· قبل كدا ...كتبت ليكم في هذه المساحة عن الشغيل تحت عنوان (الازرق يليق بك). · في ناس الكلام دا ما عجبهم. · قالوا اشمعنا...وليه؟. · دا اصلو الشغيل ..وإلا طارق احمد آدم. · وبراكم شفتوا (الشغيل) بالازرق كيف ؟...ما فاضل إلا يغني ليكم ( حبيت عشانك كسلا خليت دياري عشانك). · الشغيل بس عاوز يبقى (التاج مكي). · التاج مكي قبل 40 سنة. · يعمل ليكم شنو اكتر من كدا؟. · إلا يقول ليكم (شعر) ويعمل ليكم فيها اسحق الحلقني. · يتحلقن ليكم يعني؟. · وإلا يتنازر ويتقابن ليكم ...(يعني يبقى ليكم نزار قباني). · انتوا إلا يشرحوها ليكم. · على العموم الظاهر كدا ..(الكورسيات) التى اخذها نصرالدين الشغيل كانت كورسيات تقيلة. · اي فيروس (وصيفي) في دم الشغيل شلناهو منو؟. · اي (بنكرياس) فيه ورم وصيفي ...شلناه بي بنكرياسو. · اي طوحال (متنجم)...قطعنا ليك برة. · اي مرارة فيها (وصفنة) نضفناها ليه. · وبراكم انتوا بتذكروا وقت الهلال سجل (الشغيل)...مدرب الهلال الفرنسي غارزيتو اعترض على تسجيل الشغيل ..ومشى صرح في مجلة فرنسية ..وقال بالفرنسي الما بنفهموا نحن : (كرتولو ..شوتغر فاد شويغر). · يعني الشغيل دا لا بنفع ولا حاجة. · في ناس جابوا (الشمار) دا. · الشمار عند الفرنسيين (كسبرة). · وعند الايطاليين (توم). · في زول جاب الكسبرة دي ...ترجمها لينا طلعت (شمار). · الحلة كلها ...انطلقت ...غارزيتو ما عاوز (الشغيل). · طبعا غارزيتو ...دا ممكن تتوقع منو اي حاجة. · يعني ممكن يقول ليك عاوز لي سمك. · تجيب ليه (السمك). · يقول ليك وينو الفول؟. · السمك اعمل بيه شنو في السخانة دي؟. · انت ما عارف السمك بالفرنسي ...يعني (فول) ...ومعاه عيشة زيادة. · والله الفرنسيين ديل لا عندهم (عيشة زيادة) ولا حاجة ...دي حاجة عندنا نحن. · طبعنا كعب. · الواحد يقعد ...قبل ما يبدأ في الاكل ...يقول للجرسون : (عليك الله عيشة زيادة). · في ناس العيشة الزيادة عندهم اهم من العيشة الاساسية. · غايتوا انتوا يا السودانيين الشيء يسكوها ليكم كدا ..فصل ..فصل لمن تدخل الجامعة. · ما بتفهموها طايرة. · والزمن ماشي. · والحكومة قالت ما في طريقة. · هسع الحكومة الدخلها هنا شنو؟. · مالك انت عاوز تعمل لينا مشاكل. · مالها الحكومة ...احسن حكومة. · قلنا حاجة. · عليك الله خلينا مع (غارزيتو) احسن ..ما تقعد تنظر لينا. · قالوا غارزيتو في تمارين الهلال ....بقول لي (خليفة) امشي كمل اللاين واعكس الكورة. · سنتروف كافشل يا كليفة. · الكلام دا بالفرنسي ..ما تقعدوا تستغربوا لي ساكت. · في زول فيكم عارف (فرنسي). · طيب وقت ما في زول عارف فرنسي ..ما تخلونا نتجدع شوية. · خليفة يكمل اللاين ويعكس الكورة ...غارزيتو ...يقول ليه عكستها ليه؟..انت ما عارف كمل اللاين واعكس الكورة بالفرنسي يعني شوت في القون. · انتوا (الفرنسة) دي ما بتفهموها. · غارزيتو معذب ناس خليفة عذاب في التمارين. · قالوا مرة غارزيتو قال لي نزار حامد ...عاوزك تتقدم مع الهجمة ...عشان تستفيد من طولك دا في العكسيات. · نزار حامد المسكين...اتقدم. · غارزيتو ...قال ليه ...القال ليك اتقدم منو؟..انت ما عارف التقدم مع الهجمة بالايطالي يعني تساند الدفاع. · وقت انت تتقدم ...مساوي دا يمشي وين؟. · مساوي طبعا مرات بكون زي مدير المدرسة ...المباراة كلها بتكلم مع بويا. · يا جمعة اطلع. · جمعة يا مساوي لو بطلع كان قعد في كنبتو. · جمعة لا بطلع ولا حاجة. · خليه مساوي هسع. · خلينا مع غارزيتو. · غارزيتو ...يجوه بالفرنسي ...يمشي للايطالي. · يجوه بالايطالي ...يقلبها ليهم فرنسي. · اقول ليكم حاجة غريبة. · مرة البرير ...صرف لي غارزيتو مرتب الشهر بي حوافزو من يوم اتنين. · يوم تلاتة ...غارزيتو وقف قدام البرير قال عاوز المرتب. · يا كوتش ...نحن امس موش صرفنا ليكم المرتب بي حوافزو. · غارزيتو قال للبرير نحن كاتبين في العقد بالفرنسي ...اي مرتب استلموا يوم اتنين او قبل اتنين لا يعتبر مرتبا. · يعتبر (نثريات) ساكت. · البرير قال ليه ايوا ...يعني الحركات الكنت بتعملها مع هيثم مصطفى ديك ...عاوز تعملها معاي. · اوعك يا كوتش. · اوعك ..فتح عينك دي ...انا الحركات دي ما بتنفع معاي. · البرير طلع ليه عقد باللغة العربية مع غارزيتو ...مكتوب فيه انا موافق اشتغل في الهلال مجاني ...ومرتباتي اشيلها من الاممالمتحدة. · الموقع تحت الكلام دا غارزيتو. · غارزيتو ..قال للبرير ..والله انا التوقيع دا كنت مفتكرو في عقد العربية ...هو انت عاملو في عقد العمل. · كمان البرير بدقس. · عشان تكونو عارفين ...غارزيتو هسع شغال بدون عقد. · ما يعمل ليكم فيها (فرنسي) مفتح. · والله البرير مفتح اكتر منو. · نرجع للشغيل. · غارزيتو دا ..هسع ما موضوعنا. · موضوعنا الشغيل. · في البداية ...نحن كلنا اعترضنا على (الشغيل). · قلنا عليكم الله هسع (الشغيل) دا نعمل بيه شنو؟. · نحن ما كنا عارفين الموضوع بيتطور. · ما كنا عارفين ...الشغيل دا بيستجيب للكورسيات بالشكل دا. · الشغيل بقى في النص ...اخطر من نزار الصاقعة. · كورة ..ووعي ..وتمريرات بينية ...وتمريرات عرضية ...وشقة ...ومشي. · بس فاضلة ليك (القيادة) يا الشغيل!!. · حاجة راقية عديل. · في واحد قاعد جنبي ....قاعدين نحضر في كورة الهلال...قال لي انت تعال هنا : الشغيل دا كان بيلعب وين؟. · تصوروا نسيت. · نسيت حكاية المريخ دا بشكل نهائي. · ساعة بفكر في الشغيل دا ...كان بيلعب وين؟. · كورتو دي ما كورة المريخ. · لكن وقت الزول عصر علي بالسؤال ...ولقيت ما في مفر ..اتذكرت. · قلت ليه : كان بيلعب في المريخ ...اها ان شاءالله تكون استرحت. · الواحد يحددها مع زول للطيش. · اصلو ما بتخلوا الموضوع يفوت عادي. · زولكم ..وضع ايدو في رأسو. · قال لي ما معقول. · قلت ليه شنو الما معقول؟..ساردين هو؟. · قمردين؟. · كبكبي. · قال لي هسع الساردين الدخلو هنا شنو؟. · قلت ليه دخلو مشابرتك دي ...تتشابر في الزول ...لمن تندموا على الاجابة. · زولكم استغرب ..قال لي معقولة ..دا الشغيل بتاع المريخ...دا الشغيل الكان بيلعب في المريخ. · قلت ليه : ايوا ..دا شغيل المريخ ذاتو. · قال لي ناس الهلال ديل عملوا ليه شنو؟. · سبحان الله ...والله الشغيل كورتو بقت زي الشاي باللبن. · حاجة رايقة. · زي غنا علي السقيد. · نقرشة كدا بالعود. · الزول دا كورتو بقت زي (مسامحك يا حبيبي قلبك عارفو ابيض وكلك حسن نية). · قلت ليه دي كورة وإلا قصة حب. · الشغيل بقى يستلم ...ويسلم عن طريق رائعة محمد وردي ...(لو بهمسة). · نقرشها ليكم عديل كدا بالعود. · قال لي : لا ..لا..لا ...الشغيل دا الظاهر عليه قلبو (ابيض) عشان كدا ..جاء يلعب في الهلال. · قلت ليه : انت قصدك هيثم مصطفى قلبو (احمر). · قال لي احمر يودي وين؟. · بطيخة هو. · غايتو الشغيل في الهلال ..كورتو بقت طاعمة عديل كدا. · كورة (قيافة). · انتوا يا ناس الهلال عندكم شنو؟...اللاعب من يدخل كشوفاتكم ..تدوه الطمأنينة. · يبقى هادي ..ورلاكسي. · بتعملوا ليه شنو؟. · هسع دا موش موسى الزومة...الزول دا موش كل مباراة بتسبب في هزيمة المريخ بي نفس الطريقة. · تذكروا (سرحة) بشة. · موسى سرح ...بشة جاء فايت فيه. · موسى الزومة حسب عقلو ..افتكر بشة دا سيد اللبن. · ما عارف انا اللخبطو شنو؟. · فجأة كدا اتعارض ليه سيد اللبن في رأسو. · بشة جاء فايت قدامو زي الما حصل حاجة. · اكرم الهادي سليم ..هناك مستعجل ...قام طلع. · بشة ما كضب ..وضعها في شمالو. · اها قون بشة دا...ناس ليبولو الانغولي ...جوا كرروه بصورة تانية في المباراة الافريقية. · وموسى الزومة واقف. · موسى الزومة دا ..بي حالتو دي. · بي (طوفيشو) دا ...جابوا لينا في الهلال. · نعمل ليه 180976543905 كورس ..نشيل ليه الورم الوصيفي دا بشكل نهائي. · (نزومو) ليكم من الاول. · نطلعوا ليكم موسى الزومة جديد. · والله ما تعرفو. · اول حاجة نوديهو صالون حلاقة. · انتوا شفتوا فييرا لما رجع المريخ حلاقتو بقت كيف. · زمان في الهلال ...حصل فييرا دا حلق زي الحلاقة دي. · والله الكورة البيلعبها ليكم موسى الزومة ..خالد احمد المصطفى في ايام مجدو ما لعبها ، لو جاء الهلال. · جبوه لينا ...خلونا نعمل ليه بس 180976543905 كورس. · نطلعوا ليكم ...جديد. · ضحكتو ذاتها نغيّرها ليه. · لكن موسى الزومة براهو ما بنشيلو. · إلا تدونا معاه المقصورة والطابق التاني وكأس مادنيلا. · كأس مانديلا ...عاوزين نعمل بيه تقسيمة في التمرين. · انتوا عارفين موسى الزومة دا لو جاء الهلال ...اول حاجة ح نعملها ليه شنو؟. · نشيل ليه الموسوى والزوموى دي نهائي. · بعد كدا ..بنقعدوا في حلقات هوبنة مقفولة مع مهند الطاهر ...عشان يركب ليه فهم جديد في الكورة. · فهمو القديم دا ..من مريخو ما عاوزينو. · اضف الي ذلك. · بلة جابر لو ضرب ليه ...ما يرد عليه. · عشان اي مكالمة مع بلة جابر ..بتخلينا نعيد الجلسات والكورسيات من اول جديد. · لو بلة جابر ضرب ليه ...موسى بقوم ينتكس. · نحن نصلح ..ونعدل ...ويجي بلة جابر ..يلخبط لينا الحكاية. · موسى دا اول حاجة اعزلوه من بلة جابر. · يا جماعة (الطوفشات) دي ما معقول تلموها لينا في كشف واحد. · (الطوفشات) دي لو اتحدت في برشلونة ...برشلونة بدق الدلجة. · انتوا كمان ما عارفين. · احسن الزول من البداية يكون واضح معاكم. · ملحوظة : الشغيل دا بقى فرقو من مهند الطاهر (الهوبة). هوامش · اكتب من حلفاالجديدة. · واحمد الحاج في حلفاالجديدة ..ما بريحنا. · امس حلفاالجديدة كلها كانت محتفلة بانتصار دبروسة على حي العرب في دوري الاولى بحلفاالجديدة. · السنة دي احسن ..الزول يتابع دورى الاولي في حلفاالجديدة. · حلفا وشندي. · زاهر مركز بيلعب في فريق النيل احد اندية الدرجة الاولى في حلفا. · في حلفا ...خرجنا بمعلومات جديدة وغريبة عن كابتن دبروسة (فرح سلطان)..سوف نكتب عنها في مساحات قادمة ان شاءالله. · امام النسور امس الاول قدم الهلال في الشوط الاول ..اداء مخجل. · بقينا نخاف على الهلال في الخرطوم. · هذا الاداء امام هلال كادوقلي يمكن ان يفقدنا اكتر من نقطة. · اعملوا حسابكم. · وجمهور الهلال نفسه ..مفروض يدعم الهلال ...بدلا من ان يكون الجمهور خصما على. · اي هتاف ضد اي لاعب في الهلال ..امر غير مقبول ..وشيء مرفوض. · الهلال مع هذا المستوى ...ومع هذا الحال ...هو متصدر الممتاز بوضعيته دي. · غارزيتو محق ...اذا اجلس تراوري في الاحتياطي. · تراوري يلعب باستهتار. · الكنبة افضل ليه. · غارزيتو كان متعصب ومتوتر جدا في مباراة الهلال امام النسور ...وهذا يؤكد خوف غارزيتو ...وهلاليته. · غارزيتو توتر الي الدرجة التى كان يلوك فيها في اصابعينو. · غارزيتو بقى هلالابي من الطراز الاول. · في الشوط التاني ...غارزيتو قلب المباراة. · سنكارا كان من افضل لاعبي الهلال في المباراة. · سنكارا يتميز بعكسيات جيدة ...دائما يسجل منها الهلال. · ساني لماذا هو متوتر الي هذا الحد. · ساني ربما يخشى الخروج من كشف الهلال ...لذلك هو متوتر. · كلتشي ..عازو حقو. · كلتشي هل ينتقل الي الاهلي شندي. · يا كلتشي ...تاني ما في زول بقدر يدفع ليك غير الاهلي شندي. · تاني ح تمشي لي صلاح ادريس. · وصلاح ادريس بي حالتك دي 100 دولار ما بدفعها ليك في الشهر. · الخرطوم لن يفقد امام المريخ. · لكن المهم ألا يفقد الهلال امام هلال كادوقلي. · البرير مطلوب منه ان يحدد موقفه بصورة قاطعة. · هذا الحال ..يتضرر منه الهلال. · تسجيلات يونيو اقتربت ...وهناك مطالبات والتزامات على الهلال. · الهلال بدون رئيس ممكن يكون في الخطر. · وممكن يتجمد نشاطه. · عاجل : الثلاثاء ...يوم للهلالاب فقط...اي هلالابي (نص) كدا ...يقعد في بيتو.