مباراة اليوم انظر لها على انها مباراة يلعب فيها الهلال ضد الهلال. مننا وفينا. جمال الوالي بعد ما يقرب من العشر سنوات اوشك على ان يخلق من فريق المريخ نسخة اخرى من الهلال. لكن طبعا (مع مراعاة فروق الوقت). النسخة المشوهة. نحن وين؟...وهم وين؟. جمال الوالي في البدء حاول ان يجعل فريق المريخ متميزا بالاستاد ...والمقصورة ...والنجيلة الطبيعية. لكن اكتشف اخيرا ان مثل هذه الاشياء لا تصنع له (انجازا). لقى (النجيلة) دي ما جايبة حقها. اكتشف ان هذه الاشياء (ضجيجها) في وقتها ..بعد ذلك حتى الاعلام السالب اصبح يمل الحديث عنها. لذلك كان اتجاه جمال الوالي الي التعاقد مع محترفين كبار ...امثال (على النونو...واليجا تانا ..وعبدالكريم النفطي وعصام الحضري). محترفون المريخ كانوا (كبار) فقط في السن. كبر عمر. جمال الوالي وقت لقى (المحترفون) ما جايبين حقهم ..والفريق برضو بطلع من البطولات الافريقية من التمهيدي. قال يقبل على ناس الهلال. بقى ينزل من المقصورة بين الشوطين ويقول للاعبي المريخ ألعبوا لي بس ناس الهلال. ويقول للمدرب ...ألعب لي بنفس الطريقة والخطة التىي يلعب بها الهلال. عاوز نفس الاسلوب. المدرب يقول لي جمال الوالي ...يا كوتش لكن ديل عندهم (طمبل). جمال الوالي بقول للمدرب ما في مشكلة ...نحن (طمبل) دا بنجيبوا ليكم. جمال الوالي يدخل ويطلع ...لمن يجيب (طمبل). طمبل يسافر جنوب افريفيا. ويعمل ليه حركات كدا. ويرجع يلعب في المريخ. وجمال الوالي عاوز المريخ يلعب زي الهلال. نفسو ومنى عينو كدا ...المريخ يبقى زي الهلال. جابوا (طمبل)...المريخ برضو ما بقي زي الهلال. جمال الوالي يدخل ويمرق. جمال الوالي قام تاني في مباراة نزل بين الشوطين ...وقال لي ناس المريخ عاوزكم تلعبوا لي زي ناس الهلال. عاوز نفس الاسلوب. مدرب المريخ ...قال لي جمال الوالي زي الهلال دي صعبة علينا. الهلال عندو (كلتشي). جمال الوالي قال للمدرب ...ما عندكم مشكلة ...نحن (كلتشي) دا لو بخليكم تلعب زي ناس الهلال بنجيبو ليك. اها كلتشي قعد (يصرج) لينا في الكور. يكون هو والقون يقوم يشوت لينا الكورة في (الكشافات). نحن فاكرين الكورة فكت من (كلتشي). اتاري (كلتشي) كان موقع عقد المريخ. عشان كدا ...كان يشيل ويهدف في (الكشافات)..الي ان انتقل كلتشي للمريخ. مباراة ...مباراتين. جمال الوالي تاني قام نزل من (المقصورة). نزل بين الشوطين. قال لمدرب المريخ ..قلت ليكم عاوزكم تلعبوا لي زي ناس الهلال. بي نفس الخطة. نفس الطريقة. مدرب المريخ ..قال لي جمال الوالي ...لكن زي الهلال دي صعبة علينا. قول زي الاهلي الخرطوم. زي الاهلي شندي. زي الموردة. لكن زي الهلال دي ناس موسي الزومة ديل ما بستوعبها ليك يا ريس. جمال الوالي ..قال للمدرب المشكلة شنو؟. المدرب قال ليه ناس الهلال عندهم (الباشا). جمال الوالي قال ليه لو بقت على (الباشا) هينة. جمال الوالي دخل وطلع. وقعد يفكر. الباشا مشى يلعب في بورتسودان. شوية كدا .نشوفك ليك (الباشا) في المريخ. الموضوع دا حصل كيف؟...ما تسألوني. شهر ...شهرين. المريخ تاني طلع من (التمهيدي). جمال الوالي غلبو الصبر. نزل من المقصورة. لقى ليك ناس بلة جابر ديل بشربوا في (العصير). ومدرب المريخ قاعد ينظر. جمال الوالي قال ليهم يا جماعة ألعبوا لي زي ناس الهلال. انا عاوز نفس الاسلوب. ما تنظروا لي ساكت ...وتلعبوا لي زي جزيرة الفيل. مدرب المريخ قال لي جمال الوالي زي الهلال دي صعبة علينا. جمال الوالي قال ليه (صعبة) في شنو؟. مدرب المريخ قال لي جمال الوالي ...ناس الهلال ديل عندهم (اكرم). جمال الوالي قال للمدرب ان بقت على اكرم ..دي اسهل حاجة. اكرم دا بكرة نجيبوا المريخ. شوية كدا ...شفنا ليكم اكرم في المريخ. قايلين الحال اتصلح. الحال ادهور اكتر. جمال الوالي نزل من (مقصورتو) وقال للمدرب ولاعبي المريخ ...عاوزكم تلعبوا لي زي ناس الهلال. بي نفس الطريقة. نفس الاسلوب. الحاجة البعملوها ناس الهلال ...اعملوها لي. نفس الطريقة. موسي الزومة المرة دي سبق المدرب ...وقال لي جمال الوالي ...زي الهلال دي صعبة علينا. الوالي قال ليه صعبة ليه؟. موسي الزومة قال لي جمال الوالي ناس الهلال ديل عندهم مدرب عالمي ...مدرب كبير اسمو (ريكاردو). لو عاوزني نلعب زي ناس الهلال جيب لينا (ريكاردو). جمال الوالي ضرب تلفون. صلاح ادريس انهى ليك عقد ريكاردو مع الهلال. ريكاردو عمل الحيلة ماشي (قطر). مشى قطر ...ما اشتغلنا بيه. قام مشي الاسماعيلي. ما في زول هببوا. شوية كدا ..نشوف ليك ريكاردو في (المريخ). اتاري اللفة دي كلها عشان يجي المريخ. طيب ما تقول كدا من الصباح. ريكاردو مسك المريخ. انتوا قايلين جمال الوالي ما نزل من المقصورة. جمال الوالي تاني نزل من المقصورة ..وقال لي ريكاردو عاوز ناس المريخ ديل يلعبوا لي زي ناس الهلال. ريكاردو قال الموضوع دا صعب علينا. زي الهلال دا صعبة. جمال الوالي قال ليه : صعبة ليه؟. ريكاردو قال ليه ناس الهلال عندهم (هيثم مصطفي) حفظه الله ورعاه. جمال الوالي وضع ايدو في رأسو..وقال لي ريكاردو ...لا دي صعبة عليّ. انا معاك لي اسامة التعاون. لكن اجيب ليكم هيثم مصطفي ...دي كتيرة عليّ. صعبوتها علينا عديل كدا. اها عليكم الله بالطريقة دي ...الليلة موش نحن لاعبين مع (اولادنا). كلتشي والباشا واكرم الهادي سليم. يا اخي ديل مدربنا السابق (ريكاردو) جابوه. دا هلال 2007 عديل كدا. ما في أي جديد. طمبل (القديم) تاني رجعوه. يا ريكاردو عليك الله انت ما بتضحك على الجماعة ديل. طمبل في ايام مجدو في الهلال موش كنت بتخطوا في (الكنبة). هسع بعد ما صل الاربعين ...عاوز تيجبو. إلا مساعد مدرب. غايتو نحن ما فارقة معانا الليلة كتير. هلال لاعب ضد هلال. والله يا ناس المريخ (هلال كادوقلي) خلى مشاطبينا. انتوا لسع شغالين بالموضوع دا. ملحوظة : يا الله ستة. هوامش جمهور الهلال. جمهور الهلال. جمهور الهلال. الليلة الكورة دي في ملعبكم ..والانتصار على المريخ في مساندتكم القوية ..والتشجيع طوال زمن المباراة. شجعوا وخلوا الباقي على (غارزيتو). 90 دقيقة عاوزين نكون فيها بنشجع فقط. شجعوا ساي. الليلة يا ناس المريخ اخدو ليكم (ستة) بروفة لي مازمبي. طبعا الجماعة ديل من تجيب ليهم سيرة (مازمبي)...الاكل يطلع من نفسهم. خشمهم يبقى ملح ..ملح. الليلة على وجه خاص يمكن ان يسجل (فلانتاين). السعودي لو لاعب ..اعتمدوا على (اهدافو العكسية). بكرى المدينة حالف يجيب قطايع لي المسطبة الجنوبية كلها. الجنوب اتفصل. الكلام الكتير خلوه. نسأل الله التوفيق للهلال. والنصر الكبير. لو سجلتوا (هدف) اضغطوا. عشان تسجلوا التاني. وبعد التاني اضغطوا اكتر. عاوزين الثالث. ما تقيفوا من التشجيع. اعملوا ليهم شغل (مازمبي). وخلوا الباقي لي (عيد الحب). عاجل : ريكاردو ..جهز شنطتو.