لا ادرى لماذا يغضب المريخاب عندما يقول لهم الحضري اني قررت الرحيل وما بقعد ليكم؟. بالمناسبة في بداية التمانينات قدم الفنان محمد وردي اغنية (قلت ارحل) التي كتب كلماتها الشاعر (التجاني سعيد) الذي لم يكتب غنائيا غير (قلت ارحل) واغنية (من غير ميعاد) التي كتبها وهو في (الثانوي العالي). قلت ارحل لحنها وردي في سجن كوبر وهو (معتقل)...وقام بتلحينها بدون آلة موسيقية ..وضع لحنها بفمها. نرجع لهروب الحضري ..ورحيله. ما جديدة على الحضري (الهربنة) دي. عملها في الاهلي. وعملها في سيون. وعملها في الاسماعيلي. وعملها في الزمالك. ما عاوزينو يعملها في المريخ. فريق بدون طموح. وما فيهو (انضباط) ...وكل البطولات التي يشارك فيها يخرج منها (مبكرا). ما عارف بزعلوا ليه؟. الموضوع عادي بالنسبة لينا. متوقعنو. كل يوم كنا بنقول ليكم في الكلام دا. الجديد في الموضوع دا شنو؟. دي طبيعة الحضري...ومن خلى عادتو قلت سعادتو. الزول دا اصلو كدا. مدربه في الاهلي المصري البرتغالي جوزيه قال عنه ... الحضري ممكن يبيع (ابوه) في سبيل مصلحتو. القرش او الدولار بخلى يعمل أي حاجة. أي شيء. انتوا يا جمال الوالي الزول دا جايبنو بعد (مشكلة) مع الزمالك. وانتوا براكم الحليتو ليهو مشكلتو. دفعتوا ليهو (الغرامة). وجبتوا ليهو التورتة. بقت عليكم (تورتة ودفع غرامة). يعني (ميتة وخراب ديار). افتكرتوا الموضوع انتهى. اها العملوا الحضري في الفرق التي لعب فيها الحضري ...عاد الحضري وطبق النظرية فيكم. اتلدغوا من نفس الحجر. بالمناسبة اورع ثنائيات الفنان محمد الامين والاستاذ فضل الله محمد اغنية (الحب والظروف) المعروفة ب (قلنا ما ممكن تسافر). حكى مرة الفنان الراحل ابراهيم عوض وقال مرة نزل من البص وشال شنطتو ورجع البيت لأنه سمع في البص محمد الامين يغني (قلنا ما ممكن تسافر). نرجع للحضري. الحضري قال الجو (مسخن)..واللاعبين ما عندهم (طموح). هسه في علاقة بين السخانة والطموح. المشكلة يا حضري ما في اللاعبين الما عندهم (طموح). المشكلة مع عدم طموحهم دا ...كانوا بجيبوا في الحضري اهداف (عكسية). يا ريت لو بقت على عدم الطموح. لا طموح ...واهداف عكسية كمان. ناس موسي الزومة ديل طموحهم في الدنيا دي كلها (اسكراتش) بي عشرة. بلة جابر طموحي (مطبخي). فرخة..جاتو...كنافة. سمك. حاجة بالشكل دا. ناس الشغيل ديل ما عاوزين اكتر من يغلبوا الهلال كل عشر سنوات. دا طموحهم. بعدين الحضري من سولي شريف قطع ليهو (جلابية) ..عرفتو ما بقعد. نفسو مرقت. البقعدو شنو مع ناس سعيد السعودي. ديل ناس ما مضمونين. ممكن يقلبوا عليك في أي لحظة. حارسهم ..من حارس الفريق التاني ما بعرفو. كلهم عندهم واحد. قالوا ليك سعيد السعودي وقت جاب القون في الحضري ..قالوا ليك سعيد السعودي جرى على (الكنبة). فاكر نفسو جاب قون للمريخ. السعودي جاري على الكنبة ...ثبتو الشغيل قال ليهو القون الجبتو دا انت جبتو في المريخ. السعودي رجع. ما عرف يعمل شنو؟. يتصرف كيف؟. الحضري قال اسرتو ما بتقدر تعيش في السودان. بالمناسبة غني الفنان الشعبي محمد احمد عوض للمسافر وقال (تسافر كيف تخلينا)..وغني الفنان الراحل سيد خليفة (يا مسافر وناسي هواك ..اروحنا وقلوبنا معاك)، وغني صلاح بن البادية (يا مسارفين). ومن كلمات عثمان خالد غني حمد الريح (الي مسافرة)...(حليلو قال ناوي السفر). نرجع للحضري. هل عندما وقع الحضري العقد مع المريخ كان يفتكرانو ح يلعب في الدوري الاسباني؟. في زول منكم يا مريخاب وصل ليهو (معلومة) غلط. لو ما بتعرف (عربي) كنا قلنا ناس (البصمة) ديل خدعوك يا حضري. خدعوك وجرحوا سمعتك ..(وخلوك تشارك في سيكافا). غشوك. قالوا ليك ح تلعب في الدوري الايطالي. يمكن ..ناس توفيق ديل ما في حاجة بعيدة منهم. بعدين انتوا ما كلموكم. (الكتاحة) ما بتنفع مع (الحضري). بتعمل ليهو (ضيق). بتقوم عليهو (النفس). اكيد انتوا ما عارفين المعلومة دي. واحتمال الحضري في العقد يكون وضع (شرط). في حالة وقوع أي (كتاحة) من حق الحضري ان يفسخ العقد. انا بقول الكلام دا ...عشان شايف الحضري عينو قوية. شايفو بعد (الكتاحة) الاخيرة بقي يتكلم بثقة. يكون في (ثغرة). كل الحاجات دي بتدعم هروب الحضري. والحضري اصلا هو حارس (هارب). طبعو كدا. زول (هرب) من الاهلي المصري ..(فريق القرن)..عاوزنو ما يهرب من (ثالث) سيكافا. لو في أي لاعب في المريخ عندو (كرامة) بعد النتائج الاخيرة دي مفروض ما يقعد ليكم ..مفروض يهرب منكم يا مريخاب. خروج من دور ال (32) في بطولة الاندية الافريقية. احرزوا المركز الثالث في بطولة سيكافا مع 3 اهداف عكسية. عليكم الله (النتائج) دي ما بتخلى (الحضري) يهرب. حضري شنو؟. موسي الزومة بعد (النتائج) دي تحديدا مفروض يفكر في (الهروب). هسه موسي الزومة ذنبو شنو؟. بلة جابر طبعا طول ما (البوفيه المفتوح) فاتح ما بهرب. بس (رقدوا) ليهو (سلطة الفواكه). تورتتكم ما اقنعت (الحضري). الحضري سافر. قال ما بعقد. ما اشتغل بي كلام جمال الوالي. حارس بتفاوض ..ويشوف العروض براهو وبحدد العرض بالتناسب معاهو. تورتتكم راحت ساكت يا ابوجريشة. الحضري (لغي) المريخ نهائي ...كأنو ما بيلعب فيه ..كأنو ما مسجل. قالوا ليك الحضري (شال) شنطتو وطلع ..زي الما حصل حاجة. تعالوا نفتح تحقيق في (هروب) الحضري. نحن طبعا ما عندنا حاجة ساكت. زي دا ما بنفوتها. طوالي بنفتح فيها (تحقيق). كيف كان يفكر الحضري؟. الحضري بعد ما لقي زول دفع ليهو (الغرامة) بقي يتصرف تصرفات غريبة. تصرفات غريبة كيف يعني؟. يعني مرات بكون واقف في (الشباك) وبحاول يقفز من (الطابق الرابع). يا زول انت ما تبالغ. الحضري دا عمرو 40 سنة. يعني لو وقع من (مرتبة) بتكسر...تقول لي (يقفز) من الطابق الرابع. دي الحضري ما بعملها. عشان كدا شيل لي النقطة دي من (التحقيق). طيب الحضري اخر حاجة قالها شنو؟. قال : ناس المريخ ما عندهم (طموح). وانت يا الحضري (الطموح) بعد الاربعين عاوز تعمل بيهو شنو؟. اوعى تكون بتفكر تلعب في (الدوري الانجليزي). لو دا طموحك ...طموحك دا اخير منو (تواضع) موسي الزومة. اها اواصل التحقيق في هروب الحضري ..وإلا نقفل الملف على كدا. يا جنابو في حاجة صغيرة. زي شنو؟. زي كلام الحضري القالو وقت سعيد السعودي جاب فيهو قون. انتوا عارفين الحضري قال شنو؟. ما عارفين لكن من طريقة كلامو كدا ..الحضري دا قال : يعني انتوا (التورتة) الجبتوها لي عاوزين تذلوني بيها العمر كلو. سعيد السعودي تفتكر قال ليهو شنو؟. سعيد السعودي قال ليهو : على حسب تحريك (الشفاه) هي كان بقت على (التورتة) ما مشكلة ..نسيت (الغرامة) يا الحضري. يا سعيد السعودي انتوا (الغرامة) دافعنها للحضري من جيبكم. الغرامة دي دافعنها من سيخ الولاية. يعني ما في حاجة نقصوها منكم. طبعا سفاري ..عامل فيها مصاب. عارفين ليه؟. عشان عندو احساس انو مجلس المريخ وقف مرتبه 5 شهور ..عشان يدفع (غرامة) الحضري. لكن الكلام دا كان الموسم الفات. فعلا كان الموسم الفات ...ناس المريخ بلقطوا في (غرامة) الحضري قبل 3 مواسم. انتوا ما عارفين حاجة ساكت. نواصل التحقيق. في زول شاف الحضري في اليوم الاخير. ما في زول شافو. لا ابدا...في ناس شافوه في النادي الالماني مع جمال الوالي. جمال الوالي طلع زعلان من النادي الالماني ...والحضري حاول يلحقو في باب العربية. لكن جمال الوالي قفل الباب ودور العربية وطلع. الحضري بعد (الزعلة) دي جاء وسافر. ما اشتغل بالموضوع. كأنو جمال الوالي دا رئيس نادي تاني. لكن يا حضري عاوز اقول ليك حاجة. تهرب نحن (الهلالاب) ما عندنا معاك قضية ...رغم انو الموضوع دا بزعل (اتوقووون). تمشي بي طريقتك. تفوت بالغرامة. ما عندنا قضية. الحاجات دي كلها ممكن نسامحك فيها. الشيء الوحيدة الما بنقدر نسامحك فيها..(التورتة). رجع لينا (تورتتنا) والله يسهل عليك وعلينا. ملحوظة : يعني بقت على (التورتة). هوامش لو دي كورتكم يا مريخاب ...الحضري ليهو حق يهرب. فريق ما عندو أي طموح. سيكافا دي انتوا كنتوا بتتفرجوا فيها. والله كورتكم دي اخير منها تعادلنا مع (النيل الحصاحيصا). في حاجة غلط. في حاجة غلط في (البوفيه المفتوح). هلال الساحل رغم انه ما قدم أي كورة إلا انه احرج المريخ. لو لعب هلال الساحل (كورة) كان يمكن ان ينتصر على المريخ. بختكم يا ناس شندي. في صيدة ماشي عليكم. يا البدري فريقكم دا ما تجازف بيهو في (شندي). اهرب. الحق الحضري يا بدري. الحضري قالوا من اسباب هروبه (الاهداف العكسية). انتوا يا مريخاب جبتوا عشان يلعب ضد 10 لاعبين. قام لقوا نفسو بيلعب ضد 20 لاعبا. هو فاضي ليكم. بعدين هو بي عمرو دا خمسة ما بقدر يلعب ضدهم. المريخ بقي زي الاهلي. الاتنين الحضري هرب منهم. سوف يقول الحضري ان اسوأ فترة في حياته هي فترته في المريخ. بوفيكم المفتوح طلع (طارد). الكلام عن سوء استضافة فريق انيمبا للهلال. وعن الحرب النفسية. وعن ما يمكن ان يتعرض له الهلال في نيجيريا ...امر مرفوض وهو (تعليل) مبكر للخسارة. نحن عاوزين ناس الهلال ينتصروا لينا في كل الظروف. حتي لو كانت الاستضافة في منتهى السوء. مفروض الهلال يتغلب على مثل هذه الامور. ما عاوزين عذر. الحاجات دي نحن متعودين عليها في (نيجيريا). ما في حاجة جديدة. خبرة الهلال يجب ان تكون قادرة على التعامل مع مثل هذه الامور. اغرب حاجة في حسام البدري. كان غير مقتنع بي بلة جابر. اصبح بلة جابر عنده لاعب اساسي. كان مقتنع بي هنو. هنو اصبح وين؟. سعيد السعودي اعاده البدري كابتنا بعد ان لم يشركه في أي مباراة في الدورة الثانية. ابعد البدري (كلتشي) وكان من قبل مقتنع به. البدري ما عندة حاجة ثابتة. البقولوا ليهو بعملو. ما بثبت ليهو على رأي. من الافضل ان يستبدل الحضري المريخ بالزمالك. شينة في حقكم لو استبدل الحضري المريخ بمصر المقاصة. الحضري قال اقعد في البيت احسن لي من اللعب في المريخ. تاني البجيب ليك (تورتة) منو تاني في عيد ميلادك. البدفع ليك (الغرامة) منو لو لخبطت يا الحضري. في واحد قال لي الحضري لو هرب من المريخ. والاتحاد الدولى لكرة القدم فرض غرامة على الحضري. عارفين البدفع (الغرامة) منو؟. جمال الوالي. برضو بدفعها جمال الوالي. جمال الوالي بدفع ما عندو (مشكلة). هلال الساحل فاقد اربع من ركائزه مع منتخب الشباب. وفاقد مدربه. مع ذلك لعب ضد المريخ. فريق يفقد مدربه ويفقد اغلب عناصره ويجهجه المريخ كدا. انتوا في (شندي) بتعملوا شنو؟. قالوا ليك ناس شندي بين الشوطين عندهم (جلد). جلد عديل كدا. ناس شندي ديل اسألوني منهم. ما عندهم حفلة بدون جلد. المباراة ذاتها ما بفوتها ساكت. لو دا فريقكم ..حاولوا شوفو ليكم مخرج من بدري. ما تمشوا شندي بي حالتكم دي. ميشو تصريحاته اصبحت اكتر من (تمارينه). حالتو دي مجلس ادارة نادي الهلال مثبتو من التصريحات. وميشو برضو يصرح. مفروض ميشو في نيجيريا يبدأ بي توريه واتوقووون. بداية اتوقووون مهمة. في نيجيريا اتوقووون ممكن يحسم المباراة. الاهلي والرجاء في مصر اقرب لأن تنتهى تعادلية. خاصة وفريق الاهلي يلعب بدون جمهور. كل ما اشوف محمد كمال ..اقول المريخ ليهو حق يدفع (غرامة) الحضري. وكل ما يفك محمد كمال الكورة ..اقول الحضري يستاهل (التورتة) الجابوها ليهو. عاجل : الحضري بدل (الشريحة) اضربوا ليهو عند (شحاتة).
