول تاني يجيب لي سيرة (الاعتزال). انا ما بتعزل ليكم. انا تاني لو سمعت لي زول جاب سيرة (الاعتزال) بقدد عيونو. العجب شاف مجدي ام بدة قال : انا على الاقل بلعب 5 مواسم. وبيني وبينكم العجب عندو حق. قالوا ليك مازدا شاف مجدي ..قال والله نحن اعتزلنا (صغار)..لو ما المنتخب الوطني ..كان الواحد الي الان بكون بيلعب في المريخ. ضريبة الوطن عملتها فينا. مازدا شنو؟. ناس (جادالله) لو حضروا جمال الوالي كانوا الي الان بكونوا بيلعبوا في المريخ. مع جمال الوالي ما في زول بعتزل. فاروق جبرة كان هو وجمال ابوعنجة بكونوا تحت السن. بس ديل حظهم كعب ..ما حضروا (التكية) دي. التكية دي حضرها نجاد وابالو ومجدي ام بدة. مجدي ام بدة دا قالوا ليك أي فريق في الممتاز لعب فيه. دا الاندية التي هبطت لعب فيها. انتوا بتذكروا فريق المريخ بورتسودان...اها مجدي ام بدة دا لعب في (مريخ الساحل). بختك يا مجدي. عارفين المريخ السنة دي ما لعب في (التمهيدي) ليه؟. مراعاة للسن. برضو (العمر) ليه احكام. موش كمال ترباس عندو غنية بتقول : (اني ماشي كبير ليه تسيبني اجر). عشان كدا المريخ ما لعب في (التمهيدي). عفوه من الحكاية دي. عفوه عشان خاطر مجدي. يا ناس المريخ ما تفرحوا ساكت. بفضل الهلال ..اهلى شندي الذي يلعب لاول مرة في البطولة الافريقية اعفوه من (التمهيدي). اهلي شندي لقاها. صحى من نومو ..ولقي كومو. من شندي للكونفدرالية. هيع. (الجعليين) ديل صعبين. قالوا ليك في (جعلي) صعب في شندي. صعب شديد. النوع البقيف ليك قدام القطر ويفتح زراير قميصو الخمسة. جعلى صعب. النوع البقيف في الشارع من يشوف ليهو زول بحلف عليه يدخل يتغدي. حرم ما بتطلع ساعة الغدا. جعلي صعب شديد. قالوا ليك الجعلي دا قال نحن ما عندنا فريق بيلعب في (الكونفدرالية). الكونفدرالية دي عندنا في شندي (عيب) عديل. حاجة كعبة. لكن بي جاي وجاي ..الجماعة اقنعوا ليك الجعلي قالوا ليهو هو المريخ بي (حضريهو) بيلعب في (الكونفدرالية). بي الطابق التاني بيلعب في (الكونفدالية). الجعلي بقول ليهم ان بقى كدا ..الاهلي اليلعب ساكت. هسه الاهلي دا ما موضوعنا. الاهلي ساهل كمان. اسامة التعاون بيلعب في الاهلي. تاني عاوزين شنو اكتر من كدا. نخلى الاهلي. نرجع لي نزار حامد. جمال الوالي قال عاوز نزار. ناس مصطفي توفيق ..قالوا ليهو لكن نزار دا (حلف) يا ريس. جمال الوالي قال ليهم ما عندكم مشكلة...الموضوع دا بنشوف ليهو حل. اللاعب يصوم 3 ايام ..ويجي يلعب في المريخ. اصلو نزار دا نحن ما بنخلى. نزار دا لو مشي الهلال ما بريحنا. لكن يا ريس نزار وقع اقرار مع الهلال. ما في مشكلة ..موش الاقرار دا ..بنشوف ليهو حل ...اللاعب يسافر مع المنتخب ...وبعد يوم تلاتة الاقرار بسقط. كلموا مازدا عشان يختار نزار حامد للمنتخب. نزار سافر مع المنتخب. الامين البرير اكتشف ليك المخطط. عرف ليك الموضوع. الهلال سجل 3 لاعبين ..وشطب 4 لاعبين. الناس كلها استغربت ..طيب الزول الرابع دا شاطبنو ليه؟. دي شنو الحركات البعمل فيها البرير دي. المريخاب ما استوعبو الموضوع. الساعة عشرة اللاعب وقع للهلال بالفاكس. الموضوع انتهى. عشان كدا الامين البرير شطب 4 وسجل 3. البرير خلى خانة نزار خالية. ناس مصطفي توفيق ..قالوا نحن نقول شنو لي جمال الوالي نتصرف كيف؟. دي جمال الوالي ما بستحملها. ما بفوتها لينا. دي ممكن يروح فيها. واحد فيهم قال ليهو نحن ممكن نكلمو بالخبر شوية شوية. يعني ممكن نقول ليهو في صاقعة وقعت. يستوعب الحتة دي. نقول ليهو الصاقعة وقعت في رأسنا. يستوعب الموضوع. نقول ليهو ورأسك كمان يا ريس. يهبش رأسو ..نقول ليهو نزار حامد اتسجل في الهلال. كدا ممكن الموضوع يبقي ليه عادي. لكن غير كدا ما بقبل. يا جماعة دا في سفر الحضري ...حل لجنة الكورة كلها. الي الان مجاهد احمد محمد ما معروف وين؟. نحن عرفنا حل دائرة الكورة كان مقصود بيها مجاهد. المريخاب عاوزين يتخلصوا من مجاهد ..عملوا الحيلة حل دائرة الكورة...وقالوا سفر الحضري هو السبب. اها يا مجاهد هسه مصطفي توفيق رجع. وصديق على صالح رجع...وانت الوحيد الرحت فيها. باختصار كدا ...وبما ان جمال الوالي وعد المريخاب خاصة المقربون منه بتسجيل نزار حامد في المريخ ..وقال ليهم اللاعب ممكن يصوم عشان يكفر عن (قسمو). بنطلب الان من جمال الوالي يصوم 3 يوم. عشان تاني ما يتكلم ساكت. موش انت وعدت الجماعة ..خلاص صوم..تصوم في ولاد الناس ساكت ..وتسجلهم في المريخ. ضفر دا مفروض يصوم اسبوع. ومجلس ادارة النيل كلو مفروض يصوم ..من رئيس النادي الي نائب السكرتير..عشان الجماعة ديل جابوا المصحف وشهدوا على قسم ضفر. وبعدين نكروا الحكاية دي. لكن الحاجات دي كلها ممكن نعفيكم منها. بس جمال الوالي يصوم 3 ايام. طبعا في ناس بحبوا (كسير التلج). ناس مصطفي توفيق وجمال الكيماوي ما بستحملوا الحكاية دي ..بجوا يقولوا لجمال الوالي يا ريس انت افطر ..نحن بنصوم ليك. نحن بنكفر ليك. انتوا عارفين. المريخاب مشوا عطبرة عشان يسجلوا (نزار حامد)..وقت ما لقوا نزار عارفين عملوا شنو؟. جابوا (مجدي ام بدة). عليكم الله في (غلب) اكتر من كدا. يا سلك ..شكلك كدا عاوز ترجع تلعب كورة تانية..لكن عاوز تعملها ظريفة. عاوز تثبت بالعملي انو دفعتك بيلعب كورة. بكرة ناس احمد محمد احمد يقولوا لي جمال الوالي سجل لينا (سلك). وسلك بكتب في (الزعيم). يعني لو حلف قسم يلعب للهلال ..ممكن يتراجع ..ويلعب في المريخ. الزعيم زي (النيل). ملحوظة : مجدي في المريخ من اول 15 دقيقة برفع ايدو بقول غيروني..انت قايل المريخ زي الامل كمان!!. هوامش اكتب في توقيت صعب...ووصول فلانتاين للخرطوم تبقي له اقل من ساعة. فلانتاين في الخرطوم. يا مهند بختك. تاني كل 5 دقايق بتقلب (هوبة). نحذر ونحذر من شطب عبده جابر او اعارته. عبده جابر مع نزار حامد يمثلوا اخر مواهبنا ..وعبقرياتنا الكروية. عبده جابر اصغر لاعب في القمة. يجب المحافظة على هذا اللاعب ..المستقبل كله ينتظره. اشطبوا أي زول يا البرير ..إلا عبده جابر.