لا اعتقد ان هناك احتفاء بالحب كالاحتفاء الذي كان به في الاغنية السودانية ...الاغنية السودانية عبارة عن (حديقة) وبرهة جميلة للحب والحياة. نظام شنو يعني ؟.
نظام (فلانتاين) وكدا.
من قبل قال سيد عبدالعزيز:
حياتي ومعاها العاطفة النبيلة
باسم الحب اقدم ليك حياتي
عليك ياحب تحياتي
عليك أوقفت غاياتي
في حبي اضحي بحياتي
عليك أوقفت غاياتي
في حبي اضحي بحياتي
هذا الحب ..وهذا هو الفنان ابراهيم الكاشف الذي تغني باسمه ...كأننا كنا ناطقين رسميين باسم الحب.
الحالة دي لسع ما دخلت ليكم على (فلانتاين).
نمشي خطوة ..خطوة.
ورانا شنو نحن.
الليلة إلا تفهموا حاجة.
أشوفك أنسى آلامي
وأقول حققت أحلامي
علي تميل عشان نميل سوا ياجميل
وفيك أمعنت نظراتي
وجدتك كل مسراتي
وأفراحي وملذاتي
أحبك وأنسى فيك ذاتي
دا منو يا جماعة دا (فلانتاين).
الشيء شنو؟.
ليس هناك معني للحب اسمي من هذا الذي تغنينا به ...هنا الامر يرتبط بالارواح والكلمات ..الحب هنا ليس مجرد (ازهار)..وبعض الاهازيج التي تردد في مثل هذا اليوم.
اليوم الذي يوقع فيه (فلانتاين).
يا ناس الهلال عملتوها واضحة.
قالوا ليك واحد دخل فيه (مجروس).
شالوه وجرى على المستشفي.
بعد 42 يوم زولكم فتح ..لقي في وشو (الممرضة).
الممرضة قالت ليهو (شاعر) بي شنو؟.
صاحبكم ما كذب..قال للممرضة ..شاعر وملحن ..وبرسم كمان.
ما معروف الهضربة دي كانت بسبب (المجروس)..وإلا من (الممرضة).
الاغنية السودانية ..ايامها كلها حب ..الاحتفاء بالحب في الاغنية السودانية ليس ليوم واحد ..بل الاحتفاء ل 365 يوما.
نظام شنو؟.
نظام الهلال كلو (فلانتاين).
تعتبر اغنية سيد عبدالعزيز (باسم الحب) من اوضح واميز اغنيات الحب ..ومن اجمل علاماته.
تاني في كل تمرين بنغني (باسم الحب).
ايوة باسم الحب ..اذا كان الحب كلو بيلعب في الهلال.
الحب في الاغنية السودانية ليس كما هو موجود في اغنية ام كلثوم مثلا ..التي ثارت للحب ..واردة ان تحرر الذين يتحدثون باسمه.
حب ايه اللي انت جاي تقول عليه
انت عارف قبل معني الحب ايه
انت ما بينك وبين الحب دنيا
دنيا ما تطولها ولا حتي بخيالك
أما نفس الحب عندي حاجة تانية
حاجة أغلى من حياتي ومن جمالك
انت فين والحب فين
اذن هذا يتناسب تماما مع العاطفة المصرية التي يمكن ان تتكسب باسم الحب.
الكلام دا ما تقولوا لي (فلانتاين).
دا نحن ما عندنا.
ارجع واقول ان اجمل اغاني الحب ..تغني بها الفنان عثمان حسين ..عندما غني (بحبك بحبك).
بحبك .. بحبك .. ما لا نهاية
واغنيك حنيني .. شوقي وهوايا
لأنك حبيبي .. وغاية رجايا
ليس هناك اجمل من هذه الحالة ..للتصريح ..والاعلان ..والبوح ..ولا اظن ان هناك احتفاء بكملة (بحبك) كما في هذه الكلمات التي يتغني بها الفنان عثمان حسين.
شفت كيف يا (فلانتاين).
نحن أي حاجة عندنا بي نظام.
كتير في بعادك دهتني الليالي
أغالب دموعي .. واكابد ملالي
طريقي المنور .. خلاص اضحى خالي
تعال يا حبيبي .. صدودك كفاية
والله (الطرف) الشمال دا حيرنا عديل.
ما عرفنا نعالجو.
عثمان حسين نفسه ..يترنم بهذه الكلمات بشيء فيه الكثير من الفرح ..والخيلاء والابتهال والابتهاج بالحب.
زرعنا المحنة .. رويناها شوقنا
وعايشين نأمل تقوم ترمي فوقنا
نسير في ضراها نسير لي شروقنا
نتوج حياتنا .. بأسعد نهاية
منامي المسهد .. يحل لعيونك
وشوقي المعذب .. يناشد حنينك
تحكم ضميرك .. وترحم ضنينك
فؤادي البحبك .. ما لا نهاية
انه الحب.
فلانتاين.
لو راجعت (الحب) في الاغنية السودانية سوف تؤمن بانه عاطفة نبيلة ..يخرج من نفق الانانية وسفوح الانا.
الحب في الاغنية السودانية ...حالة من التضحية والامل والاشراق.
لذلك نحن نجمل عاطفتنا ..ونهذب مشاعرنا ..بمثل هذه الكلمات ..ونرتقي بالانفس بما نجده من مضامين هذه الاغاني.
عشان كدا جبنا فلانتاين.
أي حاجة نحن عندنا بي نظام.
الفنان محمد وردي ايضا من كلمات اسماعيل حسن ...غني لاجمل حالة توسل في الاغنية السودانية.
بل غني لاجمل حالة توسل في الحياة.
هذا تجدونه في اغنية (لو بهمسة).
لو بهمسة قول احبك
لو بنظرة نظرة حتى عابرة قول احبك
لو بتحلم في منامك قول احبك
لو ترسل لي سلامك قول احبك
يا حبيبي آه يا حبيبي
هذا اجمل رجاء.
يا بلة جابر ح تتعب معانا انت.
تتواصل الرسائل ...والرجاءات وفي كل ايحاءات الحبيب هذه الدنيا وتلك الروعة.
كل كلمة من شفايفك أحلى غنوة
كل نظرة من عيونك فيها سلوى
كل نسمة من ديارك فيها نجوى
وكل همسة يا حبيبي عندي حلوة
من بعد يأتي التعليل على هذا النحو :
يا حبيبي عمري كله اهديتو لحبك
يا حبيبي أنت عارف و الغرام يشهد له حبك
يا بدوري في الظلام والظلام يحجب لي دربك
آه ناري بعدك والحنان والجنة قربك
يا حبيبي والزهور الحلوة تتفتح في قلبك
أنت عارف أنا يا روحي بحبك
يلا اعكس يا فلانتاين.
المرة دي دخلوا التسجيلات ب (فلانتاين).
فلانتاين عديل كدا.
ناس الهلال ديل حيرونا ..كل مرة بجيبوا ليهم تقليعة جديدة.
المرة دي جابوا (فلانتاين).
يا ربي الزول دا ح يسجلوه في (اكاديمية الاتحاد العام) ..وإلا ح يتسجل في (حدايق السلام).
فلانتاين يا ناس الهلال.
دي موسي الزومة ما بستوعبها ليكم.
قالوا ليك موسي الزومة قالوا ليه الهلال ح يسجل (فلانتاين)...موسي الزومة خلف كراعو وقال اشمعنا ...ليه المريخ ما بسجل ليه حاجات بالشكل دا.
نحن بعد كدا (الطابق التاني) ما بغشونا بيهو.
نحن عاوزين (فلانتاين) زي فلانتاين الهلال ...اشمعنا المريخ.
بلة جابر وقت عرف الموضوع دا ..قال مع (حبكانات) الهلال دا ...بوفينا المفتوح ح يروح شمار في مرقة.
وكيل فلانتاين قالوا ليك وقت قدم فلانتاين للهلال قدمو ليك ب (الاغنية) دي.
حياتي ومعاها العاطفة النبيلة باسم الحب اقدم ليك حياتي
عليك ياحب تحياتي عليك أوقفت غاياتي
في حبي اضحي بحياتي عليك أوقفت غاياتي
في حبي اضحي بحياتي احب الحب وأيامو وذكراتو
وأحلامو وما يوحي الهامو أحبك كل اوقاتي
الاقي حبيبي يوماتي أقول ليهو تعال لي
يقول لي العهود بيناتنا مرعيه اقول ليهو تعال لي
نجلس جلسة غزلية أمتع فيك عيني
أشوفك أنسى آلامي وأقول حققت أحلامي
دا فلانتاين طبعا ...البنشوفو ونحقق احلامنا...قلت ليكم قبيل الكلام دا قعدتوا تغالطوا.
الله يكفينا شر (امولادي).
امولادي دا الحاجة طلعنا بيهو منو ..بقي كل شهر يمشي الفيفا يقول عاوز قروشو.
زي (بيت الايجار).
ان شاءالله (فلانتاين) ما يكون بالصورة دي.
الاغنية بتاعة الحب دي ...كلام الوكيل...اسمها قلت ليكم (باسم الحب).
اما كلام (بلة جابر) فهو في هذا المقطع.
علي تميل عشان نميل سوا ياجميل
وفيك أمعنت نظراتي
وجدتك كل مسراتي وأفراحي وملذاتي
أحبك وأنسى فيك ذاتي
حبيبي أراعي تقديسك ويرتاح قلبي لحديثك
حديثك يشفي العليل وحاتك يا السامي الجميل
الحب الصادق قليل البيشبه حبي الأصيل
وبدون دليل أهوى الجميل انا يا جميل انت لي ميل
وأنا ليك أميل عشان نميل سوى يا جميل
امانة ما تميل ميلان يا بلة جابر.
ح تبقي مع (فلانتاين) دا يا بلة جابر زي (مروحة التربيزة).
ح دور ..وادور.
وبعد دا ان شاءالله تفهموا.
ان شاءالله تعرفوا حاجة واحدة.
تعرفوا انو نحن أي حاجة عندنا بي نظام.
قالوا ليك واحد قال لي زوجتو الليلة (فلانتاين) وصل.
زوجتو قالت ليهو يا ود الناس انت الحاجات ليه اتغيرت كدا ...انت دحين زمان (الفلانتاين) البقولوه دا موش كان يوم 14 فبرائر...هسع بقي يجي يوم 10 ديسمبر.
