أمس كنت ماشي اتفرج على تمرين الهلال. قعدت (افكر). تقول ماشي (القمر). في اخر لحظة اتراجعت. اتذكرت. قالوا ليك الفرنسي غارزيتو دا في التمرين اول حاجة في التمرين بمسك ليك (الصحفيين) ديل وبدرشهم ليك (سويدي) صاح. عشان تاني ما يكتبوا ساكت. عليكم الله هسه لو بابكر سلك دا بمشى تمارين المريخ بكتب ليهو كلمة واحدة في (الباشا). سلك (مصعب عمر) طلعو لينا (لاعب كورة). فيصل العجب ...طلعوا لينا (رجل فضائي). قلق ..اخطبوط. الاخطبوط هسه في بورتسودان ...اعاروه. جابوا (ضفر) ..واعاروا (قلق). دي زي الزول البقرأ (طب)..قام في السنة الخامسة حول سياحة وفندقة. هو وين الفندقة والسياحة عشان تدخلوا ليها جامعة؟. ناس المريخ جابوا (كرنقو) واعاروا (قلق). دي ما ادونا ليها. ما درسنا ليها. الموسم الجديد ضفر وكرنقو وموسي الزومة في المريخ. غايتو الزول العندو سكري وضغط ما يتابع كورة المريخ في التلفزيون. كلموه يحضرها في (الراديو). وفي الراديو ذاتو لو ما قلبو قوى ما فروض ما يسمعها. ضفر دا قالوا ليك كورتو زي الساعة واحدة إلا ربع. كورة مشاترة. ما بتفهم منها أي حاجة. لكن دا كلو ما موضوعنا. لا ضفر..لا كرنقو. قضيتنا الليلة (عباس). أي زول اسمو (عباس) يشد حيلو معانا ..ويبل رأسو. عباس دا زول صعب. صعب شديد. النوع البكون اليوم كلو واقف في الباب. أي زول يشوفو شايل ليهو (بطيخة) بقول ليهو (البطيخة) دي بكم؟. البعرفو والما بعرفو بسألو وبقول ليهو بطيختك دي اشتريتها بي كم؟. أي سعر يقولوه ليهو بقوليك بعدو : (والله غشوك). لو قلت ليهو (البطيخة) دي ادوني ليها ساكت!!..بقول ليك غشوك. عباس دا بفتكر أي زول اشترى ليهو (بطيخة) اتغشى. انا ما عارف السبب في ذلك شنو؟. ليه الاعتقاد دا؟. قدر ما قريت ..وحاولت اشوف لي تفسير ..ما لقيت لي (عذر) وجيه كدا. المهم يا جماعة (عباس) بكون اليوم كلو واقف في الباب. الساعة البدخل جوة البيت بعمل شكلة مع زوجتو. دائما شكلتهم لي رب السما. زي عمر وسلمي. تامر حسني ومي عزدالدين في فليم (مي وسلمى 3). اعلان الفيلم شغال في الفضائيات الان ...وهو قد نزل لدور العرض قبل اسبوع. اجمل ما في فليم (عمر وسلمى) هذا المشهد الذي يروج له الان. هناك حوار يبدو ان تامر حسني (حفظه) من كترة سماعه من مي عزالدين في الفيلم. الحوار بقوله تامر حسني مع مي عزالدين على هذا النحو: (برضو ها تخرج تتسرمح ما ترجعليش الا وش الفجر.. وبعدين ترجع تنام لحد الظهر.. وبعدين تصحي تدخل الحمام تعقد لك ساعتين وبعدين تخرج منو.. وتعقد تزعق وتعيش لى في دور سى السيد.. اجى اتكلم معاك تقفش عليا وتقولى دى عيشة تطهق.. وبعد شوية تيجى تصالحنى وتقولى معليش يا بيبى دا الشيطان). احسن نخلى (عباس) شوية..ونقبل على الفيلم الذي حقق نجاحات كبيرة عندما ظهر الجزء الاول منه. لم يكن في بال الشركة المنتجة ان يكون هناك جزء ثاني للفيلم ..فقد كتب الفيلم دون ان يكون هناك فكرة لأن يكون له جزء ثاني. لكن نجاح الفيلم وقابليته لان يكون له جزء تاني شجع الشركة المنتجة ان يكون هناك جزء ثاني للفيلم بنفس الابطال. لا سيما ان مي عزالدين وتامر حسني بدآ يشكلان ثنائية سنمائية ..وقد نسجت الكثير من الشائعات اربتاطهما. لكن مثل هذه (الشائعات) احيانا يصنعها ابطال الفيلم وشركة الانتاج من اجل نجاح الفيلم. تامر ومي عزالدين تجمع بينهما سينمائيا دائما قصص الحب. الفيلم في الجزء الاول كان قطعة رومانسية خالية من المشاكل والصراعات الموجودة بين بطلي الفيلم في الجزء التاني والجزء الثالث. فكرة الفليم مبنية على ان الحياة في البداية وقبل الزواج تكون عريضة الاحلام ورمانسية للحد البعيد. اول ما يحصل الزواج ..وتقع المسؤولية على الزوج والزوجة تظهر المشاكل وتنكشف الحياة الوردية التي كان يرسم لها قبل الزواج. طبعا الفيلم وبما انه امر يناقش القضية دراميا يبقى من المنطقى ان يدخم الامور والمشاكل لتظهر بهذه الصورة المبالغ فيها او دعونا نقول الصورة (الكوميدية) الجميلة. الترويج عن فيلم (عمر وسلمي 3) يوضح ان الامور وصلت بين بطلي الفيلم لمرحلة خطيرة. و... (برضو ها تخرج تتسرمح ما ترجعليش الا وش الفجر.. وبعدين ترجع تنام لحد الظهر.. وبعدين تصحى تدخل الحمام تعقد لك ساعتين وبعدين تخرج منو.. وتعقد تزعق وتعيش لى في دور سى السيد.. اجى اتكلم معاك تقفش عليا وتقولى دى عيشة تطهق.. وبعد شوية تيجى تصالحنى وتقولى معليش يا بيبى دا الشيطان). عليكم الله هسه الكلام دا ما بنطبق على عصام الحضري والمريخ. يسافر ..ويمشي القاهرة على كيفو (يتسرمح وما ريجعش). الحضري شغال كدا على كيفو. ينوم ويصحى ويخرج ويزعق ..جمال الوالي يتكلم معاه يقول ليهو دي عيشة تطهق. ويا ريت لو بقت على كدا. الحضري مشى فضح المريخ في الفضائيات والصحف المصرية. قال السودان ما فيها (تعليم)...وهو ما بقدر يضحي بتعليم اولاده. وقال اقعد في البيت وابطل الكورة ما ارجع للمريخ. و... (برضو ها تخرج تتسرمح ما ترجعليش الا وش الفجر.. وبعدين ترجع تنام لحد الظهر.. وبعدين تصحى تدخل الحمام تعقد لك ساعتين وبعدين تخرج منو.. وتعقد تزعق وتعيش لى في دور سى السيد.. اجى اتكلم معاك تقفش عليا وتقولى دى عيشة تطهق.. وبعد شوية تيجى تصالحنى وتقولى معليش يا بيبى دا الشيطان). وكان بقت على كدا هينة. الحضري قال عشرة شهور ما شال ليهو قرش من المريخ. معقولة يا حضري. دي ما بنصدقك فيها. لو عشرة شهور ما اعطوك مرتب ..البقعدك شنو؟. انت يوم ما بتقعد بدون (دولار). عاوز تقعد عشرة شهور. سعيد السعودي البيلعب في المريخ من هو (طفل) لو ما ادهو قروش عشرة شهور ما بقعد في المريخ. والله لو مشى (الرابطة) كوستي ما يلعب في المريخ. تجى انت يا الحضري تقول عشرة شهور ناس المريخ ما ادوك قروش. دي جمال الوالي ما بعملها. بعدين جمال الوالي دا مشكلتو بدفع. مشكلة جمال الوالي ما في عدم الدفع. مشكلة الوالي في الدفع يا الحضري. يا الحضري عملتها ظاهرة. و... (برضو ها تخرج تتسرمح ما ترجعليش الا وش الفجر.. وبعدين ترجع تنام لحد الظهر.. وبعدين تصحى تدخل الحمام تعقد لك ساعتين وبعدين تخرج منو.. وتعقد تزعق وتعيش لى في دور سى السيد.. اجى اتكلم معاك تقفش عليا وتقولى دى عيشة تطهق.. وبعد شوية تيجى تصالحنى وتقولى معليش يا بيبى دا الشيطان). غايتو يا ناس المريخ الما قدر يعملو فيك اعلام الهلال ..عمل فيكم الحضري. الحضري دا تب ما قصر معانا. المشكلة ناس المريخ بعد دا عاوزين يرجعوا (الحضري). بفتشوا ليهم (محلل). لو الحضري رجع (بختنا)..سيرة وانفتحت. رجعوا وخلوا الباقي علينا. و... (برضو ها تخرج تتسرمح ما ترجعليش الا وش الفجر.. وبعدين ترجع تنام لحد الظهر.. وبعدين تصحى تدخل الحمام تعقد لك ساعتين وبعدين تخرج منو.. وتعقد تزعق وتعيش لى في دور سى السيد.. اجى اتكلم معاك تقفش عليا وتقولى دى عيشة تطهق.. وبعد شوية تيجى تصالحنى وتقولى معليش يا بيبى دا الشيطان). ملحوظة : انت شنو خليت عباس واخوانه التسعتاشر ومسكت لينا في الحضري ..لا فهمنا حاجة في عباس لا شفنا واحد من اخوانه التسعتاشر. هوامش انتوا صدقتوا. عباس دا للتمويه. اما اخوانه التسعتاشر فهذه قصة تانية. سوف نعود لها لاحقا ان شاءالله. الحمدلله تمارين الهلال هنا عاملة ضجة كبرى ...حركة ونشاط ..وموسم سوف يكون ان شاءالله كل بطولاته للهلال. البداية الصاح ...اهم من أي حاجة تانية. غارزيتو شغال مية المية. اخبار يكاردو شنو في كينيا. ريكاردو ما في زول جايب خبرو. غارزيتو طفاهو تماما. ناس المريخ ذاتهم خلوا ريكاردو حقهم ...وقبلوا على غارزيتو. قلنا ليكم الفرنسي الايطالي دا خطير. قعدتوا تغالطوا. السنة كلها تغالطوا ..زي (قشر البطيخ). قشر البطيخ هسه الدخلو شنو؟. اقول ليكم حاجة اخطر من كدا. ناس المريخ بدأوا اتصالاتهم ب (ميشو). الناس ديل يمشوا ويجوا ويبقوا على (ميشو). الليلة ريال مدريد وبرشلونة. هلالابي قاطع ..قالوا ليهو كدا. قال ليهم والله انا مباراة ما يكون فيها (مهند الطاهر) ما بشوف ليها أي طعم. انت كمان ما تبالغ. اتخيلوا موسي الزومة الليلة لاعب مع (الريال). والله مع ناس ميسي ديل من اول 3 دقايق يطلب الغيار. من اول 3 دقايق يرفع ايدو. بعدين تعال هنا ..موسي الزومة يلعب في الريال!!. مالك عاوز تقوم علينا (المصران). موسي في الريال..زي العرس الجنبو بكا. حاجة ما بتحصل. شيء شترة عديل كدا. بعدين موسي الزومة دا مورنيهو (مشجع) ما بقبل بيهو. في المدرجات ما بقعدو. كمان ناس الريال بيلعبوا. قومت علينا (الضرس) بي كلامك دا يا ود الناس. و... (برضو ها تخرج تتسرمح ما ترجعليش الا وش الفجر.. وبعدين ترجع تنام لحد الظهر.. وبعدين تصحى تدخل الحمام تعقد لك ساعتين وبعدين تخرج منو.. وتعقد تزعق وتعيش لى في دور سى السيد.. اجى اتكلم معاك تقفش عليا وتقولى دى عيشة تطهق.. وبعد شوية تيجى تصالحنى وتقولى معليش يا بيبى دا الشيطان). نشوف الكورة ونرجع ليكم. عاجل: بس ان شاءالله قناة الجزيرة ما تقول لينا المباراة منقولة في قناة الجزيرة الحادية عشرة.
