· الشيء الذي نشهد به للامين البرير ويشهد به كل متابع للنشاط الرياضي في السودان هو ان الامين البرير كان قويا وشجاعا وهلاليا خالصا في الفترة الماضية..الفترة التي وجد فيها البرير نفسه وحده. · البرير لم يخزل القاعدة الهلالية ..قام بكل الواجبات (وزيادة شوية) ..رغم انه كان من الممكن ان ينسحب في هدوء. · يوقفوني وادفع ..(والله دي جمال الوالي ما يعملها). · اجتهد وتحرك رغم الصعاب التي احاطت به ..ورغم الظروف التي كان يعمل فيها. · لا اريد ان امنح البرير الدرجة الكاملة ..اعرف ان هناك الكثير من الاخفاقات ..لم يوفق فيها المجلس ..واخشى من تصدعات داخلية تنقل الصراع من المجلس الي الميدان. · اعرف ذلك ..لكن بحسبة الظروف والصعاب التي واجهت الامين البرير فان ما قدمه البرير في فترته تلك تحسب له انجازا لا يقبل حتى التقليل منه ..لا سيما وان هناك الكثير من الملفات التي حسمها البرير ومجلسه (ما بقيا منه) بصورة جيدة وجميلة. · البرير فجأة وجد نفسه وحيدا في الهلال بعد ان خزله الذين جاءوا معه في الانتخابات الاخيرة ..ودخلوا المجلس. · كان الكاروري والطاهر يونس من زمرة الداعمين للمجلس من الداخل ..لكن في اول (المطبات) نزل الكاروري والطاهر يونس من قطار الهلال. · الكاروري والطاهر يونس كانا اول من يقفز من قطار الهلال ..حينما كانت الحاجة لهم. · اردوا ان يحرجوا البرير ..وان يضعوه هكذا امام الجماهير مطالب بحسم التسجيلات ..ومطالب بحسم امر الجهاز الفني ..والاعداد ..ودائرة الكرة....و...و...والكثير من القضايا. · تجاوز البرير كل هذه العقبات بامتياز ...وتبقى له ان يوفر الاستقرار والمعينات للجهاز الفني واللاعبين في هذا الموسم الذي يوشك من الانطلاق. · نعم خزل كاروري ومجموعته البرير ..وابتعدوا حين كان الاحتياج لهم شديد. · بالمناسبة انتوا وين (حطبة). · حطبة مسك المرور وقفلها على الهلال. · على كل نحن سعداء بهذا التخازل من كاروري ومجموعته لأن هذا التخازل يمثل تخازل من جانب السلطة التي قيل انها تدعم الهلال عن طريق الكاروري. · اقوى دليل على ان السلطة بعيدة عن الهلال هو ابتعاد كاروري عن الهلال في وقت كان يجب ان يكون لكاروري دور. · حسب كاروري ورفيقه الطاهر يونس انهما سيشكلان ضغط على البرير وربما كان ابتعادهما بايعاز من السلطة ..حتى يجد البرير نفسه وحيدا هكذا تتلغفه الامواج. · لكن البرير لم يضعفه هذا الخزلان ..ولم يوقفه. · ماشي رغم (الايقاف). · هذا الذي تعرض له البرير من مجلسه ..وجد مثله من اقطاب الهلال الذين ابتعدوا عن الساحة الهلالية وكل قطب فيها يستمتع بمشاهدة البرير وهو في هذه الحالة ظنا منهم انه داخل (المصيدة). · غير إنا نعود ونحسب لصلاح ادريس واشرف الكاردنيال دخولهما للمسرح الهلالي في فترة التسجيلات الاخيرة ..ومد يد العون للامين البرير ولو بالمشورة. · لكن لا يمكن اعتماد مساهمتهما واعتبارها منفذا للبرير لأن دعم الارباب والكاردينال للامين البرير في التسجيلات الاخيرة كان دعم خجول ..ولا جزاء منه غير النوايا الحسنة وتلك اشياء وحدها يمكن ان يحمدوا عليها. · اعود واقول ان البرير كان يقاتل وحده في ظروف صعبة ..وتوقيت رهيب. · هو بعد كل هذه العقبات تعرض لضغوط اخرى من الوزارة ومن المفوضية ومن الاتحاد الافريقي بعد احداث مباراة الهلال والترجي. · حاولوا محاصرته من كل الجهات ..لكن البرير كان يخرج من كل حصار اقوى. · لم تزده الصعاب الا قوة وشكيمة. · بغض النظر عن الواقعة فان الامين البرير تعرض لحملة شرسة ..شاركت فيها جهات مختلفة. · توحدت اهداف الكثيرين في حربهم على البرير. · لكن مع ذلك ظل الامين البرير ثابتا ..ومنصرفا نحو القيام بواجباته الهلالية. · جميل ان البرير لم ينشغل كثيرا بهذا (الضجيج)...لم يبال به. · قلت ليكم ماشي رغم (الايقاف). · كان يمكن في هذا التوقيت العصيب ان ينسحب الامين البرير من الساحة ..وان يترك الهلال هكذا كما تركه اخرون.. لم يصمدوا كثيرا امام الهجمات الاعلامية والدفع المستمر. · البرير لم يترجل ..ولو ترجل من المسيرة لما لامه احد. · ظل البرير في هذه الظروف الشائكة ...والهجمات المستمرة التي تعرض فيها لحملة شرسة ..يدفع ويكمل ملفات فشل غيره في اكمالها حتى وهم في ظروف افضل. · لم يتخل عن مسؤوليته ولم يتاون لحظة. · يمكن القول ان البرير وصل لعشرة من عشرة بالنسبة لملف التدريب اذ يعتبر استقدام جهاز فني بقيادة الفرنسي الايطالي الاصل (غازييتو) المدرب العالمي المعروف في الساحة الافريقية انجازا عظييما. · كذلك يحمد له استقدام مع غارزيتو مدرب احمال فرنسي ومدرب حراس فرنسي ايضا ..اكمال هذا الملف بهذه الصورة يعتبر انجازا يحسب للبرير ولامين خزينته الذي تولى هذا الملف وانجزه بالصورة المطلوبة. · سوف يحفظ للبرير ذلك ..وستثبت الايام ان الامين البرير احدث نقلة في التدريب. · غير اننا ارجع واقول ان هذا الجهاز الفني ان لم يجد الاستقرار الكافى ..فان مصير الجهاز الفني سوف يكون الفشل السريع. · نحذر من التدخلات الادارية ..ومن الاجواء التي يمكن ان تفسد طقس العمل لهذا الجهاز الفني العالمي. · لا معنى لاستقدام مدرب كبير ..وصرف مبالغ ضخمة من اجل التعاقد معه ان لم نوفر له الاجواء التي يمكن ان يعمل فيها ويبدع. · ويجزل العطاء. · كذلك احسن مجلس الهلال في التسجيلات الاخيرة ..وبرواية الكل وشهاداتهم ..الهلال سجل افضل لاعب وطني في التسجيلات الاخيرة ...وذلك حينما تعاقد مع لاعب الامل عطبرة نزار حامد الذي يعتبر نجم التسجيلات الاول. · نزار حامد اضافة حقيقية للهلال ..وسوف يشاهد الناس هذا اللاعب في نهائيات الامم الافريقية وحينها سوف يعرف الناس ان الهلال كسب لاعبا كبيرا. · علما ان في كل مواسم التسجيلات السابقة كان نجم التسجيلات الاول يذهب للمريخ ...لم يكن ذلك (شطارة) من المريخ ...وانما كان ذلك زهد من صلاح ادريس (اخر رئيس للهلال منتخب قبل الامين البرير). · ما يجب ان يقال في شأن التسجيلات هو ان الهلال نجح في مراده. · سجل الهلال افضل لاعب وطني في الساحة (نزار حامد) وجاء بافضل محترف (فلانتاين) الذي دخل كشوفات الهلال حلا لمشكلة الطرف الشمال ونتمنى ان يكون فلانتاين حلا لمعضلة عجز الهلال في كل المواسم السابقة من حلها. · الهلال سجل (فلانتاين) بينما سجل المريخ اليوغندي (مايك موتيابا) الذي لم يكلف خزينة المريخ اكثر من (25) الف دولار ..تشمل نصيب النادي ونصيب اللاعب والوكيل والسماسرة ..وربما الصحفيين. · محترف ارخص من اللاعب الوطني دي ما حصلت إلا عن ناس هلال كادوقلي. · دي زي الزول البمشي السوق عشان يجيب ليهو (لحمة ضان)...يقوم يلقى اللحمة غالية ..يقوم يجيب ليهو (لحمة رأس)..ويرجع. · طبعا لما يرجع بي لحمة الرأس دي للبيت بحاول يقنع المدام بي انو لحمة الرأس دي احلى لحمة. · وانو في الاساس ما مصدق انو يلقى اللحمة دي في السوق ..(طبعا في اعتقاد قديم ..بقول ليك لو عاوز (لحمة الرأس) إلا تقوم بدري..زي لما تكون عاوز ام فتفت). · تمشي سوق اربعة والدنيا (مضلمة)...تقول عاوز ليك (قطا). · حكاية تمشي بدري دي قبل ما تكمل عليك اللحمة..(دعاية) بطلعوها الجزارين ...عشان يبيعوا بيها (لحمة الرأس) البايرة. · على كدا صاحبكم جاب (لحمة الرأس) ودخل يقنع المدام بي انو (لحمة الرأس) دي فيها (شوربة) ما تخلص. · زي شوربة (العدس). · تاني عاوز ترجع لينا للعدس. · يا جماعة الله في الزمن دا في زول بيشرب ليهو شوربة (لحمة رأس). · غايتو الزول وقت يكون (مُقنع). · ما بتلفت. · اها لحمة الرأس دي ..زي محترف المريخ اليوغندي. · وكمان قالوا صانع العاب. · دي لحمة الرأس ذاتها. · انتوا عارفين (فلانتاين) كلف الهلال كم؟. · فلانتاين كلف الهلال قرابة ال (300) الف دولار أي ما دفعه المريخ في (مايك موتيابا) مضروب في (12). · دي ما (لحمة رأس). · هسع (لحمة الرأس) ذنبها شنو؟. · بالواضح كدا فلانتاين بساوي دستة (مايك موتيابا). · طبعا اليوغندي (صانع الالعاب) دا عاوز ليه (صفحة)...زي كرنقو. · كرنقو دا ما بخلي. · زول كورتو زي (قفة) اخر الشهر. · قفة فاضية. · ضفر سطر ما بستحقو. · ضفر دا حلف قسم. · حسابو ما عندنا. · حسابو فوق. · انا اول مرة اشوف لي صانع ألعاب (يوغندي). · والله الظاهر عليها غلبتكم عديل يا ناس المريخ. · دا افلاس. · ما في ليها تسمية غير دي. · تاني مع اليوغندي دا (كورنر) ناس سكواها ما يحلموا بيهو. · الموسم القادم ...القون ما بتجيبوه إلا في التمرين. · ومع التمارين مع (لحمة الرأس) دا ما في ليكم. · صانع ألعاب (يوغندي) اكتر حاجة يمكن ان تطلعوا بيها.. الكورة تدق في العراضة مثلا. · او تضرب في الشبكة الخارجية. · حاجة زي كدا. · ما في صانع ألعاب يوغندي بيصنع اكتر من كدا. · انتوا عارفين نصيب اليوغندي دا كم من تسجيله في المريخ. · نصيب اليوغندي دا 4 الف دولار. · دي بضربها وارغو في 4 وبشيلها مرتب شهري. · هسع اليوغندي دا خلي. · شوف مشكلتكم انتوا. · البرير وقفوا 4 سنوات. · ليه (بونية) دي وإلا (لغم). · الناس ديل قاصدين البرير عديل. · زول في الحكم الاول وقفوه سنتين. · في الاستئناف يوقفوه اربعة. · خايف لو مشينا (كاس)..يوقفوا تمانية اعوام. · ديل بضاعفوا الحكاية. · ارجع واقول..ان البرير ثبت لهذا الموقف ...وظل يعمل ويدفع رغم ايقاف الاتحاد الافريقي له. · واظن ان افضل رد للبرير للاتحاد الافريقي وللذين يهاجمونه هو تحويله لمبلغ 60 الف دولار للقاهرة للمعسكر الهلال. · كما ان تحويل 60 الف دولار لمعسكر الهلال في القاهرة تبشير لجماهير الهلال وتأكيدا لهم ان البرير لم يتخل عن الهلال. · من بعد ..نشوف الفي الكتاب. · ملحوظة : الله يسهل. هوامش · اعتذر للاخوة في منتدى الهلال (سيد البلاد)...عن عدم تمكني في التواصل معهم الايام الماضية. · ولهم العتبى حتى يرضوا. · وامسحوها في (ضفرنا). · قالوا ليك ناس المريخ بفتشوا ليهم سبب عشان يشيلوا (ريكاردو). · قالوا لو ريكاردو طيارتو اتأخرت ساكت ..بشيلوه. · طبعا المريخاب بعد (غارزيتو)...قلت ليكم بقوا يشفوا ريكاردو ...ابراهومة ..ابرهومة. · يعني ريكاردو بشوفو (ابراهومة). · واضحة دي. · البرير (الموقوف) شغال. · كاروري غير الموقوف ..ما في زول شاف منو حاجة. · وقوف البرير ..ولا حركة كاروري. · اخير لينا البرير دا بي ايقافو. · عاجل : اتوبونج ..رجع من امريكا بي (كراع) زيادة ..اعملوا حسابكم يا ناس بلة جابر.
