رغم ايماني القوي ان ادارة نادي الهلال جادة في التعاقد مع مدرب اجنبي كبير ..(مدرب بطولات) كما يقول امين خزينة نادي الهلال ، إلا انني مع ذلك ما بستبعد ناس الهلال ديل في النهاية يكتفوا ب (الفاتح النقر). زي ناس المريخ ..ماسكننا السنة كلها (مبينزا ..مبينزا ..مبينزا). وفي النهاية اكتفوا بي (كرنقو). كرنقو دا مازمبي وإلا شنو؟. غايتو يا كرنقو ..كل ما اشوفك ..بشيل هم (الكشافات). الكشافات ذنبها شنو؟. ديل ناس المريخ. ناس الهلال ذاتهم بقوا يزيدوا (المحلبية). نقبل على ناس الهلال شوية. ما بعيد ناس الهلال يكتفوا ب (الفاتح النقر). هسع يعملوا ليك الحيلة (اعياد الكريمساس). بعد شوية يقولوا ليك رأس السنة. تاني يقولوا ليك الموسم بدأ. يقوموا يرسوا ليك على (الفاتح النقر). شكلها كدا. ناس الهلال ديل ممكن يعملوا ليك الموضوع في النهاية عادي ..ويحالوا يقنعونا بي الحكاية دي. كمان عندهم اعلام (مقنع). ممكن في لحظة يطلعوا ليك مجدي ام بدة احسن زول. وفجأة كدا يقلبوا ليك عليهو ويقولوا ليك كبير في السن. بي كل بساطة ممكن هاشم ملاح يطلع ويصرح ويقول المرحلة تطلب وجود الفاتح النقر. عشان الفاتح النقر فاهم الدوري السوداني. يا اخوي نحن الدوري دا بدون مدرب فاهمو بنشيلو. بالنقر ..بدون النقر. الدوري الممتاز السوداني دا ..ذاتو ما عاوز ليهو زول فاهمو. نحن لو ما ميشو ..ما كنا بنفرط فيهو. ميشو عملها لينا كلها ...(انا ما بنوم ...انا قافل نفسو في غرفة ..وانا بدرس في الفريق الخصم). لمن ضيَع لينا الدوري الممتاز. حالتو دي ما بنوم. لو بتنوم انا ما عارف يا ميشو كنت عملت شنو؟. كنت لعبتنا في (الكونفدرالية). الله يقطع سنين (الكونفدرالية). اسوأ حاجة في ميشو ....مع عدم نومو دا ..انو كان بتكلم (كتير). اررررر....ارررر. كلام ..كلام ...السنة كلها يتكلم. ميشو كان جنو تصريحات ..اليوم والتاني يصرح. حالتو دي مانعنو. المجلس قال ليهو ما تتكلم ..ما تصرح ...مع ذلك ميشو كان في أي حتة بصرح. لو ما مانعنوا انا ما عارف كان عمل شنو؟. هسه العادة دي انتقلت لي هاشم ملاح. تفتح الشروق ..تلقي قاعد. تمشي النيل الازرق ...تلقى بتكلم بالتلفون. تقلب التلفزيون القومي ..تلقى عندو تصريح. تجي قوون ...تلقى بتكلم في نفس الموضوع. محل ما تمشي ..هو قاعد يصرح. اللاعب المحترف يصل ..بصرح. ما يصل برضو يصرح. نسجل يصرح. ما نسجل برضو يصرح. اقول ليكم حاجة غريبة. انا مرة فتحت الماسورة ...لقيتها بتنقط. انتظرتها لي الساعة اربعة صباحا. عارفين في الوقت دا فتحت لي شنو؟. فتحت لي نحن (ح نجدد لي مهند ..ونحن ح نسجل سيلا). لمن سيلا مشى نادي مويس. غايتو عندنا (حنفيات) بتكذب جنس كذب. مواسير غريبة. ونحن عادي نصدق. زي واحد كدا. خلوني احكي ليكم القصة دي. ضيف مشى ليهو لي ناس الساعة واحدة صباحا. واحدة صباحا زولكم يدقدق في الباب. تقول عندو نص في العداد. صاحب البيت قام فتح الباب في (البرد) دا. زولكم قام بي (ملايتو). في ناس كدا بحوموا بالملايا. فتح الباب لقي ليك (الكراتين) مردومة قدام الباب. عرف ليك الزول دا واصل من البلد. ومن شكل الكراتين كدا ..الزول دا (شهر) ما بطلعو من الخرطوم. اهلا وسهلا ...اتفضل ..حرم ..على الطلاق. الضيف دخل بي كراتينو على الصالون. الصالون فيهو 7 مراوح. مروحة شغالة مافي. الدنيا برد قلت ليكم. الضيف قعد ..الراجل مشى على زوجتو يا ولية قومي ..شوفو ليك (عشا) للشيخ ود الحارة ..هسع واصل من البلد. المرا ..مسكينة قامت في ليلها داك على المطبخ. ولعت نارها ..ورمت فطيرها. عاست ليك الفطير الساعة اتنين صباحا. جابوا ليك الفطير باللبن للشيخ ود الحارة. ود الحارة عاين للفطير كدا ..وقال لي صاحب البيت انا اللبن دا ما بنفع..(ماكل سمك). نظام الولد عاوز (ام فتفت). ام فتفت يجيبوها ليكم من وين الساعة اتنين صباحا. صاحب البيت بدون ما يشعر ..قال ليهو وقت ماكل سمك البقومك شنو بتعاين للفطير ؟..ما تنوم ساكت. نحن ما عندنا ليك غير (الفطير) دا. دحين يا ناس الهلال نحن ماكلين سمك. اوعكم تجيبوا لينا (فطير بي لبن). الفطير بي لبن دا يعني (المدرب الوطني). مع الاعتذار للبن!!. والله انا خايف (قنابل) الهلال دي تطلع أي كلام ..موش هسع بقولوا هم حايرين بين المدرسة الفرنسية او المدرسة الايطالية او المدرسة البرازيلية. خايف القنابل دي تطلع (فشوش). بعدين يقوموا يجبوا لينا مدرب من المدرسة (العطبراوية). ما بعيدة عليهم ناس الهلال. شوفوا نحن الكلام دا بنقولوا في المريخ ..في الهلال بنقولوا. طبعا لو الهلال اتعاقد ليهو مع مدرب من (عطبرة) ممكن بي كل بساطة هاشم ملاح يطلع ويحاول يقنعنا انو المدرب الجابو من عطبرة دا (مدرب اجنبي). يا ربي عطبرة دي بتقع في (فرنسا). ناس الكاردينال ديل ممكن براحة يقنعوك ويقولوا ليك (عبطرة) بلد اجنبية. عليه فالمدرب الوطني القادم من عطبرة مدرب اجنبي. هسع (جوبا) دي موش كانت مدينة سودانية. هسع بقت عاصمة لدولة اجنبية. ديل ما بعيدة عليهم حاجة. الزمن دا مافي حاجة مضمونة. ما بعيد (شندي) القريبة دي تبقي السنة الجديدة عاصمة لدولة اجنبية!!. يمكن. احتمال. ما تعاينوا لي كدا. الكلام دا انتوا بتشوفوا بعيد. لكن ممكن يحصل. موش اتير توماس دا فجأة كدا بقي لاعب اجنبي. اها بعد كدا عليكم الله في حاجة مضمونة. يا ناس الهلال عليكم الله اتحركوا. نحن (الجرجرة) دي ما بنحبها. ما بتنفع معانا عديل كدا. احسموا لينا موضوع المدرب الاجنبي. وجيبوا لينا مدرب كبير ..مدرب بطولات ..وعندو شخصية. بعد كدا ما مهم عندنا ينوم وإلا ما ينوم. المهم يكون صاحب بصمة ملحوظة. ان شاءالله يا رب يطلع غارزيتو الفرنسي. المدرب دا ان شاءالله يجنح مع الهلال. بعدين نحن عاوزين نجرب المدرسة (الفرنسية). شوفوا كلامي دا ..لو ما ناس المريخ السنة القادمة خلوا (ريكاردو) وجروا على (فرنسا). والله نحن لو جبنا لينا مدرب من (عطبرة). المريخاب يخلوا (ريكاردو) وجرى على (عطبرة). نحن جبنا نزار حامد من الامل عطبرة. ناس المريخ جري على (عطبرة). عارفين جابوا منو؟. جابوا مجدي ام بدة ..(بابا نويل). يا ناس الهلال عليكم الله احسموا لينا موضوع المدرب. وخليكم عارفين يا البرير ان السما ما بتمطر مدربين اجانب. عجلوا لينا بالمدرب الاجنبي. باقي نحن مستعجلين. انتهى ملحوظة : الاخ الصديق عبداللطيف احمد (ضفاري) بعث لي بهذه الرسالة التي اتشرف بنشرها في هذه المساحة عن هروب المريخ وذكرى الهروب. وقد كانت رسالة عبداللضيف او ضفرتو تحت عنوان (رقصة الهيب (هروب)!!. انشرها كما جاتني منه: ((تمر بنا في هذه الأيام الذكرى الشهرية لهروب المريخ من نهائي كأس السودان بحجج تعتبر الأوهى حتى الآن، وك(عادته) الاتحاد السوداني احتفى بهذه الذكرى بمسرحية سيئة التأليف والاخراج، فبعد أن فرض عقوبات على المريخ تمثلت في الحرمان من المشاركة في بطولة كأس السودان في الموسم الجديد بجانب عقوبة مالية، عاد بالأمس عبر لجنة الاستئنافات ولغى العقوبة، بحجة أن اللجنة المنظمة عاقبت المريخ بنص المادة 37ج، والتي تشمل على عبارة (فيما عدا المباراة النهائية)، في حين أن اللجنة المنظمة عاقبت المريخ بنص المادة 37 ب ه، وهو أمر ليس بمستغرب على الاتحاد العام!!. وبعيداً عن كل ذلك دعونا نحتفى بالذكرى الشهرية الأولى لهروب المريخ بطريقتنا، فمن وجهة نظري أفضل طريقة للاحتفاء هي أن نقوم باطلاق رقصة تحمل اسم الهيب هروب، فما فعله المريخ أقرب لرقصة الهيب هوب الأمريكية، التي تعتبر حركة ثقافية للأمريكيين الأفارقة، وقد بدأت في العام 1970، ونشأت كنوع من التعبير عن أنفسهم وعن المشاكل من الفقر والعطالة والظلم، وهو ذات ما يتعرض له فريق المريخ في هذا الموسم حيث عانى من العطالة افريقياً في شتى البطولات، وانظلم كثيراً من لاعبيه في (بدعة) شرق ووسط افريقيا، فما اظلم أن تأت ببرونزية من بطولة كسيكافا، فتعبر بذلك عن الفقر في المشاركات الخارجية باسم السودان!!. يقول الاستاذ باترسون وهواستاذ نشط في موسيقى الهيب هوب (ثقافة الهيب هوب هي رد على الظلم الذي تعرض له الأمريكيين الافارقة وهو أيضا نظام للاتصال فيما بينهم في جميع أنحاء الولاياتالمتحدة)!!. وذات الأمر سيتوافر في ثقافة الهيب هروب، فهي رد للظلم الذي تعرض له اللاعبون الأفارقة مثل غاسروكا الذي عاد إلى بلاده قبل أن يرتد إليه طرفه على الرغم من ادائه القوي، في حين مازال استيفن وارغو ضمن كشوفات المريخ على الرغم من المستوى الضعيف الذي قدمه مقابل المقابل المالي الضخم الذي يتقاضاه!!. ولعل من أكبر الفوائد التي كان يتمناها من طور ثقافة الهيب هوب هو انشغال الامريكيين الأفارقة للانضمام لفرق الهيب هوب والمنافسة في الرقص الغناء بدلاً عن الانضمام للعصابات والعنف والمخدرات، وهو ذات ما يمكن أن تفعله رقصة الهيب هروب لبني الأحمر حتى لا يلعبوا في الدافوريات، فيفقدوا بذلك لياقتهم البدنية!!. وكما أن رقصة الهيب هوب تتحمل عدة لغات بعد أن انتشرت في السنوات الأخيرة في جميع انحاء العالم بين فئة الشباب، وكانت أحد أهم اسباب نفوذ الثقافة الأمريكية في جميع انحاء العالم من خلال السينما أو وسائل الإعلام المختلفة، كما هو حادث الآن، فإن رقصة الهيب هروب يمكنها أن تتحمل عدة لغات لتلائم المواسير متعددة الجنسيات التي يضمها كشف المريخ!!. رقصة الهيب هوب أيضاً من أهم ميزاتها أنها تعطي الشباب حرية في التعبير ليست موجودة في أي فن آخر، وكذلك السهولة بحيث يستطيع أن شاعر كتابة الكلمات ووضع موسيقى عليها من خلال برامج كبيوتر جاهزة، وهو أمر يمكن أن يستفيد منه أعضاء مجلس إدارة نادي المريخ الذين لا يستطيعون التعبير عن دواخلهم للرئيس طوالي من خلال رقصة يطلق عليها اسم الرووووب (هوب)!!. بووووز *في الوقت الذي يستعد فيه يحيى توريه القلب النابض للمان سيتي وساحل العاج لمواجهة السودان في بطولة الأمم الافريقية بغينيا والجابون، يستعد فيه باسكال لتشجيعه في ذات البطولة حسبما ذكر أمس في تصريحات صحافية، ولا يمكننا أن نزيد أكثر من (بدون تعليق)، لتوضح مدى الفارق بين المحترفين!! *وذات الأمر ينطبق على قيثارة الكرة السودانية هيثم مصطفى كرار الذي (غادر) إلى الدوحة كقائد لمعسكر صقور الجديان هناك استعداداً لذات البطولة التي سيشارك فيها يحيى توريه، يستعد فيصل العجب للمغادرة إلى السعودية للمشاركة في مهرجان اعتزال محمد الدعيع، ولعلك تلاحظ عزيزي القارئ أم الفرق الشاسع لا يقف عند (المغادرتين)، بل تعداه إلى (العقبالين) فقائد الفريق الذي سيرفع كأس بطولة الأمم الافريقية سيتجه إلى القائد هيثم مصطفى (دفعته) في غينيا والجابون ليقول له (عقبالك)، وذات الأمر سينطبق على فيصل العجب الذي سيقول له كل من سيشارك الدعيع في اعتزاله (عقبالك)!!. *كل الأمنيات ألا تقتصر مشاركة قائد فريق نادي المريخ في مهرجان اعتزال الدعيع على الجلوس في دكة البدلاء.. فلو شارك بالجلوس فهذا يعني أن الدعيع لا يريد أن يعتزل، والإدارة هي من ارسلت في طلب العجب حتى يرى مستقبله إن أصر على المواصلة!!. *أعجب والله لأمر المتباكين على عدم اختيار فيصل العجب لقائمة منتخبنا الوطني بحجة أنه (قيمة) فنية كبيرة، فالعجب طيلة الموسم السابق كان عبارة عن (قيمة) مضافة، والمريخ مضاف إليه!!. *من أكبر المرشحين لتدريب سيد أسياد البلد حتى الآن هو غارزينو مدرب نادي مازيمبي السابق والذي حقق معه العديد من البطولات الافريقية!!. إذا تحقق ذلك فهذا يعني أن المريخ سيواجه (مازيمبي) تكعيب، واحد في بطولة الأندية الافريقية الأبطال، والآخر في الدوري الممتاز ويحمل اسم الهلال، أما الثالث فهو ينتظره في الكونفيدرالية في حالة الوصول إليها.. وهذا يعني أن المريخ سيخرج من كل بطولات هذا العام بال(تزكية)!!. *عقد الكابتن محمد عبدالله مازدا المدير الفني للمنتخب صباح أمس اجتماعاً مع اعضاء الجهاز الفني وقائد المنتخب هيثم مصطفى البرنس وضع من خلاله الاطار الفني برنامج الاعداد لليومين القادمين، وسيقوم الجهاز الفني بوضع برنامج الاعداد ومواعيد التدريبات واماكنها بعد التنسيق مع الاتحاد القطري، وسيقوم مازدا بوضع البرنامج الكامل وتسليمه لقائد المنتخب ليسلمه لزملائه اللاعبين!!. الخبر اعلاه نهديه لكل المريخاب على امتداد المليون ميل (إلا ربع)، لنبين الفرق بين القائد هيثم مصطفى كرار، وبين القائد فيصل العجب، فآخر اجتماع للبرنس كان مع المدير الفني لكي يطلعه على آخر المستجدات في الساحة الاعدادية، بينما آخر اجتماع كان مع فيصل العجب تم لاجل اخلاء خانته، فرفض العجب وبرد الجو، وبكت كنبة البدلاء التي اصبحت هي والعجب اشهر من ثنائية هيثم وسادومبا، وبكى كذلك الرقم 24 الموجود على اللوحة الالكترونية التي تستعمل لاجراء تبديلات اللاعبين، فهو أكثر الأرقام استعمالاً في آخر أوقات المباراة لأجل دخول العجب تكتيكياً، ومن حقه أن يطالب بزيادة بدل الوجبة، وبدل الترحيل)). ملحوظة تانية : هنا انتهى كلام ضفاري الذي يبحر هذه الايام مع (التيار). هوامش بعد (سيلا) الوقع في مويس. ممكن عادي مدرب الهلال الاجنبي يقولوا ليك طار في اخر لحظة. قالوا ليك نادي مويس ..حاري ليهو (مدرب اجنبي). لو الهلال فشل يتعاقد معاهو بمشي نادي (مويس). ما في أي مشكلة. واحد وقعت فيهو صاقعة قام بعد تلاتة يوم يسأل من تلفون (عمار مرق). عمار مرق هسع ذنبو شنو؟. فلانتاين بالشمال. ويوسف محمد باليمين. وسادومبا في النص. وعاوزين عصام الحضري يرجع ليكم. عشان برجع. عليكم الله هسع (اكرم ابوحصاوي) لو كان عندو خبرة (الحضري) كان بوقع ليكم تاني. والله في الظروف الزي دي ما في حارس عاقل بقعد ليكم. فلانتاين ..ويوسف محمد ..وسادومبا واتوبونج وكاريكا وبكري المدينة والطاهر حماد. انتوا مجانين. في حارس بقيف لي ديل. عاجل: كرنقو قالوا قافل الغرفة عليهو ويزاكر في (باصات) سيدا حفظه الله ورعاه.
