قالوا الصحافة طيرت (مدراء البنوك) من المريخ.. مدراء وإلا شيكات البطيروا في (24) ساعة ديل الصحافة في دول العالم المتقدمة ...جعلت (حكومات) تتدحرج ..وتسقط.
تلاشات حكومات كاملة بسبب (كلمة) اوردتها الصحافة ...جعلت سقوطها حتمي.
كشفت فساد ..وعرت امبراطوريات كانت مبنيّة من (الوهم)..والخداع والغش.
هذا دور الصحافة في العالم كلو ...(لو انتوا ما عاجبكم الكلام دا اعلموا ليكم كافتريات او منتزهات او حتى كوافير).
الصحافة اصلها كدا.
كم من وزير كبير ..استقال بسبب ما كشفته الصحافة عنه ، وما كتب فيه ...وكم من مسؤول (يهز ويرز) اقيل وقعد في بيته بسبب حملات صحفية عرضت فساده.
ديل عاوزين يعوّسوا في الارض فسادا ..وما عاوزين زول يقول ليهم حاجة...(زي كأنو فسادهم هذا بر وتقوى وخير).
يا عم روح ..(دا ما بتلقوه هنا).
الغلط غلط ...والصاح صاح ..وما اظن ان الصحافة قادرة على ان تحول (الصواب) الي (الخطأ)...كما انها تعجز تماما من ان تفعل العكس.
لكن الناس البيوتها من قزاز ..دائما ما تهتز ..وتتساقط ...وتخر على الارض ..اذا شعرت ساكت ان هناك (تلميح) يمكن ان يكونوا مقصودين به.
يرجفوا زي (القصب) في امشير.
النوم يطير من عينهم.
يا ربي بكرة الصحافة كاتبة عننا شنو؟.
يمشوا في الشارع ويتلفتوا ..ويقولوا يا ربي الزول دا قاصد شنو بي كلامو دا؟.
ما بستحملوا (كلمة)..متل (حلاوة) قطن ..سريع الذوبان.
الكلام ليك يا المنطط عينيك.
الصحافة لن تلعب بي اي حال من الاحوال دور (طيور الزينة)..لن تغرد وتزقزق ...كما تفعل (عصافير الخريف) في رائعة وردي التى كتبها اسحاق الحلنقي ...(احساس غلبني اتحملو).
انتوا وقت ما بتتحملوا حاجات زي دي ..البطلعكم من بيوتكم شنو؟.
قال لجنة تسيير قال.
هل مطلوب من الصحافة ان تسبح بحمد وشكر (مدراء بنوك) اعلن جزافا كدا انهم سوف يكونوا ضمن (لجنة تسيير) لقيادة المريخ.
عليك الله.
في رأسكم ريشة ..عشان الصحافة ما تكتب عنكم.
عاوزين تخشوا (لجنة التسيير) وتدفعوا من قروش البنوك ..وتعملوا اي حاجة في رأسكم ..وزول يسألكم مافي.
بالله.
انتوا ما تشوفوا شغلتكم..وتعاينوا للبلد ..(الكورة الفيها موسي الزومة وضفر دي ما بتودينا لي قدام).
عاوزين تكبوها لينا كلها لي ناس موسى ..وناس بلة.
وعاوزين شنو؟.
ما عاوزين اي زول يسألكم ..او يكتب عنكم.
شطار والله.
كملتوا (الشطارة) عديل ..وفوتوها بي غادي.
مدراء بنوك ..كنا نظنهم يمكن ان يكون دورهم في تعمير البلد ..واعمار دارفور في صندوق المانحين .. في بناء الشرق - في مساعدة اطفال السرطان ..بدلا من ان يترصوا لنا كدا في (لجنة تسيير)...عشان صورهم تملأ الجرايد ..وتصريحاتهم تغطي على كل الفضائيات.
تجوا من سبعة تقعدوا في المقصورة ..وتتفرجوا على هدف بلة جابر العكسي.
وعصام الحضري في مصر ..يسوي اي حاجة ...(الغلط والصاح)..يسوط البلد (سواطة) ..وما في زول فيكم قادر يقول ليه حاجة.
وقت الصحافة هنا تكتب بعض كلمات عنكم ( يا من في رؤوسكم بطحات) ..تزعلوا ..وتغضبوا ..وتقولوا ما دارين.
خلاص ما بنشتغل.
ما تشتغلوا ...(انتوا مطلعين حاجة من جيبكم).
مطلوب من الصحافة ان تتعامل مع اولئك (المدراء) الكبار ..بمجرد الاعلان عنهم في (لجنة تسيير) وهمية باحترام وتقدير ..بل بعطف وحنان ..يوازي تماما (حنية) الفنان محمد ميرغني (في عاطفة وحنان يا ناس).
عاملوهم زي (نباتات الزينة)..لا بستحملوا شمس ولا كتاحة ..ولا سخانة.
اقعدوا حولوا فيهم كدا من ضل لي ضل.
يا عم روح.
ديل جبتوهم لينا من وين ؟...لم يصمدوا (24) ساعة والصحافة تكتب عن تلك الاسماء الكبيرة التى ظهرت فجأة في (لجنة تسيير).
انت زعلان فوق كم؟....وعلى شنو؟...وليه؟..ومالك؟..والدخلك هنا ذاتو منو؟.
الوزير حسن بدوي في مؤتمر صحفي... اكرر في مؤتمر صحفي (وليس في قهوة او في شارع النيل)..مؤتمر صحفي عديل كدا قال : (أن ما كتب فى الصحافة فى الأيام الماضية والطريقة التى يتعامل بها الإعلام مع الأوضاع الرياضية هو السبب الرئيس فى إعتذار عدد من مدراء البنوك ورجال المال عن دخول لجنة التسيير وأنهم أعلنوا دعم المريخ من الخارج).
في ستين.
الكورة ذاتها البوظها شنو غير رجال المال.
الوزير قال الصحافة هي السبب ..(بدل ما يشكرها ..زعل منها).
طيب (ود الجنيد) يقول شنو؟.
الوزير دا الدولة بتصرف ليه مرتب وحوافز..وبتدي (3) عربات ..وبيت وتلفون ..و..و..
وبزعل عشان الصحافة كتبت عن مدراء البنوك.
طيب (ود الجنيد) يعمل شنو؟.
عاوز اعرف بس ..(اذا كان هناك وزير رسمي بزعل في انتقادات الصحافة وفي كتاباتها).
بزعل في شغل الصحافة وفي القيام بواجبها.
اي والله ...(على طريقة العمدة سيلمان غانم في مسلسل ليالي الحلمية)...الوزير زعلان.
ود الجنيد يعمل شنو؟.
يا عم روح بلا مدراء معاكم ...بلا كلام فارغ.
انتوا فاكرين البلد دي كلها ...(هلال مريخ).
فاكرنها (كورة) بس.
في حاجات اهم من هذه الاشياء ...(الكورة) دي في حد ذاتها (وسيلة) وليس (غاية).
لكن ديل عملوها (غاية).
عملوها (شغلة).
عاوزين يخلوا (بنوكهم)..ويصاقروا لينا ناس بلة جابر وضفر وموسى الزومة.
يخلوا شغلكم ..ويقعدوا يصرحوا في الجرايد.
خلوا هموم البلد الاصلية ..ومشاكله الاساسية ..وقبلوا على الهلال والمريخ.
جابوا وارغو قبل كدا بما يقرب من ال (3) مليون دولار ..ونفس هذا المبلغ صرفوه في (عصام الحضري) الذي يذل في المريخ الان ..ويمسح بكرامته الارض.
وعاوزين الصحافة ما تقول اي شيء ...تصفق لي جمال الوالي ..وتهتف ليه زي ما بهتفوا.
ما عاوزين فيه اي كلمة ..(ما بستحمل اي حرف).
يغنوا ليه ..يزعل - يرضوه ..يمشي البيت مبتعد ..ينتظروه لمن يرجع ..(بعد (6) شهور ..بعد سنة ..بعد الف سنة)...المهم متى ما يرجع بيلقى مكانتو فاضية.
زول في المريخ قادر يدق صدرو ويسد خانتو ما في.
جنسيات تمنح للاعبين عندهم وباء في الكبد ..وعندهم رأي في السودان ..وتجاوزوا الاربعين عاما.
تمنح لهم (الجنسية) قبل السودانيين بالميلاد.
من سلم المطار ..ينتظروهم بالجنسية والجواز والكاش.
وعاوزين الصحافة ما تقول اي حاجة.
ولا كلمة.
ما تقول اي شيء ..(تسكت ساي)..كأنها عضو في فرقة ندي القلعة او انصاف مدنى.
ولا حرف.
عاوزنها تهلل معهم وتكبر وترقص كمان!! ..واسماء (مدراء بنوك) كبيرة في البلد ..يرصوها لينا هكذا في (لجنة تسيير).
رصوها لينا زي (مسابقة رمضان).
عشان يعملوا شنو؟.
عشان يعملوا (الطابق الثالث).
هذا كل همهم.
هي البلد ناقصة ليها (طابق ثالث).
تفتكروا مشاكلنا كلها في الطابق والانارة والنجيلة وقروش عصام الحضري.
البلد بتغرق في (شبر موية)...وانتوا فرحانين .
وبتزعلوا كمان لمن الصحافة تكتب وتنتقد لجنة تسيير كلها (مدراء بنوك).
لجنة زي (المقاصة).
اي مدير بنك ساكت ..لو حصل مرة شاف مباراة لي برشلونة او اليوفي بالغلط كدا ..يجبوا ليك في (لجنة التسيير) دي.
ويقولوا ليه انت (خطير) في الكورة.
لو جاء فايت صدفة باستاد المريخ ..يقبضوه ويدخلوا لجنة التسيير.
وعاوزين شنو؟.
عاوزين الصحافة ما تتكلم ...وما تقول اي حاجة.
انتوا ما كنتوا تطلعوا (قرار) من مجلس الصحافة تقولوا فيه ما في زول يتكلم عن مدراء البنوك.
ولا مدير ..ما تجيبوا سيرتو.
افتكر الحكاية دي ما كان بتغلبكم.
الشيء المضحك ان الوزير ذاتو زعلان.
عليك الله انت المزعلك شنو؟.
لو سألنك سؤال ..البزعلك شنو؟..بتقول شنو؟.
بتفسرها لينا كيف؟.
كدا ورينا ..يمكن نلقى ليك سبب ..ومنطق.
يمكن نعذرك في (زعلك) هذا.
ما يزعلوا ان زعلوا ..ان شاءالله يطرشقوا ...الباب يفوت جمل.
البلد كلها (زعلانة)...ما اشتغلت بيها.
جيت هسع تزعل عشان (3) مدراء بنوك زعلوا.
البلد قاطعة (غاز)..ما زعلت.
تزعل هسع عشان (3) مدراء زعلانين.
الشعب دا ..اصلو ما بهمك.
نموت نحن يعني.
تصوروا بعد دا كلو - عاوزننا كمان نقعد نحنس معاهم ..ونغني ليهم اغنية ايهاب توفيق (تترجي فيّ)..كما يفعلون هم.
ديل جبتوهم من وين؟....البزعلوا من اول يوم ديل.
جنسهم شنو؟.
ناس زينا كدا ..وإلا من استراليا.
الشغل دا شغل (روس)..يتخيل لي كدا.
عايشين وين الجماعة (الزعلتية) ديل ؟...الما قدروا يستحملوا انتقادات وكتابات في الصحافة.
ديل عاوزين بيهم شنو؟..وهم (24) ساعة لم يصمدوا امام اقلام وكتابات صحفية.
والله مفروض تحمدوا الصحافة ..التى انقذتكم من الناس (الهشين) ديل.
سريعين الذوبان...زي (الجلي).
كانوا سيضيعون المريخ ...اكتر من ضياعه هذا ..لأنهم لا قدرة لهم ولا رغبة ..ولم يستحملوا حتى مجرد (كلمات) كتبت عنهم.
الجماعة ديل وقت بلة جابر يجيب ليه هدف عكسي في شبكتو بمشوا وين؟.
بتصرفوا كيف؟.
وكلمات ساكت ما قادرين يستحملوها.
معقولة في ناس (حساسين) كدا في السودان ..اكيد ديل ما عاشوا معانا في البلد دي.
اكيد عايشين في عالم تاني ..وان كانوا يسكنون في ام درمان او الخرطوم او بحري.
ديل ما جايبين خبر..وما عارفين شيء ..زعلوا واعتذروا عشان الكتابات التى كتبت عنهم.
لا بالله.
خلاص معليش.
بنعمل ليكم (يوم مفتوح).
او بنعمل ليكم (يوم ترفيهي) ..البدعة التى اخترعتها دائرة الكرة في الهلال بان يكون هناك يوم ترفيهي كل ما يفقد الهلال (نقطيتن).
نفقد نقطيتن ..يطلعوا (يوم ترفيهي).
كأن الخروج ب (نقطة) والعودة بها (انجاز)...يستحق (يوم ترفيهي).
الطريف في الامر ان دائرة الكورة كل ما الهلال يخسر (نقطيتن) ..يقولوا عاوزين نطلعهم من حالة (الاحباط) تلك ...عشان كدا بنعمل ليهم (يوم ترفيهي).
يطلعوا من (الاحباط) باليوم الترفيهي ...اول مباراة بعد (اليوم الترفيهي)..يرجعوا تاني للاحباط.
طيب انتوا مطلعنهم ليه؟..وقت برجعوا اليوم التاني طوالي.
خسارة (يوم ترفيهي) ساكت.
لمّوا (ايامكم الترفهية) عليكم...وما تبحطونا اكتر من كدا.
ختاما للنقطة دي نقول ان كلام (الوزير)..والذي اعترف فيه (مشكوار) بان الصحافة هى السبب في (طفيش) مدراء البنوك ..اثبت لنا واكد ان الصحافة في السودان بي خير.
وانها الي وقتنا هذا (قوية)..وقادرة ان تتطيح بي (لجنة تسيير) حتى قبل الاعلان عنها رسميا.
على الوزير ان يبحث عن (لجنة تسيير) جديدة ...ان شاءالله يتمها (صينيين) من شارع عبيد ختم ..او من اقرب شركة بترول.
دي ما بتخصنا.
الشيء البخصنا ...ما عاوزين لينا (مدير) بنك في لجنة تسيير.
ولا مدير قسم.
الكلام دا ..واضح وما عاوزين نعيدوا تاني.
ملحوظة : كمان قال زعلان.
هوامش
الهلال سوف يلعب منتصف هذا الاسبوع امام الاهلي مدني في الخرطوم.
