في داعي في التوقيت الرهيب دا ...مازمبي يغلب ستة. في داعي للتلتلة دي. البلد في ظروف صعبة. والنفط وقف. ومظلة المريخ لسه (معلقة). في الظروف الحرجة دي مازمبي غلب ستة. نحن ساكت كنا شايلنها على نجم الدين عبدالله. نجم الدين عبدالله زي ما قلت ليكم امس طلع اعقل لاعب في المريخ. طلع واعي عديل. نحن شايلنها في الاستفزاز ..وردة الفعل. الموضوع اكبر من كدا. نجم الدين طلع اعقل من ادارة نادي المريخ. اتخارج من بدري من مباراة المريخ ومازمبي. ونحن نشيل ونهاجم في اللاعب السودانى. طلعت (مفكر) عديل يا نجم الدين. طلعت عبقري. عرفتها. بونيتك دي ممكن تلعبك في الدوري الانجليزي. بونية (خبرة). انتوا كمان كونوا منطقيين ....مدافع منو الفى المريخ البثبت لي (مابي مبوتو). مابي مبوتو دا في ميدان ما بتلاقى ...كورة ما بتصاقع. مابي مبوتو دا ما بتلاقى إلا في (نيفاشا). يعني احسن ليكم تمشوا تفاوضوه. امشوا بيه (نيفاشا)...قبل ما يجيكم في ام درمان. اقعدوا معاه. ناس اكرم الهادي سليم ما بنستروا ليكم قدام الجماعة ديل. اكرم المباراة كلها يرجف تقول في (كورس) شوايقة. (الحزن لو دام ما بطول ..الدنيا حلوة ..حلوة الننسي الهموم). غايتو يا نجم الدين طلع عندك قراءة فنية ...عند مدربك ما في. طلع عندك بُعد نظر. والله باسكال لو كان عارف مازمبي بغلب (باور ديناموز زامبيا) ستة..كان هو ذاتو شاف ليه (كرت احمر) اتخارج بيه. باسكال كان زي ريكاردو عنده امل. عنده امل (باور ديناموز) يغلب مازمبي ويعمل مفاجأة. باعتبار ان الكورة مجنونة. باسكال لو كان بعرف دا بحصل كان ضرب ليه لاعب (بونية). لكن نجم الدين برضو في مشكلة. بونية نجم الدين ..طلعتو من (مازمبي). نجم الدين هسه البطلعو من (سادومبا) شنو؟. نجم الدين لو كان عارف الجهجهة دي ...كان في مباراة المريخ والخرطوم الوطنى كان ضرب ليه لاعب من الخرطوم. الحاجة الخلتنا نتأسف ...ما بونية نجم الدين. ولا كوريك باسكال. الحاجة الوجعتنا ..تسخينة (العجب). انا اول مرة اشوف لي لاعب يسخن ...ويدخلو لاعب تاني. سخن العجب ..ودخلوا (ضفر). دي ما سمعنا بيها إلا في المريخ. انتوا وقت عندكم (حول) بالشكل دا ...ليه بتحرجوا (العجب). التسخينة دي كان ممكن يقوم بيها أي لاعب تاني. يعني مثلا كان ممكن يسخن (يس) ويدخل (ضفر). العجب كبير على الحركات دي. والله بختك يا (ضفر). التسخينة بقوا يسخونها ليك. ويا ريت كمان لو كان بسخن ليك لاعب ساكت. يا ضفر بسخن ليك (العجب). انت بس تلعب طوالى. التسخينة كمان (ضفر) بعمل بيها شنو؟. لكن في رواية تانية. قالوا الجهاز الفني للمريخ بقيادة المدير الفني البرازيلي ريكاردو اكتشف ان فيصل العجب بعد (التسخينة) لياقتو قطعت. العجب كب لياقتو كلها في التسخينة. وقت جو عشان يدخلوها ...لقوها بالماينص. عشان كدا ريكاردو اتلفت على (ضفر) وقال ليه قوم ادخل. غايتو في المريخ دا في حاجات غريبة بتحصل. لكن بعد (الستة) دي بنعذركم. ما بنقول ليكم حاجة. قالوا ليك ريكاردو بعد ما عرف مازمبي غالب ستة ......طالب بمعسكر في امريكا اللاتينية. قالوا ليه اشمعنا امريكا اللاتينية ...قال عشان حاجز اللغة. والله يا ريكاردو ناس بلة جابر ديل في أي دولة من دول امريكا اللاتينية شاي اللبن من البيبسي ما بفرزو ليك. العصيدة من (الفراخ المشوي) ما بعرفوها. احسن تقوم بيهم قبلك. الشيء الغريب في حاجات اغرب من الحاجات دي حصلت. قالوا ليك ابراهومة طالب بمعسكر (داخلي) في (اديس ابابا). في واحد من مجلس المريخ قال لي ابراهومة انت ما تحرجنا ...(اديس ابابا) دي معسكر (خارجي)...ما معسكر (داخلي). ابراهومة قال لي عضو المجلس والله نحن مع (ستة) مازمبي دي بقينا ما عارفين أي حاجة. ما عارفين الخارجي من الداخلي. لكن بيني وبينكم مع المفاوضات الكتيرة دي بقينا ما عارفين ان كانت اديس ابابا داخلية وإلا خارجية. وفد الحكومة بقى اليوم والتاني في (اديس ابابا). اديس بقت لينا زي (شندي). في واحد تاني عامل فيها (مشلق). قال لي الزول المعاه اسمع الساعة كم؟. الزول قال ليه الساعة ستة. صاحبنا قال ليه ستة مساء وإلا صباح. صاحبكم رد عليه وقال ليه ستة مازمبي. كمان في زول ما بعرف ستة صباح من ستة مساء. في امريكا قالوا ليك ستة مساء ...من ستة صباح ما بتنفرز. الوقت في امريكا كلو واحد. الصباح من المساء ما بتعرف. مريخابي تاني. دخلوه الانعاش. الدكتور عرفو ليك (خايف)...قال ليه اسمع اديك (بنج)..وإلا اقول ليك مازمبي غلب ستة. المريخابي سمع ليك (ستة) دي دخل ليك في غيبوبة. الدكتور دخل ليك في العملية. غايتو بعد ستة مازمبي دي البلد دي حصلت فيها جنس لخبطة. عندنا زول ...صعب. النوع البمشي لبتاع البطيخ ويعزل ليه اكبر بطيخة ..ويقول ليه اسمع افتح لي البطيخة دي. الزول الصعب دا ...الساعة تلاتة صباح ...باب الحوش ضرب. الزول اتلملم ومشى يفتح الباب. فتح الباب لقى ليك اللوري معنقلين فيه 17 خواجة. الزول صنقع عاين للخواجات ...قال ليهم ان شاءالله خير ..مالكم جايني في الوقت دا وفي لوري كمان. ان شاءالله خير. واحد من الخواجة عاين ليه كدا وقال ليه : عليك الله ان كان خير ...كنا بنجيك في وقت دا. وكمان في (لوري). الزول قال ليه : في شنو؟. الخواجة قال ليه : مازمبي غلب ستة. الزول جاء واقع. خبر مازمبي ...الخواجة عارفو. قلت ليكم البلد دي بتحصل فيها حاجات شنو؟. عندنا واحد تاني خالص. الزول دا صحى الصباح ...عاين لي شجرة النيمة كدا ...قام قطعها. في واحد قال ليه : انتوا يعملها فيكم مازمبي ..وتجوا تعملوها في (النيم). فلاحتكم بس في (النيم). والله بعد (الستة) دي مفروض ما تخلوا ليكم (نيمة). تقطعوا (النيم). وتكرموا نجم الدين. نجم الدين عرفناه. النيم هسه ذنبو شنو؟. ملحوظة : كان بقت على نجم الدين هينة ...قالوا ليك (مقصورة استاد المريخ) من سمعت بي ستة مازمبي قعدت تشكي من الاعمدة الخرصانية. هوامش لو عندكم تكريم لي جمال الوالي. كرموه الان. كرموه قبل مباراة مازمبي. عشان بعد المباراة دي ما اظن في زول بكرمو تاني. هيثم كابو بعد ما عرف بي نتيجة مازمبي وسداسيته النارية ...قالوا ليك كان عاوز ينتقد انصاف مدنى ...قام بدون ما يشعر انتقد ندي القلعة. يا كابو احسن تحتجب من الان. عشان ما بتبقى ظاهرة. السنة كلها تتفاصح. عاوزين نعرف الفصاحة دي حدها وين؟. مزمل ابوالقاسم قالوا نصح مجلس المريخ بتقديم شكوى في (الفاكس) بتاع مازمبي. قال الفاكس ما شغال. اما عبدالقادر همد فقد اوقف (رش) النجيلة من الان. قال ما تسقوها. قال النجيلة دي تاني ما تشوف ليها (نقطة موية). ناس مازمبي ديل عاوزين ليهم سبب. فيصل العجب قالوا قام سخن. بعد ما عرف ان المريخ سوف يواجه مازمبي ...رجع قعد تاني. بابكر سلك ..قالوا ثبت بنتو (اسلام)...قال ليها تاني اوعك تجيبي سيرة الكورة. لو عاوزة ليك موضوع ...اتكلمى عن (المقصورة). لكن تاني أي كلام في الكورة ما عاوز اسمعو منك. يا سلك (اسلام) ذنبها شنو؟. معاوية الجاك قال الحمدلله الواحد عرس قبل (مازمبي). احمد محمد احمد قعد مع كم كوتش كدا لمراقبة اندية الكونفدرالية ..وتقييم مستوياتها الفنية. فريق الاهلي شندي ..استطاع الانتصار في شندي بهدفي نادر الطيب ..رغم تجاهل الفضائيات له. الامل تأهل بالتعادل. مستوى الامل رغم التأهل لم يكن جيدا. لكن الحمدلله مازال عندنا اربعة اندية في البطولات الافريقية. الهلال سوف يواجه الشلفالجزائري ...وهى مواجهة لن تكون ساهلة. لكن بالتأكيد لن ترقي الي (مازمبي). لكن اذا تعامل الهلال مع هذه المباراة باستهتار وتساهل سوف يخرج. لا سيما وان مباراة الاياب في الجزائر. قناة الشروق قدمت جهدا مشكورة عليه لتلفزة مباريات الاندية السودانية باستثناء الاهلي شندي. الاهلي المصري لم يجد مشقة في الانتصار على البن الاثيوبي. وكان مستوى الاهلي المصري فاترا. الزمالك تأهل بعد ان اوشك على الخروج. رغم اهداف مازمبي الستة..إلا ان هجوم الهلال يعتبر اقوى هجوم افريقي في هذه المرحلة. الهلال سجل في الدبلوماسي (8) اهداف ..وهذا اكبر معدل اهداف سجل في دور ال (32). ليس في بطولة الاندية الافريقية فقط. بل حتى بالنسبة للبطولة الكونفدرالية. الهلال عليه ان يستعد للمرحلة المقبلة بالكثير من الجد والجهد. مباراة الخميس تشكل دافعا معنويا كبيرا للهلال في حالة الانتصار ان شاء الله. لذلك من الضرورة ان يحسم الهلال مباراة الخميس وان ينتصر فيها ..حتى يكون متصدرا للممتاز بفارق 4 نقاط. اعتقد ان اسوأ مركز في المريخ ...هو مركز حراسة المرمى. امام مهند الطاهر وفلانتاين فرصة تاريخية للتهديف من كل الاتجاهات ..ومن كل المسافات. مهند الطاهر وفلانتاين من الخلف ..وفي المقدمة كاريكا وسادومبا واتوبونج. اتمنى مشاركة اتوبونج في مباراة القمة. افضل حاجة في غارزيتو كما قلت بالامس ...هو اجادته لقراءة الخصم. وافتكر ان غارزيتو قرأ المريخ جيدا. بل ان غارزيتو حفظ المريخ حفظ. الباقي على ناس نزار حماد. الشيء الذي يسعد الهلالاب ويعطيهم دافعا اكبر على الانتصار على المريخ ..ان مباراة القمة سوف تلعب في استاد الهلال. وناس المريخ عارفين (المقبرة) كويس. عاجل : نجم الدين قالوا عمل ليه حفلة شاي بمناسبة المخارجة
