الباشا (قرحة)..الحضري (امه عيانة)...العجب (قافل تلفونو) • ساعة ونص انا قاعد اشاهد في المباراة ...بفتش للمريخ دا (فتيّش)..وين الجماعة ديل؟. • يكونوا مشوا (الدهب). بلة جابر جهجهتكم دي ما بقدر عليها ..قالوا (عدسكم) قدحة توم بقيتوا ما بتعملوها ليه. • والعدس بدون (قدحة) لا بتأكل ولا حاجة. • ما تخموا الناس ساكت ب (الدكوة) والليمون والبصل. • الوصيف وين ؟..بفتش ليه في المباراة زي الحاجة السمحة؟...وما شايف غير نزار حامد (الصاعقة) والغول تراوري ..وايكانغا. • وين ناس موسي الزومة؟. • موسي ما لاعب ...طيب (راجي عبدالعاطي) برضو ما لاعب...هيثم في ما في ...ما عارف. • الحالة واحدة. • في ..ما في واحد. • اتذكرت شفتو في البداية قبل انطلاقة المباراة مع الحكم وعمر بخيت. • ومرتضى كبير دا شنو؟ ..لاعب وإلا رجل راية ..قدر ما اعاين ليه ..القي نزار الصاعقة يجي فايت فيه. • شوووووووووووووو. • تقول حارس ليه (شاي في النار). • مرتضى كبير دا نازل الملعب بالسالب ..بالداون. • شنو يا مرتضى ..نزار حامد بجي يفوت منك بالشكل دا. • انت مالك (تقيل) كدا ؟..شايل ليك شوال ملح. • قاطع عديل كدا انت يا مرتضى. • لو ما ثقتي كبيرة في تلفزيونا ..كنت قلت في زول ثبت الصورة. • ثبت مرتضي ..وخلى نزار حامد يفوت. • غايتو يا مرتضى كبير ...الكوكي دا عمل فيك عملية ما كويسة ...(قالوا لي وقتنا هذا مرتضى واقف في الزير يشرب). • تاني يا مرتضى الكوكي (الغتيت) دا ، لو قال ليك تلعب مدافع قول ليه : (عندي مغص). • قول ليه اي حاجة. • اتصرف بس. • اوعك تلعب ...بالطريقة دي بيشطوبك. • الجماعة ديل في التسجيلات ، خبطونا ليك (نقة)...نقة ساي..عصام الحاج ما خلى ليه (قناة)..من النيل الازرق لقناة الشروق .. يوم الجمعة بمشي (التلفزيون القومي)..الخميس والاربعاء (قوون)..والثلاثاء قناة النيلين ..نحن سجلنا ..ونحن عملنا ..وهيثم مصطفى لاعب كبير ..وعلاءالدين فييرا ...اصلا هو لاعب المريخ ..ومونزا ..(شنو كدا ما عارف؟). • والمريخ كان بس بفتقد للقائد. • اها هسع بقى عندكم 11 (قائد)..ورونوا شطارتكم. • وجرايد المريخ ..شغالة ردح ...(المريخ بقى كل كباتن)..والمريخ فيه اكتر من نجم سوبر. • والموسم دا موسم الخبت. • وناس (النسور) يشيلوا ويصدقوا ..ونحن عارفين الكلام دا كلام (جرايد) ساكت. • نحن متعودين على الحاجات دي ..كل سنة بقولوا نفس الكلام. • الموسم يبدأ ...( يا مولاي كما خلقتني). • والله لو دا فريقكم ...احسن من هسع توقفوا خدمة اخبار المريخ على الجوال. • اخباركم يعملوا بيها شنو؟...وهى كلها (مصائب) على هذا الشكل ..العجب ما سافر ..والحضري يغادر للقاهرة ..والباشا اعتذر من مرافقة الفريق. • هسع عليكم الله دي (خدمة) الزول يدفع فيها قرش واحد. • انتوا موش ناس المريخ ديل كانوا معسكرين في (تونس) واحد وعشرين يوم. • في تونس دي ..دحين اعلام المريخ (السالب)...موش كان بكتب عن تألق (مونزا)..وعن ثنائية منونزا مع هيثم مصطفى ..وعن اهداف مونزا. • والتفاهم ..والتجانس ...وانا يا طير محل ما تطير بشوفك. • موش قالوا المريخ لعب مباريات ودية بمثابة تجارب حقيقية ..والكوكي قال نفذنا الاعداد ىصورة علمية ..وما عندنا اي مشكلة. • موش قلتوا جاهزين. • انتوا ما طالبني (حليفة)..لكن مونزا دا لمن طلع من الميدان..انا افتكرتو جاء يعمل دعاية لمرقة الدجاج ويتخارج. • اعتبرتو من الناس البدخلوا الملعب ويرفعوا شعار (اللعب النظيف) ، ويطلعوا قبل المباراة ما تبدأ. • زول ما عندو اي علاقة بالكورة ...زي الزول البتقول ليه : ( قرش ما عندي)..يقول ليك ..اديك بندول. • والله يا مونزا ..لو ما (شعرك) دا ..كنا رجعناك ورا. • لعبك دا لعب (باكات) ، ما تغوشونا ساكت يا جماعة ...نحن كمان لعب الباكات من لعب المهاجمين ما بنعرفو. • مونزا دا يا عصام الحاج ..هسع بتصرفوا ليه (مرتب)..ولا قاعد على (بطنو). • الممرض وقت الدكتور يكون مافي ..بعمل فيها هو ذاتو (دكتور) ..تلفونو ما برد عليه. • مونزا لقى المريخ خلا ..عمل فيها (مهاجم). • دا ما المريخ البنعرفو. • المريخ وين يا جماعة؟. • روحّتوا المريخ فين؟. • ضيّعتو المريخ ليه؟. • فين المريخ يا عصام الحاج؟. • احنا عاوزين المريخ. • انا عاوز (خراراية) واحدة بس. • يا عصام الحاج ..نحن هلالاب ..والمريخ بنعرفو كويس ..(وصيفنا) وما في زول بغالطنا فيه. • والله دا لا مريخ ..ولا حاجة. • هسع وصيف الهلال بقى هلال كادوقلي. • ناس كادوقلي ديل لا عندهم مقصورة لا مونزا ..لا هيثم مصطفى. • حاجاتكم دي مريخ الفاشر ما بعملها. • مريخ بورتسودان النزل من الممتاز ...ما بيلعب بالمستوى الباهت دا. • المريخ الشفناه دا (ألسنة) ساكت. • شوية جرايد ...على شوية حكام ...على شوية (جلكسات). • حليل زمن (الشغيل)...الحكم في النص لو ما كان لابس اسود ما بمر. • حكم ما بفوت فيه. • كمان الشغيل بيلعب. • الشغيل دا زي بكري المدينة ..قالوا دافن ليه (مطوة) في السنتر. • تكتر ..تجنن بيبعجك. • تعال شوف نص المريخ هسع ...ناس امير ورمضان عجب ..(حنكشة) ..وتمليّس في الكورة ..تقول قاعدين في صالون حلاقة منتظرين دورهم. • دي شنو يا امير كمال (الحنكشة) البتعمل فيها دي؟. • نصكم بقى زي صالون الحلاقة ...(حلاقات) ساكت. • غايتو (كورة) ليهم ..ما شايفه. • علاءالدين يوسف ذاتو ..القلنا كويس ..نزار حامد عمل فيه عملية ..موش تشطبو من الهلال...لو كان اتعلمت ليه وهو بيلعب في (ام بدة) كان بتشطبو. • يا فييرا ..اقيف قبلك ...كورتك الصلحناها ليك ..عليك الله ما تخربها. • احسن اقيف على كدا. • شنو كل ما نصلح ...ناس عصام الحاج ديل يخربوا؟. • بعدين انا مصر على حكاية (فين المريخ)؟. • المريخ بقى كل (هلالاب). • ولاد المريخ الحقيقين قاعدين في الكنبة. • ناس العجب يتاوقوا من (الكنبة) ..زي الزول اللاحق ليه (بنك) قبل ما يقفل عليه. • كابتن المريخ هيثم مصطفى ..وكابتن الهلال طبعا معروف عمر بخيت. • ديل غير انهم (هلالاب)...ولعبوا مع بعض سنوات طويلة ...هم (نسائب). • نسائب عديل كدا يا عصام الحاج ...(الكورة خلوها). • بقيتوا تفرقوا بين الاهل كمان. • هيثم وعمر ...والباشا ..وعلاءالدين يوسف ...اي زول قاعد في المباراة دي اعتبرها (تقسيمة). • مننا وفينا. • انتوا وين طيب؟. • والله المباراة كلها ..نحن كنا لاعبين ضد عصام الحضري ..لا شفنا بلة لا موسي لا نجم الدين لا ضفر لا امير كمال لا رمضان عجب. • مرة ..مرة كدا بنشوف هيثم مصطفى. • ومرة الباشا ..ومرة فييرا ..وديل اولادنا. • لو سألناكم ..سؤال ..انتوا عندكم شنو هسع في المريخ دا. • المؤتمر الوطني عندو نص ...والهلال عندو نص. • نص جابوا المؤتمر الوطني ..ونص جابوا الهلال. • (طابق شاخور) محجوز عليه. • وروني بس ..عندكم شنو؟. • لا انا الحكاية دي مُصر عليها. • ممكن المريخ دا كلو تطلعوا منو بي (4) كراسي. • بالكتير كدا ...ممكن نصل معاكم لغاية (7) كراسي. • تاني ما عندكم اي حاجة في المريخ. • تاني ما عندكم الحبة. • اكرم الهادي سليم (الهلال). • الباشا (الهلال). • كلتشي (الهلال). • هيثم مصطفى (الهلال). • علاءالدين يوسف (الهلال). • جمال الوالي (الهلال)...وبرضو (مؤتمر الوطني). • ابوالعائلة (الهلال). • مجاهد ، هيثم طمبل ، ريتشارد ، علاءالدين بابكر (الهلال). • الي اخره...الي اخره ...الي اخره ...كلو (الهلال). • باسكال (المؤتمر الوطني). • عصام الحضري (المؤتمر الوطني). • مونزا (المؤتمر الوطني). • ضفر (المؤتمر الوطني). • المقصورة (المؤتمر الوطني). • النجيلة بي ديدانها (المؤتمر الوطني). • مجلسكم (مؤتمر وطني). • جمهروكم دا ذاتو (مؤتمر وطني). • اها بعد كدا ..(الفاضل) شنو في المريخ؟. • ما تقولوا لي (الفاضل) ابوشنب. • موش 7 كراسي. • ما تقعدوا تنظروا فينا ساكت. • 7 كراسي عاملين لينا فيها كل الجوطة دي ..جرايد ..ومواقع في النت ..ومنتديات. • الشيء الغريب ...والجديد في المريخ الايامات دي في موضة (زعلة) حاصلة في المريخ. • هيثم مصطفى من مشي المريخ (الزعل) كتر. • بقى اليوم والتاني في واحد زعلان من المريخ. • اول ما اتسجل هيثم مصطفى في المريخ ...عبدالله حسن عيسي (نائب الرئيس) زعل وشال (شنطتو) ومشى بيت ابوه. • في نائب رئيس بزعل. • قال لا نائب رئيس ...لا عاوز معاكم. • موضوع عبدالله حسن عيسي انتهى ..لكن متوكل احمد علي قالوا الي الان (زعلان). • متوكل طبعا ..زعلو وعدم زعلو واحد ...في الحالتين ما بدفع. • بعد الزعل الاداري دا ..انتقل الزعل للاعبين. • اول (زعلة) حصلت ...قبل مباراة القمة كانت (زعلة) اكرم الهادي سليم. • الزعلان كلمو. • اليشيل شنطتو ...ويمشي البيت. • اكرم الهادي سليم ...زعل وشال (شنطتو) من المعسكر ..ومشي بيت ابوه. • شفتوا حكاية ( يا هو يا بيت ابوي) دي في المريخ كترت كترة. • نحن ما بتكلم ساكت. • نحن اي حاجة عندنا بي نظام. • اكرن قال كيف يجيبوا لي الحضري من القاهرة ..ويلعبوه مباراة القمة. • من المطار للملعب. • انت يا اكرم جنيت...الحضري دا من مطارو ادوه (الجنسية السودانية). • زول منحو الجنسية السودانية ...ما يمنحوه المشاركة اساسا في المريخ. • بعدين يا اكرم ...الحضري دا في المنتخب المصري برفض الجلوس في الكنبة ..عاوزو يقعد ليك في المريخ (كنبة). • انت قايلو (فيصل العجب). • الزول دا ما برضى. • الزعلة الثالثة ..زعلة فيصل العجب ...(انتوا الزول دا موش قلتوا ما بيزعل). • اها زعل. • طلع بعرف يزعل برضو. • فيصل العجب بقينا نشوفو قاعد في (الكنبة) الزعل عاوز يشقو. • الغريبة عامل فيها ما زعلان. • في زول ما زعلان بقفل تلفونو. • ما قلت انا زول (مثالي)...ما عندي اي مشكلة ...وكمان ممكن ألبس هيثم مصطفى (شارة) الكابتنية. • وانتي يا عيني (الزعل) كاتلك. • قبل كدا قلت ليك زعلك ظاهر في عيون احمد الباشا. • وناس بلة جابر وموسي الزومة ...الموضوع بتاع (كنبة) العجب دا ما عاجبهم. • ولا داخلين ليهم في رأسهم. • العجب انفجر اخيرا ..ورفض يسافر مع المريخ الي (انغولا). • وفوق دا ..العجب ..(قفل) تلفونو واختفى من الانظار. • ناس عصام الحاج بقوا ما لاقين العجب في عضمو. • عشان كدا المريخ ح يكون عنده مشكلة عويصة في انغولا. • كنبة المريخ في انغولا ح تفتقد العجب. • والله يا ناس المريخ ..كنبتكم دي في انغولا ..إلا تموها بي سواق الحافلة البجيبكم الملعب. • العجب دا كان في الكنبة بملأ خانتين. • يقعد ويشمر ...(متابع اي شيء). • يتلفت متل سواق القندران. • العجب كابتن المريخ ..والزول المثالي هسع (ققل تلفونو). • فاض بيه عديل كدا ..وانفجر. • والعجب دا لو انفجر ...بتنفجر معاه الشلة كلها ..بلة وموسي والباشا وضفر ومصعب عمر وكلتشي. • وان جينا للجد ..العجب ليه حق (يزعل). • كيف ما يزعل ..وهو بقعدوه في (الكنبة) كدا ..زيو وزي (بلة جابر). • دي بلة جابر ما بقلبها. • بلة لو قعدتوه في (بوفيه مفتوح) ...ما بقعد ليكم. • الزعلة الحارة ...وسخنة ...زعلة احمد الباشا. • احمد الباشا ..اصلو من يومو زعلان ..وموضوع هيثم مصطفى دا ما مقتنع بيه. • الباشا زمان كان بفوز بنجومية المباراة. • هسع بقوا يطلعوه ليك من بداية الشوط التاني. • الباشا دا ما بستحمل الحاجات دي ولا بقبل بيها. • الزول دا مرة زعل مرقها لي ليبيا. • هسع مع زعلتو دي ...ما بقعد ليكم. • ولا تغشوا نفسكم ساكت. • خاصة وان احمد الباشا بعتقد ان هيثم مصطفى شطبه من الهلال...عنده الاحساس دا. • لذلك ...هو (متخندق) مع العجب في (كنبة) واحدة. • احمد الباشا من زعل جاتو (قرحة). • والقرحة دي بتجيبها حاجتين. • يا الجوع الشديد ...يا الزعل الشديد. • اها انت شوف ...واختار الخيار البريحك. • جوع وإلا زعل يا كابتن؟. • الجوع مسؤول منو عصام الحاج. • الزعل ..هيثم مصطفى. • التقشف الحاصل في المريخ ...ما بعتقد انه وصل مرحلة (الجوع). • لذلك نحن نستبعد حكاية (الجوع) دي. • ونرجح كفة ان قرحتك دي سببها (زعلة). • وزعلة شديدة كمان. • زعلة قوية . • الزعل النص نص دا لا بجيب ليه (قرحة) ولا حاجة. • يعني زعل موسي ..وزعل بلة جابر ما برقى لمرحلة (القرحة). • لكن زعل (الباشا) قرحة عديل. • العجب اعتذر من السفر ..وقفل تلفونو ..وما اعتذر. • يعتذر لي منو؟...وعشان شنو؟. • الباشا ...قال عندو (قرحة) ..ولم يسافر مع المريخ الي انغولا. • الحضري قال امو عيانة. • شفت يا الحضري...نحن الحركات دي عارفنها. • حافظنها ...حفظ. • اسأل منها بابكر سلك. • شفت زمان كان عندنا محترف اسمو (سادومبا). • اكرم الهادي سليم وبابكر سلك ..بعرفوه كويس. • سادومبا دا كان من يكون عاوز قروش ...ومجلس الهلال ما يديه قروشو ومرتباته ..كان بقول (امي عيانة). • في موسم كدا ..كلو عملوا لينا (امي عيانة). • مشينا الحسابات لقينا ليك الزول طالب الهلال قروش كتيرة ...(سلك شاهد على الكلام). • هسع انت يا الحضري ..عمليتك دي ..واضحة وظاهرة. • انت عاوز ليك (قروش) ساكت. • امي عيانة دي ..يعني عاوز قروشي. • بس ان شاءالله عصام الحاج مع (التقشف) دا يفهم ليك الحتة دي. • عصام الحاج ...(غتيت) ما بستوعب ليك الحكاية دي. • بعمل ليك فيها ما عارف اي شيء. • سلك ذاتو يمكن ينكرك. • الغريبة المريخ سافر الي انغولا بي حارس واحد هو (يس)..الحضري في (القاهرة) واكرم الهادي سليم في (الخرطوم). • يس دا لمن يكون في الكنبة (باسكال) بعملها كلها (مزلقانات). • هسع الزول دا يمكن يكون اساسي في مباراة انغولا ..واحتمال الاحتياطي حقو يكون (ضفر). • باختصار كدا ...حالتكم (صعبة) شديد بقت. • لكن لو قعدتو مع هيثم مصطفى ...ممكن يحل ليكم المشكلة دي. • هيثم بي خبرتو ممكن يقيف ليكم (حارس). • اصلو جاكم حلال مشاكل. • ملحوظة : هيثم دا يا فرتكم ..يا فرتك الهلال..ينجح معاكم بفرتك الهلال ..يفشل بفرتكم ..وشكلو كدا هسع فرتكتكم دخلت الفصل الثاني. هوامش • عمار تلودي ..قال لي ناس امريكا يمكن يدخلونا في (حص بيص). • ويمكن يقولوا في تعاون نووي بين السودان وايران. • وناس حماس ذاتهم ممكن يتكلموا. • قلت ليه ...عشان شنو؟. • نحن شن عملنا. • قال لي الصواريخ البطلق فيها مهند الطاهر وترواري ..ما صواريخ نصاح. • بالمناسبة انا ما شايف الخضري اتألق ..لأن كل تهديفات الهلال وتصويباته كانت من مسافات بعيدة. • مهند الطاهر كان بشوت من نص الملعب. • تراوري من سقط لقط. • حتى سانيه هدف من مسافة بعيدة. • وزي ما قال الحيدوسي مهند الطاهر كان يكون خلف المهاجمين مباشرة. • كان الحضري فهم حاجة. • هذا لا يعني ان الحضري لم ينقذ المريخ. • فقد كان المريخ كلو (الحضري). • بعد الصواريخ التى استقبلها الحضري ...لا بد للحارس المصري العجوز ان يأخذ ليه (اجازة) شوية. • عاوز ليه على الاقل اسبوع ..عشان تركيزو يرجع. • اول مرة اشوف الحضري متعادل وبضيّع في الزمن. • في جرسة اكتر من كدا. • مهند الطاهر لعب بمزاج ...وامتع كل الجمهور بما في ذلك جمهور الوصيف. • متعة حقيقية. • في اعتقادي ان النجم الحقيقي للمباراة هو الصاعقة نزار حامد. • الصاقعة وصل المرمي مرتين ..وكاد ان يسجل ...لكن الحظ لم يصاحبه. • نزار حامد عمل اي حاجة في الكورة. • ترواري لعب بالقدم ..ولعب بالرأس ..وحركة ومهارة ..وتصويب ..وقوة. • ترواري دا اي ميزة في كرة القدم جيدة عنده. • مهاجم مكتمل. • اتخيلوا ..سيدي بيه مع تراوري. • ما في اجمل من كدا. • غارزيتو في كل يوم يثبت انه صاح. • يا البرير الجماعة ديل ادفع ليهم بس ..ما تخليهم محتاجين لي حاجة ...بنمشي السما. • الكوكي قال ببني في فريق. • بتنبي في فريق اعمار لاعبيه تجاوزت الاربعين يا الكوكي. • العجب القاعد جنبك في الكنبة دي ...قدرك. • بناية شنو يا زول انت قايل نفسك في الاهلي شندي لسع. • قلنا ليكم الكوكي دا اصغر من (الوصيف). • عفوا اصغر من وصيف الوصيف. • وصيف الهلال الان هو هلال كادوقلي. • الاهلة دوما في المقدمة. • قرحة الباشا ...قالوا زي حصوة اكرم. • مع (الصواريخ) دي ...الله اعلم الحضري يرجع. • يا احمد الحاج ...خت الصور البتريحك انت وعمر بشاشة ...ان شاءالله تجيبوا صورة (احمد بدير). • عاجل : يا مهند تصويبتك المن النص دي ...مفروض تقلب فيها (هوبة) عديل كدا ..والله بتستحق الهوبة.
