لا ادري لماذا ارتبطت (المثالية) عندنا بالسلبية ؟...يقال في ضل الشجرة البنقعد فيه ..(انت زول مثالي)..يعني انت زول (سلبي)..او على الاقل عايش في زمن ما زمنك ...ومهوّد بيك (الخيال). وعادة يوصف الشخص بالمثالية اذا (شطح) في المثاليات المتمثلة في دنيا جميلة ..وساحة خضراء ..وناس ملائكة.
خليك مفتح!!.
من غير شك ...(المثالية) شيء ما كعب (وما عندنا معاها اي غضاضة او مشكلة) . ان شاءالله كلكم تبقوا (مثاليين) ..وانما اختلاف الموازين ..وتبدل القيّم والمثل في هذا الزمن الصعب (ابو جلحات) ...جعل من (المثالية) على الاقل شيء (مكروه).
مثالية شنو؟.
الزمن دا ما عاوز (مثالية)...لو مشيت ليك مناسبة ...لو ما مشيت (مكفكف) ...واخلاقك في نخرتك ...ما بجيبوا ليك (كرسي).
ولا بقعدوك.
ما عارف ليه بدللوا على (زهجة) الزول ، وضيق صدره بمقولة (اخلاقو في نخرتو).
وبرضو (الحشرية)...بثبتوها بهذا القول : (الزول دا بحشر نخرتو في اي حاجة).
في ناس (نخرتهم) دي في الرسالة البتصلك بيحشروها.
واضح ان (النخرة) بتدخل في اي حاجة ما حلوة.
المثالية في هذا الزمن مثل (الرومانسية)...هي برضو مرفوضة.
هسع الواحد لو عاوزين يطلعوه ليك من طورو ..يقولوا ليه : (انت زول رومانسي ساكت).
يتعقد ..لمن يكرفس وشيهو.
والزمن ...ما عاوز اي (رومانسية).
ولا حتى شبه رومانسية ساكت ...خليك (غتيت) ..وناشف ..ولسانك مسيخ.
اتذكر ..(والكلام دا ما يطلع من العمود دا)...زمان كان معانا (باك) لفت...(رومانسي) قاطع.
كورة ما عندو ..لكن (الرومانسية) دي مبالغة فيها.
النوع البكون اليوم كلو واقف في (المرايا).
المجهود الببذلو في (شعرو) ...لو بذلو في الميدان ما في زول بلحقو.
من الله خلقكم ..شفتوا ليكم (باك) رومانسي.
نحن كان معانا في فريق الحلة (باك) رومانسي ...في منتهى (الرومانسية).
زمن روايات (عبير) والزهور.
كان كل يوم طالع ونازل بي (رواية).
لو مشى يرفع ليه (كورنر) ساكت ...بكون شايل روايتو معاه.
الباك دا من رومانسيتو كان مجلة (حواء)...بقرأها.
خلاص يعني الود مقطع (الرومانسية).
يا اخوي انت ما تشوف كورتك وين؟...عامل كدا زي (محمود الجندي) في الشهد والدموع.
بعدين الباك من تلقاهو بشبه (محمود الجندي) اقنع من كورة فيه.
باك رومانسي ..رومانسي ...دي شيء ما بغالطوني فيها.
لمن يعمل ليه مخالفة ...الشوط التاني كلو بعدي (اعتذار).
الباك من يعتذر من (المخالفة) ..بمرق من نفسي طوالي...انت (باك) وإلا (قنصل) في سفارة.
اوعكم ...ثقافة الاعتذار دي نحن ذاتو ما عندنا ...ولا شايلنها.
والله عندنا ناس ...الواحد احسن ليه تقدد ليه عيونو من تعتذر ليه.
باكنا الرومانسي دا كان بعتذر لاللاعب ..ويعتذر للكوتش ..ويعتذر للكابتن ..ويعتذر للحكم ..واخر المباراة يمشي على المساطب ...عشان يعتذر للجمهور.
جنو (اعتذارات)...نظام دي ظرافة ..ورشاقة زي رشاقة مذيعات قناة النيل الازرق.
المذيعة تلقاها بتضحك براها ..وقت تسأل دي بتضحك في شنو؟..يقولوا ليك ..دي نكتة قالوها السنة الفاتت في البرنامج دا.
يا دوب فهمتها.
مذيعات قناة النيل الازرق خليهن.
خلينا هسع مع (الباك) دا.
باك (رومانسي) لمن داخل في حوش الجيران.
الباك دا كان لمن الحكم يطلع ليه (كرت اصفر)...بقعد في الواطة عشان يحنس الحكم.
جرسة شديدة.
الباك دا بي اختصار كدا ...كان من غلبة (رومانسيته)...الكورة كان ما بوصلها لينا وقت يعكسها.
يعكسها (حبة).
ديمة كورتو مقطوعة.
موش ناس بلة جابر ديل وموسي الزومة ...كورتهم بتمشي السماء ...نحن باكنا (الرومانسي) دا ..الكورة ما بوصلها.
شفتوا الرومانسية كعبة كيف؟.
المثالية ..برضو ما حلوة ...خاصة في الزمن دا.
كمساري (مثالي) شديد ...كان في كل يوم بخسّر السواق الشغال معاه في الحافلة.
والسبب كان يتمثل في (مثالية) المخلوق دا.
الكمساري كان بركب في الحافلة ..ويطقطق للركاب ..راكب يقول ليه : والله ما معاي قروش يا ولدي ...(كلمت السواق تحت).
انا ما عارف (كلمت السواق تحت) دي شنو؟...دي (عملة) جديدة يا رب.
الكمساري يقول ليه : ما في مشكلة يا حاج.
طبعا لو الكمساري (قطيم) في الحتة دي طوالي بفضحك ...يقول ليك : (يا جماعة الحافلة دي كلها كلمت السواق تحت ...نحن نشتغل ليكم كيف؟)...انتوا مفروض تمشوا منظامات العون الانساني ...(يقعد يسمع ليك منظمات لا اول ولا اخر لها).
انتوا ما عارفين البنزين عمل كم؟.
الرغيفة بقت قدر (الخاتم)...ولو عاوز ليك (فول) بي 2 جنيه ..ألا تجيب ليك (ختم).
حاجة ما بتسوى.
قطع الغيار ولعت نار ...والله الحافلة دي شغالة معانا بالخسارة...نحن الحافلة دي برة كاتبين فيها (الصلات الطيبة).
يدخل ليك الزول الكلم السوق في (كبريتة).
لكن الكمساري (المثالي) دا ..كان بمشي الحكاية ...(ما في مشكلة).
راكب تاني يقول ليه : (طالب)...الكمساري ما بقول ليه اي حاجة.
مرات بقول ليه : شغال كيف في الامتحانات؟.
الله يعيّنكم.
موش الكماسرة ديل ..جنهم وجن الواحد يقول ليهم (طالب)...زولنا دا ما كان عندو اي قضية.
بضحك بس.
كماسرة الخرطوم ديل ...الواحد فيهم تقول ليه : (ألعن ابوك)...ما تقول ليه : (طالب).
طالب عندهم زي الحاجة الكعبة.
قالوا ليك (الصينيون) الكتار ديل بركبوا في حافلات سوبا ...بركبوا معاهم (الطلاب)..كل يوم بسمعو في الشكلة ...المساكين افتكروا كلمة (طالب) دي شتيمة.
اصلو الواحد من يقول : (طالب) الكمساري يقوم فيه...حافلة كلها (طلاب)...فصل بس.
لكن الكمساري (المثالي) ما كان شغال بالموضوع دا ..البقول ليه (طالب) بقول ليه : الله يوفقك.
راكب اخر ...يدي 10 جنيه ..موش مفروض الكمساري يشيل حقو ..ويرجع الباقي ...الكمساري المثالي دا كان في اخر محطة برجع للراكب ال (10) جنيه ..ويقول ليه ما في فكة..خلاص ما في مشكلة.
عشان كدا (الحافلة) دي كانت شغالة بالخسارة بسبب (مثالية) الكمساري الشغال فيها.
شفتوا (المثالية) بتخسر كيف؟.
اخير ليك تكون (كعب) عديل كدا ...من تكون (مثالي) بالشكل دا ...اليوم كلو قاعد في حدايق السلام ...تكتب في القصائد العاطفية.
وزول حاسي بيك ما في.
المثالية برضو عندنا ليها فهم تاني.
فهم برضو بالنسبة لي ما مقنع.
في المدرسة في اخر السنة الاساتذة ومدير المدرسة بعملوا جائزة للطالب المثالي.
شفتوا جائزة الطالب المثالي دي اخير منها يرفدوا ولدك من المدرسة عشان بغيب كتير.
ولدك كلو يوم يجبوه ليك (مفلوق)...احسن من يجيك اخر السنة شايل جائزة (الطالب المثالي).
الطالب المثالي في المدرسة دائما بكون طالب مسكين ...والمدرسة كلها حاقرة بيه.
واحد يشيل قلمو ...وواحد يشيل المسطرة ...وواحد يشيل فطورو ..واخر السنة يقولوا ليك فاز بجائزة الطالب المثالي.
اخير الطالب يكون (شفت)..وكل يوم بجلدو فيه في طابور الصباح ..وعلى رأس كل اسبوع مدير المدرسة بستدعي ولي امر الطالب ..عشان ولدو عامل مشكلة.
افضل الشفتنة دي ...يكون ما حافظ جداول الضرب ..وبغيب يوم الاختبار ..وبشيل دفتر العيادة ..وبجي المدرسة (مردف) عديل كدا للجلد.
الحاجات دي احسن من يقولوا ليك ولدك ..شال جائزة الطالب المثالي في المدرسة.
جائزة الطالب المثالي دي ...زي جائزة اللعب النظيف.
زمان ناس الهلال والمريخ بشاركوا في البطولات العربية والافريقية ..وكانوا برجعوا لينا من هناك ب (كأس اللعب النظيف).
دي بتخليني اقول ...اللعب النظيف دائما ما بعمل نتيجة ....وما بحقق بطولة.
الشفتنة ..والفهلوة ...والضرب ..وحرة القلب ..هي البتجيب البطولات.
الفريق من يقولوا ليك فاز بجائزة اللعب النظيف ...اعرف طوالي انه ما فيه خير.
الحمدلله هسع على مستوى الهلال والمريخ ..فارقنا حكاية (اللعب النظيف).
بقينا نمشي لي قدام.
ومن دخلنا المجموعات ..بقينا ما بنفوز بي (كأس اللعب النظيف).
كأس اللعب النظيف نعمل بيه شنو في (الزحمة) دي؟.
خليك مفتح.
وتابع معاي.
فيصل العجب ...الي وقت قريب كانوا المريخاب فرحانين بيه ...قالوا لا شات ليه (قارورة)..لا قال ما بقعد في الكنبة.
ولا بسأل ليه زول.
المدرب لو قال ليه اقعد في الكشافات بقعد.
المريخاب كانوا عاملين لينا زحمة بالموضوع دا ...و كان كلما تأتي سانحة للمقارنة بين هيثم مصطفى والعجب ..برجحوا كفة لاعبهم ..وبقالوا العجب سلوكة قويمة ...وهو لاعب خلوق ومثالي.
مشينا غانا ..اتغلبنا في 3 مباريات 3 مازدات زي السم ..اي مباراة اتغلبنا فيها (تلاتة).
اها مع الغلب دا عليكم الله الزول الودانا غانا ..موش مفروض (يجلدوه) في شارع عام.
على العموم دا ما موضوعنا..فقط اردت ان اذكر المريخاب مقارناتهم بين هيثم مصطفى ...والعجب ..العملوه لينا (ملك)..وطلعوا لينا هيثم مصطفى بتاع (قارورات) ساكت.
الايامات لفت ...ومرت ..وجات واثبتت انه لا يمكن المقارنة بين هيثم مصطفى وفيصل العجب ..وقد اثبت لنا ذلك المريخاب براهم ...منهم وليهم.
خلوا العجب ..وقبلوا على هيثم مصطفى.
بل خلوا الفريق كلو بي (باشتو)...وقبلوا على هيثم مصطفى.
فيصل العجب ...رموه في الكنبة ..بقى يدخل الميدان مع ناس (الملح).
شفتوا وقت يفتحوا الابواب للناس الما عنده (تذاكر)..العجب بقوم يسخن.
وقت بوليس السواري يحيط ليك الملعب ..وينتظر ليك صفارة النهاية عشان يجروا للحكم ويحموه ...العجب بمشي على الحكم الرابع.
وقت الحكم الرابع (شخصيا) يرفع الزمن البدل الضائع ...العجب بخش.
بخش مع الزمن دا.
عليكم الله ...لاعب بالتاريخ دا ..وفي هذه السن ..يعملوا فيه كدا ..وما يقول اي حاجة ...عليكم الله ما يستحق جائزة (الطالب المثالي).
اقصد اللاعب المثالي...مفروض (سوداني) تشوف ليها جائزة للاعب المثالي.
قالوا ليك الفانلة الوحيدة في نادي المريخ الما بغسلوها ...هي فانلة فيصل العجب.
بشيلها نظيفة.
وبرجعها نظيفة.
ملحوظة : العجب كبر على الحركات دي ...شوفوا ليه (كرسي) يقعد فيه مع الجهاز الفني ...بدل ما يقعد مع ناس ضفر في الكنبة.
هوامش
ارضية استاد المريخ بقت زي الفتة الفيها عضم واحد.
نفسي اعرف ...القال منو للنجيلة دي جمال الوالي فات.
والقال ليها منو ..عصام الحاج هو البدور في المريخ هسع.
نجيلتكم حرقت.
ليها حق تحرق.
يعني إلا النجيلة يبقى لسانها طويل زي الحضري وباسكال عشان يسقوها.
عشان (النجيلة) دي قمت خليت مباراة المريخ ...ورسلت عمودي قبل نهاية الشوط الاول.
كنت عاوز اتابع المباراة.
لكن ما قدرت مع (النجيلة) دي.
يا هيثم النجيلة دي بتلعبوا فيها كيف؟.
والله انا (فرجة) ساكت غلبتني اقعد اعاين ليها.
زمان وقت كنت في الهلال يا هيثم ...ما كنا بنلعبك في (نجيلة) متواضعة كدا.
على العموم بكرة ارجع واكتب عن مباراة الامس.
فيها حاجة كدا ..تستحق (صفحة).
نخليها لي بكرة احسن.
مرتضي كبير مشارك ..وراجي مشارك ..وعلاءالدين مشارك...والعجب قاعد برة.
في تشكيلة الصف التاني ...العجب بقى يقعد (كنبة).
انت عاوز تلعب متين يا العجب.
والله كبرت على (الكنبة).
اكرم الهادي سليم بي حالتو دي ح يلعب يوم 12.
اكرم مستواه اتراجع شديد.
كلموه قلت ليكم ...خلوه يشوف ليه (فندق) يطردو.
عصام الحاج واكرم الهادي سليم ...تاني عاوزين شنو؟.
يوم الثلاثاء كتروا لينا (الزلابية) بس.
قنة النيلين عاملة اعلان لمباراة القمة يوم الاثنين.
يوم الاثنين يا الاعيسر ...بيلعبوا ناس سلك ومزمل ابوالقاسم ومعاوية الجاك.