لو قلت ليكم من باب (المكايدة) ساكت ..والكلام دا جد يا جماعة الروائي الاميركي (فليب روث) قرر اعتزال (الكتابة) بعد أن بلغ سن التمانين ..وقد أعلن (فليب روث) ذلك بعد أن أصدر آخر رواياته (نيميسيس) (Nemesis). شفتوا الناس برة كيف؟...هنا الجماعة يكنكشوا في الشيء ...لمن تجيب الدم.
ح تقولوا لي نحن مالنا ومالو؟...شوف لينا (بلة جابر) دا ...(فليب) خليه هسع.
فليب دا ود عمة (محمد الطيب).
ما فايقين ليه.
بمناسبة ما (فايقين) دي.
عندنا زول في الحلة اكتر زول (فايق) في العالم ...ما عندو أي شغلة.
نظام (ما تشيلي هم) بس.
شحن الموبايل بعملوا موضوع ...الساعة اليقولك عاوز اشحن موبايلو ...تقول ح يشحنو من (ميناء بورتسودان)..تشعر أن الزول دا بتعب جنس (تعب) في شحن موبايلو ..زي كأنو بشحن فيه (اسمنت).
انت بتشحنو من جيبك.
زولكم (الما فايق دا) اليوم كلو واقف (برة الباب).
لو مرت فيه (جدادة) بقعد يعلق عليها ..انت (جدادة) ناس فاطمة ديل مالها ضعفت كدا.
ولاَّ (الجدادة) دي مالها (اتزعمطت) كدا.
الزمن قلب عليها ولاَّ شنو؟.
والله (زمني الخائن) عديل كدا.
بس دي شغلتو ..شغال (معلاقاتي) على الأشياء.
الحاجة الوحيدة البعملها الساعة تسعة ونصف ..بجي شايل (جك) الفول يشيل ليه فول ب (2) جنيه ويرجع.
وكل يوم بقول لي سيد الفول : (فولكم بقى موية ساكت)...والله مفروض تضموه بعد كدا لي (فاتورة الكهرباء).
(عامل كيف )..شايل جكو ..ولابس ليه (فانلة) اظنها دخلت البلد دي مع (السكة الحديد).
مع الفانلة لابس ليه (برمودة)...تحلف تقول من فيضانات 1987 ما شافت ليها (موية).
الزول (الفايق) دا ...لو قلت ليه أي حاجة ...نمشي السوق ..نمشي نعزي ...نمشي المستشفى ...يقول ليك : (والله أنا ما فايق).
تسمع ما فايق دي ..تقول الزول دا يا ربي مامون حميدة ...ولاَّ عمر محمد خالد.
ما فايق قال.
ما عندو وقت.
يا ود الناس ..موضوع انك تشيل (جك) الفول الساعة تسعة ونص عشان تجيب ليك فول ب (2) جنيه ...دا ما موضوع.
ولا محتاج انك تلغي كل مواعيدك ووقتك ..عشان تتفرغ (للفولنة) دي.
بعدين (الجك) الاخضر دا غيرو عليك الله ..حايم بيه كدا زي (حكم الراية).
يكمل اللاين..وما بعكس ..موسى الزومة بس.
خلوه دا هسع.
لو قلت ليكم فيرغسون (ساب البلد) اقصد يوناتيد بعد أن أمضى 26 عاماً ونصف مع مانشستر يونايتد وقاده إلى الفوز بلقب الدوري المحلي 13 مرة، آخرها هذا الموسم..قرر يعتزل التدريب.
ح تقولوا شنو؟.
ح تقولوا لي ما يعتذر ان اعتذر ..نحن مالنا.
هسع الحركة دي (الفاتح النقر) بعملها.
خلي الفاتح النقر.
أحمد عبدالله ...سيد سيلم بعملوها.
الغريبة فيرغسون قال اعتزل التدريب عشان (زوجتو)...شفتوا (الحنين) دا كيف؟.
منطق والله.
يمين هنا (مدرب) يقول خلى الكورة عشان (زوجتو) إلا ناس بابكر سلك يقطعو ليك (قطيع).
يقولوا ليه (لهيب الشوق) البتعمل فيه دا شنو؟.
ناس (سلك) ما برحمو.
شوف الزول الما عندو شخصية دا.
هى (الزوجة) هنا في السودان بخلوا ليها (البيت)...ما بخلوا ليها (التدريب).
(خلي بالك) هنا الكلام دا نحن ما عندنا.
الناس هنا عاوزين إعادة ترتيب للأمور.
شفتوا (الاخلاص) عن فيرغسون كيف؟.
يعني كورة وفهم ..نحن أول مرة كنا فاكرنها (كورة) بس.
فيرغسون في حديث مع التلفزيون الرسمي ليونايتد قال »زوجتي، كاثي، كانت السبب. لقد فقدت شقيقتها في اكتوبر الماضي وأصبحت منعزلة كثيرًا. كانت رأس الأسرة، ضحت بنفسها من أجلي ومن أجل أبنائنا الثلاثة وأحفادنا الذين يحبونها لدرجة الجنون. كان لابد أن يأتي اليوم الذي أطوي فيه هذا الكتاب«.
يا ولد أنت ...فيلم هندي بس.
شفتوا الكلام دا كيف ...يعني فيرغسون دا ما حقق الانجازات دي ساكت ...هو رجل رائع ...ومخلص ..ومن يملك ذلك الشعور والاحساس لا بد أن ينجح في المجال الذي يعمل فيه.
سوف يبقى فيرغسون (في بالي)..وفي بال كل الناس كمان ..لأنه صنع تاريخ يصعب أن يصنعه مدرب غيره.
أنا الكلام دا كلو ما عندي بيه قضية ...ما شغال بيه الشغلة ..زي الزول البشيل (جكو) الساعة تسعة ونص صباحاً ويمشي على دكان الفول.
عبدالسميع في طريق كدا ...سمع أن لجنة التسيير بتاعة المريخ دي فيها عضو بتاع شركة بريد.
بتاع جوابات.
قال أحسن يغشاهم....يمكن يكون عندو (جواب للبلد).
مشى عليهم ...لقى ليك المدير قاعد ..قال اسمع هنا ..أنا زمان في الأسبوع بتجيني (4) جوابات ..هسع في السنة كلها ما بجيني (جواب) واحد.
كمان (الجوابات) دخلتوا عليها.
حركاتكم دي ما بتنفع معاي.
انتوا الشركة دي مسكتوها (موسى الزومة) ولاَّ شنو؟.
عبدالسميع طلع من الشركة بعد أن دور في رأسو حكاية (اكتبي لي) دي ..عشان يذل ليك الجماعة ديل.
عبدالسميع دخل على عيالو بي (فرختو)...الشفع طلعوها ليك من (الكيس) يا الله ...لاصقة في الكيس لصق ..زي (اللبانة).
المرا شالت (الفرخة)..ووضعت ليك في النار ..وعملت الفرخة (سبب الريد)...بعد ما عملوا الشفع ( يا مفرحة).
عليكم الله دي (فرخة)..ولاًّ لوتري.
المرا جابتها ليهم محمره ...العائلة كلها عملت (على النجيلة جلسنا)...عبدالسميع ضرب ليك الفرخة دي عضم عضم ما خلى فيها حاجة نزلك فيها (الحجل بالرجل)...لمن شطبت.
الموضوع انتهى على كدا.
أوعكم كمان تكونوا منتظرين ليكم حاجة من (الفرخة) دي.
