المريخاب بفتكروا ان الهلالاب بعملوا على ارهابهم بهجوم الهلال الناري...(نحن هجومنا دا ما جبناه من بيتنا). الزعل في شنو؟. روقة أي حاجة بالتفاهم احسن. هجوم فيه سادومبا وكاريكا وسانيه ..البقعد ناس نجم الدين شنو؟ وهم على موعد مع (الكشة) يوم الوقفة. قبل اعوام كان هجوم الهلال يتميز بقوة شهدتها افريقيا كلها ..وتوجع منه المريخ كثيرا. والناس تذكر هجوم الهلال عندما كان فيه هيثم طمبل وقودوين وكلتشي.(من الامس). المريخاب حاولوا بكل ما ملكوا من قوة ومال (فرتيك) هذا الهجوم ..ونجحوا في ذلك تعاقدوا مع كلتشي وهو في الهلال ...وسفرّوا طمبل الي جنوب افريقيا وابعدوا قودوين. وقتها كان المريخاب ايضا بنكروا قوة هجوم الهلال رغم من ان أي لقاء جمع بين الهلال والمريخ استطاع هجوم الهلال ان يصل لشباك المريخ. ناس المريخ ما ارتاحوا إلا بعد ان تم (فرتيك) هذا الهجوم. الان المريخاب بنكروا على الهلال قوة هجومه ..بالرغم من ان افريقيا كلها بتتحدث عن هجوم الهلال. موقع الكاف ...والصحف السنغالية والمواقع العالمية كلها شهدت بقوة هجوم الهلال. وهنا في السودان ..قال مدرب اهلي شندي التونسي الكوكي ان اندية الكونفدرالية كلها لن تصمد امام هجوم الهلال. دا الكوكي قال كدا ..ما عبدالمعز جبارة صبحي. وشهد بقوة هجوم الهلال مدرب الرابطة المصري محمود عزالدين الذي اخذ (5) نقاط من المريخ ..من داخل القلعة الحمراء ومن خارجها. محمود عزالدين قال من الصعب بل من المستحيل ايقاف هجوم الهلال. واظن ان أي زول في الدنيا دي عارف ان الهلال يتمتع بهجوم مثالي فيه كل صفات القوة والسرعة والخبرة والتنوع. ويمكن ان يشهد بذلك بلة جابر. سمعت حوار اذاعي للزميل معاوية الجاك ...يؤكد فيه ان هجوم المريخ اقوى من الهلال بدليل تقدم هجوم المريخ على هجوم الهلال في الدوري الممتاز. بالله. يا معاوية انت الكلام البتقول فيه دا مصدقو. معاوية قال هجوم المريخ يتفوق على هجوم الهلال في الممتاز. دي معلومة قديمة لمعاوية الجاك ...لأن هجوم الهلال الان يتساوي مع هجوم المريخ في الدوري الممتاز. كان هجوم المريخ يتقدم على هجوم الهلال قبل (سانيه)...الذي لعب مع الهلال 4 مباريات فقط في الممتاز وسجل (7) اهداف. واكيد عندما ينتهي الدوري هذا العام ...على الاقل هجوم الهلال ح يكون متقدم على هجوم المريخ ب (10) اهداف. بعد سانيه الحساب بختلف. الحساب بقى بي ال (سانيه). نذكر ان مهاجم المريخ ساكواها من شربوه بالمشاركة مع منتخب بلاده في نهائيات الامم الافريقية ما سجل. ساكوها في 7 مباريات لم يسجل. دا مهاجم ..ولا مستثمر عربي. ساكواها دا فاضل يلبس ليه (عقال). بقى قاعد ساكت. اما كلتشي على ما يبدو ان ريكاردو قنع منو ...فقد اصبح لا يشارك بصورة رسمية. اديكو ..يلعب مباراة ويغيب 3 مباريات بسبب الاصابة. هذا هو هجوم المريخ ...(سوداني) واحد ما فيه ...هجوم كله (مجنس) عشان كدا بيلعب بدون غيرة وبدون حماس. لذلك فان هجوم المريخ في تراجع مستمر. اعود واقول ان اعلام الهلال يلعبها اليوم بذكاء يحسد عليه. اعلام الهلال في هذه الايامات (المباركة) شغال ارهاب في المريخ ...حتى اني اصبحت عندما اجد مريخابي في الشارع بشعر بي رجفتو...(المريخاب بقوا يدسوا زي ساعة الجيب). المريخاب هذه الايام برجفوا زي الزول المنتظرين منو الخمسين. اعلام الهلال ارهب المريخ ب (سانيه)...وخلى ليك الاعلام كله يركز مع هذا اللاعب. وحقيقة الامر ان الهلالاب عاوزين يشغلوا المريخاب ب (سانيه)...لأن حسم مباراة القمة سوف تكون باقدام اخرى. سانيه دا عاوزين نشغل بيه ناس نجم الدين ساكت. وانا اقول قولي هذا ..واحلل موقف اعلام الهلال ..عشان الضغط اصبح عالي على سانيه. المريخاب ركزوا مع سانيه اكتر من اللازم. حتى اني لا استبعد ان تتم اصابة سانيه في اول عشرة دقايق من عمر المباراة مثلما فعل المريخاب مع الراحل والي الدين الذي اصابوه في بداية المباراة ..فخرج وحل بديلا له خالد بخيت فسجل هدفين في شباك المريخ فى تلك المباراة. اذن فان الانتصار في مباراة يوم الوقفة للهلال سوف يكون عبر لاعبين اخرين سوف يجدوا الفرص والمساحة في ظل انشغال المريخاب ب (سانيه). يقال ان حمى الودي (المتسنن) ...اصابة المريخاب ...تلك الحمى تصاب الجهاز العصبي ..وتخلى ليك المريخابي بدون ما يشعر يطلع عمود الكهرباء وينزل. وقت يقولوا ليه في شنو يا ود الناس ...يقول ليك شفت (البرق) دي كيف الليلة؟. في مرض تاني جابو سانيه للمريخاب. عارفين المرض دا اسمو شنو؟. المرض اسمو (الكمتونة). الكمتونة دي اقول ليكم شنو؟. اشرحها ليكم كيف؟. الكمتونة دي ...يعنى تمشي تفتح التلاجة ....بدون سبب وترجع تقعد تاني. تطلع تهبش (الطبق)..وتنزل ..بدون سبب كدا يتخيل ليك انو (الطبق) دا ما موزون ..رغم ان القنوات كلها شغالة. قلق بس ..نقول شنو؟. تطلع التلفون ...من غير مبرر تمسكل لي عمك في الجزيرة ...ترجع تقفل التلفون ..عشان عمك ما يرجع ليك. ما عارف تعمل شنو؟. تحاول تنوم.. ما تقدر ..تقوم تشكي من (الضهر). ساكت كدا ..رغم انك ما عندك أي ألم في الضهر. لكن قلبك بقول ليك انك عندك وجع ضهر. سانيه بعمل اكتر من كدا. اذا كان عندك هذه الاعراض ..فانت عزيزي المريخاب عندك مرض اسمو (الكمتونة). الكمتونة دي بتعادل وجع 7 اضراس ....و4 حالات اصابة بالحصوة. نحن ننصحك لو كان عندك هذا المرض ان تلملم تشوف ليك ملايا قديمة وترمسة شاي ومرافق تمشي المستشفى. حالتك دي اوقعى تقعد بيها. حالتك دي خطرة. ممكن تروح فيها. امشي للدكتور ...بقول ليك اول حاجة اعمل لي (حلبة). انت بتقول ليه شنو؟. بقول ليك اعمل لي (حلبة)...الحلبة دي حاجة جديدة في الطب ...بتعادل الموجات الصوتية ...لكن الحلبة اسرع واضمن!. انتي بتمشي تعمل الحلبة وترجع للدكتور. الدكتور بشرب الحلبة ..وبقول ليك جيب لي صورة من المرتب. يا دكتور صورة من المرتب ليه ؟...انا عاوز لي سلفية ..وإلا عاوز اشيل لي تلاجة بالاقساط. الدكتور بقول ليك ما عاوز كلام كتير ..دا شغلنا ..ونحن عارفين بنعمل في شنو؟..ما في داعي للمساخة ..نحن الطب دا قرينا 6 سنوات (سنة تنطح سنة) ...انت عارف عندك شنو؟...انت عندك مرض خطير...الكلام البقولوا ليك تنفذو بالحرف. تمشي تجيب صورة للمرتب ...الدكتور بشيل الصورة ويقطعها ويرميها في سلة المهملات ..وبقول ليك اعمل لي صورة تانية. تعمل الصورة ...بقول ليك تلفونك زين وإلا سوداني؟. بتقول ليه علاقة تلفوني بي مرضي شنو؟. الدكتور بقول ليك دي حاجة بنعرفها نحن. يا دكتور انا مرضي خطير للدرجة دي. مرضك خطير شديد ...لو عندك قطعة ارض بيعها. لو عندك وصية اكتبها. الحياة من الموت ما معروفة. صاحبكم بلملم ورقو وبمشي يقنع من الحياة دي ...يقول في نفسو ..كدا الواحد احسن يجري يعمل ليه عمل خير في الدنيا دي قبل ما يعملوا لينا حفلة تأبين. بالمناسبة. انا ما عارف الموضة القايمين فيها الناس الايامات دي شنو. الواحد يعملوا ليه حفلة تأبين قبل ما يرحل. تقول شاعر. عندنا في حلتنا رابطة ...ما بتشتغل بي زول ..اي مبدع في البلد دي عندها فيه رأي. الرابطة دي تنتظر الشاعر يرحل ..وتعمل ليه حفلة التأبين. المبدع لو ما مات ما بشتغلوا بيه. الواحد ما بعرف قيمتو إلا بعد ما يرحل. ملحوظة : لكن الحركات دي كلها من سانيه. هوامش نسيت احدثكم عن حلاقة العيد. شغلتوني. طلعتوني من الموضوع. الموضوع دا بذكرني ليك بي حاجة. بذكرني ليك بي زول كدا يكون جايّك مخصوص عشان يكفر ليك المرض. يقوم يلقاك بقيت كويس ..يقول احسن ما ارجع ساكت ..يقوم يدين منك قروش. يقول ليك والله انا كنت جاي عشان اكفر ليك ..لكن طول ما بقيت كويس ديني 500 جنيه. او زي الزول البكون عندو وجع في البطن. يمشي للدكتور. الدكتور يخلى الوجع ..ويقعد يتحدث معاه في الكورة ..وانخفاض الدولار ..وازمة البلد. انا مالي ومال انخفاض الدولار او ارتفاعها. زول عندو (مغص)..وانت بتتكلم ليه عن ازمة البلد. هسع تاني طلعتوني من حلاقة العيد. ادخل ليكم في الموضوع..عشان (فرقة ناجي عطا الله) قربت. قالوا ليك ...غارزيتو الايامات دي شغال مع سانيه بالاشارة. ما في أي كلام. وقت الشغل يكون بالاشارة الموضوع كدا بكون فيه تركيز شديد. كدا يعني الموضوع مهم ...وسري للغاية. اها الايامات دي سانيه وغارزيتو شغالين بالاشارة. قالوا كدا ...غارزيتو جاب ليه (راديو) قديم لي سانيه ...وقال ليه فرتكو لي سلك سلك. قمت انا نطيت في اللحظة دي قلت هسع (سلك) ذنبو شنو؟. غارزيتو ساكت شايلها معاكم يا مريخاب. عارفين فائدة فك وتركيب الراديو شنو؟. كدا سانيه بكون اكتر من مركز ..زول بفك الراديو ويركبو ..غالبو يفك ليكم نجم الدين وباسكال وليما ركبة ..ركبة. بالمناسبة ...سانيه حالف يشيل لي (ليما) قصتو. قال نحن ما عندنا كلام زي دا في السنغال ..ولا في فرنسا. عشان كدا ...الايامات دي سانيه ما بدرّب على الكورة. سانيه بدرّب على (الحلاقة). دخل كورس مكثف للحلاقة. مباراة الوقفة ..سانيه ح يدخل المباراة بي مقص وماكينة حلاقة وموس وفوطة وصابونة. نحن طلعنا ليه اذن يدخل بالحاجات دي. يوم الوقفة ...حلاقة العيد طبعا. الصوالين ح تكون زحمة. لذلك نحن اولادنا ديل حالفين يحلقوا ليكم. كلكم يا مريخاب بتحلقوا. بس اصبروا. النظام كويس. نحن أي حاجة عندنا بي نظام. سانيه (معلم) في الحلاقة. ح يحلق في البداية لي (ليما). بعد ليما يدخل باسكال. ثم نجم الدين ..والشغيل ..وسعيد السعودي. كلكم بتحلقوا يا جماعة ما تضيقوا. قلنا ليكم حلاقة العيد دي نحن عندنا ليها نظام براهو. الباك بي عشرة جنيه ..والمحور ب (12) جنيه...والصحفي ب (15) جينه. انت يا باسكال بي صبغتك دي حسابك بطلع 35 جنيه. عاجل : ناس معاوية الجاك ديل لو عاوزين يحلقوا إلا يوم العيد ...الوقفة حاجزين صالون لي ناس الحضري.
