2/1 في لواندا و2/1 وفى امدرمان ..المباراة دي (مباشر) ولاّ (اعادة)؟ • هسع لو جريّت لي اي واحد من ناس المريخ ديل. • من طرف كدا. • وقلت ليه عليك الفرق عندكم شنو بين (ام درمان)..و لواندا؟. • عاوز اعرف بس. • سؤال عادي. • ما فيه اي استخفاف. • الفرق شنو بين القلعة الحمراء و كالولو؟. • انتوا ما عندكم وطنية. • ما عندكم احساس بالوطن. • شنو هناك في انغولا مضروبين 1/2. • وهنا في السودان ..برضو مضربين 1/2. • انتوا ما عندكم (جغرافيا). • الدرسكم ..جغرافيا دا منو؟. • عملتوا لي لخبطة في (الطوحال). • طوحالي من طوحال (سلك) بقيت ما قادر افرزو. • 2 / 1..هناك. • و2/ 1...هناك. • عليكم الله دي ما لخبطة دي. • قعدت اغالط في نفسي. • طلعت الكرسي ..وقعدت في الواطة. • متلخبط شديد. • فكرت...قلت في نفسي. • طيب يا جماعة ...دا بلة جابر ...بي جوزو. • بلة بتاع فرنسا. • والله يا بلة جابر ..لو مشيت فرنسا بي (كورتك) دي ...وتنفرك دا ...من الاسبوع الاول للدوري الفرنسي ...ينزلوك في الشارع عشان تبيع لبن. • دي كورة توديّك فرنسا. • كورتك دي ...(قري) هنا...ما بتوصلك. • قلت ليكم انا قبل كدا. • كورتك دي يا بلة جابر ...(المصفأة) حقت الجيلي دي ما بتوصلك. • عاوز كمان تمشي بيها ...فرنسا. • يمكن بلة جابر دا ...ماشي فرنسا ..عشان يشيلوا منو (عينه). • يكون كدا. • ما عندها اي تفسير تاني غير كدا. • يكون عاوزين يشيلوا منو (عينه)...عشان يعرفوا (الجليط)...في الكورة دي بجي من وين؟. • الخلايا النايمة دي جنسها شنو؟. • خلاياكم دي كلها (كشافات). • بلة جابر ...هسع خلي ...خلينا عليك الله مع طيران الوصيف دا. • قلت ليكم. • انا بحكي ليكم الحاصل كلو. • قعدت في المباراة. • الكرسي في حتة ...وانا في حتة. • جابوا لي (الشاي)...شربت الموبايل ...وضربت الشاي. • قلت اتمتع بي المباراة ...ناس المريخ ديل ...عاوزين ليهم (هدف). • هدف واحد. • ما مشكلة. • اصلو ما مشكلة. • علاءالدين يوسف ..حسب معرفتنا ليه في الهلال ...لو لعب براهو امام ليبولو ...الهدف الوحيد دا بجيبو. • خلوه علاء ..برضو مرات بجلط. • قول جلط. • اعتبارا كدا. • لو المباراة كانت بين ليبولو وهيثم مصطفى ...المباراة كانت ح تنتهي واحد / صفر لهيثم مصطفى. • هيثم براهو بغلب واحد صفر. • تجوا يا المريخاب ..بي هيثمكم ..وبي عجبكم ..ورمضان عجب (كمية من العجبو)..وراجي ومحمد موسي وامير كمال وجمال ابوعنجة ...تتغلبوا 1/2. • هسع جمال ابوعنجة دا ذنبو شنو؟. • جبتوه ليه؟. • زول كان مرتاح ...وبالو رايق. • والله ...انا الحكاية دي ...ما كنت مصدقها. • اصبروا ..بحكي ليكم الحاصل بالتفصيل. • بس خلوا (احمد الحاج) دي يصبر لي شوية كدا. • الليلة يا احمد ما ح اسألك من اي (صورة). • ان شاءالله تجيب لي صورة (امينة رزق). • ما في زول بقول ليك حاجة. • خلونا نتابع المباراة. • قعدت في التلفزيون. • دا بلة جابر. • ودا موسي الزومة. • ودا ضفر. • ابو الاضفار ...بتاع القسم الشهير. • يعني الفريق اللاعب دا ...ما فريق (الحرية) ام درمان ...ولا هو فريق (الاحرار). • دا المريخ ذاتو. • طيب جمال ابوعنجة دا ...الجابو هنا شنو؟. • بسأل في نفسي. • بشوف لي في مبرر ...في عذر. • بمنطق في روحي. • مالكم انتوا. • جمال ابوعنجة دا تكون جابتو (الصلعة)...يمكن عاوز يعمل اتحاد (صلع) مع الكوكي. • يا جماعة مالكم انتوا عاوزين ..تلخبطوني؟. • ما تجهجهوا لي (طواحلي) ساكت. • انت ما متابع وإلا شنو؟. • جمال ابوعنجة دا ...جابوه المريخ نظام (3) تسعات. • نظام شنو؟. • نظام اسعاف عاجل كدا. • يعني دا ...المريخ. • ايوا المريخ. • خلاص يا جماعة ..سلمنا انو دا المريخ بي (ضفرو). • معقولة ...قون واحد ...غالبهم يجبوه. • والله زمان هيثم مصطفى دا وقت يكون في الهلال ...باصاتو كانت كلها اقوان. • هسع محمد موسى لمن يفهم ليك باص هيثم مصطفى ...المباراة تكون انتهت. • شوية كدا. • ليبولو ...جاب ليه قون. • تاني قعدت اراجع في ناس ضفر. • دا ضفر. • وداك بلة جابر. • والعجب ....قاعد في الكنبة. • اذن دا المريخ. • المريخ ...مضروب في استادو. • معقولة. • نحن سيوي العاجي ..جبنا فيه تلاتة ...جاب فينا هدف ...الزعل ..عاوز يشقنا. • الواحد فينا ...قام الصباح ...زي الطالع ليه من (فرن). • نوم ما نمنا والله. • رجعت ...اعاين تاني في المباراة. • بعد هدف ليبولو ..قلت اقوم ..اخلي الكورة ...برضو الواحد عندو (وطنية). • ما بنحب نشوف المريخ مغلوب. • المريخ ...اتعادل. • رجعنا ...تاني نتابع في المباراة. • الوقت لسع. • المريخ ممكن يجيب ليه هدف يعادل نتيجة لواندا. • ممكن يجيب هدف ...والكورة تبقى 2/1 للمريخ. • وممكن المريخ يتأهل بالضربات الترجيحية ..وحتى لو طار بعد ذلك ..ما في مشكلة. • المهم بس يغلب في استادو. • شوية كدا ..وبينما انا كنت قاعد افكر. • ليبولو ...جاب ليه قون تاني. • عليكم امان الله. • ودي شيء انتوا ما بتصدقوني فيها ..قعدت تاني اراجع ليكم في ناس ضفر. • طيب دا ضفر. • ودا بلة جابر. • ودا موسى الزومة. • ودا فيصل العجب ...قام دخل من الكنبة. • والباشا. • طيب يا جماعة دا ...ما هو المريخ ذاتو. • معقولة بس. • معقولة ....المريخ في استاده يتغلب. • في ام درمان. • فكرت في حاجة تانية. • قلت ايوا ..لقيت ليها حل. • ناس الشروق ديل ...يكونوا عادوا مباراة الذهاب. • يكون جابوا المباراة الاولى. • دا الشريط...دي ما المباراة. • قعدت اقنع في (طواحلي). • ما اظنها دي مباراة الاياب. • لا ..لا ..دي مباراة الاياب. • دي مباراة ام درمان. • عارفين عرفتها كيف؟. • هيثم مصطفى ...في مباراة الذهاب لم يكن مشاركا في المباراة. • والمباراة دي هيثم مصطفى مشارك. • يا ولد انت. • مفتح ...وعارف اي شيء. • شفتوا العبقرية دي كيف؟. • لكن تاني ..الفأر لعب في رأسي. • قلت حكاية هيثم مصطفى انو ما كان مشارك في المباراة الاولى ....ما حكم. • هيثم مصطفى دا كان في الهلال. • فجأة كدا ..لقينا في المريخ. • بعد 17 سنة ...جاء ولعب في المريخ. • هيثم بعملها. • عشان كدا ..طلع لينا موضوع هيثم مصطفى من الحكاية دي. • هيثم مصطفى ما مقياس. • عارفين عملت شنو تاني؟...بعد ما شلت موضوع هيثم مصطفى دا من رأسي. • صنقعت فوق. • صنقعت في الشاشة. • قعدت افتش عن كلمة (مباشر). • قلت بس كلمة (مباشر) دي الفيصل. • لو لقيت كلمة (مباشر) في شاشة الشروق ...هذا يعني ان المباراة منقولة على الهواء من استاد ام درمان. • ولو كمان شاشة الشروق ما فيها كلمة (مباشر)...تكون المباراة دي (اعادة). • شفتوا الفهم دي كيف؟. • عليكم الله يا جماعة الكلام دا ما يطلع من العمود دا. • يكونوا ناس الشروق عايدين المباراة الاولى. • ما معقولة المريخ يتغلب في استاده 1/2. • نفس نتيجة مباراة الذهاب. • صنقعت سمح. • لقيت كلمة (مباشر). • اتهجمت. • وتاني قعدت اراجع في ناس ضفر. • انتوا المريخ دا فيه كم (ضفر). • مالو بقى كلو (ضفر) كدا. • هسع محمد موسى دا فرقو شنو من ضفر. • مباشر موجودة ..وضفر موجود. • انصدمت في الدنيا دي جنس صدمة. • كوركت يا سلك لي (عبدالماجد)...قام من نومو مخلوع. • قلت ليه يا ولد ..اقرأ الكلمة المكتوبة فوق (الشاشة) دي. • شوفوا لي يا عبدالماجد ..مكتوبة (مباشر)...وإلا مكتوبة (اعادة). • باقى نظري بقى كعب. • ويمكن مباراة امس ..خلتني ما اشوف كويس. • يمكن انا بتخيل ساكت. • يمكن دا وهم ساكت. • ويمكن ديل ناس الشروق. • عبدالماجد (شفت) يا سلك. • مفتح. • عارف قال لي شنو يا ابو اسلام؟. • عبدالماجد قال لي انت يا حاج ...فاتح قناة (زي افلام)..وقاعد تتفرج في فيلم هندي. • دا فيلم هندي ...دي ما كورة. • البعملوا فيه ناس بلة جابر دا ...فيلم هندي. • هناك 2 / 1 ...وهنا 2/1. • كوركت ليك في الولد ..عرفتو ليك بيهظر. • قلت ليه ...ما عاوز كلام كتير ...الشاشة دي مكتوب فيها (مباشر)..وإلا مكتوب فيها (اعادة). • عبدالماجد قال لي (لايف). • كمان (لايف). • الحكاية بايظة ...بايظة. • الموضوع اتحسم. • طيب يا عبدالماجد ..بس عشان اتأكد...شوف لي بلة جابر ...قاعد. • قال لي قاعد. • وضفر. • قاعد. • وموسي الزومة. • قاعد. • يعني دا المريخ. • دا المريخ ذاتو يا حاج ..بي نتيجتو الاولى. • طيب يا جماعة ...ناس بلة جابر ديل ..ما بفرقوا بين (لواندا)..وبين (ام درمان). • يا بلة ..انت ما عارف ..ام درمان دي العاصمة الوطينة. • معقولة ما عندكم ليها خاطر ...في لواندا ..تنضربوا 1 / 2. وفي ام درمان ..تنضربوا بي نفس النتيجة. • كالولو...من القلعة الحمراء ...ما بتفرقوا ...يا ضفر. • انتوا قاعدين تتلخبطوا في (النجيلة) وإلا شنو؟. • مية مرة قلنا ليكم نجيلة (الرد كاسل)...فيها (ديدان). • الكلام دا انتوا ما واضح ليكم. • طيب قول (ضفر) ما بفرز. • وقول هيثم مصطفى ..جديد على المريخ. • انت يا العجب بتلعب ليك 15 سنة ...ما قادر تفرق بين الرد كاسل وملعب كالولو. • قول اتشابهت عليكم (النجيلة). • انت يا موسى الزومة. • يا واعى ...ويا زول يا كبير. • جمهور المريخ من جمهور ليبولو...ما بتعرفو. • شنو هناك اتغلبتوا 1/2...وهنا اتغلبتوا 1/2. • يا ود الناس ...الزول وقت يشتري ليه (دولاب)..ويرجع تاني يشتري ليه (دولاب) من نفس المحل ....ببقى زبون. • ببقي زبون ....للمحل ...بقوم صاحب المحل ...يعمل ليه (تخفيضات). • انتوا يا موسى الزومة ..ويا بلة جابر (يا بتاع فرنسا)...تشيلوا الحكاية بي صمتها كدا. • هناك اتنين واحد. • وهنا اتنين واحد. • تخفيض ما في. • بلة جابر خلي ..يا موسى الزومة. • يمكن عشان بلة جابر ماشى فرنسا ...بقى قنعان من المريخ ....(المفارق عينو قوية). • انت مالك يا موسى الزومة؟. • جمهور (الزعيم) كمان ما بتعرفو. • والله لخبطوني في (تلفزيونو). • شكيت عديل كدا في (الشروق). • قلت اعادة. • انتوا يا جماعة دي لاحقننا. • في اي حاجة ...ورانا ...ورانا. • نجنس ...يجنسوا. • نسجل ...يسجلوا. • نعسكر برة...يعسكروا برة. • نشطب هيثم ...تسجلوه. • نطير من الدنيا دي ....تطيروا معانا. • نعمل شنو نحن؟. • وروني بس. • نتقطع. • اها الامين البرير استقال. • يا عصام الحاج ...ما تتلفت كتير. • بكرة بتستقيل. • البرير برجع. • عصام برجع. • ملحوظة : والله مفروض الحكومة بعد طيرانكم دا تشيل (استادها) منكم. هوامش • الهلال امام سيوي قدم مباراة كبيرة ...شاهدت في كثير من اجزاء المباراة ..فريق (برشلونة) في الملعب. • كان الهلال عبارة عن (برشلونة). • متعة ...اهداف ما بتفهمها إلا في الاعادة. • لاعبو الهلال قاموا بالواجب واكتر ...وامتعونا ..رغم الخروج الحزين. • بشة سجل هدف ...ما بتشاهدوا في الدوري الاسباني. • هدف فيها كل (الطيران). • زي ما بقول كمال ترباس ...هدف (صقر) ما بسجلو. • وتراوري كان شعلة من النشاط والحركة. • كان كل الروعة. • كاريكا ...قدم الممكن ..واللا ممكن. • ومهند الطاهر ..ما قصر. • كلهم كانوا رائعون. • حتى غارزيتو ...لعب بخطة واسلوب رائع. • مجلس ادارة نادي الهلال ..يشكر على كل حال. • موقفهم الاخير هذا ...موقف كبير. • الهلال عمل العليه. • الكورة ابت. • عاوزين 3 اقوان. • جبناها ..وقد استقبلت شباكنا هدف في اخر الثواني. • هذه الطريقة ...يمكن ان يخرج بها الريال نفسه. • علينا ان نتعامل مع الكورة ...بكل مشتقاتها. • النصر ..والهزيمة والتعادل. • الهلال ...ليس فريق للانتصار فقط. • في كرة القدم...لا يوجد فريق ينتصر دائما. • كل الفرق الكبيرة ...الريال ..وبرشلونة ..واليوفي وميلان ..ومانشسيتر يوناتيد ...كلها جربت الخروج من الادوار الاولى. • هذا امر يحدث في كرة القدم. • حتى كتابتنا عن المريخ اليوم ...لا تخرج من القبول بكل نتائج الكرة. • وعلى المريخاب ..ان يقفوا مع فريقهم ..وان يخرجوا من هذا النفق. • المهم هو ان لاعبي الهلال ...قدموا مباراة كبيرة. • يجب ان نعرف كيف نتعامل مع الهزيمة. • هذا الكلام ...ليس للهلال فقط ...بل للمريخ ايضا. • خيرها في غيرها. • سوف تعودوا اقوى. • ننتظركم في كل حين ...وفي كل مباراة ...وفي كل مباراة. • الامين البرير كان شجاعا وهو يتقدم بالاستقالة. • لكن عليه ان يعلم ان هذه الامور تتحدث في كرة القدم. • تعلموا كيف تتعاملوا مع الخسارة. • الهلال كبير. • والهلال عظيم ...حتى وهو يخرج. • واضح ان الحضري عندو حق. • اكرم دا ما عندو علاقة بالكورة. • الزول دا نايم عديل كدا. • اي كورة وصلتو قون. • باسكال ..طلع كور اكتر منو. • ما عارف حارس المرمى منو؟. • باسكال إلا اكرم الهادي سليم. • غايتو تاني لو الحضري قال ليكم عاوز لي (حوض سباحة) في شارع القصر ..اعملوه ليه. • عاجل : الله يكتر لينا (البلات) في المريخ.